《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第三章

作者 巴克禮普世版小組 2014.09.28

1 Án-ne kóng khí-lâi, chò Iû-thài-lâng ū sím-mi̍h iu-tiám? Siū kat-lé ū sím-mi̍h lī-ek? 2 Tī ta̍k hong-bīn lóng ū chin-chē hó-chhù. Thâu-chi̍t-hāng chiū-sī Siōng-Chú ū chiong I ê ōe kau-thok in. 3 In tiong-kan nā ū-lâng bô sìn-si̍t, In ê bô sìn-si̍t kám ē hō͘ Siōng-Chú ê ōe piàn-chò bô sìn-si̍t? 4 Choa̍t-tùi bē! Sīm-chì só͘-ū ê lâng lóng pe̍h-chha̍t, Siōng-Chú mā it-tēng sī chin-si̍t-.ê. Chiàu Sèng-keng só͘ kì-chāi: "Lí kóng-ōe ê sî, lâng ē jīm-tēng Lí só͘ kóng ê sī tio̍h, Lí siū sím-phòaⁿ ê sî, mā ē tit-tio̍h sèng-lī.”( chù: SPh 51:4) 5 M̄-koh lán ê put-gī nā ē-tàng hián-bêng Siōng-Chú ê kong-gī, lán ē-tàng kóng sím-mi̍h lè? Góa chiàu sè-kan-lâng ê siūⁿ-hoat kóng, Siōng-Chú tùi lán siū-khì sī m̄-tio̍h, kám sī án-ne? 6 Choa̍t-tùi m̄-sī! Siōng-Chú nā m̄-sī kong-gī ê, I ná ē-tàng sím-phòaⁿ sè-kan? 7 Góa ê hi-ké nā bô láu-si̍t thang hō͘ Siōng-Chú ê chin-si̍t koh-khah bêng-hián, hō͘ I koh-khah ū êng-kng, góa ná-ē iáu-koh hō͘ I soan-phòaⁿ chò chōe-jîn? 8 Án-ne ná-ē m̄ kóng,“Lán lâi chò pháiⁿ thang hō͘ hó tāi-chì hián-bêng?”Khak-si̍t ū-lâng án-ne kóng lâi kā goán tiòng-siong, chit-khoán lâng eng-kai siū chek-hoa̍t.

Sè-kan Bô Gī-lâng
9 Án-ne, lán Iû-thài-lâng kám-ū pí Gōa-pang-lâng khah iu-siù? Bô, chi̍t-tiám-tiám-á to bô! In-ūi góa í-keng ū chí-chek Iû-thài-lâng kah Gōa-pang-lâng lóng siū chōe ê koán-hat. 10 Chiàu Sèng-keng só͘ kì-chài:“Lóng-bô gī-lâng, liân chi̍t-ê to bô! 11 Bô-lâng bêng-pe̍k sī-hui, mā bô-lâng chhōe-kiû Siōng-Chú. 12 Lâng-lâng lī-khui chiàⁿ-lō͘, lóng kiâⁿ bê-lō͘. Lóng bô-lâng chò hó, liân chi̍t-ê to bô.( chù: SPh 14:1-3) 13 In ê nâ-âu chhin-chhiūⁿ khui-khui ê bōng. In ê chhùi-chi̍h khi-chà lâng. In ê chhùi-tûn ū chôa ê to̍k.( chù: SPh 5:9) 14 In chhùi-lāi chhiong-móa ok-to̍k ê chiù-chó͘.( chù:SPh 10:7) 15 In cháu chin-kín, kip-beh thâi-lâng. 16 In keng-kòe ê lō͘ ū húi-bia̍t kah pi-chhám. 17 In m̄-chai ū pêng-an ê lō͘.( chù: ISA 59:7-8) 18 In gán-tiong bô kèng-ùi Siōng-Chú.”( chù: SPh 36:1) 19 Taⁿ lán chai lu̍t-hoat it-chhè ê iau-kiû sī tùi hiah-ê siū lu̍t-hoat koán-hat ê lâng teh kóng ê, hō͘ lâng bē-tàng piān-kái, hō͘ choân sè-kài lóng siū Siōng-Chú ê sím-phòaⁿ. 20 Só͘-í bô-lâng ē-tàng khò chun-siú lu̍t-hoat lâi hō͘ Siōng-Chú khòaⁿ-chò gī-lâng. Lu̍t-hoat sī beh hō͘ lâng chai-iáⁿ sím-mi̍h sī chōe.

Thong-kòe Sìn-gióng Lâi Kah Siōng-Chú Hô-hó
21 Taⁿ Siōng-Chú í-keng kā lán chí-sī, lán m̄-bián khò lu̍t-hoat chiū ē-tàng kah I kiàn-li̍p hô-ha̍p ê koan-hē. Lu̍t-hoat kah sian-ti mā lóng ū ūi-tio̍h chit-hāng tāi-chì chò kiàn-chèng. 22 Kah Siōng-Chú hô-ha̍p ê koan-hē sī thong-kòe sìn Iâ-so͘ Ki-tok. Siōng-Chú hō͘ só͘-ū sìn ê lâng lóng kāng-khoán tit-tio̍h chit-ê hô-ha̍p ê koan-hē. 23 In-ūi só͘-ū ê lâng lóng hoān-chōe, bē-tàng niá-siū Siōng-Chú ê êng-kng. 24 M̄-koh Siōng-Chú bô tiâu-kiāⁿ ê un-sù hō͘ lâng ē-tàng thong-kòe Ki-tok Iâ-so͘ lâi oân-sêng ê kiù-sio̍k, thang tit-tio̍h kah Siōng-Chú ū hô-ha̍p ê koan-hē. 25 Siōng-Chú hi-seng Ki-tok chò sio̍k-chōe ê chè-phín, ēng I ê hoeh hō͘ sìn I ê lâng ê chōe tit-tio̍h sià-bián, Siōng-Chú khoan-iông bô tui-kiù lâng kòe-khì só͘ hoān ê chōe. 26 Chit-má, Siōng-Chú hō͘ só͘-ū sìn Iâ-so͘ ê lâng, kah I ū hô-ha̍p ê koan-hē. Siōng-Chú ēng án-ne lâi hián-bêng I ê kong-gī. 27 Nā án-ne, lán iáu ū sím-mi̍h thang khoa-kháu? Lóng bô! Khò sím-mi̍h hoat-chek? Khò hêng-ûi sī-bô? M̄-sī! Sī khò sìn ê hoat-chek. 28 Só͘-í lán ê kiat-lūn sī: lâng ē-tàng kah Siōng-Chú kiàn-li̍p hô-ha̍p ê koan-hē, m̄-sī khò chun-siú lu̍t-hoat, sī khò sìn lâi tit-tio̍h. 29 Siōng-Chú kám kan-taⁿ sī Iû-thài-lâng ê Siōng-Chú? I mā sī Gōa-pang-lâng ê Siōng-Chú, kám m̄-sī? Sī, I mā sī Gōa-pang-lâng ê Siōng-Chú. 30 Kì-jiân Siōng-Chú chí-ū chi̍t ūi, I hō͘ siū kat-lé ê kah bô siū kat-lé ê, lóng kāng-khoán tùi sìn lâi tit-tio̍h kah I ū hô-ha̍p ê koan-hē. 31 Án-ne, lán in-ūi chit-ê sìn soah hō͘ lu̍t-hoat sit-khì kong-hāu? Tong-jiân m̄-sī, tian-tò sī khak-li̍p lu̍t-hoat.