《巴克禮普世版聖經（試讀本）》

 | | | 轉寄

巴克禮普世版（試讀本） 哥林多前書第一章

作者 巴克禮普世版小組 2015.01.04

Chhéng-an Kah Kám-siā
1 Góa sī Pó-lô, hōng Siōng-Chú ê chí-ì siū tiàu, chò Iâ-so͘ Ki-tok ê sù-tô͘. Góa kah hiaⁿ-tī Só͘-thê-nî, 2 siá-phoe hō͘ tī Ko-lîm-to Siōng-Chú ê kàu-hōe, chiū-sī hiah-ê tī Ki-tok Iâ-so͘ chiâⁿ-sèng, siū-tiàu chiâⁿ-chò sìn-tô͘, í-ki̍p ta̍k só͘-chāi kiû-kiò lán ê Chú Iâ-so͘ Ki-tok ê miâ ê lâng. Ki-tok sī in ê Chú, mā sī lán ê Chú. 3 Goān lín tùi lán ê Thiⁿ-Pē Siōng-Chú kah Chú Iâ-so͘ Ki-tok tit-tio̍h un-tián kah pêng-an.

Tī Ki-tok Ni̍h ê Chiok-hok
4 Góa siông-siông thè lín kám-siā góa ê Siōng-Chú, sī ūi-tio̍h Siōng-Chú ê un-tián ū thong-kòe Iâ-so͘ Ki-tok siúⁿ-sù hō͘ lín. 5 Chiū án-ne, lín ta̍k-hāng thong-kòe Ki-tok tit-tio̍h hù-chiok, chhiong-móa ta̍k-hāng ê kháu-châi kah tì-sek. 6 Ki-tok ê sìn-sit í-keng tī lín ê tiong-kan kiàn-li̍p kian-kò͘ ê ki-chhó͘, 7 hō͘ lín teh thèng-hāu lán ê Chú Iâ-so͘ Ki-tok ê hián-hiān ê sî lóng bô khiàm sím-mi̍h un-sù. 8 I mā ē hō͘ lín kian-kò͘ ti̍t-kàu lán ê Chú Iâ-so͘ Ki-tok chài-lîm ê ji̍t-chí bô thang hō͘ lâng hiâm. 9 Siōng-Chú sī sìn-si̍t. I ho͘-tiàu lín lâi kah I ê Kiáⁿ lán ê Chú Iâ-so͘ Ki-tok kiat-liân.

Kàu-hōe ê Hun-cheng
10 Hiaⁿ-tī chí-mōe ah, taⁿ góa hōng lán ê Chú Iâ-so͘ Ki-tok ê miâ khǹg lín, kóng-ōe tio̍h it-tì, m̄-thang ū hun-cheng, tio̍h it-sim it-ì phō kāng-khoán ê bo̍k-phiau lâi thoân-kiat. 11 Chhin-ài ê hiaⁿ-tī chí-mōe, Kek-lâi ke-lāi ê lâng bat kā góa kóng, lín tiong-kan ū hun-cheng. 12 Góa ê ì-sù sī kóng lín ta̍k-lâng ū bô kāng-khoán ê kóng-hoat.Ū-ê kóng, "Góa sio̍k Pó-lô"; ū-ê kóng, "Góa sio̍k A-pho-lô"; ū-ê kóng, "Góa sio̍k Pí-tek", koh ū-ê kóng, "Góa sio̍k Ki-tok". 13 Ki-tok kám ū hō͘ lâng pun-khui? Pó-lô kám thè lín tèng si̍p-jī-kè? Lín hōng Pó-lô ê miâ niá-siū sé-lé? 14 Kám-siā Siōng-Chú, Kek-lí-sū-pò͘ kah Ka-iû í-gōa, góa m̄-bat kā lín tiong-kan jīm-hô lâng sé-lé. 15 Só͘-í bô-lâng ē-tàng kóng, lín ū hōng góa ê miâ niá-siū sé-lé. 16 Tio̍h lah, góa mā ū kā Su-thê-hoán-à chi̍t ke ê lâng sé-lé, kî-tha ū kā pa̍t-lâng sé-lé á-bô, góa khiok bē kì-tit à. 17 Ki-tok bô chhe-phài góa kā lâng sé-lé, sī beh lâi thoân hok-im. Góa bô ēng tì-hūi ê giân-sû thoân, chiah bián hō͘ Ki-tok ê si̍p-jī-kè sit-khì ì-gī.

Ki-tok Sī Siōng-Chú ê Tōa-lêng Kah Tì-hūi
18 Si̍p-jī-kè ê tō-lí, hiah-ê tîm-lûn ê lâng khòaⁿ-chò gû-gōng, m̄-koh lán chiah-ê tit-kiù ê lâng khòaⁿ-chò sī Siōng-Chú ê tōa-lêng. 19 In-ūi Sèng-keng ū kì-chài: Góa beh siau-bia̍t tì-hūi ê lâng ê tì-hūi, Mā beh khì-sak chhong-bêng ê lâng ê chhong-bêng.( chù: ISA 29:14) 20 Án-ne tì-hūi ê lâng tī tó-ūi? Keng-ha̍k-kàu-su tī tó-ūi? Chit sè-kan hò͘ⁿ piān-lūn ê lâng tī tó-ūi? Siōng-Chú kám m̄-sī í-keng hō͘ sè-kan ê tì-hūi piàn-chò gû-gōng? 21 Kì-jiân sè-kan bē-tàng ēng in ê tì-hūi lâi jīn-bat Siōng-Chú, Siōng-Chú chiū ēng I ka-kī ê tì-hūi, hoaⁿ-hí sú-iōng goán só͘ thoân ê gû-gōng ê sìn-sit, lâi chín-kiù hiah-ê sìn ê lâng. 22 Iû-thài-lâng kiû sîn-jiah, Hi-lia̍p-lâng chhōe tì-hūi. 23 M̄-koh goán thoân siū-tèng si̍p-jī-kè ê Ki-tok. Chit-ê sìn-sit tùi Iû-thài-lâng sī chó͘-gāi, tùi Gōa-pang-lâng lâi kóng sī gû-gōng. 24 Tùi Siōng-Chú kéng-tiàu ê lâng lâi kóng, bô-lūn Iû-thài-lâng á-sī Hi-lia̍p-lâng, Ki-tok chiū-sī Siōng-Chú ê koân-lêng, sī Siōng-Chú ê tì-hūi. 25 In-ūi Siōng-Chú ê gû-gōng pí lâng khah ū tì-hūi, Siōng-Chú ê loán-jio̍k pí lâng khah ióng-chòng. 26 Hiaⁿ-tī chí-mōe ah, tio̍h ē-kì-tit lín siū-tiàu ê sî, chiàu sè-kan it-poaⁿ ê phiau-chún, lín bô kúi-ê lâng ū tì-hūi, bô kúi-ê lâng ū lêng-le̍k, bô kúi-ê lâng sio̍k siōng-liû kai-kip. 27 M̄-koh Siōng-Chú ēng sè-kan-lâng khòaⁿ-chò gōng ê tāi-chì lâi hō͘ tì-hūi ê lâng kiàn-siàu. Siōng-Chú mā ēng sè-kan-lâng khòaⁿ-chò loán-jio̍k ê tāi-chì lâi hō͘ ióng-chòng ê lâng kiàn-siàu. 28 Siōng-Chú mā ēng sè-kan-lâng só͘ khin-sī, hō͘ lâng khòaⁿ-bē-khí á-sī bô-lō͘-ēng ê tāi-chì, lâi phò-hoāi lâng só͘ khòaⁿ-tiōng ê tāi-chì. 29 Án-ne sè-kan-lâng chiū bô-lâng ē-tàng tī Siōng-Chú ê bīn-chêng khoa-kháu. 30 Siōng-Chú hō͘ lín kah Ki-tok Iâ-so͘ kiat-liân, hō͘ Ki-tok chiâⁿ-chò lán tùi Siōng-Chú lâi ê tì-hūi, koh hō͘ lán kah Siōng-Chú hô-hó, chiâⁿ-chò Siōng-Chú sèng-kiat ê chú-bîn, iū-koh hō͘ lán tit-tio̍h kiù-sio̍k. 31 Só͘-í chiàu Sèng-keng só͘ kì-chài: Ài-beh khoa-kháu ê lâng tio̍h ēng Chú lâi khoa-kháu.( chù: ILB 9:24)