《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第十六章

作者 巴克禮普世版小組 2014.06.15

1 Thê-mô͘-thài Tòe Pó-lô kah Se-lah Khì Thoân-tō Pó-lô koh khì Te̍k-pì kah Lō͘-su-tek, tú-hó tī hia ū chi̍t-ê bûn-tô͘ miâ-kiò Thê-mô͘-thài, lāu-bú sī Iû-thài-lâng, lāu-pē sī Hi-lia̍p-lâng. 2 Lō͘-su-tek kah Í-ko-liām ê sìn-tô͘ lóng o-ló i. 3 Pó-lô siūⁿ beh chhōa i chò-hóe khì, chiū kā i kiâⁿ kat-lé, in-ūi hit só͘-chāi ê Iû-thài-lâng lóng chai i ê lāu-pē sī Hi-lia̍p-lâng. 4 In keng-kòe chiah-ê siâⁿ ê sî, chiong Iâ-lō͘-sat-léng sù-tô͘ kah tiúⁿ-ló só͘ gī-koat ê kui-lē thoân hō͘ in khì chun-siú. 5 Chiū án-ne, chiah-ê kàu-hōe ê sìn-sim ná kian-kò͘, lâng-gia̍h ji̍t-ji̍t ke-thiⁿ. 6 Má-kî-tùn ê Ho͘-siaⁿ In-ūi Sèng-Sîn chó͘-chí in tī A-se-a-séng thoân tō-lí, in chiū tùi Hut-lū-ka kah Ka-lia̍p-thài ê tē-hng keng-kòe. 7 In lâi-kàu Múi-se-a ê pian-kài, siūⁿ-beh khì Pì-chhui-nî, m̄-koh Iâ-so͘ ê Sèng-Sîn m̄-chún. 8 In chiū se̍h tùi Múi-se-a keng-kòe, lo̍h khì Te̍k-lô-a. 9 Hit àm, Pó-lô khòaⁿ-tio̍h īⁿ-siōng, ū chi̍t-ê Má-kî-tùn-lâng khiā-teh kiû i kóng, "Chhiáⁿ kòe-lâi Má-kî-tùn pang-chō͘ goán!" 10 Pó-lô khòaⁿ-tio̍h īⁿ-siōng liáu-āu, goán sûi-sî chún-pī beh khì Má-kî-tùn. Goán khak-sìn che sī Siōng-Chú ho͘-tiàu goán thoân hok-im hō͘ Má-kî-tùn-lâng.

Lū-tí-a Kui Chú
11 Goán tùi Te̍k-lô-a chē chûn it-ti̍t khì-kàu Sat-mô͘-te̍k-lat, keh-tńg-ji̍t lâi-kàu Nî-a-pho-lī. 12 Tùi hia lâi-kàu Hui-li̍p-pí, chiū-sī Má-kî-tùn hit tē-khu ê thâu chi̍t-ê siâⁿ, mā sī Lô-má ê si̍t-bîn-tē. Goán tī chit-ê siâⁿ tòa kúi-nā ji̍t. 13 Tī An-hioh-ji̍t, goán chhut siâⁿ-mn̂g-gōa lâi-kàu hô-piⁿ, siūⁿ-kóng tī hia ū kî-tó ê só͘-chāi. Goán chiū chē lo̍h-lâi, kah chū-chi̍p tī hia ê hū-lí tâm-lūn tō-lí. 14 Ū chi̍t-ê bē chí-sek-pò͘ ê hū-lí miâ-kiò Lū-tí-a lâi thiaⁿ tō-lí, i sī Chhui-ngá-chhui-lat-siâⁿ ê lâng, pêng-sî kèng-pài Siōng-Chú. Siōng-Chú khui i ê sim, hō͘ i choan-sim thiaⁿ Pó-lô só͘ kóng ê ōe. 15 I kah chhù-ni̍h ê lâng í-keng siū sé-lé, chiū kiû goán, kóng, "Nā lia̍h góa chò chin-si̍t sìn Chú ê lâng, chhiáⁿ lâi goán tau tòa." I kiông-kiông kā goán lâu lo̍h-lâi tòa.

Tī Hui-li̍p-pí Chē-kaⁿ
16 Āu-lâi goán khì kî-tó ê só͘-chāi, goán tú-tio̍h chi̍t-ê hō͘ pok-kòa ê sîn hū-sin ê cha-bó͘ lô͘-lē, i kā lâng pok-kòa sǹg-miā, thè hiah-ê chú-lâng thàn chin-chē chîⁿ. 17 I tòe tī Pó-lô kah goán ê āu-bīn, tōa-siaⁿ hoah: "Chiah-ê lâng chiū-sī chì-koân Siōng-Chú ê lô͘-po̍k, beh tùi lín soan-káng chín-kiù ê tō-lō͘." 18 I kúi-nā-ji̍t lóng án-ne hoah. Pó-lô chin thó-ià, oa̍t-tńg-sin kā hit-ê siâ-sîn kóng, "Góa hōng Iâ-so͘ Ki-tok ê miâ bēng-lēng lí tùi chit-ê lâng chhut-khì." Siâ-sîn sûi-sî tùi hit-ê lâng chhut-khì. 19 Cha-bó͘ lô͘-lē ê chú-lâng khòaⁿ-tio̍h thàn chîⁿ ê ǹg-bāng sit-lo̍h khì à, chiū kā Pó-lô kah Se-lah lia̍h khí-lâi, kā in thoa khì ke-lō͘ kìⁿ koaⁿ-oân, 20 kau hō͘ Lô-má koaⁿ-tiúⁿ, kóng, "Chit nn̄g-lâng sī Iû-thài-lâng, lâi teh kiáu-jiáu lán ê siâⁿ, 21 thoân lán Lô-má-lâng bô eng-kai chiap-siū á-sī chun-siú ê kui-lē." 22 Chèng-lâng mā khí-lâi kong-kek in. Koaⁿ-tiúⁿ pak in ê saⁿ, bēng-lēng lâng ēng kùn-á kā in kòng. 23 Kòng chin-chē ē liáu-āu, kā in koaiⁿ lo̍h-kaⁿ, hoan-hù kò͘-kaⁿ ê lâng giâm-bi̍t kò͘-siú. 24 Kò͘-kaⁿ ê lâng siū-tio̍h bēng-lēng, chiū kā in koaiⁿ ji̍p-khì lāi-kaⁿ, siang-kha pa̍k tòa chhâ-kê. 25 Chha-put-to pòaⁿ-mê ê sî, Pó-lô kah Se-lah kî-tó gîm-si, o-ló Siōng-Chú. Kî-tha ê hoān-lâng lóng chù-ì teh thiaⁿ. 26 Hut-jiân khí tōa tē-tāng, liân kaⁿ ê tē-ki lóng iô-tāng, só͘-ū ê kaⁿ-mn̂g sûi-sî lóng khui, hoān-lâng ê kha-khàu choân-pō͘ lak khì. 27 Kò͘-kaⁿ ê lâng chhéⁿ khí-lâi, khòaⁿ-tio̍h kaⁿ-mn̂g khui-khui, siūⁿ-kóng hoān-lâng lóng tô-cháu liáu-liáu, chiū pu̍ih to beh chū-sat. 28 M̄-koh Pó-lô tōa-siaⁿ hoah: "M̄-thang siong-hāi ka-kī, goán lóng tī chia." 29 Kò͘-kaⁿ ê lâng kiò lâng gia̍h teng-hóe lâi, chông ji̍p-khì, phi̍h-phi̍h-chhoah phak tī Pó-lô kah Se-lah ê kha-chêng. 30 Jiân-āu chhōa in chhut-lâi, kóng, "Lāu-su ah, góa tio̍h án-chóaⁿ chò, chiah ē tit-tio̍h kiù?" 31 Pó-lô kah Se-lah ìn kóng, "Tio̍h sìn Chú Iâ-so͘, lí ê ke chiū ē tit-tio̍h kiù." 32 In chiong Chú ê tō-lí kóng hō͘ i kah in choân-ke ê lâng thiaⁿ. 33 Hit mê, kò͘-kaⁿ ê lâng chhōa Pó-lô kah Se-lah khì sé in ê khang-chhùi. I kah choân-ke ê lâng sûi-sî siū sé-lé. 34 I chhōa in ji̍p-khì in ê chhù, chún-pī mi̍h-kiāⁿ hō͘ in chia̍h. In sìn Siōng-Chú liáu-āu, choân-ke lóng chin hoaⁿ-hí. 35 Keh-tńg chá-khí, Lô-má ê koaⁿ-tiúⁿ phài kéng-koaⁿ, kóng, "Kā hit nn̄g-lâng pàng chhut-khì." 36 Kò͘-kaⁿ ê lâng chiong chiah-ê ōe kā Pó-lô kóng, "Koaⁿ-tiúⁿ ū kau-tài kóng beh pàng lín chhut-khì. Taⁿ lín thang chhut-lâi, pêng-an lī-khui." 37 M̄-koh Pó-lô kā hiah-ê lâng kóng, "Goán sī Lô-má-lâng, bē siū sím-mn̄g chiū tī chèng-lâng bīn-chêng ēng kùn-á kā goán kòng, koh kā goán koaiⁿ lo̍h-kaⁿ. Taⁿ beh thau-thau-á kóaⁿ goán chhut-khì sī-bô? Án-ne bē-ēng-tit, tio̍h kiò Lô-má koaⁿ-tiúⁿ chhin-sin lâi chhōa goán chhut-khì!" 38 Kéng-koaⁿ chiong chiah-ê ōe kā koaⁿ-tiúⁿ kóng. Koaⁿ-tiúⁿ thiaⁿ-tio̍h kóng in sī Lô-má-lâng, chiū chin kiaⁿ-hiâⁿ. 39 Koaⁿ-tiúⁿ chiū lâi kā in khó͘-khǹg, chhōa in chhut-lâi, chhiáⁿ in lī-khui hit-ê siâⁿ. 40 Pó-lô kah Se-lah lī-khui kaⁿ-ga̍k, chiū khì Lū-tí-a in tau, kah hiah-ê sìn-tô͘ saⁿ-kìⁿ, kā in kó͘-lē liáu-āu chiah lī-khui hia.