《胡文池牧師kap布農族》

 | | | 轉寄

進化論ê鼻祖

作者 胡文池 2009.10.04

英國科學家達爾文(Charles Darwin 1809-1882)bat發表進化論講人類是tùi低等ê猿猴類進化á來，á猿猴又koh是tùi koh-khah低等ê動物進化而成‥‥。Án-ne講落去，所有生命是tùi siōng下等ê變形蟲(Ameba)進化á來，chit種學說，雖然以後受tio̍h bē少學者反對，但是當時確實bat驚動了學術界kap宗教家。

對tī tòa-tī高山一帶ê布農族來講，chit種「蟲變成人」ê論講並無希罕．因為比達爾文koh-khah早數百年、或數千年前，布農族ê遠祖已經有chit種ê想法了。M̄-nā進化論，iáu有「退化論」ê奇異怪講neh!

每一個民族lóng有in獨有特殊ê傳說。傳說表達了in民族固有ê思想kap文化，甚至宗教。

布農族ê傳說真chē，chiah-ê傳說到底是誰創始，koh tī什麼時代發生，誰mā m̄知影，不過來路一定真chē。因為in無家己ê文字，是由口傳，tùi chit代傳到下一代。因此，傳說jōa-chē會跟tòe時間kap地點á產生變化。我現在boeh講ê是五十年前所得tio̍h ê資料。

一、蟲變為人ê故事
太古時代，有一種名叫「古拉特Clat」ê蟲。伊是面朝地慢慢爬行ê。伊家己感覺án-ne太無方便，心想，若ē-tàng khiā起來行路有jōa好ah!ē-sái講是如何chiah ē-tàng khiā立neh?想mā想bē出有什麼好辦法。

Tú好，當時有一隻蚊á飛來，用力叮伊ê腹部，致使伊因痛á跳起來khiā立。Tùi chit時chūn開始，伊真歡喜ē-tàng用兩腳khiā起來行路。

了後伊生二個gín-á。長子長大了，行tī沙連堡kap社寮村一帶，最後來到巒大山，伊看看chit所在真好，就定居落來。這就是布農族巒支派(Takebanoad)ê始祖。(根據竹內友治大正二年調查述者為Tamadoan社ê Ulavtasikapan。

二、人變為猿ê故事
太古時代，有一陣年青人tī山畑耕作。In因腹肚餓，其中有一個人提議講：「大家來煑蕃薯食pah!」伊就叫一個人去煮。

受託ê人在地上立起三個石頭做窯，頂面放一個大鍋。收集樹枝起火，就開始煮地瓜。其中有一個忍不住饑餓，看tio̍h水一開，不管地瓜熟不熟，就用手the̍h一個、koh再一個食了。煮ê人看bē順眼，大怒如火，the̍h起鋤頭柄boeh phah hit-ê貪食ê人。

被phah ê人搶去鋤頭柄，用力折斷。Koh再the̍h折斷ê一半，真得意假裝phah家己ê腳chhng並哈哈大笑，不料chit-ê半ê鋤頭柄誤插入肛門，伊koh痛koh驚，但是拔mā拔bē出來。而且奇怪地，鋤頭柄竟忽然變成尾溜。眾青年行óa來，ài-beh看發生了什麼tāi-chì。Chit-ê有尾ê怪人，因感覺見笑，就逃到山中變成猿了。

三、兄妹變為犬ê故事
Tī太古時代並無犬。

一個家庭，有一工全部動員到耕地工作。其中有兄妹二人對其他ê家人講beh先tńg去煮飯，就急速走tńg去。

日頭落山，大家快步tńg去厝裡boeh食飯。一入門，煞看無爐上有飯thang食，甚至連兄妹兩人ê人影mā看bē-tio̍h。

當in koh再推開睡房查看時，誰mā料想未到，竟然看tio̍h那兄妹兩人正相攬teh做床中戲。大家憤怒如燄火，the̍h起木棍phah chit兩個可惡ê男女，結果這二人突然變成二隻犬了。(Takebaka支派傳說)

四、女人變為老鼠ê故事
太古時chūn，有一個查某gín-á名叫打卡砂卡爾。有一工，全家人動員出去工作，只留落來一個查某gín-á tī厝做家事。日頭beh落山時，大家做完了一工ê工作，同齊tńg去厝裡來。

Ē-sái講是留tī厝ê查某gín-á是一個pîn-tōaⁿ蟲，tùi早起一直睡到暗時，連早頓用過ê碗盤lóng m̄洗，雜亂一堆。父母看了chit種景況，雖然心中受氣，卻認為這hit年青人常有ê事，mā不責罵伊，只上前搖搖伊，叫伊起床。

女gín-á起床來感覺pháiⁿ勢，馬上the̍h來未樁ê小米，連tio̍h外殼就放入去鍋á煮了。大家行近鼎á boeh食飯，煞無人食得下。

看此情況，父母禁bē-tiâu大罵了伊一下。女孩自覺無面見人，暗暗á逃入壁孔，家己食所煮帶殼ê小米，就án-ne變成老鼠了。 (達hō͘巴卡社傅講)

五、只有福音ē-tàng hō͘「動物」變成上帝ê兒女
山地民族iáu有真chē真chē像chit種「人變為動物」或「動物變為人」ê傳說。

五十年前，福音iáu未傳入山地時，in lóng相信chiah-ê傳說。布農ê語言中，無「人」或「人類」chit句話。一切ê動物，包括人類lóng稱做「活物」(Minihomis)。Tī in看起來，動物kap人ê間，並無本質ê差異，這並無ē-tàng表示in ê腦筋幼稚。自稱做文明ê中國人，mā不是án-ne mah?

原子時代ê現今，iáu有真chē人相信白蛇傳ê故事，白蛇變為美麗ê女人，kap許先生結婚，甚至生kiáⁿ、做官。Iáu有梁山伯kap祝英台ê故事，in最後iáu雙雙對對變成ia̍h-á neh!

真chē人講「人是感情ê動物，人kap動物ê差異只tī「感情」方面而已。」這是天大ê têng-tâⁿ。In m̄知影，動物mā仝款有感情。

飼養犬ê人lóng知影犬是有情感ê動物。有真chē故事指出犬是會知恩報本ê。人lóng叫這為「義犬」。鴿子絕對是一雄配一雌。螞蟻行路相tú時，mā交頭接耳，你講，in無感情mah?怎樣ē-tàng講只有人才是感情ê動物?

若有人罵你「衣冠禽獸」時，你會欣然接受，á不怒髮三尺mah? 不管古代原住民或現代進化論者怎樣講，咱基督徒相信tī本質上，人kap動物是完全ê無仝。聖經mā指示了chit項事。

Tī創世記一章26節，上帝講「阮來創造人類，in tio̍h kap阮類似、kap阮相像。Hō͘ in管理魚類、鳥類kap一切牲畜、野獸、爬蟲等各種動物。」

原住民信主了後，就無koh相信古時ê傳說，á相信，in是上帝寶貴ê兒女。