《巴克禮普世版聖經（試讀本）》

 | | | 轉寄

巴克禮普世版（試讀本） 哥林多前書第十六章

作者 巴克禮普世版小組 2015.04.19

Ūi Sìn-tô͘ Bō͘-khoán
1 Koan-hē bō͘-khoán pang-chō͘ sìn-tô͘ ê tāi-chì, lín mā tio̍h chiàu góa chêng hoan-hù Ka-lia̍p-thài hiah-ê kàu-hōe ê pān-hoat khì chò. 2 Múi chhit-ji̍t ê thâu chi̍t-ji̍t, lín ta̍k-lâng tio̍h chiàu ka-kī ê siu-ji̍p poah chi̍t-kóa khí-lâi khǹg, bián-tit góa khì lín hia ê sî chiah khai-sí bō͘-khoán. 3 Góa kàu-ūi ê sî, ē chiong siāu-kài ê phoe kah lín ê koan-khóa kau hō͘ lín só͘ chhui-chiàn ê lâng, chhe-phài in tòa khì Iâ-lō͘-sat-léng. 4 Nā-sī góa mā tio̍h khì, in mā thang kah góa chò-hóe khì.

Pó-lô ê Kè-ōe
5 Góa chit-má keng-kòe Má-kî-tùn liáu-āu, chiū beh khì lín hia. 6 Góa tāi-khài ē kah lín tòa chit-chām, kiám-chhái ē kah ín chò-hóe kòe tang-thiⁿ, án-ne bô-lūn sòa lo̍h-khì beh khì tó-ūi, thang hō͘ lín sàng góa chhut-hoat. 7 Chit-pái góa bô ài kan-taⁿ kòe-lō͘ sūn-sòa khì lín hia. Chú nā ín-chún, góa ǹg-bāng kah lín tòa khah kú. 8 M̄-koh góa mā beh tī Í-hut-só͘ tòa kàu Gō͘-sûn-cheh. 9 Sui-jiân tī hia ū chin-chē tùi-te̍k, m̄-koh Siōng-Chú ūi góa khui chi̍t-ê khoah-tōa ê mn̂g, thang chò ū kong-hāu ê kang-chok. 10 Thê-mô͘-thài nā kàu-ūi, lín tio̍h kā i chiap-thāi, hō͘ i ē-tàng an-sim chò-kang, in-ūi i kah goán kāng-khoán teh chò Chú ê kang. 11 Lín lóng m̄-thang kā i khòaⁿ-khin, tio̍h sàng i pêng-an chhut-hoat lâi góa chia, in-ūi góa teh thèng-hāu i kah hiah-ê hiaⁿ-tī chò-hóe lâi. 12 Koan-hē ná ê hiaⁿ-tī A-pho-lô, góa chài-saⁿ khǹg i kah hiah-ê hiaⁿ-tī khì lín hia, m̄-koh i kàu-taⁿ lóng bô àn-sǹg beh khì. Nā ū tú-hó ê ki-hōe, i chiū ē khì.

Kiat-bóe ê Chhéng-an
13 Lín tio̍h kéng-séng, tī sìn-gióng-siōng khiā hō͘ chāi, tio̍h ióng-kám, kian-kiông. 14 It-chhè tāi-chì tio̍h ēng thiàⁿ-sim lâi chò. 15 Hiaⁿ-tī chí-mōe ah, lín bat Su-thê-hoán-à ê chi̍t-ke lâng, in sī A-kai-a-séng thâu chi̍t-ke kui-sìn Chú, koh jia̍t-sim ho̍k-bū sìn-tô͘. 16 Góa khǹg lín tio̍h ho̍k-chiông chit-khoán lâng, í-ki̍p só͘-ū kah lín chò-hóe lô-khó͘ ê tâng-kang. 17 Góa chin hoaⁿ-hí Su-thê-hoán-à, Hok-tô͘-lah, A-kai-kó͘ ē-tàng lâi lín chia, thang pó͘ lín ê put-chiok. 18 In hō͘ góa kah lín ê sim-lêng tit-tio̍h kó͘-bú. Lín tio̍h chun-tiōng chit-khoán lâng. 19 A-se-a-semg2 ê kok kàu-hōe lóng kā lín chhéng-an. A-ku-lah, Pek-ki-lah kah tī in chhù-lāi teh chū-hōe ê kàu-hōe, tī Chú ê lāi-bīn pek-chhiat kā lín chhéng-an. 20 Só͘-ū ê hiaⁿ-tī chí-mōe lóng kā lín chhéng-an. Lín tio̍h ēng sèng-kiat ê sio-chim lâi hō͘-siōng chhéng-an. 21 Góa Pó-lô chhin-pit kā lín chhéng-an. 22 Nā ū-lâng bô thiàⁿ Chú, tio̍h siū chiù-chó͘. Chú ah, kiû lí kàng-lîm! 23 Goān Chú Iâ-so͘ Ki-tok ê un-tián kah lín tông-chāi. 24 Góa ê thiàⁿ-sim kah só͘-ū sio̍k Ki-tok Iâ-so͘ ê lâng tông-chāi. Amen.