《受恩蒙福的一生》

 | | | 轉寄

墮落ê前兆

作者 林宗要 2010.07.25

創世紀十三章1-13節

聖經ê排列用創世紀開始，用啟示錄結束。你是m̄是bat思考過，為何會有án-ne ê編排？tng-tong你用心去kā伊思考ê時，你就發現tī-chia有上帝非常清楚、完美ê安排kap計畫。

咱知影創世紀是用上帝創造宇宙做開始，然後說明人性ê根本問題，chiah用以色列人為代表人選；啟示錄是以世界ê最後會產生ê各種現象為主體，來強調榮光勝利ê基督beh分配、審判世界ê事實。雖然，屬tī基督ê教會tī現實ê地上會受tio̍h真chē迫害kap 無理想ê現象。若是照人ê看法，kah-ná是惡者、kap上帝做對ê人權是勝利者，祂ê教會一直teh hông迫害中。但是啟示錄soah teh kā咱講，tī最後ê時祂會用祂ê權柄來消滅kap教會做對ê惡勢力，來建立屬tī祂ê理想王國、接納對祂忠心ê子民，同齊kap祂分享屬靈王國ê喜樂。

Tī啟示錄內描寫每一項重大tāi-chì ê發生chìn前必定有一個兆頭，mā ē-sái 講前兆，tùi án-ne通過chit-ê前兆來表示有重大ê tāi-chì teh-beh發生。比如啟示錄第八章beh拍開七個封印ê時，「羔羊phah開第七個印ê時chūn，天頂恬恬無聲，大概半點鐘。」（八：1）。以前ê世界是混亂，吵鬧、擾亂ê，chit-má soah有半點鐘hiah-ni̍h久，tī絕對ê恬靜中，chit-ê恬恬半點鐘久，是beh拍開七個封印ê前兆。咱koh看啟示錄十九章，當惡勢力beh永遠被消滅chìn前，有hiah-ê chìn前被迫害窘逐ê一大tīn基督徒將一切ê光榮歸hō͘全能永遠ê主（十九：1-10），然後chiah完全消滅hiah-ê迫害教會攻擊基督ê名ê撒旦ê勢力，雖然交戰猛烈，結局是基督ê勝利。

若用咱生活ê經驗，咱mā ē-sái體會，tī大自然中ê事物會有一kóa前兆，譬如風颱、地震，照學者研究有一kóa動植物會表現出chiah-ê tāi-chì teh-beh發生ê一kóa動作，相信tī咱人生生活中，mā會有chit種前兆teh kā 你講你ê人生或者是身軀中，有啥物問題ê發生。保羅tī使徒行傳廿七章有一個經驗，當時276人仝坐一隻船，多數人以一chūn微微á ê南風吹來感覺歡喜，但是保羅soah認為he是一chūn驚人ê風beh來chìn前ê前兆，雖然保羅bat建議，但是無被採納，chiah會發生真驚人ê危機kap損失（船沉落、貨無去）。

Tī咱人ê人生現象中，咱mā會有chit種感受，tī重大ê tāi-chì beh發生ê時，通常lóng有一kóa前兆teh kā你講，真通俗ê是目睭皮會眺（這雖然是生理現象）但是有人真巧合有tāi-chì來發生。或者是母囝連心ê情形，有時老母亦會體驗tio̍h無tī身邊ê囝兒會發生ê前兆，（雖然是半信半疑）。

確實，咱若詳細來思考咱人生狀況ê時，無論信仰方面或者是日常生活方面，tī每一件重大tāi-chì，lóng有一kóa前兆，尤其是人身軀上ê問題，lóng有前兆teh提醒你，你ê身軀某一方面有一kóa欠缺，你tio̍h-ài趕緊去處理，比如：胃疼、高血壓、心臟病、血尿、感冒chìn前ê前兆等等，lóng teh kā 你講身軀ê某一kóa功能有問題，及時ê把握，to̍h ē-tàng化解危機，時間一過就成做驚人ê危機，甚至影響身軀ê健康，甚至性命。

所以，tī現實ê人生境況中，對前兆ê適應（觀察、判斷、理解），對人生ê現實必定有正面ê存在，因為若ē-tàng體會伊ê事實，你就ē-tàng用適當ê辦法去面對你ê人生危機或者是問題，有準備ê人生，chiah-ê問題tio̍h好處理。

因為人生lóng teh追求成功，但無可能ta̍k項tāi-chì lóng會hō͘你成功（人生難免有不如意），顛倒是不如意，失敗ê tāi-chì佔多數，因為án-ne人tio̍h有責任去減少失敗ê成份tī你ê人生現象中，伊若減少，自然成功ê成份就會增加。

基督徒tī屬靈ê路上koh-khah ài體會會hō͘基督徒靈命墮落ê真chē前兆，án-ne chiah ē-tàng堅持信仰ê絕對性，當一個基督徒tī教會生活中有一kóa現象出現ê時tio̍h需要 khah注意。無關心、對參加教會ê興趣減少、慣習m̄做禮拜、主日有tāi-chì ài去處理、無歡喜讀經、祈禱、靈修，chiah-ê lóng是信仰生活開始怠慢ê前兆。主耶穌告誡學生：「Ài有智慧如蛇」。Chit種koân度ê警覺力需要觀察、辨別ê能力ài強，然後chiah有真正行動ê準則，to̍h是生活ē-tàng有khah美好ê結果。

（一） 相爭→問題ê啟端
Chit段聖經所記載是值得基督徒tī屬靈ê路上來深深思考--ê，羅得kap長輩亞伯拉罕同受召，ùi吾珥城出來beh到上帝所應允ê迦南地，伊自細漢tòe chit位有淡薄á有信仰ê阿叔，kap伊同齊生活，照理伊應該真清楚伊ê阿叔ê信仰狀態以及上帝對受選者所應該有ê期待，ài tī伊ê受選ê境況中成做符合上帝ê需求，這是上帝對選民ê期待，因此選民應該有儆醒tī建立kap上帝之間ê良好關係。必須ài有屬靈ê智慧來辨別現實ê屬靈ê狀況來便利tī伊ê kap上帝ê正常關係。Ē-sái講是咱看tio̍h伊kap亞伯拉罕有美好ê信仰表現，伊卻表現出曖昧kap矛盾ê信仰性格，tī聖經中常常引用伊是bōe專心koh雙腳踏雙船ê人物，chit種性格已經失卻了信仰ê本質，咱知信仰要求信仰者ê iáu是絕對ê忠實，bē-tàng有二樣心，tú親像上帝所講「我以外你bē-tàng有別ê上帝」chia所講ê上帝的確m̄是指神明上ê上帝，mā包含任何tī你心中會取代上帝地位ê物質ê事件。咱若去看聖經，咱就知羅得ê信仰khah有妥協性，妥協ê信仰就會失去信仰ê真義，因為tī絕對ê信仰ê世界是無容允有妥協ê存在，今咱看chit位常常kap信仰ê人格者同齊生活ê羅得，為何會有chiah-ê負面ê信仰生活ê種種表現。

至少，tī創世紀十三章chit段聖經中，咱ē-tàng看出問題。Tī-chia事先發生問題ê就是「相爭」（爭端或者爭吵），這就是墮落ê前兆，tio̍h親像頭前所講，tī ta̍k項事件chìn前lóng會有一kóa前兆teh kā 咱講有tāi-chì teh-beh發生，因為爭端原是表示人ê心中無愛心，「怨恨引起爭端」（箴言十：12），「食一塊餅換來ê心安理得，贏過為tio̍h kui桌酒肉相爭吵」。這是teh說明人心中若無愛心ê存在，就會相爭，咱看咱ê實際狀況，tī社會中，真chē親人，為tio̍h相爭祖產soah發生真chē驚人ê問題，以前ê分家伙定定hō͘兄弟á互相殺害。

Chit段聖經kā咱講hō͘咱知影羅得kap亞伯拉罕ê奴僕ê相爭，雖然無記明內容，但是相信這是kap in ê生存有利害關係ê事所引起--ê，到底是非如何判斷，實在是一件淡薄á艱難ê tāi-chì，但是有一件事實，就是主人ê人格表現tī奴僕身上，咱ē-tàng ùi做長輩ê亞伯拉罕ê發言看出伊是一位信仰ê人格者，伊用愛kap親情來化解奴僕之間所引起ê危機。Tī chit件tāi-chì頂面，咱ē-tàng看出羅得無責任ê態度。相信雙方ê相爭，羅得必須負應該有ê責任，但是伊tī事件上soah無chit種願意負責任ê心態，chit種無意識ê心態是teh證明伊ê人生當teh行入墮落ê路，相爭表示無法度有共同生活ê可能，伊ê狀況就是teh失去kap一位信仰ê人格者共同生活ê可能，這m̄-tio̍h是teh說明人beh墮落ê前兆mah？

基督徒生活墮落ê起始kap這相仝，無疼心、無情、失去共同生活ê意義。

（二） 貪慾ê心性
既然爭端已經發生，亞伯蘭先提出解決ê辦法並向羅得說明互相之間ê親情：「咱是至親，bē-tàng冤家。」（十三：8）這是正確ê人生態度，既然無法度共同生活自然就是分開，bē-tàng一直用傳統ê共同生活去維持現狀，是無利益ê，早時ê家庭狀況，父母m̄甘kiáⁿ兒分開，chiah維持無向心力ê共同體，每一個份子lóng艱苦心！亞伯蘭建議，m̄管正pîng抑是倒pêng hō͘伊來選擇，「羅得giâ頭看約旦河hit-pêng ê平原lóng真肥沃koh潤澤，tī耶和華beh滅掉所多瑪chìn前，親像耶和華ê園á，mā像埃及ê地。」（創世紀十三：10），這是構成滿足羅得選擇ê地ê肥地以及適合伊生存ê條件，無論耕作或者是牧羊lóng真適合，耶和華ê園á kap埃及之地是hit時形容siōng美好ê所在！

羅得無客氣tio̍h選擇chit-ê所在作為伊kap亞伯蘭化解爭端ê原因，伊用伊ê眼光來選擇有利伊ê人生生存ê條件，羅得chit-ê動作本身是teh表現出伊ê心態，貪心ê人是自私--ê kan-nā顧家己ê利益，無想講chit位長者已經年老，只要對家己有利ê境況就爭取，m̄管別人如何，這是貪心ê人ê本性！因此chit-ê人ê心思若被chit種貪慾ê心所控制ê時，當teh說明hit-ê人已經漸漸á接近墮落！

羅得用伊ê眼光來選擇伊認為有利ê生存境況ê時，完全被chit種貪慾ê心所充滿ah！

保羅向提摩太講：「貪財是萬惡ê根源，有一kóa人因為貪慕錢財chiah離開了信仰ê道路，食真濟苦，心靈破碎。」（提前六：10），咱若看聖經或者以現實ê狀況來思考ê時，舊約中ê夏娃、亞當、大衛（目、財、色）lóng是tùi貪先開始，然後犯了chiok驚人ê罪，貪慾ê心性，kan-ta圖謀家己ê安穩以及目前ê享樂，khah無想tio̍h會引起ê後果，貪圖家己ê利益kap享受是伊ê特色。

（三） 選擇
夏娃聽蛇ê巧語是先以目chiu看，「hit-ê cha-bó͘人看見hit叢樹á ê果子好看、好食。」（創世紀三：6），然後就伸手去挽，chiah帶hō͘人類chiok驚人ê罪，是先ùi目看ê原因，然後chiah有動作。

羅得因為先用目chiu看約旦河邊ê一片肥ê土地，chiah選擇了hit片平原，當做伊日後生存ê場所，人生是選擇！因為tī咱ê現實生活中，有真chē ê分歧點tī每一個人生chìn前！人不斷來khiā-tī叉路上，人生必須做正確ê選擇，因為伊決定人生kui-ê運命！tī選擇chìn前，人生必須ài先有判斷，因為只有建立判斷ê人chiah有所選擇。Tī判斷chìn前，人必須ài有真chē培養判斷ê籌備khang-khè，tī chiah-ê價值判斷chìn前ê時，有真chē價值觀念ê建立，是人生成敗ê主因。因為通常面對選擇ê時，通常是家己承擔，雖然有親人、朋友，但是in只ē-tàng khiā-tī參考ê立場。主要ê猶原是當事人本身ài有獨當一面ê能力，通常tī面對人生ê選擇中，是處tī成敗ê關鍵時刻，因為tī你人生面前ê雙叉路，無一定lóng是美好ê路，或者有死路、絕望之路，teh選擇ê時，人生需要有敏銳ê觀察力以及真正確ê價值判斷，chiah ē-tàng幫助你ê人生選擇有正面價值ê人生道路來化解真chē人生危機。

咱看羅得ê選擇，伊kan-ta khiā-tī物質現實ê利益立場，伊無思考伊ê身份以及kap上帝ê關係，伊ê選擇是1)家己本位；2) 只貪圖物質kap現實ê生活：3)疏忽屬靈ê信仰條件，這是墮落ê前兆。

（四） 遷徙到所多瑪khiā起（徙伊ê布棚到所多瑪）
羅得kan-ta顧慮tio̍h目chiu前ê事實，伊無想tio̍h「所多瑪人chiok pháiⁿ，大大得失tio̍h耶和華」（十三：3），因為chit種惡劣ê環境對人生生活是有負面ê實在，為何現代人一直teh反對in不利ê生活環境ê設施？主因tī chiah-ê狀況會對in ê生活（kiáⁿ孫）有不良ê影響，（抗議六輕、核廠、糞埽場等等），羅得kan-ta貪圖目前ê問題soah疏忽hiah-ê要緊ê實在，咱若看chit段聖經咱就會明白，人ê墮落是漸漸形成--ê，m̄是一開始就跳入墮落ê坑。

咱看羅得ê狀況先ùi 1) 奴僕in ê相爭開始；2) 亞伯蘭提出問題了後；3) 伊ê貪心hō͘伊無尊重序大；4)選擇（照理伊應該hō͘亞伯蘭先選擇），chit種結果就是造成伊tòa-tī所多瑪ê事實，是一步步ta̍uh-ta̍uh-á來--ê。這是beh hō͘基督徒墮落ê設計者（主謀者）撒旦ê一貫作風，伊hō͘基督徒墮落是用漸進ê方式。有一個故事講，基督徒婦人夢中拾tio̍h無數ê錢銀財寶，先ùi細開始chiah到大，大到無法度容納chiah發怨言，聽見主叫伊看頭前，chiah知是魔鬼tī面前故意khǹg珠寶hō͘伊拾。

咱ē-tàng tùi羅得chit種現實狀況來體會tio̍h，tī基督徒屬靈ê路途上，一kóa值得咱思考ê問題，相信咱ta̍k人lóng期待咱屬靈ê道路是tī美好ê境況中。

羅得ê作為值得咱警醒，因為伊重要ê心靈ê境況。被現實ê利益遮tiâu。

因此咱必須記tiâu耶穌所講ê「lín ài謹慎自守，閃避ta̍k樣ê貪婪，因為一個人無論án怎富裕，伊ê真正性命伊有jōa-chē財產無關係。”（路加十二：15），人ê活，物質條件真要緊，但是若為tio̍h伊來損失屬靈ê性命ê時，tio̍h親像耶穌所講「人若thàn得全世界，賠上家己ê性命有甚麼好處neh？」，真chē人為家己ê理想，放棄hō͘人看做可惜ê khang-khè kap待遇！

結論：
基督徒ài認bat清楚咱生活ê性格－肉體現實、心靈永遠，同時tī現實中ài看透你生活中ê一切，chiah善用主所hō͘你ê智慧來發揮你人生ê內容，克服你ê人生危機！