《巴克禮普世版聖經（試讀本）》

 | | | 轉寄

巴克禮普世版（試讀本） 帖撒羅尼迦前書第四章

作者 巴克禮普世版小組 2016.01.03

Hō͘ Siōng-Chú Hoaⁿ-hí ê Seng-oa̍h
1 Hiaⁿ-tī chí-mōe ah, goán iáu ū ōe beh kā lín kóng. Lín chêng bat tùi goán ha̍k-si̍p tio̍h án-chóaⁿ seng-oa̍h lâi hō͘ Siōng-Chú hoaⁿ-hí. Kî-si̍t lín í-keng ū chiàu án-ne teh seng-oa̍h, m̄-koh goán hōng Chú Iâ-so͘ ê miâ lâi khún-kiû koh khó͘-khǹg lín, taⁿ tio̍h koh-khah ló͘-le̍k. 2 In-ūi lín mā chai, goán ū hōng Chú Iâ-so͘ ê miâ kā lín kà-sī sím-mi̍h. 3 Siōng-Chú ê chí-ì sī ài lín chiâⁿ-chò sèng-kiat, lī-khui îm-loān. 4 Ài lín ta̍k-lâng ē-hiáu ēng sèng-kiat kah chun-kùi lâi siú ka-kī ê seng-khu. 5 M̄-thang chhin-chhiūⁿ m̄-bat Siōng-Chú ê Gōa-pang-lâng teh hòng-chiòng su-io̍k. 6 Koan-hē chit-hāng tāi-chì, mā m̄-thang chò-pháiⁿ lâi chhim-hoān tâng-sìn ê hiaⁿ-tī chí-mōe. Goán bat kā lín kóng-kòe, mā ū kā lín kéng-kò, Chú ē kā chò chit-chióng tāi-chì ê lâng chhù-hoa̍t. 7 Siōng-Chú m̄-sī tiàu lán lâi kòe ù-òe ê seng-oa̍h, sī tiàu lán lâi kòe sèng-kiat ê seng-oa̍h. 8 Só͘-í kī-choa̍t chit-ê kà-sī, m̄-sī kī-choa̍t lâng, sī teh kī-choa̍t siúⁿ-sù lín Sèng-Sîn ê Siōng-Chú. 9 Koan-hē hiaⁿ-tī chí-mōe hō͘-siōng thiàⁿ-sioh ê tāi-chì, m̄-bián goán siá sím-mi̍h hō͘ lín, in-ūi lín ka-kī í-keng siū-tio̍h Siōng-Chú ê kà-sī ū teh sio-thiàⁿ. 10 Kî-si̍t lín ū chiàu chit-ê kà-sī thiàⁿ choân Má-kî-tùn ê hiaⁿ-tī chí-mōe, m̄-koh, hiaⁿ-tī chí-mōe ah, goán khǹg lín tio̍h koh-khah ló͘-le̍k. 11 Mā tio̍h chiàu goán chêng kā lín hoan-hù ê, lín tio̍h li̍p-chì kòe pêng-chēng ê seng-oa̍h, chīn ka-kī ê pún-hūn chhin-chhiú chò-kang lâi î-chhî ka-kī ê seng-oa̍h, 12 Án-ne lín chiū ē-tàng hō͘ kàu-hōe-gōa ê lâng chun-kèng, mā m̄-bián óa-khò pa̍t-lâng.

Chú ê Lâi-lîm
13 Hiaⁿ-tī chí-mōe ah, koan-hē sí-khì ê lâng, goán ài lín chai, án-ne lín chiah bē chhin-chhiūⁿ hiah-ê bô ǹg-bāng ê lâng teh pi-siong. 14 Lán kì-jiân siong-sìn Iâ-so͘ sí-khì koh-chài oa̍h khí-lâi, lán mā siong-sìn Siōng-Chú ē thong-kòe Iâ-so͘ chhōa hiah-ê sí-khì ê lâng kah Iâ-so͘ chò-hóe lâi. 15 Goán chiàu Chú ê ōe kā lín kóng chit-hāng tāi-chì, chiū-sī lán chiah-ê tī Chú koh chài-lîm ê sî iáu oa̍h-teh ê lâng, bē pí hiah-ê í-keng sí-khì ê lâng khah tāi-seng kìⁿ-tio̍h Chú. 16 In-ūi Chú beh pún-sin tùi thiⁿ kàng-lîm, thiⁿ-sài-tiúⁿ tōa-siaⁿ hoah, Siōng-Chú ê sàu-kak chi̍t-ē hiáng, hiah-ê sio̍k Ki-tok í-keng sí ê lâng ē tāi-seng koh oa̍h. 17 Jiân-āu lán chiah-ê iáu oa̍h-teh ê lâng ē kah in siū chiap-khì hûn-lāi, tī khong-tiong kah Chú kìⁿ-bīn, án-ne lán chiū éng-oán kah Chú chò-hóe. 18 Só͘-í lín tio̍h ēng chiah-ê ōe hō͘-siōng kó͘-lē.