《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第十八章

作者 巴克禮普世版小組 2014.06.29

Tī Ko-lîm-to
1 Chit-ê tāi-chì liáu-āu, Pó-lô lī-khui Ngá-tián khì Ko-lîm-to. 2 Tī hia tú-tio̍h chi̍t-ê miâ-kiò A-ku-lah ê Iû-thài-lâng. I tī Pún-to͘ chhut-sì, kah i ê bó͘ Pek-ki-lah tú-á tùi Ì-tāi-lī lâi, in-ūi Kek-ló-tiu hông-tè bēng-lēng Iû-thài-lâng lóng tio̍h lī-khui Lô-má. Pó-lô khì chhōe in. 3 In-ūi in lóng sī kāng chò pò͘-pêⁿ ê hâng-gia̍p, Pó-lô chiū kah in chò-hóe tòa, ha̍p teh chò-kang. 4 Ta̍k-ê An-hioh-ji̍t, Pó-lô lóng tī hōe-tn̂g kah lâng piān-lūn, khó͘-khǹg Iû-thài-lâng kah Hi-lia̍p-lâng lâi sìn Chú. 5 Se-lah kah Thê-mô͘-thài tùi Má-kî-tùn lo̍h-lâi liáu-āu, Pó-lô chiū choân-sim thoân-tō, tùi Iû-thài-lâng kiàn-chèng Iâ-so͘ sī Ki-tok. 6 In tùi-khòng Pó-lô koh kā i húi-pòng ê sî, i chiū pōaⁿ saⁿ ê thô͘-hún piáu-sī khòng-gī, tùi in kóng, "Lín ê sí-oa̍h chāi tī lín, bô góa ê koan-hē. Tùi taⁿ í-āu, góa beh khì Gōa-pang-lâng hia." 7 Pó-lô chiū lī-khui khì chi̍t-ê miâ-kiò Thê-to Iû-sū-to͘ ê chhù. Hit lâng sī kèng-pài Siōng-Chú ê Gōa-pang-lâng, i ê chhù tī hōe-tn̂g ê keh-piah. 8 Hōe-tn̂g ê chú-koán Kek-lí-sū-pò͘ kah i ê choân-ke lóng sìn Chú, koh ū chin-chē Ko-lîm-to-lâng thiaⁿ-tio̍h tō-lí liáu-āu lâi sìn Chú, mā siū sé-lé. 9 Ū chi̍t àm, Siōng-Chú tī īⁿ-siōng tiong tùi Pó-lô kóng, "M̄-bián kiaⁿ, tio̍h kè-sio̍k kóng, m̄-thang tiām khì. 10 In-ūi Góa kah lí tông-chāi, bô-lâng ē kong-kek lâi siong-hāi lí. Góa ū chin-chē chú-bîn tī chit-ê siâⁿ. 11 Pó-lô tòa hia chi̍t nî koh la̍k kò-goe̍h, chiong Siōng-Chú ê tō-lí kà-sī hiah-ê lâng. 12 Ka-liû chò A-kai-a chóng-tok ê sî, Iû-thài-lâng liân-ha̍p kong-kek Pó-lô, kā i thoa khì hoat-têng, 13 kò i kóng, "Chit-ê lâng siàn-tōng lâng ēng ûi-pōe lu̍t-hoat ê hong-sek lâi kèng-pài Siōng-Chú!" 14 Pó-lô tú beh khui-chhùi, Ka-liû tùi Iû-thài-lâng kóng, "Iû-thài-lâng ah, che nā sī sím-mi̍h hoān-hoat á-sī hoān-chōe ê tāi-chì, góa tong-jiân tio̍h nāi-sim thiaⁿ lín ê khòng-sò͘. 15 Kì-jiân lín teh piān-lūn lín ê lu̍t-hoat ê jī-gán kah miâ-chheng, lín ka-kī khì kái-koat. Góa bô ài pān chit-khoán ê tāi-chì!" 16 Chiū kā in kóaⁿ-chhut hoat-têng. 17 Chèng-lâng chiū lia̍h hōe-tn̂g ê chú-koán Só͘-thê-nî, tī hoat-têng chêng kā i phah, chiah-ê tāi-chì Ka-liû lóng bô chhap.

Pó-lô Tńg-khì An-thê-o
18 Pó-lô tī Ko-lîm-to koh kah hōe-iú tòa kúi-nā ji̍t liáu-āu chiū lī-khui hia. Kah Pek-ki-lah hām A-ku-lah chò-hóe chē chûn khì Sū-lī-a. Pó-lô ū hē-goān, chiū tī Kian-kek-lí chián thâu-mn̂g. 19 Lâi-kàu Í-hut-só͘, Pó-lô kā in lâu tòa hōe-tn̂g gōa-kháu, ka-kī ji̍p-khì kah Iû-thài-lâng piān-lūn. 20 Tāi-ke chhiáⁿ Pó-lô ke tòa kúi ji̍t, i bô tap-èng. 21 Beh lī-pia̍t ê sî, Pó-lô kā in kóng, "Nā sī Siōng-Chú ín-chún, góa ē koh tńg-lâi lín chia." Jiân-āu chē chûn lī-khui Í-hut-só͘. 22 I tī Kai-sat-lī-a lo̍h chûn, tùi hia chiūⁿ-khì Iâ-lō͘-sat-léng, kā kàu-hōe chhéng-an liáu-āu chiah lo̍h-khì An-thê-o. 23 Pó-lô tī hia tòa kúi ji̍t liáu-āu koh chhut-hoat, keng-kòe Ka-lia̍p-thài kah Hut-lū-ka ê tē-khu, kian-kò͘ chèng bûn-tô͘ ê sìn-sim.

A-pho-lô Tī Í-hut-só͘ Káng-tō
24 Ū chi̍t-ê miâ-kiò A-pho-lô ê Iû-thài-lâng lâi-kàu Í-hut-só͘. I tī A-le̍k-san-tāi chhut-sì, sī ū ha̍k-būn ê lâng, tùi Sèng-keng mā put-chí-á cheng-thong. 25 I bat ha̍k-si̍p Chú ê lō͘, koh jia̍t-sim chiong Iâ-so͘ ê tāi-chì siông-sè kóng lâi kà-sī lâng, m̄-koh kan-taⁿ chai Iok-hān ê sé-lé niā-niā. 26 I tī hōe-tn̂g hó-táⁿ khai-sí káng-tō. Pek-ki-lah kah A-ku-lah thiaⁿ-tio̍h, chiū chhōa i lâi, koh-khah chèng-khak kā i kái-soeh Siōng-Chú ê tō-lō͘. 27 Āu-lâi A-pho-lô koat-tēng beh khì A-kai-a ê sî, Í-hut-só͘ ê sìn-tô͘ kā i kó͘-lē, koh siá phoe chhiáⁿ A-kai-a ê bûn-tô͘ kā i chiap-thāi. I khì kàu hia liáu-āu, hiah-ê tùi Siōng-Chú ê un-tián lâi sìn-Chú ê lâng, siū-tio̍h chin-tōa ê pang-chō͘. 28 In-ūi tī kong-khai ê piān-lūn, i chhut-la̍t piān-tó Iû-thài-lâng, kin-kì Sèng-keng lâi chèng-bêng Iâ-so͘ sī Ki-tok.