《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第二十六章

作者 巴克禮普世版小組 2014.08.24

Pó-lô Ūi Ka-kī Piān-hō͘ A-ki-phàⁿ tùi Pó-lô kóng, "Chún lí ka-kī piān-hō͘." Pó-lô chiū chhun-chhiú piān-hō͘ kóng: 2 "A-ki-phàⁿ-ông, kin-á-ji̍t góa ē-tàng tī lí ê bīn-chêng ūi-tio̍h hō͘ Iû-thài-lâng khòng-kò ê tāi-chì lâi piān-hō͘, hui-siông êng-hēng. 3 Ka-chài in-ūi lí tùi Iû-thài-lâng ê kui-lē kah in teh cheng-lūn ê būn-tê chin liáu-kái, só͘-í kiû lí nāi-sim thiaⁿ góa kóng." 4 "Góa chū siàu-liân kàu taⁿ, khí-thâu tī góa ê pún-kok, āu-lâi tī Iâ-lō͘-sat-léng, chò-lâng án-chóaⁿ, só͘-ū ê Iû-thài-lâng lóng chai. 5 In í-keng bat góa chin kú, nā khéng ē-tàng ūi góa chò-chèng, góa chò chi̍t-ê Hoat-lī-sài-lâng, ū chiàu goán chong-kàu siōng giâm-keh kàu-phài ê iau-kiû teh seng-oa̍h. 6 Chit-mà góa khiā tī chia lâi siū sím-phòaⁿ, chiū-sī in-ūi ǹg-bāng Siōng-Chú tùi goán chó͘-sian ê èng-ín ē si̍t-hiān. 7 Goán cha̍p-jī chi-cho̍k ê tông-pau mê-ji̍t jia̍t-sim kèng-pài, mā sī ǹg-bāng ta̍t-sêng chit-ê ǹg-bāng. Ông ah, góa ūi-tio̍h chit-ê ǹg-bāng, chiah hō͘ Iû-thài-lâng khòng-kò. 8 Siōng-Chú hō͘ sí-lâng koh-oa̍h chit-hāng tāi-chì, lín Iû-thài-lâng ná-ē bē-tàng siong-sìn?" 9 "Í-chêng góa pún-sin mā siūⁿ-kóng tio̍h ēng ta̍k-khoán ê hong-hoat lâi kong-kek Ná-sat-le̍k Iâ-so͘ ê miâ. 10 Góa tī Iâ-lō͘-sat-léng khak-si̍t ū án-ne chò, m̄-nā ū chè-si-tiúⁿ ê siū-koân, lia̍h chin-chē sìn-tô͘ lâi koaiⁿ-kaⁿ, koh tī in siū sí-hêng ê sî mā piáu-sī chàn-tông. 11 Góa sî-siông tī ta̍k-ê hōe-tn̂g kā in hêng-hoa̍t, kiông-pek in kóng siat-to̍k ê ōe, ēng pō-le̍k tùi-thāi in. Sīm-chí kàu gōa-kok ê siâⁿ-chhī mā kā in pek-hāi."

Pó-lô Hóe-kái ê Keng-kòe (St 9:1-19;22:6-16)
12 Hit sî, góa khì Tāi-má-sek ê sî, ū tòa chè-si-tiúⁿ ê siū-koân kah bēng-lēng. 13 Ông ah, thàu tiong-tàu ê sî, góa tī lō͘-tiong khòaⁿ-tio̍h pí ji̍t-thâu khah kiông ê kng tùi thiⁿ-téng chiò lo̍h-lâi tī góa kah tâng-phōaⁿ ê sì-chiu-ûi. 14 Goán lóng poa̍h lo̍h-khì thô͘-kha, góa thiaⁿ-tio̍h ū siaⁿ ēng Hi-pek-lâi-ōe tùi góa kóng, 'Sò-lô, Sò-lô, lí ná-ē pek-hāi góa? lí án-ne chò chhin-chhiūⁿ gû ēng kha teh that ū chhì ê kùn-á, sī ka-kī teh thó phôe-thiàⁿ.' 15 Góa mn̄g kóng, 'Chú ah, Lí sī siáⁿ-lâng?' Chú kóng, 'Góa chiū-sī lí só͘ pek-hāi ê Iâ-so͘. 16 M̄-koh lí tio̍h khiā khí-lâi, in-ūi góa thiâu-tî tùi lí hián-hiān, sī beh siat-li̍p lí chò tāi-chì, tī lí só͘ khòaⁿ-tio̍h góa kah góa só͘ beh hián-hiān hō͘ lí khòaⁿ ê tāi-chì lâi chò kiàn-chèng. 17 Góa beh Iû-thài-lâng kah Gōa-pang-lâng tiong-kan kā lí kiù chhut-lâi. Taⁿ Góa beh chhe-phài lí khì Gōa-pang-lâng hia, 18 khui in ê ba̍k-chiu, hō͘ in lī-khui o͘-àm oat-tńg lâi kui-hiòng kng-bêng, lī-khui Sat-tàn ê koân-sè lâi kui-hiòng Siōng-Chú, tùi sìn Góa lâi tit-tio̍h sià-chōe, koh sêng-siū chò Siōng-Chú soán-bîn ê tē-ūi.'"

Pó-lô Soat-bêng I ê Kang-chok
19 Só͘-í, A-ki-phàⁿ-ông, góa bô ûi-pōe tùi thiⁿ lâi ê īⁿ-siōng. 20 Góa seng tī Tāi-má-sek kah Iâ-lō͘-sat-léng, āu-lâi tī Iû-thài choân-tē, mā tùi Gōa-pang-lâng thoân-tō, khǹg lâng tio̍h hóe-kái lâi kui-hiòng Siōng-Chú, koh tio̍h ēng hêng-ûi chèng-bêng in chin-chiàⁿ ū hóe-kái. 21 In-ūi án-ne, Iû-thài-lâng tī sèng-tiān kā góa lia̍h koh siūⁿ-beh kā góa thâi. 22 M̄-koh kàu kin-á-ji̍t góa ū tit-tio̍h Siōng-Chú ê pó-hō͘, ē-tàng khiā tī chia, tùi chun-kùi kah pi-bî ê lâng chò kiàn-chèng. Góa só͘ kóng ê kah sian-ti í-ki̍p Mô͘-se só͘ kóng ê oân-choân kāng-khoán, lóng sī koan-hē chiong-lâi beh hoat-seng ê tāi-chì, 23 chiū-sī Ki-tok án-chóaⁿ tio̍h siū-khó͘, chiâⁿ-chò thâu-chi̍t-ê tùi sí-lâng-tiong koh-oa̍h ê tāi-chì, thang chiong chín-kiù ê kng-bêng thoân hō͘ Iû-thài-lâng kah Gōa-pang-lâng." 24 Pó-lô án-ne piān-kái ê sî, Hui-su-to͘ tōa-siaⁿ hoah: "Pó-lô, lí teh khí-kông!? lí ha̍k-būn siuⁿ-koân soah hō͘ lí khí-kông!" 25 Pó-lô kóng, "Hui-su-to͘ tāi-jîn, góa m̄-sī teh khí-kông, góa só͘ kóng ê ōe chin-si̍t koh chèng-siông, in-ūi ông lí chai chiah-ê tāi-chì, góa chiah hó-táⁿ tùi lí kóng. 26 Góa siong-sìn ông tùi chit-hāng tāi-chì chin chheng-chhó, in-ūi lâng-lâng lóng chai chit-hāng tāi-chì. 27 A-ki-phàⁿ-ông, lí kám ū siong-sìn sian-ti? góa chai lí ū sìn." 28 A-ki-phàⁿ tùi Pó-lô kóng, "Lí siūⁿ-kóng ēng chit kúi-kù ōe chiū beh soeh-ho̍k góa chò Ki-tok-tô͘ ò͘!" 29 Pó-lô kóng, "bô-lūn kúi-kù-á á-sī chin-chē ōe, góa khún-kiû Siōng-Chú, m̄-nā hō͘ lí, mā hō͘ kin-á-ji̍t só͘-ū thiaⁿ góa kóng ê lâng, lóng kah góa kāng-khoán, m̄-koh bô chhiūⁿ góa án-ne hō͘ lâng ēng thih-liān-á liān-teh." 30 Ông, chóng-tok kah Pek-nî-ki í-ki̍p tī hia teh chē ê lâng lóng khiā khí-lâi. 31 In thè chhut-khì liáu-āu chò-hóe tâm-lūn kóng, "Chit-ê lâng pēng bô hoān-tio̍h kai-sí á-sī tio̍h koaiⁿ-kaⁿ ê chōe." 32 A-ki-phàⁿ kā Hui-su-to͘ kóng, "Chit-ê lâng nā bô tùi Lô-má hông-tè siōng-sò͘, chá to̍h thang pàng i khì."