《受恩蒙福的一生》

 | | | 轉寄

逆說ê真理

作者 林宗要 2010.09.05

列王紀上十七：1-16

舊約時代ê以色列民族，用上帝ê選民自居，一方面享受in有--ê權利，另gōa一方面mā tio̍h-ài盡義務。權利是tī in kap上帝之間ê特別契約，thang享受上帝ê應允kap特別ê祝福，同時上帝mā要求in，必須ài符合選民特質ê生活方式。

特別tī kap上帝ê關係 chit-ê方面，是別的民族bōe-sái相比評--ê，因為上帝藉tio̍h kap in立約，要求in必須ài盡一切力量去疼上帝，實行上帝所交代ê使命，只有完成選民ê責任，上帝chiah會將in應該得tio̍h ê福氣賜hō͘ in。這是舊約中講tio̍h--ê上帝kap以色列人ê關係，所以tī舊約中，咱tiāⁿ-tiāⁿ會看tio̍h一句話「以色列ah，lín ài疼主你ê上帝」。Chit句話ê前提，就是認定in kap上帝之間ê關係。

今á日咱雖然tī新約時代，相信主耶穌要求咱chiah-ê基督徒kap祂ê關係，大概mā是kap舊約時代ê情況相siâng。主耶穌當時bat向彼得提起彼得對耶穌基督ê信仰，「約翰ê 後生西門，你疼我比chiah-ê koh-khah深mah？」（約翰福音廿一：15）相信咱ê主耶穌，猶原ài用chit句話來問咱chiah-ê屬於祂ê人，咱對祂ê疼如何？

事實上，基督徒信仰siōng好ê解釋，就是對主耶穌ê疼，因為chit種疼，是發出基督徒所有ê信仰生活ê一切動作，或者是講疼基督耶穌ê心tio̍h是基督徒信仰生活所結ê果實！

因為咱知影，愛是kā咱人kap人ê間距離giú 較óa ê主因，咱若看tio̍h家庭中親情ê表達，咱就會了解chit件tāi-chì，翁仔bó͘之間ê感情，父母kiáⁿ兒、兄弟姊妹，或者其他ê親情，hiah-ni̍h甜美感動人，lóng tī其中充滿愛。假使，tùi chiah-ê親情中除去「愛」ê時，是真悲哀--ê，這mā會發生tī chiah-ê siōng親密ê人之中，比如翁仔bó͘結冤仇，thâi死對方，甚至滅屍，父母kiáⁿ兒ê歹面相看、相phah、兄弟姊妹為tio̍h利益關係，互相殘殺控訴，chiah-ê tī咱ê社會中並m̄是啥物稀罕ê tāi-chì，為何會有chit種悲劇發生，主因tī失去愛ê連結，iah就是tī chiah-ê所謂親人關係中，無形成做伊ê主要因素—愛，因此成做欠缺愛ê翁仔bó͘、欠缺愛ê父母kiáⁿ兒kap兄弟姊妹，如此一來，teh有利害關係發生ê時，狀況就是真pháiⁿ想像，因此咱ē-tàng了解，翁婿為何會將伊ê bó͘ phut死koh滅屍，是án-ná兄弟為tio̍h一kóa利害關係來互相殘殺等等ê殘忍ê行為。

無愛ê人生關係，是疏遠ê人生關係。所以愛是成做人倫關係ê主因！

這就是為什麼咱會一直teh強調愛ê重要性，尤其是基督徒應該ài比別人koh-khah ē-tàng體會tio̍h愛ê重要性。因為咱chiah-ê基督徒，lóng tùi上帝hia體會tio̍h無限ê恩疼tī咱ê身上！特別是咱kap上帝之間愛ê關連，是成做基督徒ê信仰生活ê 主要原因。

Chit種愛ài如何表現？Chit種愛ê表達，就是基督徒ê信仰生活之一，聖經中講teh人愛上帝ê時，通常lóng用順從上帝命令或者順服上帝ê旨意做siōng關鍵ê問題。所以聖經是用順服上帝來說明人對上帝ê愛ê關係。

今á日ê經節，是描述當時ê掌權者亞哈王，tī政治方面，伊是有成就ê王，但是tī信仰頂koân，伊是欠缺信仰，因為伊tiāⁿ-tiāⁿ表現出m̄順從上帝ê話，用伊家己ê意思代替上帝ê旨意，因此tī上帝ê眼中，伊是一位無愛上帝ê王，當然mā是無信仰ê王，因為當時ê以色列是神政政治，所以無論如何lóng是以上帝為主，聽從上帝ê旨意（神政政治），chiah是符合上帝ê要求。

親像頭前所講--ê，選民kap上帝之間ê契約是m̄是實現，就是in受祝福或者受棄絕ê關鍵。因為teh完成契約ê動作中，會充分表現出in kap上帝ê愛，iah 就是用in是m̄是完成上帝ê契約來看出in對上帝ê態度！

因為亞哈王ê反背上帝，soah造成有三年半ê火燒埔，這是非常嚴重ê問題，因為水kap空氣、光線，lóng是人生生存所bē-tàng欠缺ê物質。台灣熱天ê時bat因為電力不足或者火燒埔（欠水），來發生嚴重ê民生問題（1911年4月中，全台灣水無夠用，佳哉5月初ê 及時雨化解了生活上ê大問題。）因為連續三年半ê火燒埔，m̄-nā人民用水欠缺，農產品mā欠收，這往往是造成飢荒ê主因。近年來非洲有kúi-nā萬人時常生活teh飢荒中，主因是火燒埔所引起ê欠水。（沙漠mā是其中之一）

三年半火燒埔造成水kap食物不足ê結果，開始ê時是影響tio̍h hit kóa社會基層ê人（貧苦ê工人，以及無資產ê歹命人），但是社會中，低階層ê人占大多數，chiah-ê人若無mn̄g-kiāⁿ thang食，社會必定會動亂，社會若動亂，hiah-ê王公貴族mā無好日子thang過，這是咱ē-tàng了解--ê，歷史上朝代ê 改換，通常lóng是因為民生問題，真正屬於政治性ê khah少。

Tī亞哈王朝中，chit對艱苦ê母á-kiáⁿ，咱ē-tàng了解in當時ê實況：

（一） 伊（寡婦）ê現實情形
咱已經大概提起，火燒埔kap人生生活ê實質關係，伊對人有決定性ê影響，因為人生生活ê條件，食占真重要ê地位，過去中國人用「民以食為天」來形容伊ê重要性。囡仔時mā tiāⁿ-tiāⁿ聽tio̍h chit句「食飯皇帝大」，相信chiah-ê lóng是the講，人生中食ê重要，為tio̍h beh hō͘生活ê內容koh khah豐富，人類ê歷史上，一直teh為伊付出一切，期待tio̍h人生有koh khah理想ê生活內容，相信這就是人為何ài hiah-ni̍h骨力teh做khang-khè、thàn錢ê主因。

生活境況若良好ê時，食ê問題就bōe受tio̍h影響：若無好tio̍h會活teh 枵腹肚ê生活中。咱看世界ê現況，自由國家ê經濟狀況lóng非常好，共產主義國家，大部份ê生活狀況lóng真bái，用蘇聯來講，伊是共產國家ê龍頭，但是經濟狀況soah真bái，這就是造成近年來歐洲真chē共產國家改變政治主體ê原因。

因為人民是成做國家ê重要因素，chiah-ê人民若無mn̄g-kiāⁿ thang食，國家就tī危機中，chit種狀況，用目前ê台灣kap大陸相比就ē-tàng了解，假使一位偷渡ê大陸人來台灣ē-tàng順利tòa tī台灣一冬半冬，伊可能ē-tàng thàn tio̍h十gōa萬，chit種數目是in tī大陸thàn二十年mā thàn bōe-tio̍h-- ê，這就是為何一直teh遣返偷渡來台灣ê大陸人ê原因，但是in mā是一直beh來，因為這thang解決in siōng大ê民生問題。

Chit位寡婦生存ê條件比一般人受tio̍h koh-khah chē ê限制，因此三年半ê火燒埔，伊kap gín-á ē-sái講是頭一ê受害者，咱thang tùi伊聽tio̍h先知ê話了後，伊ê 回答來了解伊ê狀況，「伊講：我用手指永生耶和華你ê上帝咒chōa，我無餅，甕á內只有一把麵，罐á內底只有一點á油，我chit-má chhōe兩ki柴，tńg去厝裡為我kap我ê後生作餅，等阮食了，死就死阿」（列王紀上十七：12）。Tùi婦人所講--ê，咱ē-tàng完全了解，伊所有ê可能kan-ta夠額做一頓，hō͘ in母á-kiáⁿ食飽，絕對無可能提供hō͘第三者。當時chit位婦人phah算食了了後，就是「坐—e等死」，因為tī伊ê現實ê生活境況中，伊實在chhōe bōe出有其他ê辦法thang koh再維持in ê生活！

Hit時chūn，hit種連續三年半ê火燒埔，實在造成了當時社會全面ê痛苦kap危機。Chit位寡婦ê悲哀kap困苦現實，是食好穿好ê現代人，所bōe-tàng了解--ê！除了伊向先知以利亞所講ê以外，伊實在無其他ê路徑thang解決伊所tú-tio̍h ê現實問題！

（二） 貧苦逆境中ê事奉
的確，chit位婦人ê境況實在是真困苦，甚至是充滿危機，因為伊phah算食完最後一頓了後就等死，想看māi，人生kám有比chit款境況koh-khah淒慘--ê？
M̄-koh tī chiah-ni̍h悲哀ê境況中，上帝soah安排伊ài負起供養先知以利亞之重大責任，tī列王紀上十七：8-9「耶和華ê話降到伊--講：你起身ùi西頓ê撒勒法去，tòa tī hia，我已經吩咐hia內底ê一個寡婦供養你」，先知即時起身到上帝所啟示ê所在，就tú-tio̍h hit位貧困可憐ê寡婦，伊mā將伊ê實況完完全全ê kā先知講，「以利亞對伊講：mài驚惶，tio̍h照你所講ê去作to̍h好，只要先替我作一個小餅，提來hō͘我，然後替你kap你ê kiáⁿ作餅」（列王紀上十七：13）。Che kap主基督教咱ài先求上帝ê國kap義是仝款ê道理。

照人ê看法，chit位寡婦，自身ê現實生活lóng有問題啊，那有加ê氣力去幫助別人neh？伊是無法度thang供養先知--ê！因為伊ê現實thang用「自身難保」來形容。
M̄-koh tī-chiah有人料想未到ê tāi-chì，就是上帝命令伊ài負責供養先知，而且是teh飢荒ê時！咱ē-tàng看出tī屬靈世界逆講ê真理！用理性ê思考，伊是無可能做chit種tāi-chì，但是咱ê聖經講「人感覺bōe-sái--ê，tùi上帝是萬事lóng ē-tàng」，因為信仰ê算盤，定定是kap人ê算盤無仝。上帝ê旨意，有ê時是人無法度體會--ê。
上帝希望chit位處tī極端貧困中ê寡婦，tī án-ne惡劣ê境況中，負起供養神僕ê責任！伊是hō͘上帝選tio̍h啊，當一個人hō͘上帝選tio̍h ê時，就無機會推辭，只要上帝選tio̍h你，你就無可能有法度推辭上帝ê交託。Tī舊約ê約拿書有chit-ê事實，先知約拿hō͘上帝選--tio̍h，ài負擔向尼尼微城傳道ê責任，雖然伊逃避，但是he是永遠無可能ê，因為主上帝是絕對ê主！

上帝ê旨意tī人身上ê時，人是無法度推sak抵抗--ê，人只好完全順服上帝！Hó親像chit位寡婦仝款，伊有充分ê理由拒絕上帝所交代供養先知ê責任！因為伊tī現實ê環境中，只chhun 一點點á麵粉kap小khóa-á ê油，實在無條件去完成上帝所交託ê責任。

伊ê境況是非常ê貧困，m̄-koh上帝逆講ê真理，soah發生tī伊chit種狀況中！Tú親像約翰福音六章耶穌叫學生「Hō͘ in食」！腓力講用二十兩銀去買餅，叫in各人食一點mā是無夠--ê，但是主耶穌soah命令學生，「lín hō͘ in食啦」（馬太福音十4：16）。Chit種逆講ê真理，tī基督徒ê信仰生活中，tiāⁿ-tiāⁿ會出現，因為咱所面對ê主是絕對ê上帝！

只要你hō͘祂選—tio̍h，就無任何理由推辭或者抵抗，同時咱mā必須ài會記--eh一項事實，就是任何境況中上帝lóng會選tio̍h咱，m̄是只有順境、好額、健康ê時，有ê時像chit位sàn-chhiah寡婦，逆境中、病痛ê時，基督徒mā ē-tàng體會tio̍h chit-ê事實，tī真chē人生困苦不幸ê現實中，逆講ê真理mā會降到你ê身上。

（三） 這就是逆講ê真理
伊無用人ê觀點kap作為來衡量上帝ê交託，伊無用人ê想法來計算上帝所交託hō͘伊ê事工！伊用信仰接納上帝ê旨意，伊無像上帝辯解伊悲慘ê現況，當先知ê話臨到伊身上ê時，「婦人就照以利亞ê話去做」（列王紀十七：15）。Chit句聖經chit位貧困寡婦ê信仰siōng好ê解釋。若是一般人，伊有充分ê理由kap藉口來推辭chit-ê重擔，chit種作為是現代基督徒ê特色！基督徒tiāⁿ-tiāⁿ用理由kap藉口來推辭上帝所交託ê使命，這是用人ê立場，mā就是無信心ê作為（比如講我無閒、我苦、我bōe ē-tàng等等），有信心ê行動，好親像創世記二十二章亞伯拉罕接tio̍h上帝ê命令，beh將孤kiáⁿ以撒獻hō͘祂ê時ê心態，kap無信心ê行動是完全無仝ê！信仰ê行動上，往往有hō͘人料想未到ê tāi-chì發生，上帝準備另外一隻羊á做祭物hō͘伊使用（耶和華以勒）。

Ná親像chit位可憐ê寡婦接tio̍h上帝所交付hō͘伊ê使命ê時，伊就用信仰來接受伊，koh用行動來表達：當一ê信仰者將上帝所hō͘伊ê信心變成行動ê時，hit時就會發生真chē逆講ê真理tī信仰者ê生活kho͘-á中。

會記--eh：上帝向伊要求ê是tī伊ê範圍內所ē-tàng做ê「一ê小餅」，m̄是大餅，因為上帝對人lóng是按照人ê能力，當chit位寡婦完全順從上帝ê話去行動ê時，果然有驚人ê結果，「甕á內ê麵，果然無減少，罐á內底ê油mā 無欠缺」，tú親像耶和華藉tio̍h以利亞所講ê話（列王紀上十七：16），這就是逆講ê真理，伊是用人ê理智kap人ê思考所無法度了解ê事實，是超理性--ê！Chit種逆講ê真理，tī基督徒ê信仰生活中，tiāⁿ-tiāⁿ會tú-tio̍h，mā就是基督徒信仰生活ê事實。

咱ē-tàng tùi chit位非常困苦ê婦人ê現實狀況得tio̍h學習，伊面對上帝所交託ê使命，用信心去接納，koh實際行動。當然，tī-che所需要ê是像chit位婦人肯用事奉ê生活，表現出信仰ê內容，因為ài有豐盛ê疼chiah ē-tàng完成上帝所交託ê使命。

結論：婦人ê現實是tī絕對ê危機中。
絕境逢生ê祕訣是：（一）tú-tio̍h先知。（二）聽從上帝ê話。（三）信仰kap行動。（四）上帝無限ê應允，危機會得thang化解。