《胡文池牧師kap布農族》

 | | | 轉寄

月娘降臨地上?

作者 胡文池 2009.09.13

聖經kā咱講，自創世以來，日頭kap月娘，實質就是相異ê物件，有無仝ê作用。

到了一九六九年七月，美國所發射ê日頭神十一號登陸月球以來，科學家實地發現，月球只是岩石kap塵土ê球體，並無任何生命存在。

由此可見，布農先民所傳落來關於日頭變月娘ê故事，只thang hō͘現化人了解未開發民族低落ê智識kap思想而已。

充滿迷信生活ê原始民族，一致相信「月娘kap人類仝款，有血肉之體，有靈魂之身，有人情，ē-tàng講話。」in認為這是千真萬確， bōe-sái m̄信ê事實。

一九四八年春天，有一個暗時，我帶了一位來自花蓮，任玉山神學院教授ê馬克聞戶(Macilwane)牧師到關山里瓏山向布農族佈道。 馬牧師向一大群族人講論創世記ê故事，伊講：「上帝創造日頭kap月娘，分別照耀日間kap暗時，hō͘咱日間ē-tàng工作，暗時好安靜歇睏，‥‥‥」

聽眾中有一位老人隨時khiā起來反駁道：「你tú-chiah講ê m̄-tio̍h，阮ê祖先傳落來二個日頭ê故事chiah是真實ê。因為月娘以前bat由天頂落來，到台灣中部山地，對阮祖先教授真chē tāi-chì。伊落來ê時chūn，伊ê腳chhng tú-tio̍h大地，hō͘土地塌成二個大窟，後來落雨積水，這二個大窟變成現在ê日月潭了。這就是證據，你講「上帝創造月娘，有什麼證據mah?」

真chē聽眾對chit位老人ê智識kap勇敢大為感服，拍手表示贊成。

頑固ê迷信沖昏了in ê頭，mā將毀了in ê一生，但是阮相信上帝ê福音teh-beh拯救虛心願意接受ê人。

等chit位老人發表完畢，馬牧師koh繼續傳講起帝ê福音，hō͘虛心ê人有機會聽完上帝恩典ê信息。

佈道會完了，感謝主，有人表示boeh相信主耶穌。

主耶穌講：「虛心ê人有福了，因為天國是in ê。」〈馬太福音五：3〉