《巴克禮普世版聖經（試讀本）》

 | | | 轉寄

巴克禮普世版（試讀本） 哥林多前書第十五章

作者 巴克禮普世版小組 2015.04.12

Ki-tok ê Koh-oa̍h
1 Hiaⁿ-tī chí-mōe ah, góa beh kā lín thê-chhéⁿ, góa chêng thoân hō͘ lín ê hok-im, lín ū niá-siū, mā ū óa-khò che lâi chò sìn-gióng ê ki-chhó͘. 2 Lín nā kian-siú góa thoân hō͘ lín hok-im ê tō-lí, lín ê sìn-gióng koh m̄-sī khang-khang, só͘-í ē khò chit-ê hok-im lâi tit-kiù. 3 Góa í-keng kā góa só͘ niá-siū siōng tiōng-iàu ê sìn-sit thoân hō͘ lín, chiū-sī chiàu Sèng-keng só͘ kì-chài: Ki-tok ūi-tio̍h lán ê chōe sí, 4 bâi-chòng, koh chiàu Sèng-keng só͘ kì-chài, tē-saⁿ ji̍t koh-oa̍h, 5 I ū tùi Pí-tek hián-hiān, koh tùi cha̍p-jī-ê sù-tô͘ hián-hiān. 6 Āu-lâi koh chi̍t pái tùi gō͘-pah-gōa-ê hiaⁿ-tī chí-mōe hián-hiān. Hiah-ê lâng ū-ê í-keng sí-khì, m̄-koh tōa-pō͘-hūn ê lâng iáu oa̍h-teh. 7 Āu-lâi tùi Ngá-kok hián-hiān, iū-koh chi̍t pái tùi só͘-ū ê sù-tô͘ hián-hiān. 8 Chòe-āu mā tùi góa chit-ê kah-ná iáu-bōe kàu-goe̍h ê lâng hián-hiān. 9 Góa sī sù-tô͘ tiong-kan siōng bî-sè ê, bē-kham-tit kiò-chò sù-tô͘, in-ūi góa bat pek-hāi Siōng-Chú ê kàu-hōe. 10 M̄-koh ū Siōng-Chú ê un-tián chiah ū kin-á-ji̍t ê góa, I siúⁿ-sù hō͘ góa ê un-tián pēng bô óng-hùi. Góa tian-tò pí kî-tha ê sù-tô͘ koh-khah phah-piàⁿ. Che kî-si̍t m̄-sī góa ê pún-léng, sī ū Siōng-Chú ê un-tián kah góa tông-chāi. 11 Bô-lūn sī góa á-sī kî-tha ê sù-tô͘, goán án-ne teh thoân, lín mā án-ne teh sìn.

Sìn-tô͘ ê Koh-oa̍h
12 Goán thoân ê sìn-sit sī Ki-tok tùi sí-lâng tiong koh-oa̍h, lín tiong-kan ná-ē ū-lâng kóng sí-lâng bô koh-oa̍h ê tāi-chì? 13 Nā bô sí-lâng koh-oa̍h, án-ne Ki-tok chiū bô koh-oa̍h. 14 Ki-tok nā bô koh-oa̍h, goán só͘ thoân ê sī khang-hi bô si̍t, lín ê sìn mā sī khang-khang. 15 Nā-sī án-ne, goán chiū-sī teh ūi Siōng-Chú chò ké-kiàn-chèng, in-ūi goán kiàn-chèng Siōng-Chú í-keng hō͘ Ki-tok koh-oa̍h. Chin-chiàⁿ nā bô sí-lâng koh-oa̍h ê tāi-chì, Siōng-Chú chiū bô hō͘ Ki-tok koh-oa̍h. 16 Sí-lâng nā bô koh-oa̍h, Ki-tok chiū bô koh-oa̍h. 17 Ki-tok nā bô koh-oa̍h, lín ê sìn-gióng chiū bô lō͘-ēng, lín chiū iáu-koh tī chōe-ok tiong. 18 Án-ne hiah-ê í-keng sí-khì ê Ki-tok-tô͘ mā lóng sǹg-sī bia̍t-bông. 19 Lán chò Ki-tok-tô͘ ê ǹg-bāng nā kan-taⁿ tī hiān-sè, lán chiū-sī sè-kan-lâng tiong-kan siōng khó-liân-.ê. 20 M̄-koh taⁿ Siōng-Chú í-keng hō͘ Ki-tok tùi sí-lâng tiong koh-oa̍h. Che sī beh chò í-keng sí-khì ê lâng koh-oa̍h ê pó-chèng. 21 In-ūi sí-lâng koh-oa̍h thong-kòe chi̍t-ê lâng, sí-lâng ê koh-oa̍h mā thong-kòe chi̍t-ê lâng. 22 Tú chhin-chhiūⁿ jîn-lūi ūi-tio̍h A-tong ê hoān-chōe lóng tio̍h sí, mā in-ūi Ki-tok lóng ē koh-oa̍h. 23 M̄-koh ta̍k-lâng lóng tio̍h chiàu ka-kī ê sūn-sī koh-oa̍h: thâu-chi̍t-ê sī Ki-tok, sòa lo̍h-lâi sī Ki-tok chài-lîm ê sî kui-sio̍k I ê lâng. 24 Jiân-āu boa̍t-ji̍t chiah kàu, hit sî Ki-tok ē siau-bia̍t choân-pō͘ ê chip-chèng-chiá, chiáng-koân-chiá kah koân-lêng-chiá, chiong thóng-tī-koân kau hō͘ Thiⁿ-Pē Siōng-Chú. 25 In-ūi Ki-tok it-tēng tio̍h thóng-tī, ti̍t-kàu Siōng-Chú só͘-ū ê tùi-te̍k khut-ho̍k tī I ê kha-ē.( chù: SPh 110:1) 26 Chòe-āu tio̍h húi-bia̍t ê tùi-te̍k chiū-sī Sí-bông. 27 In-ūi Sèng-keng kóng, "I hō͘ bān-bu̍t lóng khut-ho̍k tī I ê kha-ē. Chin bêng-hián, chia só͘ kóng ê "bān-bu̍t" pēng bô pau-hâm hō͘ bān-bu̍t khut-ho̍k tī Ki-tok kha-ē ê Siōng-Chú. 28 M̄-koh kàu bān-bu̍t khut-ho̍k Ki-tok ê sî, Kiáⁿ mā ē khut-ho̍k tī hō͘ bān-bu̍t lóng khut-ho̍k Siōng-Chú, thang hō͘ Siōng-Chú oân-choân koán-hat bān-bu̍t. 29 Nā m̄-sī án-ne, lâng kā sí-lâng sé-lé beh chhòng-siáⁿ? Nā bô sí-lâng koh-oa̍h ê tāi-chì, lâng ná-tio̍h kā sí-lâng sé-lé? 30 Koh-chài kóng, goán ná-tio̍h sî-sî khek-khek lâi mō͘-hiám? 31 Hiaⁿ-tī chí-mōe ah, góa ta̍k-ji̍t teh piàⁿ-miā, in-ūi lán pêⁿ-pêⁿ sī kah Chú Ki-tok Iâ-so͘ kiat-liân, góa ūi-tio̍h lín kám-kak chin êng-kng, só͘-í góa káⁿ án-ne kóng. 32 Góa tī Í-hut-só͘ kah hiah-ê ná chhin-chhiūⁿ iá-siù ê lâng tàu-cheng, nā chhut-tī lâng ê tōng-ki, tùi góa ū sím-mi̍h lī-ek? Sí-lâng nā bô koh-oa̍h, chhin-chhiūⁿ lâng teh kóng, "Lán bîn-á-chài to̍h beh sí à, chò lán lim! chò lán chia̍h!"( chù: ISA 22:13) 33 M̄-thang hō͘ lâng bê-he̍k khì. Lām-sám kau-pôe pêng-iú ē pāi-hoāi phín-tek. 34 Tio̍h kak-chhéⁿ, siūⁿ hō͘ chheng-chhó, m̄-thang koh hoān-chōe, in-ūi iáu ū-lâng m̄-bat Siōng-Chú. Góa án-ne kóng sī beh hō͘ lín chai thang kiàn-siàu.

Jio̍k-thé ê Koh-oa̍h
35 Kiám-chhái ū-lâng ē mn̄g, "Sí-lâng án-chóaⁿ koh-oa̍h? In ē ū sím-mi̍h khoán ê sin-thé?" 36 Gōng lâng ah, lín iā lo̍h-khì ê chéng-chí nā bô sí-khì, kám ē oa̍h khí-lâi? 37 Koh-chài kóng, lín só͘ iā ê, bô-lūn sī be̍h-á á-sī pa̍t-chióng ê ngó͘-kok, put-kò sī chi̍t lia̍p chéng-chí, m̄-sī āu-lâi sêng-tióng ê hêng-thé. 38 Siōng-Chú chiàu I ê chí-ì hō͘ chéng-chí ū hêng-thé, ta̍k-khoán chéng-chí ū i ka-kī ê hêng-thé. 39 Ta̍k-khoán ê jio̍k-thé mā lóng bô kāng-khoán. Jîn-lūi ê jio̍k-thé chi̍t khoán, siù-lūi ê jio̍k-thé chi̍t khoán, chiáu-lūi ê jio̍k-thé chi̍t khoán, hî-lūi ê jio̍k-thé koh chi̍t khoán. 40 Ū thiⁿ-téng ê thé, mā ū tē-chiūⁿ ê thé, m̄-koh thian-thé ê kng kah tē-chiūⁿ ê thé ê kng bô kāng-khoán. 41 Ji̍t-thâu ū ji̍t-thâu ê kng, goe̍h ū goe̍h ê kng, chheⁿ ū chheⁿ ê kng, sīm-chì múi-lia̍p chheⁿ ê kng to lóng bô kāng-khoán. 42 Sí-lâng koh-oa̍h mā sī án-ne. Bâi-chòng lo̍h-thô͘ ê jio̍k-thé ē hiú-nōa, koh-oa̍h liáu-āu chiū chiâⁿ-chò bē hiú-nōa. 43 Tâi lo̍h-khì ê sī pi-chiān ê, koh-oa̍h ê sī êng-kng ê; tâi lo̍h-khì ê sī nńg-chiáⁿ ê, koh-oa̍h ê sī ióng-chòng-.ê. 44 Tâi lo̍h-khì ê sī hiat-khì ê jio̍k-thé, koh-oa̍h ê sī lêng-sèng ê thé. Kì-jiân ū hiat-khì ê jio̍k-thé, mā ū lêng-sèng ê thé. 45 Só͘-í Sèng-keng kì-chài: Thâu-chi̍t-ê lâng A-tong chiâⁿ-chò ū hiat-khì ê lâng.( chù: CAK 2:7) M̄-koh A-tong lō͘-bóe chiâⁿ-chò siúⁿ-sù oa̍h-miā ê sîn. 46 Tāi-seng ū ê m̄-sī lêng-sèng ê thé, sī hiat-khì ê jio̍k-thé. Jiân-āu chiah ū lêng-sèng ê thé. 47 Thâu-chi̍t-ê lâng sī tùi tē-chiūⁿ chhut, sī thô͘ chō ê; tē-jī ê lâng sī tùi thiⁿ-téng lâi-.ê. 48 Só͘-ū tē-chiūⁿ ê lâng lóng kah hit-ê thâu-chi̍t-ê ēng thô͘ chō ê lâng kāng-khoán; só͘-ū sio̍k-thiⁿ ê lâng mā kah lō͘-bóe lâi Hit-ūi sio̍k-thiⁿ ê kāng-khoán. 49 Tú chhin-chhiūⁿ lán ū hit-ê thâu-chi̍t-ê ēng thô͘ chō ê lâng ê hêng-siōng, mā ē ū lō͘-bóe lâi Hit-ūi sio̍k-thiⁿ ê ê hêng-siōng. 50 Hiaⁿ-tī chí-mōe ah, góa kā lín kóng, hiat-khì ê jio̍k-thé bē-tàng sêng-siū Siōng-Chú ê Kok-tō͘. Chiū-sī kóng, ē hiú-nōa ê bē-tàng sêng-siū bē hiú-nōa-.ê. 51 Taⁿ góa kā lín kóng chi̍t-ê ò-biāu ê tāi-chì: lán m̄-sī lóng ē sí. 52 Boa̍t-ji̍t ê sàu-kak chi̍t-ē tân, chi̍t sî-á kú, ba̍k nih chi̍t-ē, lán lóng ē kái-piàn. Chòe-āu ê sàu-kak tân ê sî, sí-lâng chiū ē koh-oa̍h, piàn-chò bē hiú-nōa ê, lán lóng ē kái-piàn. 53 In-ūi chit-ê ē hiú-nōa ê tek-khak tio̍h piàn-chò bē hiú-nōa ê, chit-ê ē-sí ê piàn-chò bē-sí-.ê. 54 Tng chit-ê ē hiú-nōa ê piàn-chò bē hiú-nōa ê, ē-sí ê piàn-chò bē-sí ê sî, Sèng-keng só͘ kì-chài ê "Sí-bông ē hō͘ tek-sèng thun-chia̍h lo̍h-khì."( chù: ISA 25:8) chit-kù chiū ē èng-giām. 55 Sí-bông ah, lí ê sèng-lī tī tó-ūi? Sí-bông ah, lí ê to̍k-chhì tī tó-ūi?( chù: HSA 13:14) 56 Sí-bông ê to̍k-chhì sī chōe, chōe ê koân-sè sī lu̍t-hoat. 57 Kám-siā Siōng-Chú thong-kòe lán ê Chú Iâ-so͘ Ki-tok hō͘ lán tek-sèng. 58 Só͘-í, chhin-ài ê hiaⁿ-tī chí-mōe ah, lín tio̍h khiā hō͘ chāi, m̄-thang iô-tāng, tio̍h siông-siông chīn-la̍t ūi Chú chò-kang, in-ūi lín chai ūi Chú sin-khó͘ chò-kang it-tēng bē liáu-jiân.