《老人kah海》

 | | | 轉寄

《老人kah海》_3 Bîn'áchài beh chhut khì hn̄ghn̄g/明á載beh出去遠遠

作者 Ernest Hemingway, 台譯：Manlajo, 修訂：宋麗瓊 2019.03.10

“Góa ē kìtit chū lán chòhóe ílâi só͘ū ê ta̍k hāng tāichì."

Lāu lâng ēng i hō͘ iāmji̍t pha̍k kòe ê chūsìn koh chûài ê ba̍kchiu kā i khòaⁿ.
I kóng, “Lí nāsī góan kiáⁿ, góa ē chhōa lí chhut hái khì tó͘ jīūn, m̄ koh, lí sī lín pēbú ê kiáⁿ, jîchhiáⁿ koh tng teh tòe chi̍t tâi hó ūn ê chûn."
“Góa khì the̍h un’á hî, hó bô? Góa chai khì tó ūi ētàng the̍h tio̍h sì ê jī."
“Góa kin’áji̍t ēng ê jī iáu ū chhun. Góa kā in sīⁿ iâm, khǹg tī siuⁿ’á ni̍h."
“Góa koh lâi khì the̍h sì ê sinsian.ê lâi."
“Chi̍tê to̍h hó,” lāu lâng kóng. I m̄ bat sitkhì ǹgbāng kah sìnsim; tī jiû hong chhoe khí ê chit sî, i koh khah sī ánne.
“Nn̄g ê.”Gín’á kóng.
“Hó, nn̄g ê,”lāu lâng tôngì. “Lí m̄ sī khì thauthe̍h ê ho͘ⁿh?"
“Góa ēsái ánne chò,”Gín’á kóng. “M̄ koh, chiahê sī góa bé ê."
“Tosiā,”Lāu lâng kóng. I siuⁿ tiâuti̍t, soah m̄ bat siūⁿ kóng kakī sī tangsî piàn kah chiah khiampi; m̄ koh i chai, i íkeng piàn khiampi à, che m̄ sī kiànsiàu tāi, mā bē sit bīnchú.
“Háilâu ánne, bîn’áchài ittēng ē hóthiⁿ.”I kóng.
“Lí beh khì tó ūi lia̍hhî?”Gín’á mn̄g i.
“Góa ē chhutkhì hn̄ghn̄g, piàn hong ê sî to̍h ē tńglâi. Góa thiⁿ bōe kng to̍h beh chhut hái."
“Góa ē chīnliōng kiàngī i mā khì khah hn̄g ê háibīn lia̍hhî.”Gín’á kóng,"Ánne, lí nā tiò tio̍h chin tōa bóe ê hî ê sî, góan ētàng khì kā lí tàu siokāng."
“I bô ài khì siuⁿ hn̄g lia̍hhî lah."
“Tio̍h, i bēài.”Gín’á kóng,”M̄ koh, góa khòaⁿ ē tio̍h i khòaⁿ bē tio̍h ê mi̍hkiāⁿ, chhiūⁿkóng chiáu’á teh chhōe hî, ásī góa ē kiò i tòe háiti’á（dolphine） chhutkhì."
“I ê ba̍kchiu kám hiah bái?"
“I kiōngbeh chheⁿmê ā."
“Κîkòai,”Lāu lâng kóng.”I m̄ bat khì lia̍h kòe háiku. He chiah sī ē chin sún ba̍kchiu."
“M̄ koh, lí bat kúinā nî tī Mosquito háihōaⁿ lia̍h háiku, lí ê ba̍kchiu mā sī iáukoh hiah hó."
“Góa sī chi̍tê koàinó͘chú."
“M̄ koh, nāsī lia̍h tio̍h chi̍t bóe chiok tōabóe ê hî, lí kám ū kàu ióng?"
“Góa siūⁿ sī bô būntê; hôhòng iáu koh ū chin chē phiatpō͘ leh."
“Lán seng kā mi̍hkiāⁿ the̍h tńgkhì chhù.ni̍h,”Gín’á kóng.”Góa chiah the̍h phabāng khì lia̍h un’á."


「我ē記得自咱做伙以來所有ê ta̍k項tāichì。」 老人用伊hō͘ 炎日pha̍k過ê自信koh慈愛 ê目chiu kā伊看。
伊講：「你若是阮kiáⁿ，我ē chhōa你出海去賭字運，m̄ koh，你是lín父母ê kiáⁿ，而且koh tng teh tòe一台好運ê船。」
「我去the̍h鰮á魚，好無？我知去tó位ētàng the̍h tio̍h四个餌。」
「我今á日用ê餌iáu有chhun。我kā in sīⁿ鹽，khǹg tī箱á裡。」
「我koh來去the̍h四个新鮮ê來。」
「一个to̍h好，」老人講。伊m̄ bat失去ǹg望kah信心；tī柔風吹起ê chit時，伊koh khah是ánne。
「兩个。」gín’á講。
「好，兩个，」老人同意。「你m̄是去偷the̍h ê ho͘ⁿh？」
「我ēsái ánne做，」gín’á講。「M̄ koh，chiahê是我買ê。」
「多謝，」老人講。伊siuⁿ條直，soah m̄ bat想講kakī是tang時變kah chiah謙卑；m̄ koh伊知，伊已經變謙卑à，這m̄是見笑tāi，mā bē失面子。
「海流ánne，明á載一定ē好天。」伊講。
「你beh去tó位掠魚？」Gín’á問伊。
「我會出去遠遠，變風ê時to̍h ē tńg來。我天未光to̍h beh出海。」
「我ē盡量建議伊mā去khah遠ê海面掠魚。」Gín’á講：「Ánne，你若釣tio̍h真大尾ê魚ê時，阮ētàng去kā你tàu相kāng。」
「伊無ài去siuⁿ遠掠魚lah。」
「Tio̍h，伊bēài。」gín’á講：「M̄ koh，我看ē tio̍h伊看bē tio̍h ê物件，像講鳥á teh chhōe魚，á是我ē叫伊tòe海豬á（dolphine）出去。」
「伊ê目chiu kám hiah bái？」
「伊kiōngbeh chheⁿmê ā。」
「奇怪，」老人講。「伊m̄ bat去掠過海龜。He chiah是ē真損目chiu。」
「M̄ koh，你bat幾nā年tī Mosquito海岸掠海龜，你ê目chiu mā是iáukoh hiah好。」
「我是一个怪老子。」
「M̄ koh，若是掠tio̍h一尾chiok大尾ê魚，你kám有夠勇？」
「我想是無問題；何況iáu koh有真chē撇步leh。」
「咱先kā物件the̍h tńg去厝裡，」gín’á講。「我chiah the̍h拋網去掠鰮á。」