《老人kah海》

 | | | 轉寄

《老人kah海》_24 Ι khaisí kîtó/伊開始祈禱

作者 Ernest Hemingway, 台譯：宋麗瓊 林俊育 2019.09.29

I sùsī sùsī khò tī chûnpang, kankhó͘ ê sî to̍h lún leh; hî ûnûná teh siû, chûn bānbān'á kiâⁿkòe o͘àm ê chúibīn. Tang pêng lâi ê hong chhoe khí chi̍t chūn bîsè ê háiéng; tiongtàu ê sî, lāulâng ê tò chhiú bô koh kiùkin ā.

I kóng,"hî ah, che tùi lí lâi kóng sī pháiⁿ siausit neh."i koh sóa tāng teh tī kengkahthâu môa tē'á téng ê hîsòaⁿ.

I kámkak ū khah khòaⁿoa̍h, m̄ koh iáusī kankhó͘, chóng ·sī i chi̍t tiám'á to m̄ sêngjīn he sī kankhó͘.

I kóng,"góa m̄ sī khiânsêng ê kàutô͘, m̄ koh, ūi tio̍h beh lia̍h c hit bóe hî, góa ē liām cha̍p piàn"Chú ê kîtó bûn"kah cha̍p piàn"Sèngbó keng"; jîchhiáⁿ nā lia̍h tio̍h i, góa póchèng ē khì tiâupài Cobre Sèngbó; che sī góa ê sênglo̍k." I khaisí ná kikhì teh kîtó. Ū sî i siuⁿ thiám, soah bē kìtit kengbûn ê sî, i to̍h ē liām chin kín, hō͘ kîtó bûn chūtōng liām chhutlâi. I jīnûi"Sèngbó keng"pí"Chú ê kîtó bûn"khah kántan.

"bān hok Maria, lí chhiongmóa sèng ài. Chú kah lí tôngchāi. Lí tī hūlí tiong siū oló, lí ê chhinkiáⁿ Iésu mā tângsiū oló. Thiⁿ Chú Sèngbó Maria, kiû lí tī chitmá kah tī goán sí ê sî, ūi goán chōejîn kîkiû thiⁿ Chú. Amen."liáuāu, i koh ke chi̍t kù, kóng,"siū oló ê Sèngbó ah, kiû lí ūi c hit bóe hî ê sí kîtó, suijiân i si̍tchāi sī chin liáuputkhí."

Kîtó liáuāu, i ū kámkak khah hó, m̄ koh iáusī ē kankhó͘, jîchhiáⁿ hoānsè koh khah kankhó͘. I khò tī chûnthâu pang, koh ná kikhì leh, khaisí oa̍htāng i tò chhiú ê chéngthâu'á. Suijiân ū bîhong khinkhiná chhoe khí, m̄ koh ji̍tthâu chitmá chin iāmjoa̍h ā.

I kóng,"góa siōng hó kā tī chûnbóe ê hit tiâu hîsòaⁿ kohchài pa̍k jī. Hit bé hî nā beh koh bih chi̍t àm, góa tio̍h ài koh chia̍h mi̍hkiāⁿ, jîchhiáⁿ koàná lāi ê chúi mā chhun bô gōa chē ā. Chia tûliáu lia̍h háitiá ígōa, siáⁿmi̍h lóng bô. M̄ koh, góa nā thàn chhiⁿ chia̍h i, mā sī bē bái. Ǹgbāng engàm ū poehî ē thiàu khí lâi chûnténg, m̄ koh, khósioh góa bô tenghóe thang siâⁿ in lâi. Poehî chheⁿchia̍h siōng hó, jîchhiáⁿ m̄ bián kā i chhiat chò sè tè. Taⁿ góa ittēng tio̍h ài póchhî théla̍t. Thiⁿ ah, góa m̄ chai iáⁿ i ē hiah tōabóe."

I kóng,"M̄ koán i gōa tōabóe, gōa liáuputkhí, hoâiⁿti̍t góa ē kā i thâi sí."

I siūⁿ, suijiân ánne sī ·bô kongpêⁿ, m̄ koh, góa ài ho͘ chai, lâng ū gōa gâu, gōa nāi chhau.

I kóng,"góa bat kā gín'á kóng, góa sī chi̍tê koài Lóchú, chitmá to̍h sī góa ài lâi chèngbêng ê sîchūn ā."

I kòekhì chheng gōa pái ê chèngbêng lóng bô sǹg, chitmá i beh kohchài chèngbêng chi̍t pái. Ta̍k pái lóng sī sin ê chi̍t pái; ta̍k pái chèngbêng ê sî, i lóng bô khì hôesióng kòekhì.


伊sùsī sùsī靠tī船枋，艱苦ê時to̍h忍leh；魚勻勻á teh泅，船慢慢á行過烏暗ê水面。東pêng來ê風吹起一chūn微細ê海湧；中晝ê時，老人ê倒手無koh kiù筋ā。

伊講：「魚ah，這對你來講是 pháiⁿ消息neh。」伊koh徙動teh tī 肩胛頭麻袋á頂ê魚線。

伊感覺有khah khòaⁿ活，m̄ koh iáu是艱苦，總是伊一點á to m̄承認he是艱苦。

伊講：「我m̄是虔誠ê教徒，m̄ koh，為tio̍h beh掠chit尾魚，我ē念十遍「主ê祈禱文」kah十遍「聖母經」；而且若掠tio̍h牠，我保證ē去朝拜Cobre聖母；這是我ê承諾。」 伊開始ná機器teh祈禱。有時伊siuⁿ thiám，soah bē記得經文ê時，伊to̍h ē念真緊，hō͘祈禱文自動唸出來。伊認為「聖母經」比「主ê祈禱文」khah簡單。

「萬福Maria，妳充滿聖愛。主kah妳同在。妳tī婦女中受oló，妳的親kiáⁿ耶穌mā同受oló。天主聖母Maria，求妳tī chitmá kah tī阮死ê時，為阮罪人祈求天主。Amen。」了後，伊koh加一句，講：「受oló ê聖母ah，求你為chit尾魚ê死祈禱，雖然牠實在是真了不起。」

祈禱了後，伊有感覺khah好，m̄ koh iáu是ē艱苦，而且hoānsè koh khah艱苦。伊靠tī船頭枋，koh ná機器leh，開始活動伊倒手ê指頭á。 雖然有微風輕輕á吹起，m̄ koh日頭chitmá真炎熱ā。

伊講：「我siōng好kā tī船尾ê hit條魚線koh再縛餌。Hit尾魚若beh koh bih 一暗，我tio̍h ài koh食物件，而且罐á內ê水mā chhun無gōa chē ā。Chia除了掠海豬á以外，啥物lóng無。M̄ koh，我若趁chhiⁿ食牠，mā是bē bái。Ǹg望eng暗有飛魚ē跳起來船頂，m̄ koh，可惜我無燈火thang siâⁿ in來。飛魚生食siōng好，而且m̄免kā牠切做細塊。Taⁿ我一定tio̍h ài保持體力。天ah，我m̄知影牠ē hiah大尾。」

伊講：「M̄管牠gōa大尾，gōa了不起，橫直我ē kā牠thâi死。」

伊想：雖然ánne是無公平，m̄ koh，我ài ho͘知，人有gōa gâu，gōa耐操。

伊講：「我bat kā gín’á講，我是一个怪老子，chitmá to̍h是我ài來證明ê時chūn ā。」

伊過去千gōa pái ê證明lóng無算，chitmá伊beh koh再證明一pái。Ta̍k pái lóng是新ê一pái；ta̍k pái證明ê時，伊lóng無去回想過去。