《受恩蒙福的一生》

 | | | 轉寄

一皮袋水

作者 林宗要 2010.08.08

創世記廿一：1-19

過去以美蘇兩大強國所代表ê民主kap共產，定定造成互相對立ê狀態，但是自從1991年蘇聯共產黨解體了後（tī-che chìn前，已經有東歐一kóa共產國家開始革新，比如波蘭ê改革、東德kap西德ê合併，拆除柏林圍牆），世界ê狀況就完全改觀，美蘇兩個超大強國，無koh處tī冷戰（備戰）狀態，開始簽訂友好條約，並拆掉真chē驚人ê核子武器，建立良好ê外交關係，美國甚至用真chē物資援助已經解體ê蘇聯，chiah-ê偉大ê作為hō͘戈巴契夫得tio̍h諾貝爾ê和平獎，伊實在是一位非常偉大ê政治人物！但是以色列kap阿拉伯民族ê對立，soah自以色列建國以來，一直處tī敵對ê狀態中。

確實以色列kap阿拉伯是兩個非常複雜ê民族，in形成chit種敵對ê關係是真pháiⁿ處理--ê。Tī聖經中有真chē記載，比如：亞伯蘭ê kiáⁿ孫、以掃ê kiáⁿ孫，kap以色列為敵，因此有一kóa學者認為，以色列kap阿拉伯民族之間永遠ê糾紛是kap聖經有關，比如以實瑪利後裔kap以掃ê後裔（以東）、亞伯蘭ê姪á—羅得ê kiáⁿ孫、摩押人kap亞捫人（創世記十九：37－38）等等ê民族，一直是kap以色列（雅各ê後裔）有永遠無法度化解ê紛爭。

Tī聖經中較明顯ê兩件，lóng是ùi家庭所引起ê紛爭，一件就是亞伯拉罕ê kiáⁿ以實瑪利kap以撒，另外一件就是以撒ê雙生á，以掃kap雅各，chit兩段家庭ê紛爭，上帝lóng親身應允in成做大族，tùi hit-ê時chūn開始，就一直存在永遠無法度解開ê問題tī in ê中間。

因此咱ē-tàng了解，tùi亞伯拉罕ê家族（後裔）所產生ê問題，表面上kah-ná是「家」ê問題，m̄-koh soah直接、或者間接--ê嚴重影響tio̍h人類存在ê問題，咱若看hit時亞伯拉罕ê家庭，雖然上帝已經明白kā亞伯拉罕kap撒拉講，上帝一定會祝福in ê kiáⁿ孫，hō͘ in ê後裔興旺親像天頂ê星，土腳ê沙á，m̄-koh tī信仰ê歷程中，人往往會用家己ê主觀判斷來取代上帝ê應允。Tī chit位hō͘人稱做信仰之父ê家庭，撒拉竟然以人ê立場來替代屬靈ê境況，因為伊對上帝ê應允ê無信任（因為人ê現實，撒拉已經年老，生產機能已經喪失），因此就用人ê方法，就是撒拉將伊e5cha-bó͘嫺夏甲送hō͘翁婿做bó͘，chit種作法，tī重視「不孝有三，無後為大」ê台灣人，應該是ē-tàng了解--ê，台灣mā有真chē chit種現象。

但是chit種結果tiāⁿ-tiāⁿ是產生家庭糾紛ê主因，咱若看撒拉ê行為，tùi屬靈ê觀點來看，伊已經犯了嚴重ê 錯誤，因為上帝已經明白向in應允，確實會有興旺ê kiáⁿ孫，但是伊soah用人ê觀點取代上帝ê應允，伊認為已經停經ê cha-bó͘人，是無可能koh生kiáⁿ --ê（創世記18：22），但是伊bē記得「tī人無法度--ê，tī上帝凡事lóng ē-tàng」ê信仰，因為chit種屬人ê主觀，伊決定將cha-bó͘嫺夏甲hō͘伊ê翁婿做細姨，chit種人為ê觀點，tio̍h tī chit-ê信仰之父ê厝內種落禍根。事先是夏甲輕視主母（創世記十六：4），因此撒拉tio̍h虐待夏甲，逼伊逃走。

Teh慶祝以撒生日ê時（創世記廿一章），撒拉看見夏甲ê kiáⁿ以實瑪利kap伊ê kiáⁿ以撒teh耍，撒拉考慮tio̍h未來ê繼承大權，因此用chit-ê訴求來壓迫以實瑪利kap夏甲，所以亞伯拉罕一定ài逼走夏甲kap伊ê kiáⁿ以實瑪利。

聖經記載「亞伯拉罕因為in kiáⁿ ê緣故真憂愁」，chit-ê時chūn，tī chit-ê厝內ê每一個人，lóng體會tio̍h非常驚人ê代價。痛苦ê tāi-chì，無一定lóng是ùi人chiah有，但有時人必須ài為伊ê作為付出相當大ê代價，這是咱ê人生現象中siōng嚴肅ê事實。亞伯拉罕透早起來，the̍h餅kap一皮袋水，khǹg tī夏甲ê肩胛上，koh kā gín-á交hō͘伊，叫伊走（創世記廿一：14）。咱來想看bāi，亞伯拉罕chit時ê心情比如何？咱ē-tàng想像，夏甲tī chit-ê狀況中，咱ē-tàng看tio̍h伊人生ê悲哀：

1) 伊無路thang行，一個少婦chhōa 一位未成年ê少年人，伊ê人 生是何等無助。

2) 伊tī曠野，不管時lóng有可能tú-tio̍h危險ê狀況。

3) 皮袋內ê水已經lim完，tī曠野中，水是gōa-nî--á重要，但是chit時，伊beh生存所需要ê重要物質—水，已經完全無lah，這是何等ê驚人！

咱來想看bāi，hit時ê夏甲，teh面對hiah-ni̍h驚人ê境況，伊ài如何去應付伊ê人生？

（一） 夏甲ê現實（夏甲tī曠野）
本來伊ê身分是主母ê cha-bó͘嫺，只要伊好好--á 做家己份內ê khang-khòe，伊ê人生是不止--á安穩。但是經過伊ê主母ê提拔，hō͘伊成做主人ê bó͘，提koân身分kap地位，koh替主人生落一位小主人，因為角色ê轉變，造成伊tī觀念上ê變化，這是一定--ê，因此mā造成伊hông迫離開溫暖ê厝，伊所tiàm ê現實環境就是曠野，伊hō͘人ê感覺是寂寞、孤單、荒涼、驚惶、不安kap危險！chiah-ê現象是無符合人生存ê條件，因為人生存ê條件是tī鬧熱、互相往來、安全、平安、舒適ê狀況中，m̄-koh夏甲當時ê現實soah未具備chiah-ê因素！chit種現象就是人生矛盾ê原因。

咱知影每一個人lóng有伊ê理想面，但現實ê狀況，往往kap人ê理想背道而行。Chiah-ê情形就是人生ê問題kap悲哀，夏甲ê現況，to̍h是人生ê反應。Tùi屬靈ê角度去觀察人生ê時，咱發現，人所期待ê理想，往往無法度實現，顛倒親像活tī曠野ê人生。Tī hiah人所感受tio̍h ê m̄是安全、平安kap喜樂，是寂寞、孤單、不安kap驚惶。

雖然，今á日ê人生（尤其是tòa tī都市中ê人），會體驗tio̍h人生各方面lóng非常鬧熱，平時tī台北鬧區，四界lóng是人，生活ê必需品排滿所有店面，食物、衫褲、娛樂場所ê人群，非常ê鬧熱！

M̄-koh chiah-ê外在ê鬧熱（物質ê），無法度彌補人內心永遠ê孤單kap寂寞，因為現代文明ê產物，對人心靈上ê孤單kap 無安全感，無任何作用。因此咱ē-tàng了解，jú進步ê物質文明社會，人心jú無安全、jú疏遠。

生存ê危機mā是hit時夏甲ê體驗，咱知影人生存在ê一件重要ê事實，就是人ài活tī有安全感ê境況中，伊是形成人生價值siōng 高貴ê內容，人ê一切操勞kap phah拚ê結果，lóng是teh期待有安全ê生存！無論錢財或者學問以及khang-khè事業等等ê表現，lóng指向這！但是事實上，人生ê不幸或者悲哀就是「安全感ê欠缺」，這是咱所ē-tàng了解--ê。

現代教育真重視建立有安全感ê人格，這是一件非常重要ê tāi-chì。夏甲當時ê 狀況，ē-sái講伊是tī生存ê危機中，伊無一個溫暖ê厝，無親人，所有生活ê條件lóng欠缺，koh tī極端危機ê曠野，這kám m̄是對伊ê生存有真大ê威脅mah？

（二） 一皮袋水
若單純以人ê立場來思考亞伯拉罕kap撒拉如何對待夏甲母á-kiáⁿ時，咱會感覺實在是相殘忍ah！相信每一個人lóng會明白，對夏甲母á-kiann2a2-kiáⁿ ê處置實在過份，m̄-koh chit位hō͘人敬重ê信仰偉人—亞伯拉罕，soah照撒拉ê要求處置夏甲母á-kiann2a2-kiáⁿ。

當然，當伊teh極端痛苦中，伊得tio̍h上帝ê指示，上帝也bat應允以實瑪利，會hō͘伊成做大族（創世記廿一：12-13）。若按照創世記廿五：12-18記載，以實瑪利是十二大族ê先祖（真chē歷史家lóng認為今á日ê以色列kap阿拉伯民族解bōe開ê死結，加減lóng kap聖經chiah-ê記載有關）。今á日咱看見chit位夏甲chhōa後生kap有限ê食物kap一皮袋水，chiah-ê物件是in母á-kiáⁿ日後生存ê寄託。食物雖然重要，但是tī 荒漠ê曠野中，「水」koh-khah重要，chiah-ni̍h重要ê水，tī夏甲母á-kiáⁿ中，只有一皮袋而已，按照人生存ê條件，人是需要有活水泉（現代人ê自來水），chiah夠生存ê需要，但是夏甲母á-kiáⁿ，只有一皮袋水，咱ē-tàng體會，chit皮袋水對夏甲母á-kiáⁿ ê重要性，雖然無講--著容量，但是咱ē-tàng想像，一個軟弱ê女子，tī一皮袋水之外，iáu有日常生活所需要ê物品，因此chit kha皮袋水ê容量，咱大慨mā ē-tàng io̍h-tio̍h，siōng chē是10公升～20公升，伊所chah ê水有一工一定會用完，這是一皮袋水ê特質。Mā就是夏甲母á-kiáⁿ絕對依賴維生ê一皮袋水，有一日會用完，人生無水koh bē-sái（無洗身軀iá-koh ē-tàng活），因為人生是tī有限ê狀況中，人ê一切mā是有限--ê，甚至人人看做重要ê錢財，咱ê俗語mā講，生不帶來，死不帶去，是伊ê特質！

咱每一個人生lóng像夏甲仝款，只chah一皮袋水，但是你必須記tiâu，chit皮袋ê水一定會用完！當你所帶ê一皮袋水用完ê時，你ê人生就會面臨極驚人ê危機，ná親像當時ê夏甲teh thèng候死亡ê來臨。

Hit皮袋水用盡ah，是夏甲母á-kiáⁿ生存ê危機！是絕望、是人生ê盡頭，是人生絕對ê苦難。咱知影人生ê痛苦m̄-nā是生存或者肉體上有ê痛苦而已，koh-khah嚴重ê事實是，人無法度用人ê氣力去解決人生所tú-tio̍h ê問題，ná親像hit時ê夏甲，to̍h是處tī絕對ê苦難中！因為伊現實ê環境，伊無辦法處理伊ê難處！人生ê現實只有一皮袋水，有限、不足、無夠用，是伊ê特性。Ài會記咧！你生活ê一皮袋水mā有用了ê時chūn，這是造成夏甲大聲哭（人生ê 不安、驚惶、危機）ê主因。

（三） 上帝聽見……夏甲就看見井水
一皮袋水ê人生，一定會tī伊ê生存中kap上帝相tú，chiah ē-tàng koh再充實伊ê皮袋ê水，hō͘人ē-sái tī曠野中生存！

當時ê夏甲，咱ē-tàng用走投無路ê絕境來形容，tī án-ne ê絕境中，伊ē-tàng做什麼？伊hit時ê人生真正是危機kap絕望，除了坐leh等死以外，伊想bōe出其他ê辦法，假使只有伊一人tio̍h khah單純，但是chit-má身邊有一ê寶貝後生，chit種母愛ê流露，hō͘伊想tio̍h愛子，chit時伊ê心情是複雜而且矛盾，情緒極端不穩，自然ê表現就是大聲啼哭，來表達伊hit時ê絕境。

伊是處tī偏僻ê曠野中，用來維生ê食物kap水lóng用完ah，tī chit時，伊心思ê複雜是咱ē-tàng了解--ê，處tī án-ne絕境中，伊ē-tàng做什麼？只有teh上帝面前哭！相信伊teh亞伯拉罕家ê生活中，必定聽過有關上帝ê事實！

亞伯拉罕ê上帝m̄是聽人祈禱ê上帝mah？目前伊ê苦境，上帝是m̄是了解？

「上帝聽見童子ê聲音，上帝ê使者tùi天頂叫夏甲講，夏甲你為何án-ne neh？mài驚惶，上帝已經聽見童子ê聲音了，起來，kā童子抱tī懷中，我必定hō͘伊ê後代成做大國」（創世記廿一：17-18）。Tī-chia，咱會看tio̍h人ê辦法用盡，人ê能力無效ê時，上帝ê權能就會顯現，tī屬靈ê過程中，咱定定會聽見一句話－「人ê盡頭，是上帝ê開端。」

當人生iáu有一皮袋水ê時，人有時常將上帝khǹg外外，但是當人生受tio̍h危機、絕境ê困擾、侵犯ê時，若是用哭來求告上帝，上帝會到tī絕境中ê人。好親像夏甲當時ê境況，伊tī絕境中體會tio̍h上帝ê臨到，「上帝hō͘夏甲ê目chiu變光，伊就看見一口水井，tio̍h去kah皮袋ê水té hō͘伊滿」（創世記廿一：19）。當伊皮袋內ê水用完時，伊必定是用真chē ê時間去chhōe水源，因為chhōe無tio̍h，所以chiah用哭ê辦法。

但是亞伯拉罕ê上帝是看顧伊ê子民ê上帝，上帝既然應允tī伊身上，祂的確會引chhōa in突破絕境，化解in嚴重ê危機，聽見上帝聲音了後ê夏甲，就完全無仝，因為伊體驗了上帝ê同在，是有希望，是起死回生，人生前途充滿力量kap喜樂！

結論：
認bat人生ê一皮袋水，不時了解你人生所chah ê水，phah開心靈之眼，看出救恩ê泉源，kap人生皮袋ê水té hō͘伊滿！Ài會記leh！亞伯拉罕ê上帝是引chhōa、看顧伊ê子民ê上帝！tī絕境去體會、領受恩典ê主！