《胡文池牧師kap布農族》

 | | | 轉寄

淨化山地教會ê風暴

作者 胡文池 2009.09.06

「所以凡聽見我這話就去行ê，ná準一個聰明人，kā厝蓋tī磐石上。雨淋、水沖、風吹，撞tio̍h厝，厝總不倒塌。因為根基立tī磐石上。」(馬太福音七：24－28)

一、長老會tī山地急速成長
台灣光復前，長老會信徒已經tī花蓮縣太魯閣族kap阿美族中秘密傳教，光復時chiah知影已經有四千gōa位族人暗中信主。光復了後山地得tio̍h了傳教自由，長老會傳教師爭先到山地傳道，接受福音ê人口日漸多，數年了後，差不多一半ê山胞成做長老會信徒，koh tī各地興建禮拜堂。當時tī信徒中有熱心能幹ê，mā lóng自動出來領導聚會，受當局任命為囑託宣道師，in每月只得tio̍h微薄津貼，但心中煞真感謝。

二、救濟品ê沖擊
天主教延慢了五、六年chiah進入山地傳教。雖然án-ne，但因in當時有豐富ê美國救濟品(麵粉、奶粉kap衫褲)分送hō͘山地人。只要登記姓名ê，lóng thang得tio̍h救濟品。戰了後物質缺乏，所以hiah-ê因無願意禁煙酒á尚未進入長老會ê人，差不多全部加入天主教，hō͘長老會和天主教tī山地中成做平分ê局勢。

Tī長老會中，有kóa信心不足或掛名ê基督徒，mā因受tio̍h救濟物質ê誘引，口口聲聲講天主教chiah有愛心，無久就轉往á去。雖然長老會tī量方面損失了一kóa，ē-sái講是煞tùi án-ne得tio̍h淨化，提高教會ê品質。

三、殃及池魚
另外一方面，天主教mā以高薪雇用山地宣道師，hō͘長老會部分宣道師羨慕，進一步koh對當局抱不平，要求加薪。有一pái，趁山地宣道會主管孫雅各牧師來花蓮巡迴時，有kóa太魯閣kap阿美族ê宣道師，自稱代表全部宣道師，直接向孫牧師提出了加薪ê要求。孫牧師體會tio̍h戰了後物資缺乏，物價高漲，in ê生活的確有困難。Ē-sái講是，hiah-ni̍h chē ê宣道師，加薪一事，談何容易!按照預算開支ê教會，將由何處the̍h來這大筆經費neh。

為tio̍h這事，孫牧師十分困擾、操心。最後伊決定關閉千山聖經書院，將hit-ê學院全部經費割愛分hō͘宣道師來平靜風波。時為一九五七年ê春天。

四、轉禍為福
當時，微僕為玉山神學院(舊名玉山聖經書院)董事長，所以bōe-sái坐視hit-ê學院夭折，soah致使影響山地教會將來傳教事工，隨時向芥菜種會孫師母求援。

上帝感動伊ê心，伊真慷慨地當面答應每月補助二千元為玉山神學院ê辦公費kap二十gōa位學生ê伙食費。山地學生食量真大，有ê每餐食五、六碗飯，佳哉當時有救濟ê麵粉thang補貼，bē致使kah「小僧多粥少」á饑餓。

當時tī花蓮hit-ê學院院舍租期已到，阮就暫時將書院搬到關山神應病院舊院舍繼續上課。前院長已離職，所以我kap常務董事孫雅各、江天順、戈銳義三位牧師商量了後，認為tī台中山地工作ê高俊明牧師條件kap能力是阮唯一ê人選，tùi án-ne隨時寫phe hō͘伊，請伊來做院長，主持校務。

高牧師生長tī台南富裕ê醫生家庭，因為tio̍h tùi耶穌基督ê腳蹤，自願放棄舒適享受ê生活，樂意地前往sàn-chhiah偏僻ê山地，辛苦傳教，伊ê精神實在hō͘人敬佩。而且高牧師是出于良好信仰世系，而且有善良ê性格，敬虔ê生活，神學時代既被稱做「聖人」。阮ē-tàng聘請到伊，實在一大榮幸。了後ê幾年，伊所行ê，證明了阮正確ê選擇。

一九五八年，台灣長老教會總會接辦玉山神學院，並得tio̍h外國經濟上ê援助，tī花蓮鯉魚潭買tio̍h一片山坡地。十多年間，高俊明牧師帶領同志教員kap學生半工半讀，流汗勞苦，開荒整地，興建校舍，慘淡經營，hō͘玉山神學院繼續成長，成做夠水準ê神學殿堂。

救濟品風暴，雖然一時困擾當局，結果煞hō͘山地教會雨過天晴，koh-khah光耀。而且hō͘玉山神學院強壯長大，ē-tàng培養koh-khah chē優良傳教者出來，hō͘山地教會有旭日東昇氣勢發展到taⁿ，這是咱siōng大ê欣慰。