《胡文池牧師kap布農族》

 | | | 轉寄

悼念老同工 駱先春牧師

作者 胡文池 2010.01.10

伊kap我
伊ê大名是「先春」，我就以這「先」字先來拉關係。伊先我五年來到chit世界，是老前輩;伊先tī我入學就讀淡水中學，koh先tī我入學台北神學校(to̍h是台灣神學院前身)，是老同學；伊先tī我被孫雅各牧師選召為山地開拓傳道人，是老同工。

一九八二年六月十五日，伊先tī我一刻登上台灣神學院禮拜堂講台，接受榮譽神學博士學位，是老同事;最後一pái ê「先」，就是伊先tī我走到天堂ê寶座前得獎，是老同道。

一九四七年十月，我先tī伊到東部關山，beh向布農族傳道，伊因種種tāi-chì延遲到同年十二月chiah達到台東，beh為阿美族傳道。

台灣光復了後ê十多年間，山地教會ê發展siōng快，tú親像春落雨了後竹筍ê氣勢tī各村建立，其數多達四百所。但是聖經學校出身ê指導者卻只有數十位而已，大多數ê教會lóng是由熱心ê長老執事主持。因此伊kap我奉山宣委員長ê命令前往各族各地召開聖經講習會。阮二人ná親像廚師，教授in如án怎講會聖經做材料，調理各色ê菜餚來滋養信徒。有數年之久，阮二人同心合力，同寢共食，到無公車ê山地行，tī無電火ê所在聚會，有時食山地野味，有時食小田蛙。

有一pái，一位美國牧師H．Anderson kap阮到大武鄉ê鄰村召開講習會。暗時，美國人用家己帶來ê太空被睏，到早起發現到全身lóng生紅疹á發癢，阮二人什麼lóng無。阮就向伊講sńg笑講:「恩，大概台灣ê臭蟲常食阮ê肉已經厭了，嗅到新口味ê白種肉，chiah全部集中到你身上lah!哈哈。」

伊是音樂大師
駱牧師有音樂天才，伊m̄-nā ē-tàng唱、會彈，mā會作曲。台灣話ê聖詩有伊ê頁獻，阿美族ê聖歌是伊翻譯出來ê。伊ê低聲歌喉特別好。淡江中學有音樂會時，伊有時chūn會出來演唱。會記得有一pái，伊kap另外一位演唱「Call John」，唱得太好了，觀眾拍手叫好久久不絕。

孫雅各牧師bat是台北扶輪社社長。伊特別邀講駱牧師去獻唱，得tio̍h全體聽眾大喝彩。伊若向歌廳發展，一定是大牌ê紅歌星。伊ê子女數位是音樂家，ē-sái講是遺傳到父親ê音樂細胞。

伊是一位學者
Tī「台灣基督長老教會百年史」內底，孫雅各牧師讚揚駱牧師是一位學者。因為伊tī台灣神學院ê成績bē-bái，被保送到日木神學校留學，回國了後chiah請伊tī淡水中學教授聖經kap英語。

光復了後，孫雅各牧師選派伊到阿美族傳教，mā是因為伊ê才幹出眾。果然不負眾望，伊對阿美族教會m̄-nā phah好根基，建設真chē教會，甚至到附近ê彪馬族，東部排灣族，以及離島ê蘭嶼雅美族，伊mā m̄驚辛苦前往傳道。伊ê傳道精神真是可欽可佩，為現今青年傳教者ê楷模。

伊ê犧牲精神
台灣光復當時，一般人認為中學教員ê待遇kap地位是比傳教者為高，事實mā是án-ne。因為第二次大戰時，一般人生活艱苦，教會不振兼會友疏散，奉獻mā減少，光復數年間情況iáu未改善，因此真chē牧師經不起chit種貧困生活，只好轉業或兼職，來增加收入貼補家用。

駱牧師甘願犧牲淡江中學教員ê職位，放棄優厚ê待遇，接受山地傳教ê呼召，chit種犧牲精神是何等可貴ah!離開了交通方便ê淡水，遠行到偏僻ê東部，tī公務員看做放逐，伊卻認為使命，勇往直前。伊ê一陣兒女，由東部送到西部受教育，不但beh支出高額ê食費、交通費，tī管理上、情感上‥種種因素，mā是一般人所無願意做ê事，伊煞將萬事交托hō͘耶和華，實在難得!

我有時chūn到台東訪問伊，常常看tio̍h有山地人tī in-tau食飯。Tī平地教會牧會，會友常贈送物件hō͘牧師，但tī貧困ê山地，tāi-chì卻完全相反。

我常常看tio̍h駱牧師厝裡有一大罐ê豆腐乳，由此thang知in一家人ê生活mā是何等清苦。每一個月，駱牧師微薄ê薪俸，大部分lóng被tī北部念冊ê子女the̍h去當學雜費，只有chhun落來一點chiah是伊台東厝內ê生活費。

飼養小鳥ê上主是人類ê父，伊從 m̄-bat餓死伊忠心ê僕人。

駱牧師ê犧牲奉獻精神，神不致使伊營養不良á夭折，反tńg hō͘伊活到八十高齡chiah召伊歸回天國。神mā特別祝福伊ê子女，hō͘每一位lóng有好ê成就，感謝主!o-ló主!

「傳播福音ê人，in ê腳蹤多美ah!」羅馬冊十章15節