《受恩蒙福的一生》

 | | | 轉寄

《受恩蒙福的一生》 編者序

作者 編輯小組 2010.07.18

2000年6月木柵教會編輯小組整理出版林宗要牧師第一本講道集《草地囝á做牧師》，今年2005年tú好是木柵教會設教三十週年，mā是林牧師ùi長老會退休了後牧養本會第二十年，阮用感恩ê心決定koh再出版續集《受恩蒙福ê一生》，收錄三十二篇林牧師過去tī教會ê主日講章，ǹg望讀者藉tio̍h閱讀chiah-ê講章，ē-tàng體會一位上帝忠心ê僕人用伊一生ê生命teh詮釋聖經ê真理、傳揚福音kap「諄諄教誨」信徒將信仰生活化ê心意。

林牧師ê講稿是一字一字用漢文手寫ê台語版，其中常見白話字（羅馬拼音），mā出現真chē日文kap一kóa英文，編輯同工tī整理林牧師ê講稿ê時，除了必須先清楚chiah-ê羅馬字kap日文、英文以外，iáu tio̍h作ê決定是：阮beh完全用現代中文來改寫或保留伊台語ê原味？tī一開始，阮就決定儘量保留台語，kan-ta看《草地囝仔做牧師》ê冊名，就ē-tàng瞭解chit本講道集是beh以台語來唸ê，整理第二本講道集ê時，阮á是照chit種ê原則，邀請多位學青kap社青來分擔整理ê工作，對in來講，是操練、是教育、是對教會事務ê參與，koh-khah重要ê是，當每人koh一pái去讀去寫，koh-khah深入去思考chiah-ê講章ê內容ê時，生命mā koh一pái得tio̍h造就kap成長。

衷心期待讀者用心讀chit本講道集，hō͘上帝ê話語常常tī咱心中，作咱腳前ê燈、路上ê光來引chhōa照亮，過「受恩蒙福ê一生」來歸榮耀hō͘咱tī天頂ê父。

編輯小組 2005年8月