《受恩蒙福的一生》

 | | | 轉寄

智者ê失敗

作者 林宗要 2010.08.29

列王紀上三：5-14

智慧tùi人生極力追求爭取ê，因為通常伊是hō͘認為是由人ê觀察kap經驗ê產物，依照聖經ê見解，智慧hō͘看做人phah拼ê結果，同ê時伊mā是上帝ê賞賜。敬畏上帝，順從神旨ê人是得tio̍h智慧ê基本條件，「敬畏耶和華是智慧ê開端，只要遵行祂命令ê是聰明人」（詩篇一一一：10）。「敬畏耶和華是智慧ê開端，認bat tio̍h聖者tio̍h是聰明」，（箴言九：10），這兩節是聖經中講智慧ê基本，因為具備伊ê人，tī活上lóng會表現出符合神旨ê生活方式，chit種生活內容，to̍h是聖經中所強調ê智慧ê人生。

的確，智慧tī人生活中佔非常重要ê地位，因為伊會tòa來真chē正面ê作為，幫助人行向理想kap成功ê人生路途，所以咱chiah會hiah-ni̍h重視伊ê存在，這是指正常ê範圍內，伊對人生ê幫助實在是任何物件lóng無法度取代--ê，但是咱mā會看tio̍h真chē人kā智慧用tī惡質之路，成做犯罪ê工具，近年來ê社會犯罪較óa智慧型ê犯罪，這就是咱ê俗語所講--ê：“賊計狀元才”，kā智慧用tī惡質、無合法犯罪ê用途，chit種結果是造成今á日ê社會混亂、犯罪增加ê原因。1986年有一個高智慧型ê犯罪集團，做真chē案件hō͘警方無法度破案，to̍h是林宗誡、溫錦隆案，後來溫自首chiah破案，警方表示chiah-ê 高智慧型ê犯罪，實在hō͘警方真oh破案，罪犯徹底了解人性心理，m̄搶銀樓，因為頭家會拚命反抗，所以危險性khah koân，若是搶運錢ê車，因有保險，就bē tú tio̍h強烈反抗，比較khah安全，in pok薰或者檳榔粕lóng br7亂tàn，是khǹg-ti7lak袋á內底，事先計畫預習，控制青紅燈，犯案ùi北到南，分散注意力，辦案人員怨嘆講：智慧若無夠koân，無可能有án-ne周全計劃。

咱知影智慧若bōe-sái善用ê時，會對人類社會造成混亂kap問題，這確實對人生生活有負面ê影響，是人類ê不幸kap悲哀。假使人類ē-tàng善用智慧，一定會帶hō͘人類正面積極ê環境，咱看歷史ê過程就知影，真chē進步ê文明生活，lóng是人善用智慧ê結果，尤其是hiah處tī領導地位ê政治人物，若ē-tàng善用智慧，就會帶hō͘人民有福利kap安定ê生活，人類ê文化史mā是如此，若善用智慧，確實ē-tàng帶來khah koân文化進展。

有智慧ê人會協助人解決人生ê危機，危機ê化解是人生ê福氣，tī中國歷史上ê姜子牙、孔明lóng是智慧絕頂ê人物，戰國時代齊景公ê宰相晏子mā是非常有智慧ê人，雖然伊m̄是真koân，但是確實是真有智慧ê政治家，tī當時景公身邊有三名武將，田開疆（征服外邦有功），古冶子kap公孫捷lóng因為護駕有功，三ê人結拜，tiāⁿ-tiāⁿ利用特權，靠勢有功，欺負鄰里，侮辱公卿，因為勢力siuⁿ大無人敢反抗指責，做宰相ê晏子一直想beh除去in，有一工魯國ê君主來拜訪，晏子叫人去挽六粒罕得有ê萬壽金桃，兩ê君主一人一粒，chhun二粒，晏子建議齊王賜hō͘ siōng有功ê人，公孫捷kap古冶子家己認為救駕ê功勞siōng大，所以一人提一粒食，田開疆看in二人ê動作了後，kā齊王講：我替大王南征北討，替大王奠定穩固ê基業，我ê功勞應該比chit二ê人koh-khah koân。晏子講：確實田將軍ê功勞是齊國之首，無人thang比，可惜已經無壽桃。田將軍講：家己功勞siōng koân，soah得未tio̍h壽桃，無面khiā-tī朝廷，而且kohti7兩國君臣之間受著侮辱，án-ne 活leh有啥物意義？所以伊tio̍h自殺，另外兩ê人看tio̍h結拜大兄，因為無壽桃來自殺，家己認為功勞無thang kah田比評，竟然koh接受壽桃，實在無應該，mā lóng自殺，一時之間除去三大害，這就是真出名ê晏子二桃殺三士ê智慧計策。

Tī聖經中mā有chit種智慧ê人，比如族長時代ê約瑟做埃及宰相ê時，處理當時埃及全國ê糧食問題，lóng是相當有智慧ê傑作。

另外就是所羅門王，伊一開始ê時，只求上帝賜智慧來方便伊管理上帝ê子民，真謙虛ê向上帝求討智慧，「求上帝賜hō͘我智慧，thang好判斷你ê子民、ē-tàng判斷是非，á無siáng ē-tàng判斷 chiah-nih chē ê民眾neh」（列王紀上三：9），果然上帝賜hō͘伊無限ê智慧，連真chē外國ê君王，lóng因為伊ê智慧來請教伊。其中siōng有代表性ê一件案件，就是兩位婦人the相爭一位活ê紅嬰仔，這確實是一件頭疼ê案件，但是所羅門王soah ē-tàng運用智慧，叫人將活ê gín-á剖做兩pîng，一人一半，án-ne siōng合理，m̄-koh所羅門王tī-chiah 是利用母愛來解決問題。

確實tī伊登基開始，聖經形容伊ê國勢是無人thang比--ê，因為伊ê智慧，所以伊ê治理國政真正常，真興旺，人民ê生活非常富裕，列王紀上四章就是述講初期所羅門ê國勢kap伊ê智慧。

（一） 好字運者所羅門
Tùi舊約列王紀咱了解，所羅門王ê成長kap生活環境是非常完備、順利。伊是大衛王kap拔示巴所生ê gín-á，大衛王hit時東征西伐，因此奠定了良好ê國基，因為伊是tī戰亂、動亂不安ê時代中，建立穩固ê政權交hō͘伊ê後生所羅門，所以所羅門登基ê時是繼承了良好ê基礎，來展開以色列民族siōng 繁榮ê景象，所羅門是和平ê意思，可能是大衛王想tio̍h家己一生ê動亂生活，期待繼承伊ê所羅門ē-tàng建立真正和平、安寧、統一ê王國，雖然tī繼承頂koân有一kóa問題，但是所羅門lóng一ê一ê去克服，來成為一國之尊。

果然tī伊掌權ê時，國家表現出和平、強盛ê狀況，kap過去ê掃羅王以及伊ê老父大衛ê治世完全無仝，過去二王所奠ê國基，伊chit-má享受現成ê果實，若kap前二位國王比較，所羅門確實是好字運ê。

當然大衛mā有真chē gín-á，所羅門是siōng小ê，竟然ē-tàng排除萬難才登上王位，亦表示伊是一位好字運者。

（二） 智慧ê所羅門

咱bat提起所羅門hit時ê環境，伊是一位好字運ê人，台語講「生tio̍h時」，chit種好字運定定是人成功ê原因之一，而且配合伊ê聰明，以及頭先伊ê謙虛，就是伊所有成就ê表現。

（A） 良好ê環境是主要ê原因之一。雖然環境對人生無一定是絕對--ê，因為咱看tio̍h真chē雖然有真好ê環境，結果mā是失敗，但是mā有真chē tī惡質環境中ê人，soah ē-tàng克服惡質ê逆境來成功ê事例。但是大部份，人生ê境況若好，當然khah有成功ê機會，當時ê所羅門有良好ê環境，成做伊成功ê原因。

（B） 向上帝求智慧。另外一個成功ê原因，著是tī當時ê所羅門，確實具備謙虛ê心態，列王紀上三章伊kap上帝ê對話中，清楚ê講：「耶和華我ê上帝ah！如今你hō͘僕人接續阮老父大衛作王，但是我是gín-á，m̄知影應當án怎出入」……所以伊求上帝賜hō͘伊智慧，「求上帝賜hō͘我智慧，thang好判斷你ê子民、ē-tàng判斷是非，﹝、﹞á無siáng ē-tàng判斷chiah-nih che7e5人民neh」，（列王紀上三：7-9），因為上帝tī怪象中明白kā所羅門講「你希望我賜hō͘你啥物？你ē-tàng求」（列王紀上三：5），chit-ê時chūn ê所羅門無求國家ê強盛，無求家己ē長歲壽，以及消滅敵人，（chiah-ê lóng是做一個國王所必具備ê條件），伊所求ê是正直kap是非ê判斷，ē-tàng做一位公正明理ê仁君，確實伊所求ê tú好符合上帝ê要求，所以上帝真喜樂伊ê祈求，m̄-nā賜hō͘伊智慧聰明，伊所無求ê，上帝mā賜hō͘伊，（列王紀上三：13），就是hiah-ê屬世ê物質條件，列王紀上四章就是teh描寫所羅門強盛ê政治力量，伊向上帝祈求治國之本ê公義kap是非分明ê人生內容，因為伊確信國家ê興旺kap衰微，m̄-nā tī 財富kap強盛ê兵力，mā有用公義治理國家，hō͘全民有判斷是非ê生活kap真高尚ê義理心to̍h ē-tàng辨別是非，án-ne國家就ē-tàng強大興旺。

Chit-ê事實，咱ē-tàng用過去ê歷史去求證，國家ê興旺kap衰弱ê關鍵m̄是tī外在條件ê旺盛，伊是tī符合上帝旨意ê公義kap憐憫ê發揮，咱看近代ê蘇聯政權，tī iáu未改革chìn前，蘇聯是一ê無公義ê國家，雖然真強，但是結局mā是瓦解，chit-má in百姓ê生活水準已經降到三流，為何會án-ne？原因在tī欠缺公義，咱mā ē-tàng用中國ê歷史來看chit件 tāi-chì，通常朝代會hông拍敗，lóng是因為政權無法度用公義好好對待百姓所造成--ê！咱看清末ê失敗政治，是造成孫中山革命ê主要原因，國民黨ê hō͘共產黨佔領大陸，雖然原因複雜，但是欠缺公義kap失敗ê政治是主要原因，因為心思hō͘極權遮蓋，soah造成治理無法度發揮公正價值kap辨別是非，造成混亂kap問題，chit-má ê台灣tī政治型態上，確實需要檢討，因為伊定定kap烏金結合造成社會ê動亂，全省八百gōa位議員中，有烏道背景ê佔二百gōa位，這實在是非常嚴重ê事實，人所以會因為現實狀況來影響對公義ê判斷，是因為人ê無知（無智慧）所造成--ê！

當時ê所羅門了解智慧ê重要，所以伊kan-nā求上帝賜hō͘伊智慧，chit-ê智慧，所羅門共伊定義做「敬畏耶華是智慧ê開端，認bat聖者tio̍h是聰明」（箴言九：10），mā ē-tàng講心中有上帝是人生智慧，確實上帝若tī心中，hit-ê人全部ê言行舉動，lóng會照上帝ê旨意，tī人間社會中，若ē-tàng發揚上帝美旨ê時，hit種社會就是人間ê理想。所羅門開始ê時，確實已經tī當時ê社會建立相當程度ê國權，因為伊ê心內有上帝ê智慧，所以ē-tàng用公義ê判斷，引chhōa人生有辨別是非ê生活內容。Chit種用智慧治理國家，就是人成功ê原因，可惜ê是，tī政權頂koân人時常用手段當做治國ê 要領，tiāⁿ-tiāⁿ會造成複雜ê人生社會問題！

（三） 失敗ê所羅門（列王紀上十一：1-11）
咱若看所羅門初期ê情景，無論tī物質、政權kap生活ê環境，lóng是siōng受祝福ê時代，照理伊應該好好計畫來治理，成全上帝交託hō͘伊ê重大責任，成為一位自頭到尾lóng是充滿智慧、成功kap理想ê君王，因為至少伊tī列王紀上三章所表現ê，實在是非常偉大將才，是正確ê人生態度，為何chit位聰明絕頂ê所羅門王，竟然會成做上帝所棄絕kap詛咒ê人！

列王紀上十一：1-13真詳細ê說明所羅門王失敗ê原因，為何一位智慧、成功ê人，會變成頇慢失敗？聖經teh提出人性ê缺點，tiāⁿ-tiāⁿ有chit種情形，若用信仰ê角度去思考ê時，咱就會了解，主要原因是tī違背上帝ê生活所引起--ê！開始ê時伊kám-m̄是hiah-ni̍h謙虛卑微ê面對上帝？

（A） 違背上帝ê命令，用十一章ê記載，造成所羅門失敗滅亡ê主因，tī伊放蕩ê生活，伊娶了真chē外邦女子做bó͘，上帝一開始就禁止以色列人，bē-tàng kap in來往，因為以色列人會引誘in離開上帝，去順從外邦ê禮俗。Tī一般人ê了解，成功者ê背後，一定有好牽手鼎力相助，這就是「世界ê運命，掌握tī婦人人手中」格言ê由來，所羅門ê失敗，tī伊ê生活中，無信仰ê牽手，列王紀上十一章記載，伊所娶ê某lóng是外邦人，上帝已經禁止以色列人bē-tàng kap in來往（十一；2），所羅門soah kap chiah-ê異邦人結親成，chit種作為是teh說明伊違背上帝ê旨意。一個違背神旨ê人，心中已經無kah上帝同在，因此對放蕩ê生活kap家庭生活ê失敗並無認為是問題。十一：3提起所羅門有千gōa名ê后妃，chit種放蕩ê生活已經m̄是有智慧ê王ê作為，tī chit種環境中註定會失敗ê，因為chiah-ê異邦ê嬪妃，hō͘伊ê心歪去（十一：2），誘惑伊ê心無順從上帝（十一：3、4、6），kap過去伊向上帝ê告白完全無仝。

（B） 少年得志，好額造成驕傲。（享受現成ê美好境況，會失去進取、儆覺ê生活）。Tī所羅門登基chìn前，伊ê老父大衛王一直kā伊警告，ài遵行上帝ê旨意，chiah ē-tàng蒙主喜樂，開始ê時，伊ē-tàng堅定行主所喜樂ê tāi- chì，（列王紀上二：3-4），m̄-nā án-ne，上帝本身mā向伊顯現，強調祂kap所羅門ê關係是特殊--ê，伊必定ài遵守祂ê旨意，服從祂ê命令，chiah會受tio̍h祝福，萬事亨通，m̄-koh伊soah失敗阿，原因tī伊ê少年得志，而且現實境況ê富強，mā致使伊ê失敗，有時人生若過了亨通，往往會產生負面ê結局，所以人生中謹慎、有撙節ê生活顛倒會策動人生正面ê價值。

（C） 祭拜偶像。一個上帝ê子民，必須ài用謹慎ê心態去經營生活，若過分放蕩享福，往往會迷失tī現實中，來看bē清伊kap上帝之間ê真正關係，這是所羅門siōng大ê失敗！m̄-nā án-ne，伊iáu犯了真大ê罪過，就是引進koh祭拜偶像，這是所羅門ê致命傷，因為伊犯了上帝siōng怨恨ê罪，tī十誡中ê第二誡「bē-tàng替家己雕刻尪仔，mā bē-tàng作甚麼形象，kah-ná上天下地kap塗跤下跤水中ê百物，bē-tàng跪拜hiah-ê像，mā bē-tàng奉待伊，因為我耶和華你ê上帝是禁止妖邪ê上帝，恨我ê我一定追討伊ê罪，ùi老父kap後生一直到三四代，疼我守我誡命--ê，我一定向in發慈疼一直到千代」，咱若看十一章ê聖經咱就知影，伊受嬪妃ê引誘chiah犯下真大ê罪，m̄-nā引進偶像，mā為chiah-ê偶像起廟，而且koh鼓勵民眾去祭拜偶像。

Tī上帝子民中，無比chit種罪惡koh-khah驚人--ê，所以耶和華ê怒氣降到伊ê身上，伊成做上帝所棄絕ê人！ kap上帝ê關係上，人若hō͘上帝所棄絕，是siōng 悲哀ê下場，無一種失敗比chit件tāi-chì koh-khah凄慘。
結論：
所羅門ê事實，thang做基督徒ê鑒戒，咱必須明白，智慧ê根源tī上帝，維持好kap上帝ê實在關係是持守智慧ê關鍵，bē-tàng半路斷絕，必須ài繼續，代代傳承hō͘咱ê kiáⁿ孫。若hō͘上帝棄絕，這tio̍h是人siōng大ê失敗。