《受恩蒙福的一生》

 | | | 轉寄

屬基督ê人生

作者 林宗要 2011.01.30

腓立比書一：18-27

創世記五章記載tùi亞當到挪亞這中間ê世系，若詳細kā伊思考，就會發現真chē真理，tī人類ê系圖中，比如tī馬太福音一章中所講主耶穌ê世系仝款，看起來真單調無味，但是soah有上帝向人類提出ê非常重要ê啟示。創世記五章自亞當到挪亞不過十代人，tī-chia有一個共通點to̍h是某某人幾歲生某某，然後koh活幾年，其中有生kiáⁿ兒，幾歲chiah死，lóng是chit種ê寫法，只有其中第七代ê以諾因為kap上帝同行三百年，然後hō͘上帝接去。咱ē-tàng看tio̍h一個過程——生kiáⁿ→養育→死亡，這to̍h是人生ê延續。人自出世了後盡伊家己ê能力去成長， 而且成做有路用ê人。大漢了後就ài生kiáⁿ來延續性命，雖然生kiáⁿ了後ê人生iáu有一段時間ài渡，但是無gōa久咱就會結束一生來死去。Chit種生生死死to̍h是人生ê寫照！人生是m̄是就ná聖經所寫，只是生生死死ê延續？或者是有koh-khah重要ê tāi-chì人ài去做？這to̍h是形成人生ê價值kap內容ê關鍵。

咱知影上帝創造人，hō͘人權限去管理照顧世界，koh-khah重要ê是人ài成做榮耀上帝ê存在，chit種榮耀上帝ê存在是建立tī人生kiáⁿ飼kiáⁿ ê過程中。因此創世記五章所記ê人生ê生生死死中，bē-tàng疏忽ê to̍h是「生kiáⁿ飼kiáⁿ」，寫法雖然真簡單，咱ē-tàng tùi其中ê事實來了解上帝託付hō͘人類ê神聖職份，這是人ê天賦，人生ê內容kap價值koh-khah是tùi chiah建立，因為tī-che過程中，人須要相當ê智慧kap能力來教養上帝所賜ê kiáⁿ兒，人是受託付ê，mā是替上帝完成受託ê使命。生kiáⁿ了後to̍h是某某人lóng總享受幾歲「chiah死」，此句話對人生有一個明確ê寫照，無論人活jōa-chē歲，伊ê結果lóng是「死亡」，chit-ê「死亡」hō͘咱想tio̍h人引罪入世了後，受上帝ê咒懺，伊是罪ê工價。死並m̄是人ê意願，人所希求ê是永「生」，這to̍h是人類ê問題。

但是聖經soah替咱記了一個非常重大而且偉大ê真理，to̍h是以諾kap上帝做伙行三百年chiah hō͘上帝接上天，其中無經過人生死亡ê階段，以諾chit件tāi-chì kā咱講一件偉大ê真理，to̍h是人若beh突破tùi罪所帶hō͘人類ê死亡，或者是講解決罪ê辦法，to̍h是「Kap上帝行做伙」，人最後會hō͘上帝接納，這是kap上帝行做伙必然ê結果。就ná聖經所寫「以諾kap上帝行做伙，上帝將伊取去，伊就無tī世間啊」（創世記五：24）現代譯本記講「無看見死，to̍h離開世人」。咱ē-tàng想像以諾kap上帝行做伙ê生活狀況。先知阿摩司講「二人若無仝心豈ē-tàng行做伙neh」，以諾kap上帝仝心，意思to̍h是「活tī上帝ê旨意ê中間」。遵照上帝ê命令，照上帝ê命令，照上帝ê指示、教示，to̍h是kap上帝仝心ê生活方式，是純潔、美好、理想ê人生生活方式，有chit種生活方式ê人，上帝ê恩惠當然會臨到伊ê身上。

基督徒ê存在，也tio̍h kap以諾仝款，是kap上帝行做伙ê人。基督徒ê稱號是安提阿人向chiah-ê基督ê學生ê一種khau洗ê稱呼，當時chiah-ê屬於基督ê人確實有某一kóa方面表現出有基督ê清香之氣，若無，外邦人就bōe稱呼in做「基督徒」，自hit時開始，tòe基督、信基督ê人就hō͘人稱做基督徒。雖然開始ê時無一定是善意，但是屬於基督ê人soah佮意chit種稱呼，因為che表現了基督徒ê歸屬。基督徒ê人生ài時刻體認，ài kā屬於基督ê特質相稱，因此bōe-sái做一個有名無實、掛名ê基督徒。

（一） Hō͘主耶穌基督得tio̍h榮耀ê生活（腓立比書一：20）
基督徒ài家己勉勵，伊生存ê內容是beh榮耀上帝--ê！這是宗教改革了後，教會ê基本信仰，因為基督教ê信仰是建立tī只有榮耀上帝ê事實上，無論任何偉大ê信徒或者牧師tī教會生活中，必須ài歸榮耀hō͘上帝，m̄是歸榮耀hō͘家己，若無就成墮落ê原因了。

「照我所切慕所ǹg望ê，無一項tāi-chì hō͘我見笑，只要凡事放大膽，無論是生、是死，lóng叫基督tī我身上照常顯大」（腓立比書一：20）合和本為「基督tī我身上照常顯大」現代譯本是「無論生死，用kui-ê我來榮耀基督」日譯：「基督tī我身上得tio̍h尊崇」lóng是仝義！Beh hō͘基督tī咱身上得tio̍h榮耀，自然m̄-nā是嘴講講ê信仰，是ē-tàng顯出基督清香之氣ê信仰生活，這是歷代教會中真chē感動人心ê見證，tī教會史中有千千萬萬ê人lóng是因為tùi基督徒身上聞到基督ê香氣chiah歸屬上帝--ê。Tú親像保羅所講「無一項tāi-chì hō͘我見笑。只要凡事放大膽」無見笑ê人生，to̍h是信仰siōng好ê寫照。試想，若基督徒生活tī卑鄙、見笑ê狀況中，有可能將耶穌基督ê福音傳開？假使信徒ta̍k個lóng是無講理、惡質，比一般人koh-khah惡劣，主ê福音kám bōe受影響？雖然咱ê信仰m̄是靠行為得救，但是基督徒ài了解，現實ê人生中間，hiah-ê人是真注重基督徒生活狀況，to̍h是基督徒ê行為！一般人看bōe-tio̍h基督，in只認bat隔壁ê某某基督徒，in tio̍h用基督徒ê生活來評估基督ê福音，來了解基督教ê上帝！所以基督徒ê生活，實在是非常重要，有人比喻基督徒ê生活，是hō͘人看見基督ê借鏡，是真合適--ê，確實，基督徒ê存在是hō͘人了解主耶穌ê關鍵，hiah-ê人beh tī基督徒身上看見榮耀ê基督。同時hiah-ê人mā beh tī基督徒身上發現tio̍h卑鄙下流ê基督教信仰！To̍h是講，基督徒身上實在負擔tio̍h無限量ê使命；榮耀或者侮辱，全繫tī每一個基督徒身上。當咱想tio̍h咱ê存在是為tio̍h榮耀上帝ê時，基督徒的確ài用謹慎ê心態去經營基督所交託咱ê信仰生活。Ná親像保羅tī哥林多前書十：31所講：「無論是食，或者lim，或者作任何tāi-chì，lóng tio̍h為tio̍h榮耀上帝來行」！若ē-tàng用che做信仰生活ê準則，相信咱就ē-tàng建立屬於基督ê生活。

（二） 尊主為大ê生活（腓立比書一：21-24）
若beh談尊主為大ê生活ê時，咱自然就會想tio̍h主耶穌ê母親馬利亞，tī路加福音一章所表現出來ê讚歌「我心尊主為大，我靈用神我ê救主為樂」一位未出嫁ê少女，忽然聽tio̍h天使對伊講伊teh-beh有身，tī-chia án-ne重大ê tāi-chì中，伊iáu ē-tàng尊主為大，實在是無簡單，因為chit項tāi-chì kap cha-bó͘ ê貞節相關，是cha-bó͘ ê第二性命，m̄-koh馬利亞soah ē-tàng尊主為大，chit款ê信心，to̍h是後代ê教會所敬仰ê信仰之母！

基督教信仰ê真實內涵是建立teh尊主為大ê根基上，只有主hō͘人尊崇ê時，信仰chiah會發現伊ê效用。因為尊主為大，是tī伊ê信仰生活中，以上帝為第一位，凡事lóng kā主考慮在內，chit種生活chiah是真正屬基督ê生活，所以屬基督ê生活to̍h是尊主為大ê生活；比如保羅tī腓立比書一：21-24所講ê「無論死活」lóng服從主ê意思，若活tī世上，就盡一切kap本份來榮耀上帝，若hō͘主接納，離開世界，就thang放下人生真chē ê煩惱、負擔，kap主同在天國，享受主ê應允。像保羅chit種「人生觀」，to̍h是基督徒應該建立ê人生觀。因為性命ê主權m̄是人ē-tàng左右，伊是屬於上帝ê。人是beh盡一切ê本份來完成上帝所託付ê使命。所以tī基督教倫理中，伊要求每一個基督徒ài成做一個良好ê子民，做負責任ê父母，或者工作者，tī各無仝ê領域中，完成美好ê角色！因為chit種美好ê角色ê完成，to̍h是ē-tàng充分榮耀上帝ê行為！所以尊主為大kap榮耀上帝是一體ê兩面「無論生死」lóng完全交託hō͘上帝，m̄是無負責任ê表態，卻是積極ê信仰生活ê建立。

（三） 是積極ê人生生活（腓立比書一：25-26）
屬基督ê人生是尊主為大ê生活，是凡事交託hō͘主ê生活，同時伊是積極ê人生生活，是有信仰長進kap喜樂ê生活。當時ê保羅是hō͘人關tī羅馬ê監獄中，保羅勉勵腓立比ê基督徒mài受此影響，ài用積極ê心態去經營人生。「Hō͘ lín tī所信ê道上，koh長進koh喜樂」是保羅ê期待。咱讀腓立比書一章25-26節就會了解，積極ê人生取向是基督徒應該有ê生活態度，因為只有實行chit種生活，基督徒chiah有能榮耀上帝。

因為這是人生信仰ê一個決定性ê關鍵，基督徒ê人生一定ài tùi信仰上得tio̍h增進人生狀況ê積極意義。Chit種信仰chiah有價值。歷史上真chē偉大ê人物，in有非常豐富ê人生經歷，雖然無lóng仝款，咱lóng ē-tàng tī in身上看tio̍h積極ê人生觀，用che當做伊人生ê根基，無論任何逆境lóng無法phah倒in積極ê人生心態，這to̍h是in成功ê主因。

因此建立積極主動ê人生觀，是基督徒ê信仰生活中所bē-tàng欠缺ê要素。咱知影人lóng會面對無仝人生中真chē苦難、問題kap環境，正確ê人生觀to̍h是面對伊siōng好ê利器！仝款ê tāi-chì，因為人ê觀念ê無仝chiah形成兩種極端ê結果，譬如：仝款是半杯茶，有人感謝，有人soah怨嘆，仝款做一件tāi-chì，有人用喜樂ê心去做，有人soah拾恨tī心內，結果完全無仝。日本ê企業án怎會hiah-ni̍h成功？成做全世界siōng好額ê民族，而且kap英、美各國完全無仝？主因tī in ê企業管理經營了真好，但是siōng重要ê是日本人ê忠心護主ê態度！將伊ê一生投入tī企業，用充滿感恩ê心去面對，自然就會得tio̍h美好ê效果。基督徒mā應該比其他ê人koh-khah會曉感恩，因為咱確實享受tio̍h上帝無限ê慈愛，存感恩ê心去面對你ê人生、家庭、khang-khè、生活，就會有無限ê收成，這是策動積極人生ê動力。

（四） 名符其實ê人生生活（腓立比書一：27）
「只要lín行事為人kap基督ê福音相稱」現代譯本翻做「應該符合神福音ê要求」無論是榮耀上帝，尊主為大或者是積極ê人生，lóng是beh建立咱chiah-ê hō͘人稱做是基督徒ê人成做名符其實ê基督徒！

Tī教會生活中，咱tiāⁿ-tiāⁿ會看見bōe真實ê基督徒，伊時常謗瀆上帝，hō͘上帝ê名受侮辱ê主因。真chē掛名ê信徒，世上ê pháiⁿ事lóng敢做，tī教會中，chit種tāi-chì滿滿是。Chit種作為自然bōe榮耀上帝，顛倒hō͘上帝ê名受侮辱，舊約中ê真chē假先知，藉著上帝ê名做m̄是上帝旨意ê事；比如以色列國ê巴蘭、基哈西，新約真chē偽善者；使徒行傳十九章13節記載，有人家己專門奉耶穌ê名趕鬼，結果失敗，hiah-ê邪靈講：「耶穌我認bat，保羅我mā知影，lín是siáng？」In就hō͘邪靈攻擊。Kap信仰無相稱ê生活m̄是基督徒應該有ê生活方式，基督徒beh建立ná保羅所講：「行事為人符合神ê福音」ê生活，因為這是siōng基本--ê。身為一個基督徒，假使連siōng基本ê福音準則lóng無符合，mā就失去了基督徒ê價值。「相稱」是人生生活ê大事，無論tùi任何角度來kā伊思考，「角色ê相稱」應該成全人生ê基本條件，人ê生活必須ē-tàng活teh相稱ê角色之下。真chē人間ê悲哀kap不幸lóng是起因tī人活teh無相稱ê角色之下，伊tiāⁿ-tiāⁿ hō͘人teh生活中發生真chē悲劇。今á日台灣ê狀況，hiah-ê人活teh無相稱ê角色中，致使無正確ê價值觀，mā造成了真chē不法ê弊端，為tio̍h錢chiah去做pháiⁿ、poa̍h-kiáu、搶劫、食毒，產生真chē社會問題，tùi此可見角色ài相稱，名符其實ê重要。

基督徒是tī耶穌基督寶血ê救贖之下，以待罪之身進入神ê恩典內面，基督ê寶血會將咱洗煉出啥物款ê人生？經過福音ê薰陶應該是價值連城--ê，因為入是啥物，出mā是啥物，咱共同勉勵。

結論：雖然俗話講：入是糞埽，出mā是糞埽，但是基督徒用待罪之身進入基督ê恩典中，耶穌基督用祂ê寶血kā咱ê罪洗清氣，救贖咱，經過福音ê洗煉，出來ê應該是價值連城ê精金，bōe koh是糞埽！