《受恩蒙福的一生》

 | | | 轉寄

無愧ê一生

作者 林宗要 2010.08.22

申命記卅一：7-8；約書亞廿四：31

1997年九月第一ê、第二ê拜六，分別有兩個世界性ê喪禮，一個是英國王妃黛安娜，一個是tī印度ê修女德瑞莎，咱ē-tàng tùi電視、報紙頂koân看tio̍h chit兩個喪禮ê壯觀，黛安娜王妃青春美麗，是全世界lóng-teh注意ê焦點，德瑞莎修女奉獻一生六十年歲月tī siōng貧苦ê人身上，近期教會公報一篇文章「虛幻ê玫瑰kap真實ê百合」teh討論chit兩位女性，作者ê觀點由題目ē-tàng了解，但是咱ē-tàng百分之百肯定德瑞莎修女ê作為，伊ê人格以及由信仰表現出來ê疼ê行為，咱thang用「無愧ê一生」來形容伊。

今á日咱讀ê聖經，講約書亞ê一生，前段講伊接受使命，後段講伊死了後hiah-ê人對伊ê懷念以及伊對社會ê影響力，約書亞ê一生是無愧ê一生，「無愧」兩個字是世人ê評斷，由伊ê人格表現來決定，m̄是家己講ê。

Tú好chit-má是重陽節，今á日咱來講老人ê問題，台灣已經進入「老人國」，所謂老人國ê定義，to̍h是六十五歲以上ê老人佔全人口ê 7％，台灣teh二、三年前就已經達tio̍h chit-ê數目。

現代社會變遷，會記得六十年前農業社會ê庄腳村á內底有二、三位年歲khâh koân ê長者，任何大小事，inl óng有chiok大ê權威，我親目chiu 看見長者用長長ê薰吹kho̍k一位無聽話ê序細ê頭，雖然非親非故，全村人對in lóng真敬畏，hit時厝內長輩若使性地m̄食飯，kiáⁿ孫就ài跪the塗跤哀求伊食mn̄g-kiāⁿ，今á日chit種情形無可能koh看見，老人ài自求多福，mài隨在使性地、發脾氣。

「老人」ê階段，每一ê人lóng會經過，若tú-tio̍h kiáⁿ孫有孝，感謝主，ná是無，mā mài怨嘆，ài以積極ê心態，面對現實，自求多福。「四十想六十」是我一直teh強調，提醒每一位會友ài有ê人生規劃，tio̍h用功充實家己ê人文素養，tòe-tio̍h社會脈動，建立正確ê人生觀，若ē-tàng有chit種準備，老年生活一定ē-tàng khah幸福安穩，bōe成做「老賊」，咱mài驚老，ài驚ê是無尊嚴ê老。英國「經濟人」雜誌bat以經濟ê觀點來看老人，結論是「老人ê義務就是去死！」。美國一位州長，mā勸老人若有慢性病，千萬m̄-thang賴leh m̄-cháu，殘害kiáⁿ孫！聽起來非常無情，完全無想著老人過去ê作為。夕陽無限好，老人ài如何hō͘家己活得有尊嚴？這m̄-nā是老來chiah ài去想ê問題，mā是二十歲、四十歲ê人應該想ê問題，過去ê社會，老一輩ê人tiāⁿ-tiāⁿ以家產來控制kiáⁿ兒序細，今á日kiáⁿ兒序細ê經濟能力遠超過in，chit-ê舊社會ê法寶已經失—去效果阿。讀者文摘bat有一篇文章「五子登科」，伊講人生七十歲chiah開始，五子登科指ê是1.kiáⁿ兒無tī時，tàu顧厝，2.新婦上班，tàu顧孫á，3.厝內是非m̄聽，假做臭耳聾，4.看bōe順眼，假做chheⁿ-mê，5.家事mài講，裝作啞口，雖然是一篇諷刺文章，soah 反應出現代老人ê生活。

老人ài如何建立有尊嚴ê生活？

（一）建立正確ê人生價值觀
社會急變，ài老人來適應社會比較khah困難，mā因為án-ne少年人時常khau洗老人是「老頑固」，堅持原則是好，過分固執soah無幫助，老人ài克服固執ê心態。我teh四十歲時開始規劃六十歲了後ê生涯，用健康ê心態來適應年歲ê增加，腓立比一：20～25，保羅講伊甘願離世kap基督同在，因為這是好得bōe比--ê，但是若tòa-tī世間，kap眾人tòa作伙，ē-tàng hō͘信徒tī所信ê道上，koh khah進步koh khah喜樂，所以無論是生，是死，伊總替主喜樂。若ē-tàng有像保羅chit種ê人生觀，無論toh一種景況，toh一種問題，lóng thang適應，這就是幸福ê人生，只要是練達，保羅食老時知影家己離世ê日子近了，但是伊猶原盡本份ê做家己應該做ê tāi-chì！chit種人生觀是值得阮/咱學習ê。無論生、死，基督ài tī我身上得榮耀，活teh是為基督，死mā有好處，活leh是為信徒ê長進kap喜樂！我年老時siōng大ê安慰就是kiáⁿ兒、新婦、查甫孫、查某孫lóng非常有孝，kap咱二老非常親密，這是上帝特別ê恩典kap祝福，當然孫á kap 阿祖感情好ê關鍵tī kiáⁿ兒、新婦，孫新婦敬重父母，孫á自然學習父母ê模樣，mā會尊敬阿祖，少年ê父母teh教育kiáⁿ兒時，特別ài用心注意chiah-ê事。

（二）成做受人尊敬ê老人
老化是人生必然ê現象，機能退化、體力衰敗，新陳代謝、消化機能、智能、思考模式lóng退步，有時甚至失態、失控。進入老年了後，siōng可貴ê是1.老伴2.健康3.朋友4.老本，但是chiah-ê物件會一項一項ta̍uh-ta̍uh-á失--去。所以老年人ài服老、認清家己，千萬m̄-thang靠勢家己年老，有問題時請教少年人，hō͘ kiáⁿ孫快樂、滿足、hō͘-in感覺家己mā ē-tàng教阿祖，老人mài固執，應該加吸收新知識，建立家己成做有智慧、健康、可愛ê形象，成做少年人學習ê對象，用客觀ê條件克服主觀ê狀況，「老才彌堅」是指老人只要身心狀況iáu ē-tàng，仝款ē-tàng有快樂ê人生！beh到chit種境界，需要平時，特別是自青壯年時期就ài phah拚kap建設，同時mā需要kiáⁿ兒kap家庭ê關心kap扶助。

（三）心靈成熟ê人
若用信仰角度去看人生，我真實體驗tio̍h上帝ê恩愛！這的確是上帝特別ê賜福，因為我ê老年生活無壓力，無煩惱，過tio̍h清淨ê日子，是teh享受人生ê時期！可惜有一kóa老年人因為現實環境無法度如願，譬如身軀衰弱、kiáⁿ孫不孝、心智障礙、經濟困難等，人生實在無法度十全十美！聖詩322首講「koh-khah好ê tāi-tsì mā有烏點」，tī chit種現實中，老年人ài如何善用上帝ê恩賜去建立咱ê人生，特別是晚境成做無愧ê一生？hō͘老人真正成做「家有一老，kan-nā一寶」，真正體會上帝ê祝福kap快樂無比ê人生狀況？

老人必須明白本身ê老化以及心理狀況ê問題，基督徒擁有受祝福ê人生，上帝賜咱信仰kap智慧，一位年老ê基督徒若ē-tàng善用上帝所賜無限信心ê力量，以及信心所帶來ê智慧運用tī你人生過程中，你必定成做一位十分完美ê人生！

「心靈成熟」確實是老大人非常重要ê人生內容，只有絕對ê信仰chiah ē-tàng引chhōa老人勇敢、放心去面對食老時期待ê真chē人生狀況，甚至死亡，tī任何階段lóng ē-tàng成做榮耀上帝ê存在者，這是上帝向人類要求ê人生siōng koân目的。一個人到老年時ná是iáu ē-tàng成做榮耀上帝ê人，chit種ê人力就是無愧ê一生。

老人雖然無少年人ê衝勁kap氣力，但是伊有豐富ê人生kap信仰ê體驗，智慧ê累積，致使心靈到完全成熟ê境界，這就是教會生活時常提起ê“信仰ê屬靈性命”，只要具備chit種成熟ê心靈，咱就ē-tàng克服真chē老年人所有ê身心障礙，障礙若消除、克服，kám m̄是完美、理想？mā就是以信心去克服真chē人生問題，因為任何老化所帶來ê人生現象lóng會tī成熟ê心靈ê直接帶動之下kā伊化解，hō͘老化ê問題減到siōng低限度。Chiah-ê事實，咱thang tùi真濟位偉大ê信仰前輩ê生活得tio̍h印證。

學生時代認bat一位楊長老，是一位偉大ê信仰者，伊ê一生充滿坎坷、病痛，但是伊有充份ê心靈ê資源，雖然生活teh苦境中，soah ē-tàng成做榮耀上帝ê存在，mā就是運用伊ê屬靈ê生活去帶動衰弱痛苦ê肉體生活。

結論：
「家家有本難念ê經」,尤其是老大人，m̄-koh「無愧ê一生」是每一個人必須phah拚去經營--ê。Tī急變ê現代社會，老人一定bē-tàng被叫做“老賊”，咱ài發揮老人ê特質，自重自愛，積極主動，tī夕陽無限好ê過程中，無一定是凡事順心，但是咱ài hō͘伊成做“無愧ê一生”。