《胡文池牧師kap布農族》

 | | | 轉寄

妖魔鬼怪ê世界

作者 胡文池 2009.10.11

世上有人類khiā起ê所在就有鬼故事。

自上帝創造人類tī樂園ê時chūn開始，到科學昌盛ê現在，鬼ê故事一直不斷ê發生。M̄-nā各國各地各地時常有鬼屋、鬼話，甚至tī台灣mā常有「人鬼」聯姻ê趣聞發生，成做人人歡喜ê茶後新聞。鬼ê問題十分奧秘，有時chūn是「疑心生暗鬼」，有ê是人裝鬼，或tī烏暗處目睭霧霧無清看錯為鬼(馬可福音六：49)。不過聖經明白kā咱講真chē關於魔鬼害人ê事實，加上真chē人ê經驗，咱就bē-tàng無認其真實性。

原住民關於鬼魔ê故事特別多，心靈受tio̍h真大ê折磨。

魔鬼特別歡喜運行tī m̄信主ê人身上(林了後四：4)，陷害in，hō͘ in犯罪，遠離上帝。伊ê別名真chē，如：試探者、巫靈、邪靈、污鬼、講白賊人ê父、惡靈、惡者等等。

古時ê原住民，雖然所tòa ê環境美好如樂園，但tī心靈上to̍h是常常受tio̍h魔鬼ê困縛，極端驚惶惡鬼kap凶運，肉體mā受害不淺。

In認為所有ê病疾kap災害lóng是由鬼魔á來，所以tī日常生活中，有無數ê事物lóng被認為是禁忌(masamo)，chiah-ê禁忌hō͘ in時時刻刻戰戰兢兢，行動做事lóng是提心吊膽。譬如；開墾時bōe-sái洗身軀，mā bōe-sái洗衫褲。播種時bōe-sái食甜ê物件，死者ê厝kap遺物lóng bōe-sái摸…。

單單就「bōe-sái洗身軀」chit項禁忌，我願kā我ê見聞略談一、二。

一、m̄驚蚊ê青年
三十多年前，我雇一位布農族青年來教授我布農話。伊年約二十，體格矮肥強壯。第一工暗時，我the̍h一條蚊罩hō͘伊使用，因為當時tī關山瘧疾真chē。伊講：「我無須iàu蚊罩，因為蚊á m̄咬我，以前政府免費配hō͘蚊罩hō͘阮，lóng乎阮改做衫褲了。」

Chit位青年tī我家工作三個月，阮m̄-bat看過伊洗身軀。我m̄知影為什麼蚊á驚伊、m̄敢咬伊，kám講驚伊ê氣味，或chhōe bē-tio̍h伊皮膚ê毛細孔thang吸血?

二、警察拉人洗身軀
日本人非常重視洗身軀，in不分男女老幼，每工lóng tio̍h洗身軀。當in統治台灣ê時chūn，為tio̍h beh改善山胞衛生，tī每一個派出所了後面，lóng建有公共浴場，免費供hō͘浴巾茶kho͘強拉山胞洗身軀。

我第一pái前往霧鹿傳道時，當地ê警員bat引領我實地觀看山胞ê公共浴場。但是光復了後，chit種設備全部被廢棄了。因為衛生知識進步多了。

三、趕鬼ê妙法
原住民信主前，認為in ê世界四界lóng有鬼魔存在。

In由工作地方或外地旅行tńg來時，驚鬼魔會跟tòe in tńg來。所以tī進入村社時，由草叢中選出一支劍葉草khǹg tī路頭，嘴中喃喃念tio̍h咒語講：

“Hau, musu haisa muu tu hanitu,
Katu madami, mahansu kaimin
Munsaina duma supah titi nakaunun,
Hu,hu.“
(其意是講「喂，lín chiah-ê魔鬼ah!
mài kap阮來，阮真臭，
請到別處去，有真chē肉、食物。呼!呼!」)

四、鬼魔進入派出所
三十五年前，我到利稻(Lito)深山傳道，途中beh經過卡和(Kaho)。卡和這地方，tī日據時代有山地部落，mā有派出所。光復了後派出所已經拆除了，族人四遷，房屋只chhun三、四間而已，派出所ê舊跡已變成一大片繁茂ê桂竹林，附近樹林蒼鬱，陰森淒涼，雖然熱天，mā不寒á慄。

我ê翻譯助手名叫木下(Kinosita)，是當過警察ê一位青年，每pái阮經過chit所在時，伊歡喜談起chia以前發生ê鬼故事hō͘我聽。伊講；
「以前駐在卡和派出所ê一位日本老警察病了無久就死去。當時ê工友是布農青年名叫馬基里(makili)。伊每夜雖然真驚，奈因職務tī身，bē-tàng無住tī宿舍值班，所以睏ê時chūn，tī伊床頭一定放有一支蕃刀。

一個月明ê暗時，半暝內底，忽然一陣冷風由窗戶玻璃脫落ê空處吹了入來，跟tòe冷風同時入來一個烏烏ê鬼睏tī伊身邊。伊感覺到鬼是冷冰冰ê，是什麼形狀，伊連看lóng m̄敢看一下，mā m̄敢動，當然m̄敢伸出手來the̍h刀。伊ê身軀縮成一團，驚惶pi̍h-pi̍h-chhoah無停，通宵睏bē去。

到了雞鳴時，hit-ê鬼就koh再由原處玻璃空處行出去了。

等未到天亮，馬基利就馬上走回池上大埔ê老家，kā家人講所發生ê事，tùi-án-ni tī厝一病不起，無久就離開了chit-ê鬼魔世界了。

卡和派出所mā因此無koh派駐守警察á關閉了。

五、可憐ê病人
有一工，我由一位山地長老帶領進入一個未信主ê厝，一踏入門，內面烏mà-mà無看tio̍h五指，稍khiā片刻chiah ē-tàng看見。因為昔時山地人ê房屋有門無窗，爐灶無煙筒，內面牆壁被燻得烏烏烏。

Tī chit-ê家庭中，有一位嚴重ê病人被扶tio̍h坐tī床頂，痛苦地呻吟tio̍h，另外有一人the̍h-tio̍h番刀tī病人四kho͘-á頂下亂揮。睡床前有一位女巫，手the̍h-tio̍h一支茅草，無停地念咒語，為病人趕鬼。

我問長老講：「為什麼不hō͘病人躺下歇睏?」
「因為in驚床內底ê鬼會掠tiâu伊不放。」伊講。
「hit-ê人用刀亂揮是什麼意思?」我問。
「因為驚鬼接近病人」伊講。
嗚呼!可憐ê病人。

六、怪物
早期ê布農族，因智識末開，常常看tio̍h奇怪ê物件就稱做「怪物」(minpakaliba)，心驚膽跳、身流冷汗。

比如講看tio̍h母豚生落來六腳ê小豚，或者妊婦生落來葡萄胎等事，lóng認為是怪物。

族人無雙生á或十一指者，mā無缺嘴或任何殘缺ê人。這並m̄是講in bē生產不正常ê嬰兒，因為chit種人tī出生時，就被稱做怪物，馬上活活地被弄死去。

Tī格拉森ê墳墓裡一個受鬼折磨ê人，慈悲ê主耶穌專程前往拯救伊(路加八：26－32) 何況chia有koh-khah chē ê人受惡鬼ê捆縛，伊豈會不關心mah?