《胡文池牧師kap布農族》

 | | | 轉寄

奇特ê交換結婚

作者 胡文池 2009.09.20

婚姻制度，依照國土ê差別，時代ê變遷，各有真大ê差異。

野蠻人bat有奪婚ê時代，昔時台灣ê布農族雖然m̄-bat發生chit款tāi-chì，但卻維特了真長一段時間ê「交換結婚」制度。Chit種制度in感覺十分公平、合理。

日人轄制時代ê高山族，完全kap平地隔絕，in對金錢kap物資ê價值非常霧霧無清。In所需ê日用品lóng是tī官方所設ê交換所，用in ê山產，交換得來ê。

人非物品，但是布農族男子boeh娶太太，mā是依照習慣上ê方式交換á得。

譬如，有一個男人，看上一位小姐，男方家必須也tio̍h交出一位小姐或小女孩到女方家，來交換這男人所beh娶ê妻。如果chit-ê男子厝裡全無女子thang交換新娘ê話， án-ne男方必須付出真大ê代價(mā等於現今ê聘金)送hō͘女方。所送之禮，必須順從女方父母ê要求，有牛隻、豬、羊、刀、槍、鼎、鋤頭‥‥等，mā就是講，女方厝裡所需要ê牲畜、農具，lóng寄望tī自家小姐身上。

一、老妻少夫
布農族家庭，對tī boeh結婚ê男女雙方ê年齡不注重。因為男方娶新娘所交換來ê女子，有ê是五、六歲ê女童，必須等待伊成年chiah ē-tàng kap厝內ê男子結婚(有點á類似童養媳)，這男子有可能等待伊成長，已過了中年。

Mā有一種情形是，女子已過了二、三十歲，因家己ê兄弟結婚á被交換到別家，á chit間偏偏只有年輕ê小男孩，án-ne夫妻ê年齡實在懸殊。

我就認bat chit種ê一對夫婦。

有一次，我到崁頂山地教會設立長老執事，禮拜了後，該堂ê宣道師chhōa我前往探訪會友。

到了新任執事，名叫蘇巴利(sobali)ê厝時，我看見一位老婦人tī厝。

我對伊講：「恭禧您!您ê gín-á當選了執事，伊iáu無tńg到厝mah?」

蘇巴利身裁矮小，患有癆傷病，看起來未到三十歲。Chit-ê婦人看起來至少mā有五、六十歲了。

無想tio̍h，伊聽了我ê問話了後，隨時講：「伊m̄是我ê gín-á，是我丈夫。」

伊ê話，hō͘我面紅，尷尬萬分。

後來，宣道師chiah-tio̍h我講，in是交換結婚換來ê，所以年齡相差二十gōa歲。In ê年齡雖然不相配，夫婦煞十分合好，相敬如賓，老妻愛護少夫，tú親像愛小弟仝款無微不到。因為二人lóng熱心事奉主。

二、醜女m̄驚嫁不出
任何時代，所有ê民族，美麗ê女人lóng是人人擇偶ê目標。但是對tī布農族來講，美女對in無什麼影響力，á勤勞、ē-tàng作稼ê女人，chiah是男子擇偶ê標準。

因為舊時，大部分ê布農族人，平時lóng是好酒、怠惰，時常上山phah獵遊蕩，擁有大男人主義ê作風。家事kap農事lóng交hō͘女人去做，為tio̍h事實上ê需要，chiah boeh娶健康、勤勞ê女人。

In無婚姻紹介ê媒人婆。如果一個男子看中一位小姐，家長就beh託ē-tàng言善辯ê人，帶酒前往提親。女方tio̍h召開家族會議來決定chit件親事，年輕ê gín-á mā有一票之權。

條件談妥，出嫁hit工，新娘kap娶親ê人lóng是行路，無車坐。伊依依不捨地離開家一段路程了後，tio̍h故意地回頭逃tńg去厝裡，這為tio̍h beh表示伊是jōa-ni̍h-á想家，伊m̄是lóng無情意tio̍h離開親人á出嫁。Chit時男方ê人beh koh再來強制拉行伊。

我tī海端鄉龍泉看tio̍h一名孝女，到四十gōa歲iáu無願意出嫁，願tī厝陪伴年老ê母親。一直等到母親過世了後，伊chiah嫁hō͘一位外省籍退役軍人，tùi-án-ni伊mā過tio̍h相當幸福ê生活。

三、交換拮婚ê悲劇
假使一間ê男子不幸往生，伊ê太太tio̍h歸回後頭厝，án-ne，後頭厝hit位chìn前交換來ê女子，就必須tńg去家己ê厝，不管伊已結婚或iáu未婚。Chit件事表面上看起來真公平，其實煞無近人情。

台灣光復了後，民智漸開，男女交際開放，自由戀愛漸風行。

有一pái，tī海端鄉山頂，bat發生一對青年男女殉情自殺，雙雙服飲殺蟲劑路騰毒液死亡。原因就是女子ê雙親beh將伊交換結婚，嫁hō͘一位老夫，soah致使bōe-sái kap自已所親愛ê青年結婚，tùi án-ne雙雙厭世自殺。

自從原住民多數信主以後，人權提高，「交換結婚」ê慣俗漸漸改善。不過猶原有少數貪財無愛惜家己子女ê人，in要求高額聘金，嫁到平地hō͘ m̄信主ê人，甚至高價出賣cha-bó͘-kiáⁿ hō͘年老ê退役軍人，或是賣hō͘妓女戶。實在可憐!