《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第八章

作者 巴克禮普世版小組 2014.11.02

Sūn-ho̍k Sèng-Sîn ê Seng-oa̍h
1 Nā-sī án-ne, hiah-ê kah Ki-tok Iâ-so͘ kiat-liân ê lâng chiū bē siū tēng-chōe. 2 In-ūi thong-kòe Ki-tok Iâ-so͘ sù oa̍h-miā ê Sèng-Sîn ê hoat-chek, í-keng tháu-pàng góa thoat-lī chōe kah sí ê hoat-chek. 3 In-ūi jîn-sèng ê loán-jio̍k, lu̍t-hoat chò bē-kàu ê, Siōng-Chú ū chò-chiâⁿ. Siōng-Chú ūi-tio̍h beh kiù jîn-lūi thoat-lī chōe kah sí ê hoat-chek, I hō͘ ka-kī ê Kiáⁿ chhái-chhú kah lán kāng-khoán ū chōe ê pún-sèng,ēng I ê jio̍k-thé lâi sím-phòaⁿ jîn-lūi jio̍k-thé ê chōe, kā chōe tû-khì. 4 Siōng-Chú án-ne chò sī beh hō͘ lu̍t-hoat ê iau-kiû ē-tàng si̍t-hiān tī lán chiah-ê bô-koh chiàu jio̍k-thé, sī chiàu Sèng-Sîn ê ín-chhōa teh seng-oa̍h ê lâng. 5 In-ūi sūn-ho̍k jio̍k-thé pún-sèng ê lâng, ì-hiòng jio̍k-thé ê tāi-chì, sūn-ho̍k Sèng-Sîn ê lâng, ì-hiòng Sèng-Sîn ê tāi-chì. 6 Ì-hiòng jio̍k-thé ê kiat-kó sī sí, ì-hiòng Sèng-Sîn ê kiat-kó sī oa̍h-miā kah pêng-an. 7 Án-ne ì-hiòng jio̍k-thé sī kah Siōng-Chú tùi-te̍k, in-ūi bô sūn-ho̍k Siōng-Chú ê lu̍t-hoat, kî-si̍t mā bô hoat-tō͘ sūn-ho̍k. 8 Sūn-ho̍k jio̍k-thé pún-sèng ê lâng bē-tàng hō͘ Siōng-Chú hoaⁿ-hí. 9 Kì-jiân Siōng-Chú ê Sèng-Sîn ū tiàm-tī lín lāi-bīn, lín chiū m̄-sī sio̍k jio̍k-thé pún-sèng, sī sio̍k Sèng-Sîn. Lâng nā bô Ki-tok ê Sèng-Sîn chiū bô sio̍k tī Ki-tok. 10 Ki-tok nā tiàm-tī lín lāi-bīn, sui-jiân lín ê seng-khu in-ūi chōe sí, Sèng-Sîn hō͘ lín iáu-koh oa̍h-teh, in-ūi lín í-keng kah Siōng-Chú ū sì-chiàⁿ ê koan-hē. 11 Hō͘ Iâ-so͘ tùi sí-lâng tiong koh-oa̍h Hit-ūi ê Sèng-Sîn tiàm-tī lín lāi-bīn, chiū-sī hō͘ Ki-tok Iâ-so͘ tùi sí-lâng tiong koh-oa̍h Hit-ūi ē thong-kòe tiàm-tī lín lāi-bīn ê Sèng-Sîn ē hō͘ lín chù-tiāⁿ ē sí ê seng-khu tit-tio̍h oa̍h-miā. 12 Án-ne khòaⁿ khí-lâi, kok-ūi hiaⁿ-tī ah, lán ū khiàm-chè, m̄-koh m̄-sī khiàm jio̍k-thé pún-sèng ê chè, só͘-í lán seng-oa̍h tiong m̄-thang sūn-ho̍k jio̍k-thé pún-sèng. 13 Lín nā sūn-ho̍k jio̍k-thé ê chōe-sèng, lín it-tēng ē sí; lín nā khò Sèng-Sîn tû-khì chōe-sèng ê só͘-chò, chiū ē oa̍h teh. 14 Só͘-ū hō͘ Siōng-Chú ê Sèng-Sîn ín-chhōa ê lâng, lóng sī Siōng-Chú ê kiáⁿ-jî. 15 In-ūi lín tùi Siōng-Chú niá-siū ê Sèng-Sîn, m̄-sī beh hō͘ lín koh tńg-khì chò lô͘-lē, iáu seng-oa̍h tī kiaⁿ-hiâⁿ tiong; lín niá-siū ê Sèng-Sîn, sī beh hō͘ lín chiâⁿ-chò Siōng-Chú ê kiáⁿ-jî, chiū án-ne, lán thang tōa-siaⁿ hoah: "A-pa, Thiⁿ-Pē ah！" 16 Sèng-Sîn ka-kī kah lán ê lêng chò-hóe kiàn-chèng lán sī Siōng-Chú ê kiáⁿ-jî. 17 Kì-jiân chò kiáⁿ-jî, lán chiū-sī I ê hō͘-sû. Lán sī Siōng-Chú ê hō͘-sû, koh kah Ki-tok tâng chò hō͘-sû. Lán nā kah Iâ-so͘ tâng siū-khó͘, lán mā ē kah I chò-hóe niá-siū êng-kng.

Chiong-lâi ê Êng-kng
18 Góa siūⁿ lán chit-sî ê kan-khó͘ kah teh-beh tùi lán hián-bêng ê êng-kng bē pí-tit. 19 Siū-chō-bu̍t lóng pek-chhiat teh thèng-hāu Siōng-Chú chèng kiáⁿ-jî ê hián-hiān. 20 In-ūi siū-chō-bu̍t bē-tàng ta̍t-kàu siū-chō ê bo̍k-tek, m̄-sī chhut-tī in ê pún-ì, sī Siōng-Chú ê chí-ì, m̄-koh siū-chō-bu̍t iáu-teh ǹg-bāng, 21 chiū-sī ū chi̍t ji̍t in pún-sin mā beh siū tháu-pàng lâi thoat-lī ē pāi-hoāi ê khu-sok, thang kah Siōng-Chú ê kiáⁿ-jî hióng-siū êng-kng ê chū-iû. 22 Lán chai, só͘-ū siū-chō-bu̍t chit-má iáu-teh thó͘-khùi ai-kiò, ná chhin-chhiūⁿ teh keng-giām seng-sán ê thòng-khó͘. 23 M̄-nā siū-chō-bu̍t án-ne, liân lán chiah-ê tit-tio̍h Sèng-Sîn ê thâu-chúi kóe-chí ê lâng mā teh thó͘-khùi, teh thèng-hāu Siōng-Chú chiap-la̍p lán chò I ê kiáⁿ-jî, hō͘ lán kui-ê lâng tit-tio̍h sio̍k-hôe. 24 In-ūi lán tit-kiù sī tùi chit-khoán ê ǹg-bāng. Ǹg-bāng nā khòaⁿ-ē-tio̍h chiū m̄-sī ǹg-bāng. Khòaⁿ-ē-tio̍h ê ǹg-bāng, ná tio̍h koh khì ǹg-bāng? 25 Lán nā ǹg-bāng hit-ê khòaⁿ-bē-tio̍h-.ê, chiū ē jím-nāi thèng-hāu. 26 Sèng-Sîn mā chhin-chhiūⁿ án-ne, tī lán nńg-chiáⁿ ê sî kā lán hû-chhî, in-ūi lán m̄-chai eng-kai tio̍h án-chóaⁿ kî-tó chiah tio̍h, m̄-koh Sèng-Sîn ka-kī ēng lâng ēng ōe bē-tàng piáu-ta̍t ê thó͘-khùi teh thè lán kî-kiû. 27 Kàm-chhat lâng ê sim ê Siōng-Chú chai Sèng-Sîn ê ì-sù, in-ūi Sèng-Sîn sī chiàu Siōng-Chú ê ì-sù lâi thè sìn-tô͘ kî-kiû. 28 Lán chai, Siōng-Chú hō͘ hiah-ê thiàⁿ I ê lâng, chiū-sī chiàu I ka-kī ê chí-ì soán-tiàu ê, kah I tâng-kang, hō͘ bān-sū tùi in lóng ū lī-ek. 29 In-ūi Siōng-Chú tāi-seng kéng-soán ê lâng, mā tāi-seng tiāⁿ-tio̍h hō͘ in kah I ê Kiáⁿ ê hêng-siōng sio-kāng, thang hō͘ I ê Kiáⁿ tī chē-chē hiaⁿ-tī tiong chò Tōa-Kiáⁿ. 30 Hiah-ê ī-sian tiāⁿ-tio̍h ê lâng, Siōng-Chú mā kā in kéng-tiàu. Í-keng kéng-tiàu ê, I mā kā in soan-phòaⁿ chò gī-lâng, thang hō͘ I ê Kiáⁿ tī chin-chē hiaⁿ-tī ê tiong-kan chò Tōa-Kiáⁿ.

Siōng-Chú ê Thiàⁿ
31 Taⁿ kóng kàu chia lán beh koh kóng sím-mi̍h? Siōng-Chú nā ūi lán, siáⁿ-lâng ē kah lán chò tùi-te̍k? 32 Siōng-Chú kì-jiân bô sioh ka-kī ê Kiáⁿ, ūi-tio̍h lán chèng-lâng hi-seng, kám bē sòa chiong bān-bu̍t pe̍h-pe̍h sù hō͘ lán? 33 Siáⁿ-lâng ē-tàng khòng-kò Siōng-Chú ê soán-bîn? Soan-phòaⁿ in chò gī-lâng ê sī Siōng-Chú. 34 Nā án-ne, siáⁿ-lâng ē-tàng kā in tēng-chōe? M̄-sī Ki-tok Iâ-so͘, I í-keng sí à. Siōng-Chú koh hō͘ I tùi sí-lâng tiong koh oa̍h khí-lâi, chē tī Siōng-Chú ê chiàⁿ-pêng, mā thè lán kî-kiû. 35 Siáⁿ-lâng ē-tàng chhiat-tn̄g Ki-tok tùi lán ê thiàⁿ? Kám sī hoān-lān, sī khùn-khó͘, sī pek-hāi, sī iau-gō, sī thǹg-pak-theh, sī gûi-hiám, á-sī hō͘ lāi-to thâi-sí? 36 Chiàu Sèng-keng só͘ kì-chài, kóng, "Ūi-tio̍h lí ê iân-kò͘, goán kui-ji̍t bīn-tùi sí-bông ê ui-hia̍p. Goán hō͘ lâng khòaⁿ-chò teh-beh hō͘ lâng thâi ê iûⁿ."( chù: SPh 44:22) 37 Lóng m̄-sī, tī chiah-ê só͘-ū ê tāi-chì, lán tùi thiàⁿ lán ê Siōng-Chú tek-sèng kah ū chhun. 38 In-ūi góa khak-sìn bô-lūn sī sí, sī oa̍h, sī thiⁿ-sài, sī chiáng-koân-chiá, sī hiān-kim ê, sī chiong-lâi-.ê, ū koân-lêng ê, 39 sī thiⁿ-téng, sī tē-chiūⁿ, á-sī jīm-hô siū-chō-bu̍t, lóng bē-tàng chhiat-tn̄g Siōng-Chú thong-kòe Chú Ki-tok Iâ-so͘ tùi lán ê thiàⁿ!