《巴克禮普世版聖經（試讀本）》

 | | | 轉寄

巴克禮普世版（試讀本） 帖撒羅尼迦前書第一章

作者 巴克禮普世版小組 2015.12.13

1 Pó-lô, Se-lah kah Thê-mô͘-thài siá phoe hō͘ Thiap-sat-lô-nî-ka-lâng sio̍k Thiⁿ-Pē Siōng-Chú kah Chú Iâ-so͘ Ki-tok ê kàu-hōe. Goān lín tit-tio̍h un-tián kah pêng-an!

Thiap-sat-lô-nî-ka-lâng ê Seng-oa̍h Kah Sìn-sim
2 Goán siông-siông ūi-tio̍h lín tāi-ke kám-siā Siōng-Chú, tī kî-tó tiong put-sî to siàu-liām lín. 3 Goán tī lán ê Thiⁿ-Pē Siōng-Chú ê bīn-chêng siàu-liām lín óa-khò sìn-sim só͘ chò ê kang, chhut-tī thiàⁿ-sim só͘ hù-chhut ê lô-khó͘, koh ū nāi-sim lâi gióng-bōng Chú Iâ-so͘ Ki-tok. 4 Hiaⁿ-tī chí-mōe ah, goán chai lín sī Siōng-Chú só͘ thiàⁿ koh siū kéng-soán ê kiáⁿ-jî. 5 In-ūi goán thoân hok-im khì-kàu lín hia, m̄-sī kan-taⁿ óa-khò giân-gí, mā khò Siōng-Chú ê tōa koân-lêng kah Sèng-Sîn, í-ki̍p tùi hok-im ê khak-sìn. Lín lóng chai goán tī lín hia ê sî án-chóaⁿ. He lóng sī ūi-tio̍h lín ê lī-ek. 6 Lín ū o̍h goán mā o̍h Chú, sui-jiân tú-tio̍h chin-chē khó͘-lān, iáu-koh ēng Sèng-Sîn só͘ siúⁿ-sù ê hoaⁿ-hí, lâi niá-siū sìn-sit. 7 Chiū án-ne, lín chiâⁿ-chò Má-kî-tùn kah A-kai-a só͘-ū sìn-tô͘ ê bô͘-hoān. 8 In-ūi Chú ê sìn-sit sī tùi lín thoân-chhut, m̄-nā tī Má-kî-tùn kah A-kai-a, lín ǹg Siōng-Chú ê sìn-gióng í-keng thoân khì-kàu ta̍k só͘-chāi, só͘-í m̄-bián goán koh kóng sím-mi̍h. 9 In-ūi hia ê lâng lóng teh thoân kóng, goán khì lín hia ê sî án-chóaⁿ siū lín ê hó khoán-thāi, koh lín án-chóaⁿ lī-khui ngó͘-siōng, kui-hiòng Siōng-Chú, lâi ho̍k-sāi oa̍h koh chin ê Siōng-Chú. 10 Koh thèng-hāu I ê Kiáⁿ tùi thiⁿ kàng-lîm. Siōng-Chú hō͘ I ê Kiáⁿ Iâ-so͘ tùi sí-lâng tiong koh-oa̍h, lâi chín-kiù lán thoat-lī chiong-lâi ê sím-phòaⁿ.