《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第五章

作者 巴克禮普世版小組 2014.10.12

Tùi Sìn Kah Siōng-Chú Hô-hó
1 Kì-jiân lán tùi sìn hō͘ Siōng-Chú kiò-chò gī-lâng, chiū thong-kòe Chú Iâ-so͘ Ki-tok kah Siōng-Chú ū hô-hó ê koan-hē. 2 Thong-kòe lán ê sìn, Ki-tok ín-chhōa lán chìn-ji̍p hiān-chāi teh hióng-siū ê un-tián, hoaⁿ-hoaⁿ hí-hí ǹg-bāng thang hun-hióng Siōng-Chú ê êng-kng. 3 M̄-nā án-ne, lán tī khó͘-lān tiong, iû-goân tio̍h móa-sim hí-lo̍k, in-ūi lán chai, khó͘-lān seⁿ-chhut jím-nāi, 4 jím-nāi seⁿ-chhut láu-liān, láu-liān seⁿ-chhut ǹg-bāng, 5 Chit-ê ǹg-bāng bē hō͘ lán sit-bāng, in-ūi Siōng-Chú í-keng thong-kòe I siúⁿ-sù lán ê Sèng-Sîn chiong thiàⁿ koàn-ak lán ê sim. 6 In-ūi lán iáu loán-jio̍k ê sî, Ki-tok tī Siōng-Chú tiaⁿ-tio̍h ê ji̍t-chí, ūi-tio̍h ū chōe ê lâng sí. 7 Chin hán-tit ū-lâng ē thè gī-lâng sí, kiám-chhái ū-lâng káⁿ thè hó-lâng sí. 8 M̄-koh Siōng-Chú ū hián-bêng I tùi lán ê thiàⁿ, lán iáu sī chōe-jîn ê sî, ū Ki-tok thè lán sí. 9 Ki-tok ê lâu-hoeh hi-seng m̄-nā hō͘ lán chit-má kah Siōng-Chú ū hô-ha̍p ê koan-hē, koh-khah ē kiù lán thoat-lī Siōng-Chú ê siū-khì. 10 In-ūi lán iáu teh pōe-ge̍k Siōng-Chú ê sî, I hō͘ ka-kī ê Kiáⁿ thè lán sí, hō͘ lán kah I koh-chài hô-hó. Kì-jiân lán chit-má í-keng tit-tio̍h kah I hô-hó, lán ē koh-khah in-ūi Ki-tok ê oa̍h lâi tit-tio̍h chín-kiù. 11 M̄-nā án-ne, lán chit-má í-keng thong-kòe Chú Iâ-so͘ Ki-tok kah Siōng-Chú hô-hó, mā beh thong-kòe Iâ-so͘ Ki-tok ēng Siōng-Chú lâi khoa-kháu.

A-tong kah Ki-tok
12 Chōe tùi chi̍t-ê lâng chìn-ji̍p sè-kan, sí mā tòe teh ji̍p-lâi. Kiat-kó só͘-ū ê lâng lóng ē sí, in-ūi só͘-ū ê lâng lóng ū hoān-chōe. 13 Iáu-bōe ū lu̍t-hoat í-chêng, chōe to̍h í-keng tī sè-kan, m̄-koh in-ūi bô lu̍t-hoat, chōe chiū bô sǹg-chò sī chōe. 14 M̄-koh tùi A-tong kàu Mô͘-se hit-tōaⁿ kî-kan, sí teh chi-phòe jîn-lūi, liân bô hoān-tio̍h A-tong só͘ hoān ê chōe ê lâng mā lóng tio̍h sí. A-tong sī tòe-āu beh lâi Hit-ūi ê tùi-pí. 15 M̄-koh A-tong ê chōe-kòa kah Siōng-Chú pe̍h-pe̍h ê un-sù sī bē pí-tit, in-ūi nā tùi chi̍t-ê lâng ê chōe-kòa chèng-lâng lóng tio̍h sí, thong-kòe Iâ-so͘ Ki-tok chi̍t-ê lâng pe̍h-pe̍h siúⁿ-sù chèng-lâng ê un-tián it-tēng koh-khah hong-hù! 16 Siōng-Chú ê un-sù kah chi̍t-ê lâng hoān-chōe ê kiat-kó bē pí-tit. Chiàu sím-phòaⁿ, kan-taⁿ chi̍t-piàn ê kòe-sit to̍h phòaⁿ-koat ū chōe; m̄-koh chiàu pe̍h-pe̍h ê un-sù, chin-chē-piàn ê kòe-sit mā soan-phòaⁿ bô-chōe. 17 Nā in-ūi chi̍t-ê lâng ê hoān-chōe, choân jîn-lūi soah tio̍h siū sí ê chi-phòe, án-ne Iâ-so͘ Ki-tok só͘ sêng-chiū ê koh-khah tōa. Hiah-ê niá-siū Siōng-Chú hong-hù ê un-tián, chiū-sī pe̍h-pe̍h hō͘ Siōng-Chú soan-phòaⁿ bô-chōe ê lâng koh-khah ē-tàng thong-kòe Ki-tok lâi chi-phòe ka-kī ê sèⁿ-miā. 18 In-ūi chi̍t-ê lâng hoān-chōe, chèng-lâng lóng siū tēng-chōe. Kāng-khoán, in-ūi chi̍t-ê lâng gī ê hêng-ûi, chèng-lâng lóng tit-tio̍h sià-chōe kah oa̍h-miā. 19 In-ūi chi̍t-ê lâng ê pōe-ge̍k, chèng-lâng lóng chiâⁿ-chò chōe-jîn. Kāng-khoán, chi̍t-ê lâng sūn-ho̍k, chèng-lâng lóng chiâⁿ-chò gī-lâng. 20 Lu̍t-hoat ê chè-tēng, hō͘ chōe-kòa ke-thiⁿ, m̄-koh chōe-kòa ke-thiⁿ, Siōng-Chú ê un-tián koh-khah ke-thiⁿ. 21 Án-ne, chōe thong-kòe sí lâi chi-phòe, Siōng-Chú ê un-tián thong-kòe gī lâi chi-phòe, hō͘ lán tùi Chú Iâ-so͘ Ki-tok lâi tit-tio̍h éng-oán ê oa̍h-miā.