《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第十九章

作者 巴克禮普世版小組 2014.07.06

Pó-lô Tī Í-hut-só͘
1 A-pho-lô tī Ko-lîm-to ê sî, Pó-lô keng-kòe lāi-lio̍k ê tē-khu, lâi-kàu Í-hut-só͘, tī hia tú-tio̍h kúi-nā-ê bûn-tô͘. 2 Pó-lô mn̄g in, kóng, "Lín sìn Chú ê sî kám ū niá-siū Sèng-Sîn?" In ìn-kóng, "Goán kàu-taⁿ lóng m̄-bat thiaⁿ-kòe ū Sèng-Sîn ê tāi-chì." 3 Pó-lô koh mn̄g kóng, "Án-ne, lín niá-siū sím-mi̍h khoán ê sé-lé?" In chiū kóng, "Iok-hān ê sé-lé." 4 Pó-lô kóng, "Iok-hān kiâⁿ hóe-kái ê sé-lé. I kiò Í-sek-lia̍t-lâng tio̍h sìn Hit-ūi tòe i āu-bīn lâi-.ê, chiū-sī tio̍h sìn Iâ-so͘." 5 Hiah-ê lâng thiaⁿ-tio̍h, chiū hōng Chú Iâ-so͘ ê miâ niá-siū sé-lé. 6 Pó-lô kā in hōaⁿ-chhiú, Sèng-Sîn chiū lîm-kàu tī in sin-chiūⁿ, in sûi-sî kóng kî-biāu khiuⁿ-kháu, koh soan-káng Siōng-Chú ê sìn-sit. 7 Chóng-kiōng chha-put-to ū cha̍p-jī-ê lâng. 8 Pó-lô liân-sòa saⁿ goe̍h-ji̍t kú, ji̍p-khì hōe-tn̂g hó-táⁿ thoân-tō, kah lâng piān-lūn Siōng-Chú Kok-tō͘ ê tāi-chì lâi khó͘-khǹg lâng sìn Chú. 9 M̄-koh ū chi̍t-kóa lâng kò͘-chip m̄ sìn, tī kûn-chiòng ê bīn-chêng siat-to̍k Chú ê Tō-lō͘. Pó-lô chiū chhōa bûn-tô͘ lī-khui in, ta̍k-ji̍t tī Chhui-lat-lô͘ ê káng-tn̂g kah lâng piān-lūn. 10 Án-ne kè-sio̍k nn̄g-nî kú, hō͘ só͘-ū tòa tī A-se-a-séng ê lâng, bô-lūn Iû-thài-lâng á-sī Hi-lia̍p-lâng, lóng ū thiaⁿ-tio̍h Chú ê tō-lí.

Sū-ki-óa ê Kiáⁿ
11 Siōng-Chú ēng Pó-lô ê chhiú kiâⁿ hui-siông hi-hán ê sîn-jiah. 12 Sīm-chì ū-lâng the̍h Pó-lô ēng-kòe ê chhiú-kin-á á-sī ûi-su-kûn, hē tī pēⁿ-lâng ê sin-chiūⁿ, in ê pēⁿ chiū hó-khì, siâ-sîn mā tùi in sin-chiūⁿ chhut-khì. 13 Hit sî, ū kúi-nā-ê kiâⁿ kang-ô͘ teh kóaⁿ-kúi ê Iû-thài-lâng, mā siūⁿ-beh chioh Chú Iâ-so͘ ê miâ, tùi hiah-ê hō͘ siâ-sîn hū-sin ê lâng, kóng, "Góa hōng Pó-lô só͘ thoân Iâ-so͘ ê miâ, bēng-lēng lí tùi hit lâng ê seng-khu chhut-khì!" 14 Iû-thài ê chè-si-tiúⁿ Sū-ki-óa ê chhit-ê kiáⁿ, mā teh chò chit khoán tāi-chì. 15 M̄-koh hit-ê siâ-sîn ìn kóng, "Iâ-so͘ góa bat, Pó-lô góa m̄-bat. Lín leh, lín sī sím-mi̍h lâng?" 16 Hit-ê hō͘ siâ-sîn hū-sin ê lâng chiū óa-khì kong-kek hiah-ê kiâⁿ kang-ô͘ ê lâng, kā in chè-ho̍k, hō͘ in tio̍h-siong, thǹg-pak-theh tùi hit-keng chhù tô-cháu. 17 Tòa tī Í-hut-só͘ ê Iû-thài-lâng kah Hi-lia̍p-lâng thiaⁿ-tio̍h chit-hāng tāi-chì lóng tio̍h-kiaⁿ. Chú Iâ-so͘ ê miâ chū-án-ne tōa-tōa siū chun-tiōng. 18 Ū chin-chē í-keng sìn ê lâng chhut-lâi kong-khai sêng-jīn, koh kóng-khí in kòe-khì só͘ chò ê tāi-chì. 19 Mā ū chin-chē kiâⁿ siâ-su̍t ê lâng the̍h in ê chheh lâi khǹg chò-hóe, tī kûn-chiòng ê bīn-chêng pàng-hóe sio. In kè-sǹg hiah-ê chheh ê kè-ta̍t, chha-put-to ū gō͘-bān-ê gîn-pè. 20 Chhin-chhiūⁿ án-ne, Chú ê tō-lí it-ti̍t thoân-khui, tōa-tōa heng-ōng khí-lâi.

Tī Í-hut-só͘ ê Pō-tōng
21 Chiah-ê tāi-chì liáu-āu, Pó-lô siū Sèng-Sîn ê chí-sī, koat-tēng beh keng-kòe Má-kî-tùn kah A-kai-a, khì Iâ-lō͘-sat-léng. I kóng, "Kàu hia liáu-āu, góa mā tio̍h khì khòaⁿ Lô-má." 22 I chiū chhe nn̄g-ê chō͘-chhiú, Thê-mô͘-thài kah Í-lah-to͘ khì Má-kî-tùn. I ka-kī chiām-sî lâu tòa A-se-a-séng. 23 Hit sî, ūi-tio̍h Chú ê Tō, tī Í-hut-só͘ ū ín-khí giâm-tiōng ê jiáu-loān. 24 Ū chi̍t-ê miâ-kiò Tí-bí-tiu ê phah-gîn sai-hū, i ēng gîn chò A-tí-bí lí-sîn-biō ê bô͘-hêng. I hō͘ hiah-ê sai-hū thàn bē-chió chîⁿ. 25 Tí-bí-tiu kā hiah-ê sai-hū kah só͘-ū ê tông-gia̍p chū-chi̍p óa-lâi, kā in kóng, "Kok-ūi, lín chai lán sī óa-khò chit-ê chhiú-gē teh thàn-chîⁿ. 26 Taⁿ chit-ê Pó-lô, m̄-nā tī Í-hut-só͘, mā tī chha-put-to choân A-se-a-séng, ēng i ê káng-tō lâi bê-he̍k chin-chē lâng, kóng ēng lâng ê chhiú só͘ chò ê lóng m̄-sī sîn-bêng. Che sī lín só͘ khòaⁿ-tio̍h, só͘ thiaⁿ-tio̍h-.ê. 27 Án-ne lo̍h-khì, m̄-nā lán chit-chióng sū-gia̍p ē phah-pháiⁿ miâ-siaⁿ, hō͘ lâng gûi-hiám hō͘ lâng khòaⁿ-khin, liân tōa lí-sîn A-tí-bí ê biō mā ē hō͘ lâng khòaⁿ-khin. Choân A-se-a-séng kah thiⁿ-ē só͘ pài ê A-tí-bí lí-sîn ē sit-khì i ê chun-giâm!" 28 Kûn-chiòng chi̍t-ē thiaⁿ-tio̍h chiah-ê ōe chiū hui-siông siū-khì, tōa-siaⁿ hoah: "Úi-tāi ah! Í-hut-só͘-lâng ê A-tí-bí!" 29 Choân siâⁿ khí jiáu-loān. Chèng-lâng lia̍h-tio̍h Pó-lô ê tâng-phōaⁿ, Má-kî-tùn-lâng Kai-iû kah A-lí-ta̍t-kó͘, kui-tīn chò-chi̍t-ē kheh ji̍p-khì hì-hn̂g. 30 Pó-lô siūⁿ-beh ji̍p-khì kûn-chiòng ê lāi-bīn, m̄-koh bûn-tô͘ kā i chó͘-tòng. 31 A-se-a-séng kúi-nā-ê koaⁿ-tiúⁿ, sī Pó-lô ê pêng-iú, mā chhe lâng lâi khǹg Pó-lô m̄-thang mō͘-hiám ji̍p-khì hì-hn̂g. 32 Hit sî, kui-ê hōe-tiûⁿ loān-chhau-chhau, chi̍t-ê lâng hoah chi̍t khoán, tōa-pō͘-hūn ê lâng m̄-chai in sī án-chóaⁿ teh chū-chi̍p. 33 Kûn-chiòng tiong-kan ū-lâng kā jiáu-loān ê chek-jīm kui hō͘ A-le̍k-san-tāi, in-ūi Iû-thài-lâng kā i sak-khì chìn-chêng. A-le̍k-san-tāi pí chhiú-sè kiò in an-chēng, siūⁿ-beh tùi in piān-kái. 34 Chèng-lâng chi̍t-ē jīn-chhut i sī Iû-thài-lâng, chiū chê-siaⁿ hoah: "Úi-tāi ah! Í-hut-só͘-lâng ê A-tí-bí!" Án-ne it-ti̍t hoah, chha-put-to hoah nn̄g tiám-cheng kú. 35 Siâⁿ ê su-kì-koaⁿ hō͘ kûn-chiòng an-chēng liáu-āu, chiū kóng, "Í-hut-só͘-lâng ah, siáⁿ-lâng m̄-chai Í-hut-só͘-lâng ê siâⁿ sī tōa A-tí-bí ê biō kah tùi thiⁿ-téng lak lo̍h-lâi hit-tè sèng-chio̍h ê siú-hō͘-chiá? 36 Kì-jiân bô-lâng ē-tàng hó͘ⁿ-jīn chit-hāng tāi-chì, lín tio̍h an-chēng, m̄-thang chhóng-pōng. 37 Hô-hòng chiah-ê lâng bô thau-the̍h biō-lāi ê mi̍h, mā bô húi-pòng lán ê lí-sîn, lín kèng-jiân thoa in lâi chia. 38 Tí-bí-tiu kah hiah-ê óa i ê sai-hū nā beh khòng-kò, ū khui-têng ê ji̍t-kî, mā ū chóng-tok, tāi-ke thang tòa hia sio-kò. 39 Lín nā iáu-ū pa̍t-hāng tāi-chì, thang tī tēng-kî ê hōe-gī lâi kái-koat. 40 Kin-á-ji̍t só͘ hoat-seng ê jiáu-loān, khióng-kiaⁿ bē bián-tit hō͘ lâng cha-mn̄g, koh kóng lán mā bô lí-iû thang piān-kái." 41 Kóng soah, i chiū soan-pò͘ sòaⁿ-hōe.