《台語kah魔術》

 | | | 轉寄

國中小台語認證招生分享

作者 蘇晏德 2013.10.06

2012年11月tshe陳金花老師傳email hoō台文界ê朋友，叫逐家鬥 sio-
thīn 邀請有tī學校參與教學ê母語老師鼓勵國中小ê學生囡仔，參加台語認證，
2013年1月22舉辦ê國中小台語認證是第2pái舉辦，前tī 2012年歇熱舉辦1
pái，金花有招bē tsió人來考試。我受金花ê鼓勵(應該ài講hoō伊牽龜落
làm)，tō開始投入tàu宣傳ê團隊，一開始擔心招無人ē真漏氣，為tio̍h beh鼓
勵學生來報名，kìⁿ nā報名ê前20人送一項魔術道具(市價100khoo,因為我買ê量
khah大，所以拍5折)，我有tī台南仁德ê文賢國小、高雄路竹ê路竹國中kap高雄
阿蓮ê阿蓮國中三間學校敎台語，每一間學校ê前20人報名lóng送一項魔術道具
(60.人tō ài khai 3000 khoo)，kiáu錢tsiah算完成報名。宣傳ê第一工先
hoō in填寫報名表，3間學校ka--起來，tō有超過100人報名，我想講tsiah -
ê學生囡仔可能是tshìn-tshái寫sńg--ê，應該bô可能tsiah-nī-á濟人，
siáng知影第2工開始繳錢阿蓮國中tō超過20人，路竹國中、文賢國小陸陸續續傳
出好消息，pún-tsiâⁿ想講每一間學校有20人成果tō算bē-bái、真是料想bē到，
每一工lóng傳出好消息，60人、80人、100人、150人、180人、200人，到報名
截止日、三間學校總共224人完成報名手續(阿蓮國中114人、路竹國中76人、文賢
國小34人)。Siōng-kài難得ê是文賢國小，全校四年到六年ê人數總共85人tō有
34人報名。
我真正是hoō金花牽龜落làm，因為一開始我lia̍h-tsò是宣傳tō好，
siáng知影ài家已kā囡仔收錢，整理報名表一抄再抄，為著beh安打無送獎品ê學
生，超過20名ê人mā送魔術道具(市價40khoo,拍折20 khoo)，224 ê學生lóng
送魔術道具，學生到底是為著魔術道具來參加台檢，ia̍h是我ê宣傳功夫超厲害，
我想應該是兩項lóng是，nā有beh了解我ê宣傳秘訣，請為文老師另外安排時間來
辦說明會。
Tùi宣傳→hoō學生寫報名表→收錢→整理報名表→去各班催繳錢→連絡→借場地
→tah名單……ta̍p-ta̍p-tih-tih ê khang-khuè lóng ài家己來，簡單講
tō是「煩」、「雜」，你nā問我有siáⁿ-mi̍h感想，我ê答案是「甜蜜ê痛苦」，
聖經講︰「施捨比接受khah有福氣」，總講一句tō是付出比kā人the̍h- -ê
khah有福份，經過tsit-pái ê招生，我kā食苦當做食補，台語認證是成大語文測
驗中心ê khang-khuè，mā是咱台文界ê朋友每一人ê khang-khuè。2013年1月
22日我tī阿蓮國中擔任試務人員，看著百kúi ê學生來考試(總共4間教室)，感覺
真有成就感，nā無付出tō無收成，我kap我ê 2 ê後生lóng投入台語認證ê
khang-khuè。為文老師為著beh答謝我ê辛苦，送我20本台語認證ê冊，我發揮宣
傳ê功夫真kín tō kā冊賣出，tú好補貼買魔術道具ê錢。招學生來參加台語認證
雖然了錢了工，m̄-koh為台語付出我無後悔，Ǹg望呈大語文測驗中心繼續辦理台
語認證ê khang-khuè；mā ǹg望koh khah tsē人投入tsit份khang-khuè。
最後我beh做一ê見證，自細漢講台語mm̄-nā bē變成「bumbler」，koh ē
變khiáu，我2 ê後生自細漢講台語，細漢後生2012年7--月(大學iáu-buē畢業)
tō考tiâu高雄市政府教育局所辦ê台語支援教師認證，大漢後生tú大學畢業退伍
2013年3--月放榜tō考tiâu地方特考；母語是咱ê至寶，tshui-sak母語代代
和，路竹台語第一家ê口號m̄是huah假--ê。