《巴克禮普世版聖經（試讀本）》

 | | | 轉寄

巴克禮普世版（試讀本） 哥林多後書第三章

作者 巴克禮普世版小組 2015.05.10

Sin Bêng-Iok ê Lô͘-po̍k
1 Goán kám sī koh teh chū-khoa? Goán kám tio̍h kah chi̍t-kóa lâng kāng-khoán su-iàu siá chhui-chiàn-phoe hō͘ lín, á-sī su-iàu lín thè goán siá chhui-chiàn-phoe hō͘ pa̍t-lâng? 2 Lín pún-sin chiū-sī goán ê chhui-chiàn-phoe, siá tī goán ê sim-lāi, beh hō͘ chèng-lâng chai, hō͘ ta̍k-lâng tha̍k. 3 Lín bêng-bêng sī Ki-tok só͘ siá thong-kòe goán lâi sàng ê phoe. Chit-tiuⁿ phoe m̄-sī ēng ba̍k-chúi siá tī chio̍h-pán ê, sī ēng éng-oán ê oa̍h-miā Siōng-Chú ê Sèng-Sîn siá tī lâng ê sim-lāi. 4 Goán thong-kòe Ki-tok tùi Siōng-Chú ū chit-khoán ê khak-sìn chiah án-ne kóng. 5 Che m̄-sī kóng goán ka-kī ū châi-tiāu chò chit-khoán tāi-chì, goán ê châi-tiāu sī tùi Siōng-Chú lâi-.ê. 6 Siōng-Chú hō͘ goán ū châi-tiāu chò sin ê bêng-iok ê lô͘-po̍k. M̄-sī ēng bûn-jī siá ê, sī Sèng-Sîn ê iok. Ēng bûn-jī siá ê lu̍t-hoat ē tòa-lâi sí-bông, m̄-koh Sèng-Sîn ē siúⁿ-sù oa̍h-miā. 7 Ēng bûn-jī khek tī chio̍h-pán ê lu̍t-hoat pan-pò͘ ê sî, Siōng-Chú ê êng-kng ū hián-hiān. Tùi Mô͘-se ê bīn hoán-chiò chhut-lâi ê kng sui-jiân chiām-chiām siau-sit, in-ūi hit-ê kng hui-siông kiông, tì-sú Í-sek-lia̍t-lâng bē-tàng chù-ba̍k khòaⁿ Mô͘-se ê bīn. Liân tòa hō͘ lâng sí-bông ê lu̍t-hoat to ū chit-khoán ê êng-kng, 8 án-ne Sèng-Sîn só͘ hoat-chhut ê kám bē koh-khah ū êng-kng? 9 Hit-ê kā lâng tēng-chōe ê kong-lêng nā ū hit-khoán ê êng-kng, kā lâng soan-phòaⁿ bô-chōe ê kong-lêng kám bē koh-khah chhiong-móa êng-kng? 10 Án-ne kóng khí-lâi, in-ūi chit-má ê êng-kng pí í-chêng koh-khah tōa, kòe-khì hiah-ni̍h tōa ê êng-kng soah siau-sit khì. 11 Hit-ê chi̍t-sî-á-kú ê nā ū êng-kng, án-ne hit-ê kú-tn̂g chûn-chāi ê chiū ū koh-khah tōa ê êng-kng. 12 Goán ū chit-khoán ê ǹg-bāng chiah káⁿ hó-táⁿ lâi kóng. 13 Goán bô chhin-chhiūⁿ Mô͘-se tio̍h ēng phè tà ka-kī ê bīn, hō͘ Í-sek-lia̍t-lâng bē tit thang chù-ba̍k khòaⁿ-tio̍h i bīn ê êng-kng chiām-chiām siau-sit. 14 M̄-koh Í-sek-lia̍t-lâng ê sim-tì phah bē khui. Kàu kin-á-ji̍t, in tha̍k kū-iok ê sî, in ê sim-lêng iáu hō͘ kāng hit-ê phè tà-teh, in-ūi chí-ū kah Ki-tok kiat-liân, hit-tè phè chiah ē-tàng the̍h-tiāu. 15 Sīm-chì kàu kin-á-ji̍t, in ta̍k-pái tha̍k Mô͘-se ê chheh, hit-tè phè iáu-koh tà tī in ê sim-lêng. 16 M̄-koh koan-hē Mô͘-se Sèng-keng ū kì-chài kóng, "Tng i kui-hiòng Chú, i ê phè chiah ē-tàng the̍h-tiāu." 17 Tī chia teh kóng ê "Chú" chiū-sī Sèng-Sîn. Ū Chú ê Sèng-Sîn ê só͘-chāi chiū-ū chū-iû. 18 Án-ne lán tāi-ke lóng ēng bô tà phè ê bīn teh hoán-siā Chú ê êng-kng. Chit-ê êng-kng sī tùi Chú, chiū-sī tùi Sèng-Sîn hoat chhut-lâi ê êng-kng, teh kā lán kái-chō piàn-chiâⁿ kah I kāng-khoán ê hêng-siōng, hō͘ lán ū koh-khah tōa ê êng-kng.