《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第十五章

作者 巴克禮普世版小組 2014.12.21

Bô Kiû Boán-chiok Ka-kī
1 Lán chiah-ê ū lêng-le̍k ê lâng eng-kai kā loán-jio̍k ê lâng tàu taⁿ tāng-tàⁿ, m̄-thang kiû ka-kī ê boán-chiok. 2 Lán ta̍k-lâng tio̍h hō͘ chhù-piⁿ hoaⁿ-hí, hō͘ in tit-tio̍h lī-ek lâi kiàn-li̍p sìn-sim. 3 In-ūi Ki-tok mā bô kiû ka-kī ê hoaⁿ-hí, tian-tò chiàu Sèng-keng kì-chài: "Bú-jio̍k lí ê bú-jio̍k kui tī Góa."( chù: SPh 69:9) 4 Chá-chêng só͘ kì-chài ê lóng sī beh kà-sī lán chiah lâi siá, hō͘ lán tùi jím-nāi kah Sèng-keng ê an-ùi lâi tit-tio̍h ǹg-bāng. 5 Goān sù jím-nāi kah an-ùi ê Siōng-Chú hō͘ lín tāi-ke tâng-sim lâi ha̍k-si̍p Ki-tok Iâ-so͘ ê bô͘-iūⁿ, 6 thang tâng-sim tâng-siaⁿ êng-iāu Siōng-Chú, lán ê Chú Iâ-so͘ Ki-tok ê Thiⁿ-Pē.

Bān-bîn ê Hok-im
7 Só͘-í, ūi-tio̍h êng-iāu Siōng-Chú, lán tio̍h hō͘-siōng chiap-la̍p chhin-chhiūⁿ Ki-tok ū chiap-la̍p lín. 8 Góa kā lín kóng, Ki-tok chò siū kat-lé ê lâng ê chhe-ēng, sī beh hián-sī Siōng-Chú ê sìn-si̍t, lâi chèng-bêng Siōng-Chú tùi chó͘-sian ê èng-ín ū si̍t-hiān. 9 Mā beh hō͘ Gōa-pang-lâng in-ūi Siōng-Chú ê liân-bín kui êng-kng hō͘ Siōng-Chú. Chiàu Sèng-keng só͘ kì-chài, kóng, "Só͘-í, góa beh tī Gōa-pang-lâng ê tiong-kan chheng-chàn Lí, Chhiùⁿ-koa o-ló Lí ê miâ."( chù: SPh 18:49) 10 Koh kóng, "Gōa-pang-lâng ah, tio̍h kah Siōng-Chú ê chú-bîn chò-hóe hoaⁿ-hí."( chù: SBK 32:43) 11 Iū-koh kóng: Só͘-ū ê Gōa-pang-lâng tio̍h chheng-chàn Chú, Bān-bîn tio̍h o-ló I.( chù: SPh 117:1) 12 Í-sài-a koh-chài kóng: Iâ-se ê kin ē puh-íⁿ, I ē heng-khí lâi thóng-tī gōa-pang, Gōa-pang-lâng ē kā ǹg-bāng khǹg tī i ê sin-chiūⁿ.( chù: ISA 11:10) 13 Goān sù ǹg-bāng ê Siōng-Chú hō͘ lín tùi sìn lâi chhiong-móa ta̍k-chióng ê hoaⁿ-hí kah pêng-an, koh hō͘ lín tùi Sèng-Sîn ê koân-lêng chhiong-móa ǹg-bāng! 14 Pó-lô ê Soan-kàu Sú-bēng Chhin-ài ê hiaⁿ-tī chí-mōe, góa khak-sìn lín hui-siông siān-liông, chhiong-móa ta̍k-khoán ê tì-sek, koh ē-hiáu hō͘-siōng khoàn-bián. 15 M̄-koh góa hó-táⁿ siá chit-tiuⁿ phoe hō͘ lín, kā lín thê-chhéⁿ kúi-tiám, in-ūi Siōng-Chú ū sù góa te̍k-pia̍t ê un-tián, 16 thang tī Gōa-pang-lâng ê tiong-kan ho̍k-sāi Ki-tok Iâ-so͘, soan-káng Siōng-Chú ê hok-im, thang hō͘ Gōa-pang-lâng chiâⁿ-chò Siōng-Chú só͘ chiap-la̍p, Sèng-Sîn só͘ sèng-hòa ê chè-mi̍h. 17 In-ūi góa ū kah Ki-tok Iâ-so͘ kiat-liân, só͘-í góa khòaⁿ ho̍k-sāi Siōng-Chú chò êng-kng. 18 Pa̍t-hāng tāi-chì góa m̄-káⁿ kóng, chí ū kóng chi̍t-hāng, chiū-sī Ki-tok thong-kòe góa ê giân-gí kah hêng-ûi, 19 ēng sîn-jiah kah kî-sū ê lêng-le̍k í-ki̍p Sèng-Sîn ê lêng-le̍k, hō͘ Gōa-pang-lâng sūn-ho̍k Siōng-Chú. Góa án-ne tùi Iâ-lō͘-sat-léng it-ti̍t kàu Í-lī-lí-kó͘ ê tē-khu, góa ta̍k só͘-chāi khì thoân Ki-tok ê hok-im. 20 Góa li̍p-chì beh khì iáu m̄-bat thiaⁿ-tio̍h Ki-tok ê miâ ê só͘-chāi thoân hok-im, chiah bē kah pa̍t-lâng ê kang-chok tiông-ho̍k. 21 Chiàu Sèng-keng só͘ kì-chài kóng: M̄-bat thiaⁿ-tio̍h I ê sìn-sit ê lâng ē khòaⁿ-tio̍h, M̄-bat thiaⁿ-tio̍h I ê lâng ē bêng-pe̍k.( chù: ISA 52:15)

Pó-lô Kè-ōe Hóng-būn Lô-má
22 In-ūi án-ne, góa put-sî tú-tio̍h chó͘-tòng, bē-tàng khì lín hia. 23 Kì-jiân tī chiah-ê tē-khu, góa í-keng oân-sêng góa ê kang-chok, koh in-ūi kúi-nā-nî lâi góa it-ti̍t ǹg-bāng ē-tàng khì lín hia. 24 Chit-piàn beh khì Se-pan-gâ ê sî, góa ǹg-bāng keng-kòe lín hia ê sî khì khòaⁿ lín. Seng kah lín ū kúi-ji̍t-á ê kau-pôe liáu-āu chiah hō͘ lín hoan-sàng khì Se-pan-gâ. 25 M̄-koh góa chit-má tio̍h khì Iâ-lō͘-sat-léng kiong-kip hia ê sìn-tô͘ ê su-iàu. 26 In-ūi Má-kî-tùn kah A-kai-a ê kàu-hōe hoaⁿ-hí hiàn chi̍t-pit chîⁿ lâi pang-chō͘ Iâ-lō͘-sat-léng chi̍t-kóa sàn-chhiah ê sìn-tô͘. 27 Che sī in hoaⁿ-hí chò ê tāi-chì, kî-si̍t mā sī in só͘ khiàm ê chè. Kì-jiân Iû-thài sìn-tô͘ ū kah Gōa-pang-lâng chò-hóe ū-hūn tī in lêng-sèng ê hok-khì, gōa-pang ê sìn-tô͘ eng-kai tī bu̍t-chit-siōng kā in pang-chō͘. 28 Tán góa chit-hāng tāi-chì pān hó-sè, chiong bō͘-khoán ê chit-pit chîⁿ kau hō͘ in liáu-āu, chiah keng-kòe lín hia khì Se-pan-gâ. 29 Góa chai góa khì kìⁿ lín ê sî, ē chiong Ki-tok hong-sēng ê chiok-hok tòa khì hō͘ lín. 30 Hiaⁿ-tī chí-mōe ah, góa tùi lán ê Chú Iâ-so͘ Ki-tok, mā tùi Sèng-Sîn ê thiàⁿ, chhiáⁿ lín chīn-la̍t kah góa chò-hóe kî-kiû Siōng-Chú, 31 kiù góa thoat-lī Iû-thài tē-khu hiah-ê m̄-sìn ê lâng ê hām-hāi, koh hō͘ góa ūi-tio̍h Iâ-lō͘-sat-léng só͘ chò kiong-kip ê tāi-chì tit-tio̍h sìn-tô͘ chiap-la̍p. 32 Án-ne góa ē-tàng chiàu Siōng-Chú ê chí-ì hoaⁿ-hoaⁿ hí-hí khì lín hia, kah lín chò-hóe hióng-siū an-hioh. 33 Goān siúⁿ-sù pêng-an ê Siōng-Chú kah lín tông-chāi. Amen!