《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第二十五章

作者 巴克禮普世版小組 2014.08.17

Pó-lô Tùi Lô-má Hông-tè Siōng-sò͘
1 Hui-su-to͘ chiūⁿ-jīm saⁿ ji̍t, chiū tùi Kai-sat-lī-a chiūⁿ-khì Iâ-lō͘-sat-léng. 2 Chè-si-tiúⁿ kah Iû-thài ê thâu-lâng, tùi i khòng-kò Pó-lô. 3 In chhéng-kiû chiong Pó-lô sàng lâi Iâ-lō͘-sat-léng. In kè-bô͘ beh tī lō͘-tiong bâi-ho̍k beh kā i thâi-sí. 4 M̄-koh Hui-su-to͘ ìn kóng, "Pó-lô koaiⁿ tī Kai-sat-lī-a, góa liâm-piⁿ mā beh tńg-khì hia. 5 Lín tiong-kan chò-thâu ê lâng thang kah góa chò-hóe lo̍h-khì. Hit-ê lâng nā ū sím-mi̍h m̄-tio̍h, lín thang tī hia kā i kò." 6 Hui-su-to͘ tòa hia chiâⁿ cha̍p-ji̍t, chiū tńg-khì Kai-sat-lī-a. Keh-tńg-ji̍t khui-têng, i bēng-lēng lâng khì tòa Pó-lô lâi. 7 Pó-lô chi̍t-ē kàu-ūi, tùi Iâ-lō͘-sat-léng lo̍h-lâi ê Iû-thài-lâng ûi óa-lâi khiā tī i ê sì-chiu-ûi, ēng chin-chē giâm-tiōng ê chōe-miâ kā i kò, m̄-koh lóng the̍h bē chhut chèng-kì. 8 Pó-lô ūi ka-kī piān-kái kóng, "Góa tùi Iû-thài-lâng ê lu̍t-hoat kah sèng-tiān, á-sī Lô-má hông-tè lóng m̄-bat hoān-tio̍h sím-mi̍h chōe." 9 M̄-koh Hui-su-to͘ ūi-tio̍h beh hō͘ Iû-thài-lâng hoaⁿ-hí, ìn Pó-lô kóng, "Lí goān-ì chiūⁿ Iâ-lō͘-sat-léng, tī hia ūi-tio̍h chiah-ê kò-sò͘ chiap-siū góa ê sím-phòaⁿ bô?" 10 Pó-lô kóng, "Góa chit-má khiā tī Lô-má hông-tè ê hoat-têng, tong-jiân tio̍h tī chia siū sím-phòaⁿ. Lí bêng-bêng chai-iáⁿ góa tùi Iû-thài-lâng pēng-bô chò sím-mi̍h m̄-tio̍h ê tāi-chì. 11 Góa nā ū chò m̄-tio̍h, á-sī hoān-tio̍h kai-sí ê chōe, góa choa̍t-tùi bē tô-phiah, m̄-koh in tùi góa ê khòng-kò lóng bô chi̍t-hāng sī sū-si̍t, bô-lâng ē-tàng chiong góa kau hō͘ in. Góa beh tùi Lô-má hông-tè siōng-sò͘." 12 Hui-su-to͘ kah gī-hōe chò-hóe chham-siông liáu-āu, chiū ìn kóng, "Lí kì-jiân í-keng tùi Lô-má hông-tè siōng-sò͘, chiū tio̍h khì hông-tè hia."

Hui-su-to͘ Tùi A-ki-phàⁿ-ông Pò-kò Pó-lô ê Tāi-chì
13 Kòe kúi-nā ji̍t āu, A-ki-phàⁿ-ông kah Pek-nî-ki lâi-kàu Kai-sat-lī-a, kā Hui-su-to͘ chhéng-an. 14 In tī hia tòa kúi-nā ji̍t liáu-āu, Hui-su-to͘ chiong Pó-lô ê tāi-chì tùi A-ki-phàⁿ-ông pò-kò, kóng, "Tī chia ū chi̍t-ê Hui-le̍k-su lâu tī kaⁿ-ni̍h ê lâng. 15 Góa khì Iâ-lō͘-sat-léng ê sî, hiah-ê chè-si-tiúⁿ kah Iû-thài ê tiúⁿ-ló ū kā i khòng-kò, iau-kiû góa kā i tēng-chōe. 16 Góa kā in kóng, "Chiàu Lô-má ê koàn-lē, pī-kò kah goân-kò bô tùi-chí í-chêng, iáu-bōe ū ki-hōe ūi ka-kī piān-hō͘, bē-tàng kā i tēng-chōe. 17 Só͘-í in lóng chū-chi̍p kàu-ūi, góa sûi-sî tī keh-tńg-ji̍t khui-têng, bēng-lēng tòa hit-ê lâng lâi. 18 Goân-kò lóng khiā khí-lâi khòng-kò, m̄-koh só͘ kò ê m̄-sī góa só͘ siūⁿ ê hiah pháiⁿ. 19 Goân-kò kah i cheng-lūn chí-put-kò sī in ka-kī ê chong-kàu būn-tê, í-ki̍p chi̍t-ê kiò-chò Iâ-so͘ ê lâng ê tāi-chì, I í-keng sí, m̄-koh Pó-lô kóng i iáu oa̍h-teh. 20 Chiah-ê tāi-chì góa m̄-chiah tio̍h án-chóaⁿ cha-mn̄g, só͘-í mn̄g Pó-lô kám goān-ì khì Iâ-lō͘-sat-léng, tī hia siū sím-mn̄g? 21 M̄-koh Pó-lô í-keng hiòng hông-tè siōng-sò͘, ài góa kā i lâu tī chia thèng-hāu hông-tè chhâi-koat, só͘-í góa bēng-lēng kā i khàu-liû kàu kau hō͘ hông-tè." 22 A-ki-phàⁿ kā Hui-su-to͘ kóng, "Góa ka-kī mā ài thiaⁿ chit-ê lâng kóng-ōe." Hui-su-to͘ kóng, "Bîn-á-ji̍t lí ē-tàng thiaⁿ i kóng." 23 Keh-tńg-ji̍t, A-ki-phàⁿ kah Pek-nî-ki ui-hong-lím-lím, tài-niá iâⁿ-tiúⁿ kah siâⁿ-lāi chun-kùi ê lâng, ji̍p-lâi kong-hōe-tn̂g. Hui-su-to͘ hā-lēng, Pó-lô chiū hō͘ lâng tòa chhut-lâi. 24 Hui-su-to͘ kóng, "A-ki-phàⁿ-ông kah chāi-chō ê kok-ūi, lín khòaⁿ chit-ê lâng, i chiū-sī tī Iâ-lō͘-sat-léng kah tī chia só͘-ū ê Iû-thài-lâng tùi góa chhéng-kiû, tōa-siaⁿ hoah: tio̍h hō͘ i sí. 25 M̄-koh góa chhâ bô i ū hoān-tio̍h sím-mi̍h kai-sí ê chōe. I kì-jiân í-keng tùi hông-tè siōng-sò͘, góa chhâi-koat kā i sàng khì. 26 M̄-koh koan-hē chit-ê lâng góa bô khak-si̍t ê àn-chêng thang chàu hông-tè, só͘-í tòa i chhut-lâi tī lín ê bīn-chêng, koh-khah iàu-kín tī A-ki-phàⁿ-ông lí ê bīn-chêng, tī chhâ-bêng liáu-āu chiah ū àn-chêng thang chàu. 27 In-ūi chiàu góa khòaⁿ, ah-sàng hoān-lâng, nā bô chí-bêng i ê àn-chêng sī bô ha̍p-lí."