《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第十六章

作者 巴克禮普世版小組 2014.12.28

Chhéng-an
1 Góa tùi lín chhui-chiàn lán ê chí-mōe Hui-pí, i sī Kian-kek-lí kàu-hōe ê chip-sū. 2 Chhiáⁿ lín chiàu sìn-tô͘ ê pún-hūn ūi-tio̍h Chú ê iân-kò͘ chiap-thāi i. I nā ū su-iàu, chhiáⁿ lín kā i pang-chō͘, in-ūi i bat hû-chō͘ chin-chē lâng, pau-koat góa pún-sin. 3 Chhiáⁿ thè góa kā Ki-tok Iâ-so͘ ê tâng-kang Pek-ki-lah kah A-ku-lah chhéng-an. 4 In bat ūi-tio̍h góa mō͘ sèⁿ-miā ê gûi-hiám. M̄-nā góa, liân gōa-pang ê kàu-hōe mā lóng tio̍h kā in kám-siā. 5 Mā chhiáⁿ kā tī in tau teh chū-hōe ê kàu-hōe chhéng-an. Chhiáⁿ thè góa kā só͘ thiàⁿ ê Í-pài-nî-thó͘ chhéng-an, i sī A-se-a-séng thâu-chi̍t-ê sìn Ki-tok ê lâng. 6 Mā chhiáⁿ kā Má-lī-a chhéng-an, i bat ūi-tio̍h lín siū chin-chē lô-khó͘. 7 Koh chhiáⁿ kā góa ê chhin-chiâⁿ An-to-nî-kó͘ kah Iû-nî-a chhéng-an. In bat kah góa tâng-chê siū koaiⁿ-kaⁿ, tī sù-tô͘ tiong-kan ū bêng-bōng, pí góa tāi-seng kui-sio̍k Ki-tok. 8 Chhiáⁿ thè góa kā tī Chú-lāi góa só͘ thiàⁿ ê Àm-pek-lī chhéng-an. 9 Chhiáⁿ lín kā tī Ki-tok kah góa tâng lô-khó͘ ê Ní-pa-lô͘, í-ki̍p góa só͘ thiàⁿ ê Sū-tāi-kó͘ chhéng-an. 10 Chhiáⁿ lín kā tī Ki-tok siū-kòe khó-giām ê A-pí-lī chhéng-an. 11 Kā góa ê chhin-chiâⁿ Hi-lô-thian chhéng-an. Kā Ná-kî-sò͘ ke-lāi sìn-Chú ê lâng chhéng-an. 12 Chhiáⁿ thè góa kā ūi-tio̍h Chú siū chin-chē lô-khó͘ ê Thó͘-hui-ná kah Thó͘-hù-sat chhéng-an. Kā só͘ thiàⁿ ê Pí-sek chhéng-an, i bat ūi-tio̍h Chú lô-khó͘ kang-chok. 13 Chhiáⁿ kā siū Chú kéng-soán ê Ló͘-hu kah i ê lāu-bú chhéng-an, i ê lāu-bú mā sī góa ê lāu-bú. 14 Kā A-sùn-kî-thó͘, Hut-le̍k-kan, Hek-bí, Pat-lô-pa, Hek-má, í-ki̍p kah in chò-hóe ê hiaⁿ-tī chhéng-an. 15 Kā Hui-lô-lô-kó͘ kah Iû-lī-a, Nî-lī-a kah i ê chí-mōe, kah O-lîm-pa í-ki̍p kah in chò-hóe ê chèng sèng-tô͘ chhéng-an. 16 Lín tio̍h ēng sèng-kiat ê sio-chim hō͘-siōng chhéng-an. Ki-tok ê chèng kàu-hōe lóng kā lín chhéng-an.

Chòe-āu ê Khoàn-bián
17 Hiaⁿ-tī chí-mōe ah, lín tio̍h thê-hông hō͘ lâng hun-lia̍t á-sī hō͘ lín hoān-chōe, ûi-pōe lín só͘ niá-siū ê kà-sī hiah-ê lâng. 18 In-ūi chit-khoán lâng m̄-sī teh ho̍k-sāi lán ê Chú Ki-tok, sī teh kò͘ ka-kī ê pak-tó͘, ēng hoa-giân khá-gí bê-he̍k láu-si̍t-lâng ê sim. 19 In-ūi chèng-lâng lóng chai lín ê sūn-ho̍k, só͘-í góa ūi-tio̍h lín hoaⁿ-hí, m̄-koh góa ài lín tùi hó-sū tio̍h khiáu, tùi pháiⁿ-sū tio̍h ū tì-hūi. 20 Sù pêng-an ê Siōng-Chú chin-kín chiū ē kā Sat-tàn ta̍h-chhùi, hō͘ i khut-ho̍k tī lín ê kha-chêng. Goān lán ê Chú Iâ-so͘ Ki-tok ê un-tián kah lín tông-chāi! 21 Góa ê tâng-kang Thê-mô͘-thài kah góa ê chhin-chiâⁿ Lō͘-kiû, Iâ-sun, Só͘-se-pá-tek kā lín chhéng-an. 22 Góa Tek-tiu, chiū-sī siá chit-tiuⁿ phoe ê tāi-pit-jîn, tī Chú-lāi kā lín chhéng-an. 23 Chiapthai7 góa kah choân kàu-hōe ê Ka-iû kā lín chhéng-an. 24 Siâⁿ-lāi koán khò͘-pâng ê Í-lah-to͘ kah lán ê hiaⁿ-tī Koat-thó͘ kā lín chhéng-an.

Siōng-chàn
25 Goān êng-kng kui hō͘ Siōng-Chú! I ē chiàu góa só͘ thoân ê hok-im, chiū-sī soan-iông Iâ-so͘ Ki-tok, lâi kian-kò͘ lín ê sìn-sim. Chit-ê hok-im chiū-sī bān-kó͘ í-lâi só͘ ún-ba̍t ê ò-biāu. 26 Taⁿ í-keng chiàu éng-oa̍h Siōng-Chú ê kài-bēng, thong-kòe sian-ti ê chheh hián-bêng chhut-lâi, thang ín-chhōa bān-bîn lâi sìn koh sūn-ho̍k chit-ê hok-im. 27 Goān êng-kng thong-kòe Iâ-so͘ Ki-tok kui tī to̍k-it choân-tì ê Siōng-Chú, ti̍t-kàu éng-oán. Amen!