《白話字文獻e5文明觀》

 | | | 轉寄

第二章《台灣府城教會報》、平面媒體、活字印刷術(三)

作者 陳慕真 2007.07.29

第二節 台灣第一份平面媒體－《台灣府城教會報》ê出現
一、《台灣府城教會報》ê創辦
印刷機ê傳入帶動「印刷業」ê興起，mā進一步帶動印刷品ê普遍，其中siōng重要ê tō是「報紙」ê產生。馬雅各捐贈印刷機hō͘台灣ê時chūn,雖然並無直接講著beh印刷報紙ê構想，kan-nā提起所捐贈ê印刷機beh作為辦白話字書刊ê用途。總是，若beh實行白話字教育，hō͘信徒thang透過對白話字ê jīn-bat來直接閱讀聖經等文字刊物，白話字報紙ê刊印kap傳播是落實白話字文字、宗教教育siōng方便ê方法。

1884年5月巴克禮牧師設立「聚珍堂」以後無lōa久，因為8月中法戰爭牽連著台灣ê關係，致使印刷ê khang-khòe停止一段時間，一直到1885年7月12號（光緒11年6月），tī台南新樓由巴克禮所發行ê白話字報紙：《Tâi-oân Hú-siâⁿ Kàu-hōe-pò》（台灣府城教會報）創刊號chiah發刊。這份報紙ê出現有幾項時代ê意義：（1）伊是台灣報業史上ê第一份報紙，mā是台灣siōng長歲壽ê報紙。（2）伊是台灣第一ê大眾傳播媒體， mā ē-sái講是第一份平面媒體，伊ê發行hian開「台灣新聞史ê第一頁」，對台灣文化史ê貢獻不可否認。 值得注意ê是，《台灣府城教會報》創刊ê時，台灣巡撫劉銘傳mā發行官方ê漢文公報－《邸報》，m̄-koh官方ê公報對台灣社會教育影響無大。 （3）伊是當時中國境內siōng早ê教會報之一。 （4）伊是東南亞siōng早，亦是歷史siōng久長ê教會報刊。 由此可見這份報紙所扮演ê先驅地位kap重要性。

創刊號ê教會報篇幅有四ê版面，ùi第三期開始，加添到八ê版面，以後kúi年lóng是án-ne。發行人兼主編ê巴克禮牧師tī創刊號ê發刊詞ni̍h,寫著府城開始用印刷機來刊印報紙，以及鼓舞眾人學白話字ê主張：

…可惜lín本國ê字真oh,少少人看ē hiáu--tit。所以阮有設pa̍k物ê法度，用白話字來印冊，hō͘ lín眾人看khah快bat。亦近來tī chit ê府城阮有設chit ê印冊ê機器，thang印字親像chit號ê款式。Taⁿ阮ǹg-bāng lín眾人beh出力o̍h chiah-ê白話字；後來阮若印sím-mi̍h冊lin lóng ē-hiáu--tit看。人m̄-thang拍算因為伊bat孔子字所以m̄-bián o̍h chit號ê字；亦m̄-thang看輕伊，講是囝仔所讀ê...。（巴克禮：1885：1）

「第一張」ê「教會報」內容有以下幾項：（1）〈白話字ê利益〉，這是一篇「有獎徵文」ê文章。根據教會報紀錄，當時廈門ê牧師出一個題目，請漳、泉、台灣各教會ê人來做，題目是「白話字ê利益」。後來有接著九個人ê文章，就請馬醫生、甘牧師來做評審，第一名賞銀五個，第二名賞銀三個，第三名賞銀兩個。教會報將前一、二名ê文章連載刊tī報ni̍h,分別是由tòa tī「小溪」ê「葉漢章」先生kap tòa tī「府城」ê「劉茂清」先生所寫ê。教會報有說明beh刊出徵文文章ê原因是：「阮想著印hō͘教會ê人chiâu知，hō͘ ta̍k人欣慕tha̍k白話字。」可見是為著beh推sak白話字，所以將學白話字ê利益刊tī創刊號，鼓舞眾人來學。張學謙認為，這種透過徵文比賽、刊登文章來推銷白話字ê做法「ē-tàng講是台灣thōng早ê語言行銷（language marketing) ê例」。 巴克禮牧師tī創刊號ni̍h對白話字ê鼓舞，mā呈現了未來教會報以刊印白話字、推行白話字作為主要方向ê媒體特色。另外，創刊號koh有刊載〈論設立中學〉、〈今年ê大會〉kap〈教會ê消息〉三篇報導性質ê文章。〈論設立中學〉chit篇主要說明教會beh創辦「中學」（長榮中學）ê構想。是因為人tī「小學」tha̍k了，並無學著lōa深ê知識，所以有需要設立一間中學hō͘人thang 得著各種ê教育，親像「聖冊ê道理、tha̍k白話字、唐人字，寫字、地理、ta̍k國ê紀錄，算帳、天文」等等。文章mā預告講8月（1885年8月）beh開設這間中學，請父母若beh chhōa囝仔來tha̍k著先通知。Ùi chia ē-tàng知iáⁿ，這間全台灣第一間ê西式「中學」，當時除了宗教性ê教育以外，亦重視語文、數學、地理學、自然科學等各領域ê現代化教育。另外，〈今年ê大會〉kap〈教會ê消息〉兩篇文章屬於教會消息ê報導。〈今年ê大會〉內容是beh請各教會ê長老kap執事tī 9月初來府城聚集，beh開會議論tāi-chì。〈教會ê消息〉紀錄tī 1885年，信仰基督教ê人數kap所屬ê地方。創刊號最後koh說明，這第一張報紙是免費送人ê「贈閱」性質，後來著ài賣--人，價錢是每張六個銀。整體來講，創刊號ê教會報內容，顯示出以後教會報發行ê大方向，尤其是注重tī「白話字」ê推行，教育事業ê報導kap宣傳，以及教會消息ê報導這kúi ê方面，另外一方面mā突顯出長老教會對「文字事工」kap「教育事工」ê重視。

二、《台灣府城教會報》ê歷史發展 Tī 1885年創刊ê《台灣府城教會報》，由巴克禮牧師主持，發刊ê機構是屬於外國傳教士所組成ê「台南教士會」。後來《台灣府城教會報》chit ê名稱tī歷史上bat經過kúi遍ê改換。1892年1月第81卷開始，改做《台南府教會報》，1893年正月改稱《台南府城教會報》，1906年正月起koh改稱《台南教會報》。1913年7月因為教會內部組織ê改變，tòe著南北教會聯合ê發展事實，ùi第340卷開始換名做《台灣教會報》，內容增加4頁「北部事務」ê版面，每份變成12面ê篇幅。1932年，高雄中會ê《教會新報》kap台中中會ê《福音報》合併入來《台灣教會報》。後來，北部中會發行ê《芥菜子報》亦加入，成做《台灣教會公報》，chit ê名稱一直使用到chit-má。1942年3月，因為戰爭ê關係，日本總督府下令關閉教會公報社，停止營業。日治時期最後一期（684號）ê教會報，出現kúi nā篇用日文來呈現ê文章，論述戰爭時期「新體制」kap基督徒ê關係，略á看會出來戰時體制對教會報ê影響。Sòa--來，《台灣教會公報》亦因為日本當局來禁刊。一直到戰後ê 1945年，高金聲牧師申請復刊，將公報社改名做「光復印書局」（Kong-ho̍k Ìn-su-kio̍k)，1945年12月chiah koh重新出刊，當期為＜台灣教會月刊＞，後一期koh改倒 tńg做《台灣教會公報》。1948年1月伊將經營權hêng hō͘南部大會，南部大會繼續以「台灣教會公報社」來出刊。1955年3月起，tī國民黨政府強勢推行國語政策之下，為著配合國語推行運動，教會報增加中文版ê副刊－「瀛光」。1962年，教會報ê發行ùi月刊改作半月刊。1969年3月，國民黨政府禁止使用羅馬字，第1049 kap1050期合刊做最後一期ê白話字公報。到1970年1月，《台灣教會公報》ùi白話字全面改換做中文來發行。1973年以後koh ùi半月刊改做週刊，一直到現在。

教會報ê主筆除了頭任ê巴克禮牧師以外，初期是由「台南教士會」ê宣教師輪流擔任。親像：甘為霖、宋忠堅、廉德烈、何希仁、梅監霧、滿雄才、馬大闢等宣教師。後來公報社歸hō͘南部大會接管以後，koh由王守勇、潘道榮kap高金聲等人來擔任主筆。 Tī khioh字ê事工方面，khioh字ê師父初期是蘇沙，後來接續ê是蘇耀雲、李本、方槌、方井等人。當時公報社分做「印刷部」、「發行部」，以及「販賣部」，蘇耀雲tī「印刷部」kap「販賣部」作工有33年之久。 另外，發行量方面，根據教會報ê紀錄，1885年創刊初期無到兩年，發行量tō ûi 500份增加到670份， 以後ta̍k年lóng維持大約700份，到1905年，印刷ê數量是千外份， 到1910年3月，增加到1100份， 1912年以後每月koh增加到1600份。 到1927年，每月發行1719份 ，到1935年3月第600卷ê發行量是1876份。 由此可見教會報ê發行量有不斷增加ê趨勢，tī戰前教會報停刊chìn前，發行量維持tī每月2000份左右ê發行量。銷售ê範圍除了大部分tī南、北部教會以外，亦寄到美國、英國，日本ê東京、京都、岡山kap佐賀等所在， Koh有中國ê廈門、泉州，以及新加坡、檳榔嶼，銷售ê範圍ē-sái講是非常ê闊。

Tī教會報ê內容、消息來源方面，主要有三種管道：（1）主筆書寫。（2）各教會牧師將家己教會ê消息寄來hō͘主筆，thang刊tī教會報，通知人知影。（3）讀者透過投稿ê方式將消息刊tī報紙。因為教會報主要扮演聯絡教會消息、傳達教會資訊ê重要媒介，所以除了主筆書寫文章以外，亦真需要來自各地方ê消息。透過各所在教會ê牧師、傳道將當地ê消息提供hō͘主筆，ē-thang收集無kâng地方ê訊息，親像教會報每期lóng有「喪喜事」ê報導，tō真需要各所在ê教會提供消息，主筆匯整了後刊印tī報紙，通知讀者知影。另外，教會報亦tiāⁿ-tiāⁿ鼓舞讀者用寫phoe、投稿ê方式，提供消息、建議，或者是將個人ê見解寄來報社。像講tī第200卷ê教會報ni̍h,主筆者講出對讀者ê ǹg-bāng:「看lín若有sím-mi̍h好消息，á-sī有想著sím-mi̍h新ê法度；á-sī beh辯論sím-mi̍h道理，lóng thang寫來hō͘阮印chiūⁿ報，做眾人ê利益。」Ùi chia來看，教會報ē-tàng講是由主筆、各教會牧師，以及眾讀者合力完成ê集體成果。另外，為著增加看報ê人數，教會報ê編輯亦用真chē種方式來鼓舞讀者看報。親像ùi第353卷到第356卷，tō連續刊出＜競爭看報＞ê系列文章， 方式是主筆每個月ùi教會報ê內容當中出題目來問讀者，包括親像「教會報所印錯ê字tī tó 1面？第kúi chōa?siáⁿ-mi̍h字？」、「報ni̍h講冊房有teh賣兩本ê字典。Hiah ê字典siáⁿ-mi̍h人做ê?亦每本kúi元？」、「8月ê報tó一層ê消息報 m̄-tio̍h,到9月chiah訂正（tèng-chèng)」。 亦有真趣味ê問題，像講「8月ê報所印ê mn̄g-tiám(？）有kúi ê?Hàiⁿ-tiám(！）」有kúi ê?Chheⁿ tiám(＊）有kúi ê?」 等等有關教會報ê相關問題。連續kúi期結束以後，主筆統計讀者累積ê點數來排列名次，前三名有賞金，第三名到第十名ê獎勵是免費看一冬份ê教會報。透過這種獎勵ê方式m̄-nā thang鼓舞khah chē讀者來看報紙，亦有鼓勵讀者詳細看報ê用意。koh有tī 1905年3月第240卷ê<教會報＞chit篇文章亦刊出講，當時教會報ta̍k月已經有千外份ê印刷量，總是，應該著有khah chē人來買，希望讀者tàu鼓舞這層tāi-chì,作者án-ne講：

Lín著去請iáu-bōe買教會報ê朋友來買，若有會友去招有5人來新買，阮就歡喜beh送伊chi̍t本新約聖冊，á-sī對冊房thang得著一角半ê pa̍k物冊。人若有招呼10人來新買，阮就歡喜送伊兩本，á-sī兩本價錢ê pa̍k物冊。

不管是透過競爭看報，或者是以獎品獎勵ê方式來鼓舞讀者買教會報，lóng是用現代行銷ê手法，來推銷、來鼓舞，ē-tàng看出當時主筆ê用心。