《受恩蒙福的一生》

 | | | 轉寄

得勝ê秘訣

作者 林宗要 2010.08.15

出埃及記十七：8-16；林前十二：26

成功或者勝利ê人生，tī現實ê社會中，是人共同ê期待，因為每一個人lóng期待伊ê人生無論什麼方面lóng有完美成就ê結果，因為伊會引chhōa人生建立khah理想ê人生方式，ē-sái講是tī現實中，人生ê期待無一定會成全，反倒轉來講，人生定定tī成功kap失敗中過日子，所以人必須ài有自覺，tī人生中定定有成功kap失敗相伴，有人講人生有成功kap失敗兩面ê存在，確實，tī人間無絕對ê成功者，任何偉大ê成功者難免mā會有一kóa失敗ê經驗，這是事實。

Chit種兩面性確實對人生有真大ê影響kap關係，人生ài如何確立tī chit種兩面性ê世界到伊ê生存ê價值，這是每一個基督徒必須ài完全把握ê人生方式，因為án-ne，人生chiah ē-tàng tī任何境況中有良好完美ê人生內容ê表現。因為咱知影世間上chit種兩面性ê事實真普遍，比如金錢mā是兩面性--ê，有價值kap罪惡lóng tī使用ê人身上，人若用tī正面有意義ê時，錢就成做對人間社會ê好，反倒轉來講，就是不法罪惡ê工具，塗mā是án-ne，tī田中伊是人生所bē-tàng欠缺ê，會生產真chē農作物hō͘ hiah-ê人使用，ná是伊tī厝內ê桌頂或者眠床頂就變成塗粉，無人愛koh討厭。自尊心（家己尊重家己）是一件美德，但是程度若是超過定定表現出驕傲，這兩者ê差別真大，有自尊ê人受人欽仰，驕傲ê人hō͘人討厭、棄嫌，照學者ê研究，驕傲ê人真chē是自尊心ê程度相超過所造成--ê，愛家己ê性格mā是人ê一種美德，但是chit種自愛，若過份表現往往會變成自私利己中心ê人生，chit兩種性格mā是完全無仝，其他iáu有真chē狀況，咱ē-tàng體會。

確實人生是處tī chit種兩面性ê狀況中，關鍵性ê問題m̄是tī tāi-chì，是tī操控ê人身上，mā就是人ê心態（價值觀）tī形成（影響）事物ê正負面，所以人生ê一項重要ê事工就是ē-tàng建立良好正確ê人生觀，to̍h是對伊ê人生ê一切運作lóng khah有正面性ê表現，因為人生價值觀若khah正確ê人，伊ê人生表現必定有khah端正ê態度。

所以一個成功ê人生，必須ài把握tùi上帝所領取ê人生，chiah ē-tàng善用tī適當ê過程，以及完全ê領域，tī chit款情形之下成功ê可能性就khah大，若是將人生ê 才能無妥當使用，是違反神道kap人道--ê，tī現實ê社會中，確實有真chē天才型ê人物，因為無妥當使用tio̍h變成犯罪工具，咱若注意社會新聞，就ē-tàng看tio̍h真chē事實，譬如電腦設計師偷theh密碼、偷theh現金等等。因為án-ne tī咱人生現象中，人定定處tī適當kap無妥當之間，對che-ê取捨chiah決定人生ê成敗，人生ê實況定定lóng會面對chit-ê挑戰。

Tī信仰生活中，誘惑本身並無一定是罪惡（因為主耶穌亦bat面對伊），伊之所以成做罪惡，猶原是人禁bōe起伊ê考驗，成做伊ê奴才，罪就降kàu人ê身上，若是ē-sái克服伊，對人ê心性lóng有正面ê提昇，hō͘人進入koh-khah koân ê層次ê人生經驗！

人定定會提出創世記三章亞當tī伊甸園中ê生活kap禁果，譬如鳥á teh天空飛，你無權干涉伊，但是當鳥á beh停tī你頭殼頂有所動作時，正常ê人lóng會有一kóa反應！像án-ne，人面對真chē試誘，人實在無權干涉，但人有取決權tī伊來臨ê時使用。我tī虎尾牧會時，經過特別區，bat hō͘查某囝仔扭tiâu所騎ê自轉車，真熱情ê請我入去坐，我kā in講我ê身份，順續想beh 向in講一kóa福音，in隨放我行！

基督徒ài有拒絕罪惡ê勇氣kap決定，為什麼tī/教會中有真chē有為ê基督徒會敗tī試誘？咱必須ài記tiâu雅各書一：１５「私慾既然懷了胎、就生出罪來、罪既然生成、就生出死來。」chiah-ê失敗ê基督徒，通常lóng是縱容in家己ê私慾，tī伊ê人生中留戀某一kóa私慾，（或者講做私慾tī伊ê人生中，設特別ê座位）。基督徒ê人生必須留基督做常客，若無會失敗--ê，chit種人生生活重心是tī人對適當kap無妥當ê問題ê取捨才來--ê，tī-chia分別出人生ê成敗關鍵性，這是每一ê人生必須定定kā伊深深思考ê嚴肅ê人生課題。Tī人生現象中，chit種適當kap無妥當ê取捨，往往對人生ê結局有深刻ê影響，譬如以兩ê背景差不多ê青年人，因為對適當kap無妥當ê取捨，一ê人成功，另外一ê soah完全失敗。事業家或者家庭狀況mā thang用chit件tāi-chì來觀察，咱所看--ê chit段聖經以色列人成敗ê關鍵加減kap此有關，只是in ê問題tī信仰上ê取捨，mā就是信仰ê適當kap無妥當來決定以色列人ê成敗，這是成做選民ê以色列人ê特殊存在。今á日ê基督徒kap chit-ê原理仝款，tī人生ê成敗中，基督徒必須加入信仰因素，伊是形成基督徒人生中bē-tàng欠缺ê因素。

（一） 必須面對ê挑戰（困境阻礙以色列人ê前途）
是chit段聖經ê一項要緊ê真理，雖然上帝已經應允將迦南地賜hō͘以色列人，但是自出埃及到迦南地中間iáu有曠野ê阻礙，以色列人若beh進入上帝所應允，確實需要克服chit段曠野ê生活，chit段曠野ê日子就是以色列人ê信仰生活，mā ē-tàng比喻做今á日基督徒ê生活實況。當一個基督徒接受上帝ê應允了後，伊就是屬於上帝ê天國子民，但是基督徒猶原ài tī人間ê日子中生活二十、三十、五十、八十年不等，chit段日子（人生ê生活）就是基督徒ê曠野生活，tī-chia以色列人會面對真chē生活上ê無方便，因為曠野kap都市ê生活狀況無仝，為何庄腳ê厝一坪十萬左右，鬧區to̍h需要四五十萬，主因mā是kap生活有關。

以色列人自出埃及到進入迦南地四十年久，實在經歷過真chē真危險，不安、無方便ê生活，食物、水、厲害ê迦南人ê反抗，chiah-ê lóng會影響tio̍h in ê生存，所以in若beh成功，in 主要ê事工，to̍h是ài先克服in目前ê困境，因為chiah-ê阻礙若無克除，就無法度達成in ê目標。

咱若看聖經，咱就知tī in前頭有連續不斷ê問題阻礙tio̍h in ê生存，十四章過紅海了後in因為克服來感謝上帝ê拯救kap上帝ê大權能，十五章無gōa久就發生瑪拉ê苦水，後來水雖然解決但是食物soah變成大問題，十六章是記in tī曠野中食mah-nah ê情形，食ê問題解決了後隨tú-tio̍h強大ê亞瑪力人軍隊，十七章由chiah-ê聖經ê記事，咱ē-tàng明白上帝ê子民，tī曠野生活ê現實問題，tī-chia必須以謹慎認真正ê心態去面對，所以曠野ê道路是歹行、坎坷ê道路，是充滿tio̍h草刺ê路，好親像耶穌所講是十字架ê道路，是koh小koh陜ê路，伊ê特色是pháiⁿ行而且辛苦，beh行ê人，必須有謹慎，bōe-sái怠慢，不時lóng-ài保持清醒，若無就會跋倒。Chit種曠野ê道路to̍h是今á日咱基督徒必須ài去行ê路，因為主耶穌kā咱講咱必須ài phàiⁿ起家己ê十字架去跟隨祂，chē是學生應該有ê覺悟，基督徒ài定定有chit種謹慎ê心態去面對人生，chiah ē-tàng成功。雖然曠野chit條路是小koh陜koh pháiⁿ行ê路，但伊soah是成功，永活得救ê路。

（二） 共同體ê群體（運命共同體）
以色列人竟然必須去面對tī in頭前真chē困苦危險ê路徑，tī án-ne情況中，in確實需要成做一個強koh有力ê團體，chiah ē-tàng應付真chē ê挑戰kap困難ê現實。當然in ê力量之源是上帝，另外，就是in家己ê表現，就是順從上帝ê旨意以及成做共同一致ê團體，chiah ē-tàng面對chiah-ni̍h強大ê外來ê敵對勢力。

Chit種狀況kap現實ê教會有淡薄á仝款，因為今á日咱ê教會mā是處tī chit種面對挑戰ê狀況，所以有戰鬥ê教會之稱，beh如何tī萬般困苦逆境中去完成教會ê使命？這是教會ê課題，tī-chiah需要夠額ê力量，當然，教會ê力量是由上帝ê靈來ê屬靈ê氣力，另一方面，就是所有ê基督徒ê信仰生活ê表現。

因為咱ê應允iáu未實現（比如出埃及到進入迦南曠野中ê生活），咱只是向應允teh追求，好親像保羅所講「這m̄是講、我已經得tio̍h阿、已經完全阿‧我是盡力追求、或者ē-tàng得tio̍h基督耶穌所以得tio̍h我ê。」（腓力比三：12）這是信仰生活ê重點。

咱ê教會生活既然án-ne，tī-chiah咱所需要--ê就是成做一ê力量－疼ê共同體，今仔，共同體所需要ê條件是啥？

A. 感情
Tī一個有人格ê共同體內，ài表明伊是有性命力ê共同體，必須ài具備純真ê感情，因為只有tī有感情ê所在意志chiah會疏通，chiah ē-tàng發揮力量，因為意志是人ê力量來源，伊必須ài有感情來做支撐，chē tio̍h是教會生活中基督徒ê交通，因為基督徒是互相ê肢體，所以一間有感情ê教會kap無感情ê教會有真大ê差別，基督徒看教會親像家己ê，án-ne chiah ē-tàng對教會有感情，有感情ê所在chiah會有付出，chiah會有力量ê發揮，互相之間chiah有美好ê tāi-chì 來發揮。Tī-chiah會看出真完美ê教會ê藍圖，一幅美麗ê小天國ê描寫，chit-ê感情是健全、正常ê感情。

B. 仝款ê運命
近來ê世界當teh向chit-ê方向發展，比如歐洲ê共同體、亞洲ê政治家mā-teh提倡運命共同體、北美ê狀況亦是án-ne。或者以宗教背景為中心-- ê mā是強調chit種人有仝款ê運命。台語有一句穿仝一條褲或者hâ仝一條褲帶就是teh描寫chit種運命ê共同體。Tī一ê群體中ài有chit種運命共同體ê認同kap建立，hit-ê群體chiah ē-tàng真正建立共同體ê實在內容，這mā是教會ê一件非常重要ê認同，to̍h是ē-tàng化解教會所面對ê各種危機。

C. 存在ê一致
Mā是形成共同體--ê一ê非常重要ê條件，好親像以色列人tī曠野ê生活中，就是in現實ê存在，同時chit-ê存在雖然是由單獨ê自我，但是必須ài建立chit種一致ê存在，kan-nā tī哥林多書十二章保羅向哥林多教會所提出ê教會共同體性格，雖然有真chē肢體，但是伊ê存在soah是一致ê。Chit種一致ê存在就是教會完成使命ê能力ê來源。

（三） 得tio̍h勝利ê秘訣
咱看見chit段聖經咱就知以色列人所面對--ê是非常強大ê敵對勢力，beh阻礙in ê前程，若照一般人ê觀點，chiah-ê無組織ê以色列人實在無法度克服tsiah-ni̍h強大ê亞瑪力人，所以in ê存在是tī極端ê危機中，chiah-ê tú tùi埃及出來ê烏合之眾（無武裝ê人民khiā-tī強大ê亞瑪力人面前）實在無法度化解in ê危機，但是經由上帝ê幫助kap以色列人ê共同體ê發揮 chiah完全勝利，tī-chiah至少咱ē-tàng看tio̍h真chē無仝ê角色a)摩西b)亞倫kap戶珥c)約冊亞kap壯丁d)後面ê群眾，chiah-ê人仝心合作chiah克服了非常強大ê敵人。

Chit場戰爭ê關鍵是tī摩西手中ê枴á，夯起to̍h是勝利，囥下to̍h是敗，亞倫kap戶珥雙雙扶tiâu摩西手中ê枴á hō͘伊永遠無下垂（雖然án-ne，相信摩西手ê負擔mā是真重--ê，但是必須ài忍耐一切ê疼kap艱苦）。然後約書帶領壯丁kap亞瑪力人交戰 chiah ē-tàng克服危機。當然，咱bē-tàng 放bē記得就是tī後面無直接參與戰爭ê群眾以及婦女做ê hit-kóa補給ê khang-khè，mā是無法度否認ê事實，chiah-ê狀況teh說明咱現實ê教會實況，咱ê教會生活中，咱有無無仝ê教會角色tī無仝ê位頂懸，有牧師、傳道、長執，各單位ê負責人，主日學先生、聖歌隊組員等等koh人tī教會ê功能lóng無仝，但是soah有共同ê目標，tio̍h是面對真強大ê阻礙kap挑戰。

聖經寫講“摩西ê手酸阿”伊手中ê枴á﹝仗﹞就下垂to̍h是以色列人戰敗，亞倫kap戶珥就sóa石頭hō͘摩西坐，兩人就扶tiâu摩西ê手，án-ne就ē-tàng克服危機，chiah-ê狀況tioh像現代ê教會生活仝款，摩西ê手會酸表示伊ê軟弱kap人性，補償ê方法著是tī亞倫kap戶珥ê扶持，in兩人無批評摩西顛倒用in ê存在來補足摩西ê不足，hō͘摩西ê手永遠bē下垂。定定有人以此來比喻教會中ê傳教者與會友（長執）ê關係，必須ài互相扶持，chiah ē-tàng完成人ê軟弱kap面對艱苦ê現實，chiah得tio̍h完全ê勝利。同時約 書亞kap hiah-ê壯丁亦無計較in ê危險來議論摩西、亞倫kap戶珥in khah安全，完全無chit種私心，chit時ê以色列人thang用萬人一心來形容in ê情形，chit種心態kap行動，就是得tio̍h勝利ê秘訣。

Tī-chia咱看見in有a)合一ê事奉b)無分彼此ê心態 c)將榮耀歸hō͘上帝ê作為，這是得勝ê信仰生活所bē-tàng欠缺ê條件。

結論：
用以色列人當時ê狀況，來反省今á日咱ê教會，尤其咱弱小ê教會，koh-khah需要chit種無分彼此ê心態，以仝步調，同心合意ê心來面對，參與咱ê教會生活，自然是得勝！