《巴克禮普世版聖經（試讀本）》

 | | | 轉寄

巴克禮普世版（試讀本） 帖撒羅尼迦後書第二章

作者 巴克禮普世版小組 2016.01.24

Put-hoat ê Lâng
1 Hiaⁿ-tī chí-mōe ah, koan-hē lán ê Chú Iâ-so͘ Ki-tok ê chài-lîm í-ki̍p lán siū tiàu-chi̍p kah I chò-hóe ê tāi-chì, goán khún-kiû lín, 2 Nā ū-lâng ká-mō͘ goán ê miâ kóng goán ī-giân, á-sī thoân-káng, á-sī siá phoe kóng, "Chú ê Ji̍t chit-má kàu à." Lín ê sim m̄-thang sûi-piān iô-tāng, mā m̄-thang kiaⁿ-hiâⁿ. 3 Lâng bô-lūn ēng sím-mi̍h hong-hoat, lóng m̄-thang hō͘ lâng phiàn-khì, in-ūi hit Ji̍t beh kàu chìn-chêng, it-tēng seng ū pōe-kàu ê tāi-chì hoat-seng, mā ū put-hoat ê lâng, chiū-sī chù-tiāⁿ bia̍t-bông ê lâng ē chhut-hiān. 4 Hit-ê lâng hoán-tùi só͘-ū ê sîn-bêng á-sī kèng-pài ê tùi-siōng, koh kiau-ngō͘ kóng iâⁿ-kòe it-chhè, sīm-chí khì chē tī Siōng-Chú ê sèng-tiān, chū-chheng chò Siōng-Chú. 5 Góa iáu kah lín chò-hóe ê sî, bat kā lín kóng chiah-ê tāi-chì, lín kám bē kì-tit? 6 Lín lóng chai, chit-má sím-mi̍h teh chó͘-tòng hit-ê put-hoat ê lâng, hō͘ i sî-kî kàu chiah chhut-hiān. 7 In-ūi hit-ê put-hoat ê sîn-pì sè-le̍k í-keng khai-sí teh ūn-chok, m̄-koh tán kàu chó͘-tòng ê sè-le̍k thiat-lī liáu-āu chiah ē hoat-seng. 8 Hit sî, put-hoat ê lâng chhut-hiān, Chú Iâ-so͘ chài-lîm ê sî ē ēng I ê chhùi thò͘ chi̍t-kháu khì lâi kā i thâi-sí, ēng I chài-lîm hián-hiān ê êng-kng lâi kā i siau-bia̍t. 9 Hit-ê put-hoat ê lâng lîm-kàu ê sî, khò Sat-tàn ta̍k-chióng ê koân-sè, lâi kiâⁿ ké sîn-jiah kah kî-sū. 10 Koh ēng kok-chióng put-gī ê khúi-kè lâi khi-phiàn hiah-ê teh beh bia̍t-bông ê lâng, in-ūi in bô chiap-la̍p ē-tàng hō͘ in tit-kiù ê chin-lí. 11 In-ūi án-ne, Siōng-Chú hō͘ in sán-seng kiông-lia̍t ê chhò-kak khì siong-sìn hiah-ê hi-ké. 12 Kiat-kó hō͘ m̄ sìn chin-lí tian-tò ì-ài put-gī ê lâng lóng siū tēng-chōe.

Siū Kéng-soán Lâi Tit-kiù
13 Chú só͘ thiàⁿ ê hiaⁿ-tī chí-mōe ah, goán tio̍h put-sî ūi-tio̍h lín kám-siā Siōng-Chú, in-ūi Siōng-Chú tùi khí-thâu to̍h kéng-soán lín lâi hō͘ lín tit-kiù, hō͘ lín óa-khò Sèng-Sîn lâi chiâⁿ-chò sèng-kiat ê chú-bîn, koh hō͘ lín siong-sìn chin-lí. 14 Siōng-Chú thong-kòe goán só͘ thoân hō͘ lín ê hok-im ho͘-tiàu lín, lâi hióng-siū lán ê Chú Iâ-so͘ Ki-tok ê êng-kng. 15 Só͘-í, hiaⁿ-tī chí-mōe ah, lín tio̍h kian-tēng sìn-sim, kian-chhî chun-siú goán só͘ kà-sī lín ê chin-lí, bô-lūn sī ēng chhùi kóng ê á-sī ēng phoe siá ê, it-chhè só͘ ha̍k-si̍p ê lóng tio̍h chun-siú. 16 Goān thiàⁿ lán ê Chú Iâ-so͘ Ki-tok kah lán ê Thiⁿ-Pē Siōng-Chú, ēng I ê un-tián siúⁿ-sù lán éng-oán ê an-ùi kah bí-hó ê ǹg-bāng, 17 lâi an-ùi lín ê sim, hō͘ lín ū khùi-la̍t thang chò ta̍k-hāng hó-sū, soan-káng ta̍k-chióng ê hó-ōe.