《胡文池牧師kap布農族》

 | | | 轉寄

巫女、巫師ê悔改

作者 胡文池 2009.09.27

舊時，kap平地遠隔ê山胞，一旦破病，無醫生thang看，mā無草木藥物智識，只好求助巫師、巫女。平地ê童乩比較高明，ē-tàng開幾味藥方，畫符唸咒，或看風水、定吉日。

山地ê巫女巫師，只ē-tàng為病人念咒語、驅鬼，為村民解惡夢。但in mā有欺騙病人ê法術一招，就是嘴中暗藏一小塊雞骨，念咒語了後，嘴用力吸tòa病人傷痛處，然了後吐出雞骨hō͘病人看，而且講：「你看，這就是你ê病魔，我已經替你the̍h出來了。」chit種魔術除斂財騙物外，有jōa-chē醫治ê效力，巫師家己內心有數。

一、巫女ê悔改
光復時，有一位太魯閣族青年，名叫奧山，被派駐清水衛生所當衛生員。

伊ê薪水無chē，生活困難，所以常常到巫女阿婆士（Abos）ê厝食飯。每pái食飯時，奧山必定先閉目祈禱。巫女感覺真稀奇，tùi án-ne問其閉目念咒ê原因。伊講：「我是基督徒，所以祈禱感謝上帝。」伊koh向伊傳道講：「萬物lóng是上帝所造kap所賞賜ê，所以咱食用ê時chūn，必須先感謝祂。」「破病ê時chūn，只要祈求耶穌，mā會得tio̍h痊癒。」「祂也bat行各樣ê大神蹟‥‥」

巫女聽講耶穌有hiah-ni̍h大ê能力，ē-tàng醫病、趕鬼，就大為歡喜，因為伊希望家己也ē-tàng得tio̍h chit種能力，來為人醫病。這猶如舊時撒瑪利亞ê術士西門，tio̍h用金錢向彼得買取權柄仝款（使徒行傳八：9－20）。

奧山對阿婆士講：「你beh得tio̍h這力量，tī禮拜日，一定會到附近東里教會敬拜上帝，學習耶穌ê樣式。」「禮拜日妳到東里時，會看見真chē人集合唱歌，he就是教會。」

當伊第一pái到東里教會禮拜了後，有一位信徒對伊講，koh過七工beh koh再來。伊家無日thiap-á，就用繩子每工phah一個結，到第七結，就koh來做禮拜。就án-ne，伊每禮拜lóng到東里教會敬拜上帝，而且mā帶朋友來信主。

一九四九年二月，我kap江天順牧師到東里佈道。阿婆士叫伊ê gín-á kap幾位青年上山phah獵boeh得tio̍h野味饗客。不料伊ê gín-á竟被毒蛇咬傷倒地hō͘人抬tńg來，阮為伊祈禱，果然得tio̍h醫治。大家感謝上主，hō͘佈道會順利進行。

以了後，我到東里傳道，每pái lóng tòa-tī伊家，伊ê巫女工作放棄了，一有閒暇，就到各地作見證。並且伊奉獻了一子為上帝所用，現在成做牧師，就是馮貴興牧師。

二、巫師ê悔改
台灣光復無久，tī高雄縣雅爾鄉，有一個巫師名叫答倫（Talum），伊平日pîn-tōaⁿ成性，遊閒放蕩，soah致使受人輕視，因此有一pái決定跳水自殺來結束家己ê生命。不料，自殺無死，第三工tńg來到自家，對村民宣傳說；「我跳水自殺死了後，靈魂升天到月娘，當時月娘對我講：「你beh tńg去到世間，向布農族人講，tio̍h復興舊時ê信仰，五穀chiah會豐收，人民chiah會平安無事。lín tio̍h相信月娘ê話。」

伊家己講，月娘是伊ê朋友，所以hō͘人tio̍h稱呼伊「月娘ê朋友」（Talum Kaviad）
因伊是巫師，熟識古時一切迷信，所以大力宣揚迷信ài族人相信。伊預言說：「世界末日將到，大地會溶化變水，但是相信伊ê人不致死亡。」

病人來求醫，伊就講：「你ê病是因為鬼tī你家作祟，你必須拆除房屋‥‥。」「你ê衫褲有鬼，你tio̍h脫去，khǹg tī山頂三工三夜‥‥」。

當時ê族人智識末開，深信答倫巫師ê話，高雄、台東二縣ê人，真chē翻山jú嶺，辛苦行了二、三工ê山路，到in-tau領教或求醫，絡繹不絕。

答倫巫師復興迷信了後，經隔kúi-nā年，阮ê福音chiah去傳報。所以台東、高雄二縣已佈滿答倫巫師ê迷信，福音真oh推廣，教勢進展真慢，四界受tio̍h伊ê信徒阻擾或迫害。雖然少年ê人boeh接受福音，煞受tio̍h老年人ê壓力，只好放棄。

Tī台東縣武陵村，有四戶接受福音，每主日步行五小時到關山禮拜。但是，自從in信主以了後，每工深夜，就有人擲石子擾亂in家屋，soah致使bōe-sái安心khiā起。

主內黃應添醫生，看tio̍h chit種情形，甚表同情，因此叫in搬到關山來khiā起，提供田地hō͘ in耕種。

為tio̍h beh除去chit種迷信根源。于一九五一年寒天，阮派遣二位宣道師到答倫家，傳報救主ê福音，叫伊悔改，並以民族大義勸伊停止欺騙族人。

果然，聖靈大大tī伊身上動工，hō͘伊流目屎認罪悔改。伊放棄了巫師ê工作。雖然有意奉獻自身為主作見證，to̍h是受tio̍h太太ê反對，村民mā講，伊若信基督，以前向in詐取ê財物tio̍h全部償還，以致使伊有了後顧之憂，bōe-sái獻身，實在可惜。

但是，tùi-án-ni福音ê宣傳工作，減少了真chē阻力，快速ê發展tī各地。

三、假先知bōe-sái救死人
Tī台東縣海端鄉霧鹿村，有一位女巫名叫Haido，伊bat聽過基督ê福音，但未真正得救，伊kan-ta想beh模仿救主醫病ê作為。伊mā自稱是月娘ê朋友，ē-tàng kap月娘用無線電通話，伊常常為病人醫病時，假裝khà電話ê樣式kap月娘講話，然後烏白講，講是月娘ê指示。伊mā常為病人按手祈禱。因伊是鄉長kap村長ê小妹，所以相信伊ê人bē少。

有一pái，伊ê姪子破病，伊講m̄免看醫生，只要為伊祈禱，但是gín-á ê病轉逆，soah致使死亡。

Koh有一pái，霧鹿村幹事ê gín-á破病，由伊祈禱，不准就醫á死亡。伊向死者ê家庭講：「不要緊，mài埋葬，我祈禱ē-tàng hō͘ gín-á復活。」果然伊熱心為gín-á祈禱，一連六天，無停地祈禱，但mā無看tio̍h效果。

Siōng早派出所警察驚得罪鄉長一家，m̄敢阻止chit位無知ê巫女所作所為。雖然tī高山寒冷地帶，但六天了後，屍體已發臭，不得不強制命令其家長tio̍h抬出去埋葬。

Tùi-án-ni了後，雖然單純ê原住民mā無koh相信伊ê話。因此福音迅速ê tī附近村莊進展。