《巴克禮普世版聖經（試讀本）》

 | | | 轉寄

巴克禮普世版（試讀本） 提摩太前書第一章

作者 巴克禮普世版小組 2016.02.07

1 Góa sī Pó-lô, góa hōng lán ê kiù-chú Siōng-Chú kah hō͘ lán ū ǹg-bāng ê Ki-tok Iâ-so͘ ê bēng-lēng lâi chò Ki-tok Iâ-so͘ ê sù-tô͘, 2 siá phoe kià hō͘ Thê-mô͘-thài, chiū-sī tī sìn-gióng-siōng chò góa chin ê kiáⁿ-jî. Goān Thiⁿ-Pē Siōng-Chú kah lán ê Chú Ki-tok Iâ-so͘ siúⁿ-sù lí un-tián, liân-bín kah pêng-an.

Khiàn-chek Hi-ké ê Kàu-gī
3 Góa khì Má-kî-tùn ê sî ū khǹg lí tio̍h lâu tòa Í-hut-só͘, thang bēng-lēng chi̍t-kóa lâng m̄-thang thoân pa̍t-chióng ê kàu-gī, 4 mā m̄-thang thiaⁿ hiah-ê bô-iáⁿ bô-chiah-ê thoân-soat kah lò-lò-tn̂g ê cho̍k-phó͘, in-ūi chiah-ê tāi-chì ē ín-khí cheng-lūn, tùi ēng sìn-sim lâi liáu-kái Siōng-Chú ê kè-ōe ê lâng bô lī-ek. 5 Chit-ê bēng-lēng ê bo̍k-tek sī beh tit-tio̍h thiàⁿ-sim. Chit-ê thiàⁿ-sim sī tùi chheng-khì ê sim, chheng-pe̍k ê liông-sim kah sûn-chin ê sìn-sim só͘ sán-seng-.ê. 6 Ū-lâng phian-lī chiah-ê tāi-chì, tian-tò tī hi-ké ê tâm-lūn tiong sit-bê. 7 In liân ka-kī ê chú-tiuⁿ to kóng bē chheng-chhó, koh siūⁿ-beh chò lu̍t-hoat kàu-su. 8 Lán chai, lâng nā ha̍p-hoat lâi ūn-iōng lu̍t-hoat, lu̍t-hoat sī hó. 9 Lán mā chai, lu̍t-hoat ê siat-li̍p m̄-sī ūi-tio̍h chèng-ti̍t ê lâng, sī ūi-tio̍h hiah-ê put-hoat kah bô sūn-ho̍k, bô kèng-khiân kah hoān-chōe, bô sèng-kiat kah chho͘-sio̍k, phah-sí pē-bú, thâi-sí lâng, 10 îm-loān, hò͘ⁿ lâm-sek, bé-bē cha-bó͘-gín-á, kóng pe̍h-chha̍t, lām-sám chiù-chōa, á-sī ûi-hoán kiān-choân kàu-gī téng-téng ê lâng lâi chè-tēng-.ê. 11 Chit-ê kiān-choân ê kàu-gī sī chiàu lán tio̍h o-ló ê Hit-ūi Siōng-Chú só͘ kau-thok góa hit-ê êng-kng ê hok-im.

Kám-siā Siōng-Chú ê Liân-bín
12 Góa kám-siā hō͘ góa ū khùi-la̍t ê, chiū-sī lán ê Chú Ki-tok Iâ-so͘, in-ūi I kā góa khòaⁿ-chò chīn-tiong, chiū jīm-bēng góa lâi kā I ho̍k-bū. 13 Sui-jiân góa í-chêng húi-pòng siat-to̍k, pek-hāi, koh Bú-jio̍k Siōng-Chú, iáu-koh tit-tio̍h liân-bín, in-ūi hit tong-sî góa iáu-bōe sìn Chú chiah án-ne chò. 14 Lán ê Chú koh sù góa hong-sēng ê un-tián, hō͘ góa tit-tio̍h kah Ki-tok Iâ-so͘ kiat-liân chiah ū ê sìn-gióng kah thiàⁿ-sim. 15 "Ki-tok Iâ-so͘ lîm-kàu sè-kan sī beh chín-kiù chōe-jîn" chit-kù ōe thang siong-sìn, ta̍t-tit lán oân-choân chiap-la̍p. Góa sī chōe-jîn tiong-kan siōng pháiⁿ-.ê. 16 M̄-koh góa tit-tio̍h liân-bín sī in-ūi Iâ-so͘ Ki-tok beh ēng góa chit-ê siōng pháiⁿ ê lâng lâi hián-bêng Siōng-Chú bû-hān ê jím-nāi, thang chò āu-lâi sìn-khò Iâ-so͘ lâi tit-tio̍h éng-oán oa̍h-miā ê lâng ê bô͘-hoān. 17 Goān chun-kùi kah êng-kng kui tī bān-sè ê Kun-ông, chiū-sī bē húi-hoāi koh khòaⁿ bē tio̍h ê to̍k-it Siōng-Chú, kàu tāi-tāi bô chīn. Amen. 18 Góa ê kiáⁿ Thê-mô͘-thài ah, góa chiàu í-chêng koan-hē lí ê ī-giân, chiong chit-ê kài-bēng kau-thok lí, hō͘ lí thang chun-chiàu chiah-ê ōe lâi hó-hó phah-iâⁿ hit-tiûⁿ cheng-chiàn. 19 Lí tio̍h chûn sìn-sim kah chheng-pe̍k ê liông-sim. Ū chi̍t-kóa lâng pàng-sak liông-sim, tì-sú sit-lo̍h sìn-sim ná chhin-chhiūⁿ chûn khò-chhián. 20 Kî-tiong ū Hú-bí-nái kah A-le̍k-san-tāi, góa í-keng chiong in kau hō͘ Sat-tàn, hō͘ in siū kéng-kài m̄-thang koh húi-pòng siat-to̍k Siōng-Chú.