《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第九章

作者 巴克禮普世版小組 2014.11.09

Siōng-Chú ê Soán-bîn
1 Góa chò chi̍t-ê sio̍k Ki-tok ê lâng kóng-ōe si̍t-chāi bô pe̍h-chha̍t, góa ê liông-sim siū Sèng-Sîn kám-tōng kā góa chò kiàn-chèng. 2 Góa hui-siông pi-siong, sim-lāi thòng-khó͘ bô soah. 3 Góa koan-sim góa ê tông-pau, góa ê kut-jio̍k chì-chhin. Nā sī ūi-tio̍h in tio̍h siū Siōng-Chú chiù-chó͘ pàng-sak, tio̍h kah Ki-tok keh-lī mā kam-goān. 4 In sī Í-sek-lia̍t bîn-cho̍k. Siōng-Chú kéng-soán in chò kiáⁿ-jî, sù in êng-kng, kah in li̍p-iok, koh hō͘ in lu̍t-hoat, chông-pài ê lé-gî kah èng-ín. 5 In sī kok cho̍k-tiúⁿ ê kiáⁿ-sun, chiàu hiat-thóng lâi kóng, Ki-tok mā kah in kāng-cho̍k. Goān chhiau-oa̍t bān-bu̍t ê Siōng-Chú tit-tio̍h o-ló kàu bān sè-tāi. A-men. 6 Án-ne m̄-sī kóng Siōng-Chú ê èng-ín bô si̍t-hiān, in-ūi m̄-sī só͘-ū ê Í-sek-lia̍t-lâng lóng sī Siōng-Chú ê soán-bîn. 7 A-pek-la̍h-hán ê kiáⁿ-sun mā bô lóng sī èng-ín ê kiáⁿ-jî. Siōng-Chú bat tùi A-pek-la̍h-hán kóng, “Tùi Í-sat seⁿ-.ê chiah ē-tàng kiò-chò lí ê kiáⁿ-sun.”( chù: CSK 21:12) 8 Án-ne sī kóng, m̄-sī jio̍k-thé seⁿ ê kiáⁿ chiū sǹg-chò Siōng-Chú ê kiáⁿ-jî. Chí-ū tùi Siōng-Chú ê èng-ín seⁿ ê chiah sǹg-chò Siōng-Chú ê kiáⁿ-sun. 9 In-ūi èng-ín ê ōe sī án-ne kóng, "Mê-nî chit-ê sî, Góa ē koh lâi, Sat-la̍h beh seⁿ chi̍t-ê cha-po͘-kiáⁿ.”( chù: CSK 18:10, 14) 10 M̄-nā án-ne, Lī-pek-ka seⁿ ê nn̄g-ê kiáⁿ mā sī tùi kāng chi̍t-ê lâng, chiū-sī lán ê chó͘-sian Í-sat lâi hoâi-īn. 11 Siōng-Chú ūi-tio̍h beh piáu-bêng I kéng-soán lâng, sī chiàu I pún-sin tiāⁿ-tio̍h ê bo̍k-tek, m̄-sī kin-kì lâng ê hêng-ûi, chiū tī chi̍t-tùi siang-seⁿ-á-kiáⁿ iáu-bōe chhut-sì, iáu-bōe chò hó-pháiⁿ-sū í-chêng, 12 chiū kā Lī-pek-ka kóng, "Tōa-hàn-ê ē ho̍k-sāi sè-hàn-ê."( chù: CSK 25:23) 13 Chiàu Sèng-keng kì-chài: Góa kah-ì Ngá-kok, bô kah-ì Í-sò.( chù: MLK 1:2-3) 14 Án-ne lán beh án-chóaⁿ kóng? Siōng-Chú bô kong-tō sī-bô? Choa̍t-tùi m̄-sī. 15 In-ūi I bat tùi Mô͘-se kóng, ”Góa beh liân-bín góa ài liân-bín ê lâng, góa beh thé-thiap góa ài thé-thiap ê lâng.”( chù: CAK 33:19) 16 Khó-kiàn Siōng-Chú ê kéng-soán sī kin-kì I ê liân-bín, m̄-sī kin-kì lâng ê ì-goān á-sī ló͘-le̍k. 17 Sèng-keng kì-chài Siōng-Chú ū tùi Hoat-ló kóng, “Góa siat-li̍p lí ê bo̍k-tek sī beh ēng lí lâi hián-bêng góa ê koân-lêng, hō͘ Góa ê miâ thoân kàu choân sè-kài.”( chù: CAK 9:16) 18 Só͘-í Siōng-Chú beh liân-bín sím-mi̍h lâng chiū liân-bín sím-mi̍h lâng, beh hō͘ sím-mi̍h lâng sim-ngē chiū hō͘ sím-mi̍h lâng sim-ngē.

Siōng-Chú ê Siū-khì kah Liân-bín
19 Án-ne lí ē mn̄g góa kóng, "Chóaⁿ-iūⁿ Siōng-Chú iáu-teh chek-pī lâng? siáⁿ-lâng káⁿ hoán-khòng I ê chí-ì?" 20 Lí chit-ê lâng sǹg sím-mi̍h, lí káⁿ kah Siōng-Chú tú-chhùi? Siū-chō-bu̍t kám ē tùi chhòng-chō-chiá kóng,“Lí ná-ē kā góa chō kah án-ne?”( chù: ISA 29:16; 45:9) 21 Pêⁿ-pêⁿ chi̍t-tè liâm-thô͘, kám-m̄ sī chhut-chāi sio-hûi sai-hū beh kā-i lia̍p-chò kùi-khì ê khì-kū, á-sī chi̍t-tè chho͘-sio̍k ê khì-kū? 22 Siōng-Chú só͘-chò mā chhin-chhiūⁿ án-ne, I sui-jiân ē-tàng sûi-sî chiàu I ê ì-sù hián-bêng I ê siū-khì, koh hō͘ lâng chai I ê koân-lêng, iáu-koh tōa-tōa khoan-iông jím-nāi hiah-ê jiá I siū-khì ê lâng, chiū-sī hiah-ê eng-kai bia̍t-bông ê lâng. 23 Che sī ūi-tio̍h beh hō͘ lâng bêng-pe̍k, Siōng-Chú beh siúⁿ-sù hong-sēng ê êng-iāu, hō͘ hiah-ê tit-tio̍h liân-bín ê tùi-siōng, chiū-sī Siōng-Chú só͘ ī-pī, beh lâi niá-siū I ê êng-kng hiah-ê lâng. 24 Lán lóng sī I ho͘-tiàu ê lâng, m̄-nā tùi Iû-thài-lâng, mā tùi Gōa-pang-lâng ho͘-tiàu. 25 Chiàu I tī Hô-se-a-su só͘ kóng,“Hiah-ê m̄-sī Góa ê chú-bîn, Góa beh chheng in chò ‘Góa ê chú-bîn'; Hiah-ê m̄-sī Góa só͘ ài ê, Góa beh chheng in chò‘Góa só͘ ài ê'.( chù: HSA 2:23) 26 Tī khah-chá bat kā in kóng 'Lín m̄-sī Góa ê chú-bîn' ê só͘-chāi, kāng-khoán tī hia in beh kiò-chò 'éng-oa̍h Siōng-Chú ê kiáⁿ.'”( chù: HSA 1:10) 27 Koan-hē Í-sek-lia̍t-lâng, Í-sài-a bat soan-pò͘ kóng,“Í-sek-lia̍t ê kiáⁿ-sun, sui-jiân sò͘-ba̍k chhin-chhiūⁿ hái-soa hiah-ni̍h chē, beh tit-tio̍h kiù-.ê, sī só͘ chhun ê chió-sò͘ niā-niā. 28 In-ūi Chú tī tē-chiūⁿ beh chin-kín koh thiat-té lâi chip-hêng sím-phòaⁿ.”( chù: ISA 10:22-23 LXX) 29 Tú chhin-chhiūⁿ Í-sài-a bat kóng,“Nā m̄-sī bān-kun ê Chú kā lán lâu chi̍t-kóa kiáⁿ-sun chò chéng, lán chá to̍h chhin-chhiūⁿ Só͘-to-má kah Gô-mô͘-la̍h siū húi-bia̍t ā.”( chù: ISA 1:9)

Í-sek-lia̍t-lâng Kah Hok-im
30 Án-ne lán beh án-chóaⁿ kóng? Gōa-pang-lâng bô tui-kiû kah Siōng-Chú ê hô-ha̍p koan-hē, tian-tò thong-kòe sìn lâi tit-tio̍h kah Siōng-Chú ê hô-ha̍p koan-hē. 31 M̄-koh Í-sek-lia̍t-lâng phah-piàⁿ tui-kiû tùi lu̍t-hoat lâi kah Siōng-Chú ū hô-ha̍p ê koan-he, kiat-kó mā bô tit-tio̍h. 32 Ná-ē án-ne? In-ūi in bô tùi sìn, sī tùi khò in ê hêng-ûi. Kiat-kio̍k sī in khì that-tio̍h hit-tè hō͘ lâng poa̍h-tó ê chio̍h-thâu. 33 Sèng-keng ū án-ne kì-chài,“Lí khòaⁿ, Góa chiong ē hō͘ lâng that-tio̍h ê chio̍h, ē hō͘ lâng poa̍h-tó ê tōa-chio̍h, khǹg tī Sek-an, m̄-koh sìn-khò I ê lâng bē tú-tioh sit-bāng.”( chù: ISA 28:16; 8:14)