《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第四章

作者 巴克禮普世版小組 2014.10.05

Ēng A-pek-la̍h-hán Chò Bô͘-hoān
1 Án-ne kah lán ū hiat-thóng koan-hē ê chó͘-sian A-pek-la̍h-hán, i ū tit-tio̍h sím-mi̍h? Lán beh án-chóaⁿ kóng? 2 A-pek-la̍h-hán nā tùi hêng-ûi lâi hō͘ Siōng-Chú khòaⁿ-chò gī-lâng, i chiū ū lí-iû thang khoa-kháu. M-koh tī Siōng-Chú bīn-chêng, i bô sím-mih thang khoa-kháu. 3 In-ūi Sèng-keng ū án-ne kóng:“ A-pek-la̍h-hán sìn Siōng-Chú, só͘-í Siōng-Chú chiū kā i khòaⁿ-chò gī-lâng."( chù: CSK 15:6) 4 Kang-lâng tit-tio̍h kang-chîⁿ bô sǹg-chò sī un-tián, he sī i eng-kai tit-.ê. 5 M̄-koh bô khò hêng-ûi, kan-taⁿ sìn Hit-ūi ē kā chōe-jîn soan-phòaⁿ bô chōe ê Siōng-Chú, in-ūi ū chit-ê sìn, Siōng-Chú chiū kā i kiò-chò gī-lâng. 6 Tāi-pi̍t mā ū kóng-khí chi̍t-ê bô chò sím-mi̍h chiū hō͘ Siōng-Chú khòaⁿ-chò gī-lâng hit-ê lâng ū hok-khì. I án-ne kóng, 7 “Kòe-sit tit-tio̍h sià-bián, chōe-kòa tit-tio̍h siau-tû ê lâng, si̍t-chāi ū hok-khì! 8 Chú bô kā i tēng-chōe ê lâng si̍t-chāi ū hok-khì!”(SPh 32:1-2) 9 Taⁿ, chit-ê hok-khì sī chí-ū beh hō͘ ū siū kat-lé ê lâng sī-bô? Á-sī mā beh hō͘ bô siū kat-lé ê lâng? Lán ū kóng,“A-pek-la̍h-hán in-ūi ū sìn Siōng-Chú, Siōng-Chú chiū kā i khòaⁿ-chò gī-lâng.” 10 A-pek-la̍h-hán sī sím-mi̍h sî-chūn hō͘ Siōng-Chú khòaⁿ-chò gī-lâng? Sī siū kat-lé í-chêng á-sī í-āu? Sī siū kat-lé í-chêng, m̄-sī í-āu. 11 Āu-lâi i ū siū kat-lé, chit-ê kat-lé sī chi̍t-chióng kì-hō, chèng-si̍t i iáu-bōe siū kat-lé í-chêng chiū in-ūi ū sìn Siōng-Chú, hō͘ Siōng-Chú kā i jīn-tēng chò gī-lâng. só͘-í, tùi hiah-ê bô siū kat-lé, in-ūi ū sìn soah hō͘ Siōng-Chú jīn-tēng chò gī-lâng ê lâng lâi kóng, A-pek-la̍h-hán chiâⁿ-chò hiah-ê bô siū kat-lé ê sìn-tô͘ ê chó͘-sian. 12 I mā-sī siū kat-lé ê lâng ê chó͘-sian, in m̄-nā ū siū kat-lé, mā-ū chun-chiàu lán ê chó͘-sian A-pek-la̍h-hán iáu-bōe siū kat-lé í-chêng to̍h ū ê sìn-sim, chò bô͘-hoān teh seng-oa̍h.

Niá-siū Siōng-Chú ê Èng-ún
13 Siōng-Chú èng-ín A-pek-la̍h-hán, beh hō͘ i kah i ê kiáⁿ-sun sêng-chiap chit-ê sè-kài. Chit-ê èng-ín, m̄-sī thong-kòe lu̍t-hoat, sī thong-kòe sìn lâi tit-tio̍h Siōng-Chú chheng i chò gī-lâng. 14 Nā chun-hêng lu̍t-hoat ê lâng chiah ē-tàng sêng-chiap Siōng-Chú ê èng-ín, hit-khoán ê sìn-gióng sī ū-ná-bô, hit-ê èng-ín mā bô lō͘-ēng. 15 Lu̍t-hoat ē ín-khí Siōng-Chú ê siū-khì. Nā bô lu̍t-hoat chiū bô ûi-hoān lu̍t-hoat ê tāi-chì. 16 Só͘-í èng-ín sī ēng sìn chò kin-kì. Che-sī beh pó-chèng èng-ín sī chhut-tī Siōng-Chú pe̍h-pe̍h ê un-tián, beh hō͘ A-pek-la̍h-hán só͘-ū ê kiáⁿ-sun, m̄-nā sī ū siū kat-lé ê, mā beh hō͘ hiah-ê kah A-pek-la̍h-hán kāng-khoán ū sìn-khò Siōng-Chú ê lâng. I sī lán chèng-lâng ê chó͘-sian. 17 Chiàu Sèng-keng só͘ kì-chài:“óa siat-li̍p lí chò bān-bîn ê chó͘-sian.( chù: CSK 17:5) A-pek-la̍h-hán siong-sìn ē hō͘ sí-lâng koh-oa̍h, ē tùi bô chhòng-chō ū ê Siōng-Chú, chiū tùi I niá-siū èng-ín. 18 I tī bô ǹg-bāng ê sî, iáu-koh phō-tio̍h ǹg-bāng, siong-sìn i ē chiâⁿ-chò bān-bîn ê chó͘-sian, chiàu só͘ èng-ín ê ōe kóng, “Lí ē ū chin-chē kiáⁿ-sun.” ( chù: CSK 15:5) 19 Hit-sî i í-keng chiâⁿ-pah hòe. I chai-iáⁿ ka-kī ê seng-khu soe-jio̍k kah teh-beh sí-khì, Sat-la̍h mā í-keng bē seⁿ-kiáⁿ, m̄-koh A-pek-la̍h-hán bô in-ūi án-ne sit-khì sìn-sim. 20 I tùi Siōng-Chú ê èng-ín bô giâu-gî, sìn-sim hoán-tńg ná kian-tēng, chiong êng-kng kui-hō͘ Siōng-Chú 21 I khak-sìn Siōng-Chú it-tēng ē si̍t-hiān I ka-kī ê èng-ín. 22 In-ūi ū chit-khoán ê sìn-sim, Siōng-Chú chiah kā i khòaⁿ-chò gī-lâng. 23 M̄-koh "Kā i khòaⁿ-chò gī-lâng”( chù: CSK 15:6) chit-kù ōe, m̄-sī kan-taⁿ ūi-tio̍h A-pek-la̍h-hán lâi siá. 24 Mā sī ūi-tio̍h lán chiah-ê lâng siá ê, in-ūi lán ū siong-sìn Siōng-Chú hō͘ lán ê Chú Iâ-so͘ tùi sí-lâng tiong koh-oa̍h, mā mā ē hō͘ Siōng-Chú khòaⁿ-chò gī-lâng. 25 Ūi-tio̍h lán ê chōe-kòa, Siōng-Chú chiong Iâ-so͘ kau hō͘ lâng hāi sí, koh ūi-tio̍h beh hō͘ lán kah Siōng-Chú ū hô-ha̍p ê koan-hē, Siōng-Chú ū hō͘ Iâ-so͘ koh-oa̍h.