《老人kah海》

 | | | 轉寄

《老人kah海》_25, Siūⁿkhí i kah o͘lâng at chhiú pà/想起伊 kah烏人at手pà

作者 Ernest Hemingway, 台譯：宋麗瓊 林俊育 2019.10.06

I siūⁿ, i nā khéng khùn chi̍tē to̍h hó à, góa mā chiah thang bîn chi̍tē, thang koh khì bāngkìⁿ saiá. Sī ánchóaⁿ góa khah bāng mā sī saiá leh? I kā kakī kóng, Mài siūⁿ ā lah, lāu hòe á. Chitmá khinkhiná phak tī chûnpang hiohkhùn, siáⁿmi̍h lóng mài siūⁿ; chitmá i tng teh phahpiàⁿ, lí tio̍h chīnliōng hóhó’á hiohkhùn.

Sîkan íkeng kòetàu, chûn iáusī bānbān'á, únún á teh kiâⁿ, m̄ koh ū chengka bîbî'á tanghong ê chó͘la̍t. Lāulâng tòe bîsè ê háiéng khinkhiná teh phiauliû, khachiahphiaⁿ phoa̍h hîsòaⁿ ê só͘chāi koh khaisí chin bênghián teh thiu thiàⁿ.

Hit ēpo͘ ū chi̍t pái, hîsòaⁿ koh seng khílâi, m̄ koh, hî kantaⁿ tī siókhóa khah chhián ê só͘chāi kèsio̍k teh siû. Ji̍tthâu chiò tio̍h lāulâng ê tò chhiú, tò keng kah khachiahāu, só͘í i chai, hî íkeng kái hiòng, siû ǹg tangpak pêng khì.

Kìjiân i bat khòaⁿkòe i chi̍t pái, i ētàng sióngsiōng hit bóe hî tī chúi ·nih teh siû ê khoán, kiô á sek ê hî 拽 tiánkhui ná si̍t, thánkhiā ê tōa bóeliu póe khui o͘àm ê háichúi. Lāulâng siūⁿ, góa m̄ chai, tī hitê chhimtō͘, i tàuté sī khòaⁿ ū á bô. I ê ba̍kchiu chin tōa lúi, bé á ê ba̍kchiu ke chin sèlúi, m̄ koh bé á tī o͘àm tiong mā khòaⁿ ē tio̍h. Íchêng góa tī o͘àm tiong ētàng khòaⁿ chin chhengchhó; tongjiân m̄ sī tī choa̍ttùi ê o͘àm tiong, m̄ koh, chhaputto ētàng chhinchhiūⁿ niauá khòaⁿ hiah chhengchhó. Kengkòe ji̍tthâu pha̍k, kah i itti̍t teh oa̍h tāng chéngthâu'á, i ê tò chhiú chitmá oânchoân bô kiùkin ā, só͘í i khaisí pàng chi̍tkóa la̍t hō͘ i, koh gia̍h kengkah, tíntāng khachiahphiaⁿ ê kin bah, hō͘ hîsòaⁿ siókhóa sóa līkhui teh thiu thiàⁿ ê ūi.

I tōa siaⁿ kóng,"hî ah, lí nā bē thiám, lí si̍tchāi sī ū kàu kîkoài."

Taⁿ i kámkak huisiông thiám, jîchhiáⁿ i chaiiáⁿ liâmpiⁿ to̍h ē thiⁿ àm, só͘í i chhì beh khì siūⁿ pa̍t hāng tāichì. I siūⁿ tio̍h tōa liânbêng ê písài, Sepangâ gí kiòchò Gran Ligas, i chaiiáⁿ New York ê Yankees tng teh kah Detroit ê Tigers teh písài.

I siūⁿ, che sī písài ê tē jī kang ā, góa khiok m̄ chai písài ê kiatkó, m̄ koh, góa ài ū sìnsim, ài tùi tit khí DiMaggio láutōa; suijiân i ê kha āuteⁿ seⁿ kutchhì teh thiàⁿ, i iáusī ū oânbí ê piáuhiān. I mn̄g kakī, kutchhì sī siáⁿ leh? To̍h sī Sepangâ gí ê"un espuela de hueso"lah. Goán lóng bô seⁿ kutchhì. Kha āuteⁿ seⁿ kutchhì kám ē chhinchhiūⁿ tī siophahkeá ê kha chng khato hiah thiàⁿ? góa siūⁿ góa bô hoattō͘ jímsiū he, mā bô hoattō͘ jímsiū íkeng tak kah chi̍t lúi sīmchì nn̄g lúi ba̍kchiu chheⁿmê, khiok iáu koh chhinchhiūⁿ siophahkeá kèsio̍k tak lo̍hkhì. Lâng pēng bô pí ióngkám ê poe khîm cháusiù kiông gōa che, góa iáusī lêngkhó chiâⁿchò tī o͘àm tōa hái ·ni̍h ê hit chiah tōngbu̍t.

I tōa siaⁿ kóng,"tûhui soahî lâi. Soahî nā lâi, Siōngtè ah, kiû lí liânbín i kah góa."

I siūⁿ, lí kám siongsìn DiMaggio láutōa ē kah chi̍t bóe hî chòhóe, chhinchhiūⁿ góa kah c hit bóe chòhóe chiah kú? góa siongsìn i ē, koh ē pí góa khah kú, inūi i siàuliân koh ióngkiāⁿ, jîchhiáⁿ in lāupē cháchêng mā sī thóhái lâng. M̄ koh, i ê kutchhì sī m̄ sī ē hō͘ i chin thiàⁿ? I tōa siaⁿ kóng,"góa m̄ chai, góa m̄ bat seⁿ kòe kutchhì."

Ji̍t lo̍h ê sî, ūi tio̍h beh chengka sìnsim, i siūⁿkhí tī Casablanca ê chi̍t keng sió chiúkoán ni̍h, i kah chi̍tê tùi Cienfuegos lâi ê o͘lâng láutōa atchhiúpà ê tāichì; hitê lâng sī béthâu siōng ióng ê chapo͘ lâng. In ê chhiú āukhiau teh tī tohténg ê hún pit sòaⁿ, chhiú ēchat khiā ti̍t, nn̄g lâng ê chhiú ânân sio ak, piàⁿ chi̍t ji̍t koh chi̍t mê; nn̄g lâng lóng siūⁿ beh kā tùihong ê chhiú at tó tī toh bīn. Chin chē lâng teh tó͘ in siáⁿ su siáⁿ iâⁿ, lâng tī tiám iû kia̍h’á ê pângkeng chhutchhut ji̍pji̍p. I itti̍t chùsī o͘lâng ê chhiúkó͘ kah chhiú, íki̍p i ê bīn. Piàⁿ peh tiámcheng liáuāu, in múi sì tiámcheng ōaⁿ chi̍tê chhâiphòaⁿ, hō͘ chhâiphòaⁿ thang khì hiohkhùn. Hoeh tùi i kah o͘lâng ê chéngkah hē lâu ·chhutlâi, nn̄g lâng hō͘siong chùsī tùihong ê ba̍kchiu, chhiú kah chhiúkó͘; tehtù ê lâng tī pângkeng chhutchhut ji̍pji̍p, chē tī piah piⁿ ê koân í'á téng koankhòaⁿ. Piah sī chhâ pang, chhat chhián nâsek, tenghóe kā in nn̄g lâng ê iáⁿ chiò tī piahténg. O͘lâng ê iáⁿ chin tōa, bîhong chhoe tíntāng tenghóe ê sî, lângiáⁿ mā tòe leh iôtāng.

伊想：牠若肯睏一下to̍h好à，我mā chiah thang眠一下，thang koh去夢見獅á。是án怎我khah夢mā是獅á leh？伊kā kakī講：Mài想ā lah，老歲á。Chitmá輕輕á仆tī船枋歇睏，啥物lóng mài想；chitmá牠當teh phah拚，你tio̍h盡量好好á歇睏。

時間已經過晝，船iáu是慢慢á，穩穩á teh行，m̄ koh有增加微微á東風ê阻力。老人tòe微細ê海湧輕輕á teh漂流，kha脊phiaⁿ phoa̍h魚線ê所在koh開始真明顯teh抽痛。

Hit下晡有一pái，魚線koh升起來，m̄ koh，魚kantaⁿ tī小khóa khah淺ê所在繼續teh泅。日頭照tio̍h老人ê倒手、倒肩kah kha脊後，所以伊知，魚已經改向，泅ǹg東北pêng去。

既然伊bat看過牠一pái，伊ētàng想像hit尾魚tī水裡teh泅ê款：茄á色ê魚拽展開ná翼，坦khiā ê大尾溜póe開烏暗ê海水。老人想：我m̄知，tī hitê深度，牠到底是看有á無。牠ê目chiu真大蕊，馬á ê目chiu加真細蕊，m̄ koh馬á tī烏暗中mā看ē tio̍h。以前我tī烏暗中ētàng看真清楚；當然m̄是tī絕對ê烏暗中，m̄ koh，差不多ētàng親像貓á看hiah清楚。 經過日頭pha̍k，kah伊一直teh活動指頭á，伊ê倒手chitmá完全無kiù筋ā，所以伊開始放一kóa力hō͘ 它，koh gia̍h肩胛，振動kha脊phiaⁿ ê筋肉，hō͘ 魚線小khóa徙離開teh抽痛ê位。

伊大聲講：「魚ah，你若bē thiám，你實在是有夠奇怪。」

Taⁿ伊感覺非常thiám，而且伊知影liâmpiⁿ to̍h ē天暗，所以伊試beh去想別項tāichì。伊想tio̍h大聯盟ê比賽，西班牙語叫做Gran Ligas，伊知影New York ê Yankees當teh kah Detroit ê Tigers teh比賽。

伊想：這是比賽ê第二工ā，我卻m̄知比賽ê結果，m̄ koh，我ài有信心，ài對得起DiMaggio老大；雖然伊ê腳後蹬生骨刺teh痛，伊iáu是有完美ê表現。伊問kakī：骨刺是啥leh？To̍h是西班牙語ê「un espuela de hueso」lah。阮lóng無生骨刺。腳後蹬生骨刺kám ē親像tī相phah雞á ê腳裝腳刀hiah痛？我想我無法度忍受he，mā無法度忍受已經觸kah一蕊甚至兩蕊目chiu chheⁿmê，卻iáu koh親像相phah雞á繼續觸落去。人並無比勇敢ê飛禽走獸強gōa che，我iáu是寧可成做tī烏暗大海裡ê hit隻動物。

伊大聲講：「除非鯊魚來。鯊魚若來，上帝ah，求你憐憫牠kah我。」

伊想：你kám相信DiMaggio老大會kah一尾魚做伙，親像我kah chit尾做伙chiah久？我相信伊ē，koh ē比我khah久，因為伊少年koh勇健，而且in老父早前mā是討海人。M̄ koh，伊ê骨刺是m̄是ē hō͘ 伊真痛？ 伊大聲講：「我m̄知，我m̄ bat生過骨刺。」

日落ê時，為tio̍h beh增加信心，伊想起tī Casablanca ê一間小酒館裡，伊kah一个tùi Cienfuegos來ê烏人老大at手霸ê tāichì；hitê人是碼頭siōng勇ê chapo͘人。In ê手後khiau teh tī桌頂ê粉筆線，手下節khiā直，兩人ê手ânân相ak，拚一日koh一暝；兩人lóng想beh kā對方ê手at倒tī桌面。真chē人teh賭in啥輸啥贏，人tī點油kia̍h’á ê房間出出入入。伊一直注視烏人ê手股kah手，以及伊ê面。拚八點鐘了後，in每四點鐘換一个裁判，hō͘ 裁判thang去歇睏。血tùi伊kah烏人ê指甲下流出來，兩人互相注視對方ê目chiu、手kah手股；tehtù ê人tī房間出出入入，坐tī壁邊ê koân椅á頂觀看。壁是柴枋，漆淺藍色，燈火kā in兩人ê影照tī壁頂。烏人ê影真大，微風吹振動燈火ê時，人影mā tòe leh搖動。