《巴克禮普世版聖經（試讀本）》

 | | | 轉寄

巴克禮普世版（試讀本） 帖撒羅尼迦前書第二章

作者 巴克禮普世版小組 2015.12.20

Pó-lô Tī Thiap-sat-lô-nî-ka ê Kang-chok
1 Hiaⁿ-tī chí-mōe ah, lín ka-kī chai, goán chêng khì lín hia hóng-būn m̄-sī bô hāu-kó. 2 Lín mā lóng chai, goán khì lín hia chìn-chêng tī Hui-li̍p-pí sui-jiân tú-tio̍h pek-hāi kah bú-jio̍k, iáu-koh óa-khò lán ê Siōng-Chú, hó-táⁿ bīn-tùi thiau-chiàn, kā Siōng-Chú ê hok-im thoân hō͘ lín. 3 Goán ê khoàn-bián m̄-sī chhut-tī chhò-gō͘ á-sī put-liông ê tōng-ki, mā m̄-sī kan-chà teh beh phiàn-lâng. 4 Si̍t-chè-siōng, Siōng-Chú khòaⁿ goán ē-kham-tit, chiah chiong hok-im kau-thok goán, goán chiū chiàu án-ne lâi thoân. M̄-sī beh hō͘ lâng hoaⁿ-hí, sī beh hō͘ kàm-chhat lán lāi-sim ê Siōng-Chú hoaⁿ-hí. 5 In-ūi lín chai, goán lóng m̄-bat tùi lín kóng phô͘-tháⁿ ê ōe, mā m̄-bat ū tham-sim ê liām-thâu. Che Siōng-Chú ē-tàng kā goán chò-chèng. 6 Goán chò Ki-tok ê sù-tô͘, sui-jiân ē-tàng iau-kiû lâng chun-kèng goán, m̄-koh goán m̄-bat tùi lín á-sī pa̍t-lâng iau-kiû kui êng-kng hō͘ goán. 7 M̄-koh goán tī lín tiong-kan ê sî un-jiû tùi-thāi lín, chhin-chhiūⁿ lāu-bú teh ióng-chhī ka-kī ê kiáⁿ-jî. 8 Goán án-ne thiàⁿ-sioh lín, m̄-nā kah lín hun-hióng Siōng-Chú ê hok-im, liân ka-kī ê sèⁿ-miā mā hoaⁿ-hí hō͘ lín, in-ūi lín sī goán só͘ thiàⁿ-.ê. 9 Hiaⁿ-tī chí-mōe ah, lín tio̍h ē-kì-tit goán ê lô-khó͘ kang-chok. Goán thoân Siōng-Chú ê hok-im hō͘ lín ê sî, ūi-tio̍h bô ài ke-thiⁿ lín jīm-hô lâng ê hū-tam, goán mê-ji̍t chò-kang lâi î-chhî goán ê seng-oa̍h hùi-iōng. 10 Lín kah Siōng-Chú ē-tàng ūi goán chò-chèng, tùi lín chiah-ê sìn-tô͘, goán ê chò-lâng sī jōa-ni̍h-á sèng-kiat, kong-gī, bô thang hiâm. 11 Lín chai goán tùi-thāi lín ta̍k-lâng chhin-chhiūⁿ lāu-pē teh tùi-thāi ka-kī ê kiáⁿ-jî. 12 Goán kó͘-lē lín, an-ùi lín, sī ài beh hō͘ lín ê kiâⁿ-ta̍h ē-tàng hû-ha̍p Siōng-Chú ê chí-ì. I ū ho͘-tiàu lín chìn-ji̍p I ê kok-tō͘ kah êng-iāu. 13 Goán mā ūi-tio̍h chit-ê iân-kò͘ kám-siā Siōng-Chú bô soah, in-ūi lín tùi goán niá-siū Siōng-Chú ê sìn-sit ê sî, lín bô kā i siūⁿ-chò sī lâng ê ōe, tian-tò tòng-chò khak-si̍t sī Siōng-Chú ê sìn-sit. Chit-ê sìn-sit tī lín sìn-tô͘ tiong-kan teh khí chok-iōng. 14 Hiaⁿ-tī chí-mōe ah, Iû-thài tē-khu sio̍k Ki-tok Iâ-so͘ ê Siōng-Chú ê kàu-hōe ū siū tông-pau ê pek-hāi. Lín siū-tio̍h ka-kī tông-pau ê pek-hāi, tú chhin-chhiūⁿ in ū siū-tio̍h Iû-thài-lâng ê pek-hāi. 15 Hiah-ê Iû-thài-lâng hāi-sí Chú Iâ-so͘ kah chèng sian-ti, mā kā goán khu-tio̍k chhut-kéng. In hō͘ Siōng-Chú bô hoaⁿ-hí, koh kah chèng-lâng chò tùi-te̍k. 16 In sīm-chí chó͘-tòng goán thoân tit-kiù ê hok-im hō͘ Gōa-pang-lâng. In án-ne kè-sio̍k hoān-chōe, chōe-ok sî-sî teh koàn-móa. Siōng-Chú ê siū-khì chòe-āu lîm kàu in ê sin-chiūⁿ.

Pó-lô Ǹg-bāng Koh Khì Hóng-būn In
17 Hiaⁿ-tī chí-mōe ah, goán chiām-sî kah lín hun-lī, m̄-koh he sī seng-khu ê hun-lī, goán ê sim pēng bô lī-khui lín. Goán jōa-ni̍h-á pek-chhiat siūⁿ beh koh kah lín kìⁿ-bīn. 18 Goán chin ài khì lín hia, góa Pó-lô chi̍t pái koh chi̍t pái siūⁿ beh khì, m̄-koh Sat-tàn kā goán chó͘-tòng. 19 Lán ê Chú Iâ-so͘ chài-lîm ê sî, goán ê ǹg-bāng kah hoaⁿ-hí, í-ki̍p siōng thang khoa-kháu ê sī sím-mi̍h? Kám m̄-sī lín? 20 Lín si̍t-chāi sī goán ê kong-êng kah hoaⁿ-hí.