《巴克禮普世版聖經（試讀本）》

 | | | 轉寄

巴克禮普世版（試讀本） 哥林多後書第二章

作者 巴克禮普世版小組 2015.05.03

1 Só͘-í góa koat-tēng bô koh khì lín hia, chiah bián koh hō͘ lín kan-khó͘-sim. 2 Góa nā hō͘ lín kan-khó͘-sim, án-ne lín chiah-ê kan-khó͘-sim í-gōa, iáu-ū siáⁿ-lâng ē-tàng hō͘ góa hoaⁿ-hí? 3 Chêng góa siá hit-tiuⁿ phoe hō͘ lín, sī ūi-tio̍h bián-tit góa khì lín hia ê sî, pún-lâi eng-kai hō͘ góa hoaⁿ-hí ê lâng tian-tò hō͘ góa kan-khó͘-sim. Góa khak-sìn góa ê hoaⁿ-hí chiū-sī lín tāi-ke ê hoaⁿ-hí. 4 Góa tī iu-siong thòng-khó͘ tiong lâu chin-chē ba̍k-sái lâi siá hit-tiuⁿ phoe hō͘ lín, m̄-sī beh hō͘ lín kan-khó͘-sim, sī beh hō͘ lín chai-iáⁿ góa jōa-ni̍h-á thiàⁿ lín.

Sià-bián Ū Kòe-sit ê Lâng
5 Nā ū hō͘ lâng kan-khó͘-sim, m̄-sī hō͘ góa kan-khó͘-sim niā-niā, mā chì-chió hō͘ lín tiong-kan chi̍t-kóa lâng kan-khó͘-sim. Góa án-ne kóng sī ūi-tio̍h bián-tit hō͘ hiah-ê lâng kám-kak góa ê chek-pī siuⁿ tāng. 6 Hit-khoán lâng í-keng hō͘ lín tōa-to-sò͘ ê lâng chek-hoa̍t kah ū kàu-gia̍h ā. 7 Lín tian-tò tio̍h kā i sià-bián, kā i an-ùi, chiah bián hō͘ hit-khoán lâng kòe-thâu kan-khó͘-sim soah choa̍t-bāng. 8 Só͘-í, góa khó͘-khǹg lín tio̍h hō͘ i chai-iáⁿ lín khak-si̍t ū teh thiàⁿ i. 9 Chêng góa siá hit-tiuⁿ phoe ài beh chai-iáⁿ lín jím-siū khó-giām kàu sím-mi̍h thêng-tō͘, khòaⁿ lín ū sūn-ho̍k góa ê chí-sī á-bô. 10 Lín sià-bián sím-mi̍h lâng, góa mā beh kā i sià-bián. Góa sī tī Ki-tok ê bīn-chêng ūi-tio̍h lín ê iân-kò͘ lâi kā i sià-bián. 11 Án-ne chiah bián hō͘ Sat-tàn phiⁿ khì, in-ūi lán chin chheng-chhó Sat-tàn ê kúi-kè.

Pó-lô Tī Te̍k-lô-a ê Chhau-hoân
12 Chêng góa khì Te̍k-lô-a thoân Ki-tok ê hok-im ê sî, Chú í-keng kā góa ê kang-chok khui-lō͘. 13 M̄-koh bô tú-tio̍h góa ê hiaⁿ-tī Thê-to, só͘-í góa ê sim-lêng bô pêng-an, chiū kah in sio-sî, khì Má-kî-tùn.

Óa-khò Ki-tok ê Tek-sèng
14 Kám-siā Siōng-Chú, sî-siông ū Ki-tok chò-thâu chhōa goán lâi tek-sèng, koh ēng goán tī ta̍k só͘-chāi hián-bêng hit-ê jīn-bat Ki-tok chiah ū ê phang-bī. 15 Tī tit-kiù á-sī tîm-lûn ê lâng tiong-kan, goán chiâⁿ-chò Ki-tok ê phang-bī hiàn hō͘ Siōng-Chú. 16 Tùi teh-beh tîm-lûn ê lâng lâi kóng sī chhàu-bī, tùi tit-kiù ê lâng lâi kóng sī oa̍h ê phang-bī. Nā án-ne, siáⁿ-lâng ē-kham-tit tam-tng chit-khoán tāi-chì? 17 Goán bô chhin-chhiūⁿ chin-chē lâng kā Siōng-Chú ê tō-lí tòng-chò siong-phín lâi phah-bē, tian-tò sī chò chi̍t-ê sêng-si̍t ê lâng, siū Siōng-Chú ê chhe-phài, óa-khò Ki-tok lâi soan-káng tō-lí.