《胡文池牧師kap布農族》

 | | | 轉寄

自願食鹽ê聖人 山地傳道ê模範者－葉彼得牧師

作者 胡文池 2010.01.03

為tio̍h家己ê利益，仿冒(imitate)別人ê商標，是卑鄙ê行為。

為tio̍h仁愛ê緣故，效法(imitate)基督ê行為，是崇高ê人格。

前者比比lóng是，後者寥寥無幾
後者ê中間，有一位洋人牧師，mā是有名ê大學教授，為tio̍h基督ê愛，自願放棄高薪榮職，以及美好文明ê享受．來到偏僻未開發ê台東，kap貧困ê山胞，過了窮苦ê生活，m̄是為tio̍h什麼，只是為tio̍h傳好消息－福音。

Tī chit-ê世風日下，浮華奢侈、自私殘忍ê現世，chit篇故事會啟示咱什麼?

神學院每工例行ê朝拜了後，校長帶了一位生份人客入來，紹介hō͘大家講：「chit位是加拿大聖公會牧師，名叫NarcissusPeterYetes，伊目前tī台東向山胞傳道。

Chit位牧師對阮講什麼話，我lóng記不得了。不過伊ê風采到現在尚留tī我腦中。伊年紀已不輕，身材瘦長，氣色mā無啥好。

伊ê服裝雖然不時髦，to̍h是ē-tàng hō͘我感覺伊有英國老紳士崇高ê氣質。伊為主肯受苦ê精神，hō͘我敬仰無停!

主後一八六二年，伊出生tī加拿大Freliglis burg。伊ê性情慈祥謙遜，飽學卻寡言，bat tī加拿大蒙德利爾(Montreal)大學當過哲學教授。所以伊無論到世界任何地力，lóng有資格tī大學教冊，過tio̍h真舒適ê生活。伊ê性格嚴肅、信仰非凡、言行不俗，kap一般人大無相仝，因此接近伊ê人lóng稱伊為聖人。

後來伊自願到日本傳道，學會曉了流利ê日本話。Tī日本時，聽tio̍h關於台灣高山族ê事，就感覺家己ê使命tī-chia。

一九三四年，伊決心離開日本，來到台灣。因當時日本政府不准任何人入山傳道，所以伊就進駐在siōng偏僻ê台東，向附近一帶ê彪馬族kap阿美族人傳道。

伊每工早起起床，就展讀希臘原文新約聖經，然後默想、祈禱。

有一pái，tī外國教士家作客。早頓時chūn，有人提起晨報所登ê國際新聞時，葉牧師冷靜地講：「我從來不讀晨報，驚會hō͘我分心，致使bōe-sái注意tio̍h koh-khah重要ê tāi-chì。」伊不注重無常暫時ê俗世tāi-chì，á專心追求永恆ê真理。

Tī台東tòa有一位日本人，是聖公會會員－倉滿藥師。葉牧師以其khiā家為傳教基地。每禮拜日，召集附近村落ê原住民來chit所在集會、聽道kap練唱聖歌。

以前ê原住民真sàn-chhiah，有時chūn甚至買鹽ê錢lóng無。葉牧師mā kap in仝款過了真樸素ê生活。伊下鄉傳道平素步行不坐車。家己帶tio̍h簡單ê食品，如番薯、小米kap鹽等，無願意原住民開錢請伊。

但有一pái，tī人家極盛意之下，感覺卻之不恭，就留落來做客。主人為tio̍h beh招待chit位貴賓，boeh出去買一瓶豆油做佐料。牧師知影chit項事時，隨時阻止講：「你用買豆油ê錢，若換買鹽，就ē-tàng用上一個月ah!」

伊雖然自奉甚儉，對待別人卻真慷慨。有一工，tī探訪一位求道者時，聽tio̍h有病人要求食蘋果。當時ê蘋果全由日本進口，價錢貴得驚人，sàn-chhiah ê病家那有這錢thang買。葉牧師忍痛，特別買了一個hō͘ chit位病人食，hō͘伊感激涕零。

一九三八年十一月十五日，tī台北馬偕病院，伊終其尾完成勞苦ê工作，tńg來到慈愛天父ê懷抱，永遠安息。其死因是－營養失調－。想tio̍h chit點，到現在我iáu會感覺心酸。伊如一條蠟燭，燃燒家己，照耀別人。

伊為主飲盡苦杯，這苦杯m̄-nā苦，又koh是鹹ê。

伊ê末了mā kap主耶穌仝款，死無葬身之地，只有借地tī淡水外國人公墓。