《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第七章

作者 巴克禮普世版小組 2014.10.26

Ēng Hun-in Chò Lē
1 Hiaⁿ-tī chí-mōe ah, góa taⁿ sī tùi lín bat lu̍t-hoat ê lâng teh kóng. Lín kám m̄-chai, lâng oa̍h-teh chiah siū lu̍t-hoat koán-hat? 2 Tùi chi̍t-ê ū kiat-hun ê cha-bó͘-lâng lâi kóng, tiōng-hu oa̍h-teh ê sî chiah siū lu̍t-hoat ê sok-pa̍k lâi kah i ê tiōng-hu kiat-liân. Tiōng-hu nā sí khì chiū bô koh siū chit-ê lu̍t-hoat ê sok-pa̍k. 3 Só͘-í tiōng-hu iáu oa̍h-teh, nā kah pa̍t-ê cha-po͘-lâng tòa chò-hòe, chiū ē hō͘ lâng kiò chò îm-hū. Tiōng-hu nā sí-khì, chiū tit-tio̍h chū-iû, thoat-lī chit-ê lu̍t-hoat ê sok-pa̍k, sui-jiân kah pa̍t-ê cha-po͘-lâng tòa chò-hóe, mā m̄-sī îm-hū. 4 Chhin-ài ê hiaⁿ-tī chí-mōe, chhin-chhiūⁿ án-ne, lín í-keng kah Ki-tok ê seng-khu kiat-liân, kah lu̍t-hoat toān-choa̍t koan-hē, bô koh siū i ê sok-pa̍k, só͘-í lín chit-má sī kui-sio̍k tī Hit-ūi tùi sí koh-oa̍h ê Ki-tok, I beh hō͘ lán thang ūi-tio̍h Siōng-Chú kiat hó kóe-chí. 5 Lán chiàu jio̍k-thé ê pún-sèng teh oa̍h ê sî, lu̍t-hoat kek-khí lán hoān-chōe ê io̍k-liām, tī lán seng-khu pah-thé teh ūn-chok, kiat sí-bông ê kóe-chí. 6 M̄-koh, chit-má lán í-keng thoat-lī lu̍t-hoat, bô koh siū i ê sok-pa̍k. Án-ne, lán ho̍k-sāi Siōng-Chú, m̄-sī chiàu lu̍t-hoat ê kū hong-sek, sī chiàu Sèng-Sîn ê sin hong-sek.

Lu̍t-hoat Kah Chōe
7 Án-ne lán beh án-chóaⁿ kóng? Lu̍t-hoat kám sī chōe? Choa̍t-tùi m̄-sī, m̄-koh nā bô tùi lu̍t-hoat, góa chiū m̄-chai chōe sī sím-mi̍h, in-ūi lu̍t-hoat nā bô kóng, "M̄ thang tham-sim, góa chiū m̄-chai tham-sim sī sím-mi̍h."( chù: CAK 20:17; SBK 5:21) 8 Chōe lī-iōng kài-bēng tī góa ê sim-lāi ín-khí ta̍k-chióng ê pháiⁿ io̍k-liām. Nā-bô lu̍t-hoat, chōe chiū bô chok-iōng. 9 Chêng bô lu̍t-hoat, góa mā teh oa̍h. Kài-bēng chi̍t-ē lâi, chōe chiū oa̍h khí-lâi, góa soah sí-khì. 10 Kài-bēng pún-lâi sī beh hō͘ lâng ū oa̍h-miā, m̄-koh chiàu góa ê thé-giām, tian-tò sī hāi lâng khì sí. 11 In-ūi chōe chhōe ki-hōe lī-iōng kài-bēng khi-phiàn góa, mā lī-iōng kài-bēng hāi-sí góa. 12 Lu̍t-hoat pún-sin sī sîn-sèng, kài-bēng mā sī sîn-sèng, kong-chèng, koh liông-siān. 13 Nā-sī án-ne, hit-ê liông-siān ê hāi-sí góa sī-bô? Choa̍t-tùi m̄-sī! Sī chōe thong-kòe hit-ê liông-siān lâi hāi-sí góa, hō͘ chōe ê pún-chit hián-lō͘, chiū án-ne, chōe lī-iōng kài-bēng hō͘ i ke̍k-kî ok-to̍k ê pún-chit koh-khah hián-lō͘ chhut-lâi.

Lâng ê Nn̄g-chióng Pún-sèng
14 Lán chai lu̍t-hoat sī lêng-sèng ê, m̄-koh góa sī sio̍k jio̍k-thé ê, í-keng bē hō͘ chōe chò lô͘-lē. 15 Góa bē liáu-kái góa ka-kī ê só͘-chò, in-ūi góa ài chò ê, bô khì chò, tian-tò khì-chò góa bô ài chò-.ê. 16 Góa nā khì chò góa bô ài chò ê, chiū-sī tông-ì chit-ê lu̍t-hoat sī hó. 17 Góa án-ne chò, kî-si̍t m̄-sī góa teh chò, sī tiàm-tī góa sim-lāi ê chōe teh chò. 18 Góa chai góa ê pún-sèng lāi-bīn bô liông-siān. Góa ū chò-hó ê ì-goān, m̄-koh bô chò hó ê khùi-la̍t. 19 Góa bô khì chò góa só͘ ì-ài ê hó, tian-tò khì chò góa bô ì-ài ê pháiⁿ. 20 Góa nā chò góa bô ì-ài ê pháiⁿ, m̄-sī góa pún-sin teh chò, sī tiàm-tī góa lāi-bīn ê choe teh chò. 21 Án-ne góa ū hoat-hiān chi̍t-ê hoat-chek, chiū-sī tng góa ài chò hó ê sî, pháiⁿ chiū kā góa tîⁿ-teh. 22 Góa lāi-sim ê chū-ngó͘ ì-ài Siōng-Chú ê lu̍t-hoat, 23 m̄-koh góa khòaⁿ, tī góa ê seng-khu ū lēng-gōa chi̍t-ê hoat-chek teh kah góa lāi-sim ê hoat-chek kau-chiàn, hāi góa khut-ho̍k tī góa seng-khu lāi-bīn ê chōe ê hoat-chek. 24 Góa chò-lâng ná-ē hiah chhi-chhám! siáⁿ-lâng ē-tàng kiù góa thoat-lī hit-ê chù-tiāⁿ ē sí ê seng-khu? 25 Kám-siā Siōng-Chú, thong-kòe Chú Iâ-so͘ Ki-tok lâi kiù góa! Án-ne góa ê lāi-sim sī sūn-ho̍k Siōng-Chú ê lu̍t-hoat, m̄-koh góa ê jio̍k-thé sī sūn-ho̍k chōe ê hoat-chek.