《巴克禮普世版聖經（試讀本）》

 | | | 轉寄

巴克禮普世版（試讀本） 帖撒羅尼迦前書第三章

作者 巴克禮普世版小組 2015.12.27

1 Goán í-keng tán kah tòng bē-tiâu, chiū koat-tēng kan-taⁿ goán tòa tī Ngá-tián, 2 chhe-phài goán ê hiaⁿ-tī Thê-mô͘-thài khì lín hia, i sī ūi-tio̍h Siōng-Chú lâi thoân Ki-tok ê hok-im chò goán ê tâng-kang, i thang lâi kian-kò͘ lín ê sìn-sim, koh ūi-tio̍h lín ê sìn-sim lâi an-ùi lín, 3 hō͘ lín tiong-kan bē in-ūi tú-tio̍h khó͘-lān soah sìn-sim iô-tāng. Lín ka-kī mā chai, lán tú-tio̍h khó͘-lān sī Siōng-Chú ê chí-ì só͘ an-pâi. 4 Goán iáu tī lín hia ê sî ū seng kā lín kóng-khí, lán ē tú-tio̍h khó͘-lān, āu-lâi kó-jiân án-ne hoat-seng. Che sī lín só͘ chai-.ê. 5 Só͘-í góa tán kah tòng bē-tiâu, chiah tio̍h chhe-phài Thê-mô͘-thài khì lín hia, ài chai lín ê sìn án-chóaⁿ chiah bē hō͘ hit-ê Mô͘-kúi kā lín iú-he̍k, hō͘ goán ê lô-khó͘ lóng óng-hùi khì. 6 Taⁿ Thê-mô͘-thài í-keng tùi lín hia tńg-lâi, chiong lín ê sìn-sim kah thiàⁿ-sim ê hó siau-sit pò goán chai, koh kóng-khí lín siông-siông teh siàu-liām goán, ài beh kah goán kìⁿ-bīn, chhin-chhiūⁿ goán ài beh kah lín kìⁿ-bīn kāng-khoán. 7 Só͘-í, hiaⁿ-tī chí-mōe ah, goán tī it-chhè ê khùn-khó͘ hoān-lān tiong, goán ū tùi lín ê sìn-sim tit-tio̍h an-ùi. 8 Lín nā tùi Chú ū kian-kò͘ ê sìn-sim, goán chiū kám-kak ū chin-chiàⁿ teh oa̍h. 9 Goán tī lán ê Siōng-Chú ê bīn-chêng ūi-tio̍h lín chin hoaⁿ-hí. Ūi-tio̍h che it-chhè ê hoaⁿ-hí, goán tio̍h án-chóaⁿ lâi kám-siā Siōng-Chú chiah ū kàu-gia̍h? 10 Goán mê-ji̍t pek-chhiat kî-tó, ài kìⁿ-tio̍h lín ê bīn, lâi pó͘-chiok lín ê sìn-sim bô kàu-gia̍h ê só͘-chāi. 11 Goān lán ê Thiⁿ-Pē Siōng-Chú kah lán ê Chú Iâ-so͘ kā goán khui-lō͘ thang khì lín hia. 12 Chhin-chhiūⁿ goán tùi lín ê thiàⁿ-sim ná ke-thiⁿ, goān Chú hō͘ lín hō͘-siōng ê thiàⁿ-sim kah thiàⁿ chèng-lâng ê sim mā ji̍t-ji̍t ke-thiⁿ. 13 Án-ne lín ê sìn-sim ē-tàng kian-kò͘, tī lán ê Chú Iâ-so͘ kah I ê chèng sìn-tô͘ koh-chài lâi-lîm ê sî, tī lán ê Thiⁿ-Pē Siōng-Chú ê bīn-chêng, ē-tàng sèng-kiat bô thang hiâm.