《受恩蒙福的一生》

 | | | 轉寄

屬基督ê生活

作者 林宗要 2011.02.06

歌羅西書三：12-17

每一個人無仝ê生活環境以及文化背景，tiāⁿ-tiāⁿ會反應tī in ê生活習慣頂koân。阿拉伯民族、印度人或者印地安人ē-tàng tùi in ê穿插來分辨，猶太人ê cha-po͘人到taⁿ iáu慣習頭戴圓圓ê小帽á，阿拉伯人處tī燒熱天氣中，穿hiah-nih-chē ê衫褲，hō͘咱bōe-tàng了解伊ê原因，chit種無仝民族，無仝文化kap無仝生活背景，往往to̍h是人kap人無法度鬥陣ê主因。因此tī現實生活中，雖然無一定講無仝ê文化to̍h是m̄-tio̍h，但是teh嫁娶頂koân，hiah-ê人mā一直主張，ài有khah接近ê生活背景，婚姻chiah會khah完美，譬如：年歲差siuⁿ-chē，kap外國人結婚或者學歷差相遠，往往the溝通ê時會發生問題。70年代台灣一位有真有名ê歌星kap印度seng-lí人談戀愛，甚至結婚，伊厝內ê人反對，但是當事人soah hō͘愛沖昏頭，無顧厝內ê人ê意見，嫁去真遠ê印度，in提出beh說服人ê理由是「愛情無國界」，只要二人相意愛，一切lóng無問題，但是當chit對恩疼夫妻tńg去印度ê時，tī in ê厝內就面對了chiok大ê文化衝突kap適應ê困難，teh食ê方面印度人ê食物是用真重ê咖哩，用手掠物件來食，同時mā有hō͘人排斥ê情感，tī he景況中，只有伊ê生活方式kap別人無仝，往往成做hō͘人笑kap輕視ê對象，因為tī hit種多數中ê少數lóng是hō͘人看做無正常。Tī社會中講tio̍h「正常性」往往是用多數做根據，少數ê動作kap見解，tiāⁿ-tiāⁿ會hō͘人看做「無正常」，這是咱所ē-tàng了解ê，所以tī傳統社會中，人ài突破原來ê têng-tâⁿ kap不良ê境況，實在會受tio̍h真大ê壓力kap反彈，所以環境對人生ê影響面是非常重大ê。尤其是基督徒生活tī異教勢力不lí-á強盛ê台灣社會，tī其他人力求傳統作風，保守觀念ê狀況之下，基督徒ài怎樣建立屬耶穌基督所要求ê信仰生活，這mā是基督徒面對tio̍h siōng切實ê課題。處tī chit種境況中，基督徒ài如何來見證上帝，是一件真值得咱思考ê問題，chit-ê問題的確kap咱ê信仰生活kap教會ê興kap敗lóng有密切ê關係，雖然咱了解基督徒得救是因信稱義，kap行為無關，但是一個得救ê基督徒若無行為來見證，因信稱義之道，hiah-ê人koh怎樣ē-tàng信服？基督教信仰無像其他ê宗教，主張個人ê修為以及刻苦修行，是基督徒ài tiāⁿ-tiāⁿ用生活來見證基督ê福音。若一個基督徒ê生活比非基督徒koh-khah不法、垃圾，hō͘人討厭排斥，hiah-ê人怎樣ē-tàng對伊所信ê宗教有興趣？Tī過去咱ê教會生活中有一個值得重視ê現象，to̍h是邊仔ê人觀察基督徒美好ê言行是in靠向基督教ê主因。長老會bat舉行全省ê問卷調查，提出如何替主作見證？「傳道、文字事工、關心助人、生活上見證，開放家庭」，結果近80％ ê人認為siōng有效、siōng好ê見證，是tī生活上有良好ê見證，mā to̍h是將自身完美ê生活表現tī眾人ê面前，這to̍h是教會ê傳道事工，mā是見證基督。因此教會真重視信徒生活上ê見證，因為真chē人信主ê原因，lóng kap基督徒美好ê生活見證有關，這一點咱chiah-ê已經信ê兄姊必定ài注意，特別是有利害關係ê情形；譬如：新婦信主，ta-ke-koaⁿ m̄信，或者tang-sāi-á之間ê關係，已經信主ê基督徒若無好ê言行，就免想beh帶領對方信主，因為chit種siōng真實ê生活狀況lóng無好見證，是behan2怎叫hiah-ê現實ê人去思考行為以外ê tāi-chì neh？有一位熱心教會事奉ê姊妹，tī厝內對待忠厚老實ê翁婿是真無客氣，ná親像母夜叉，伊期待翁婿信主，拜託牧師去kap翁婿講道，翁婿將心內ê話講出--來，提出伊ê看法。牧師tńg去了後責備chit位疼主ê姊妹不良ê見證，伊to̍h即時悔改要求牧師替家己代禱，tī-che了後生活完全改變，翁婿mā最後自動要求beh來參加聚會。已經信主ê基督徒對未信ê親人、朋友，一方面ài有生活上ê好見證，另gōa一方面ài學習保護，為tio̍h beh得tio̍h hiah-ê人，基督徒必須ài有犧牲、付出ê心志，因為只有建立完全屬上帝ê生活方式，咱chiah ē-tàng tī福音ê事工上有所分擔。今á日咱tùi chit段聖經中，用基督徒應該有ê生活方式來思考屬上帝ê生活。

（一） Ài有仁慈寬宏ê心態（三：12～14）
基督徒是屬基督ê生活者，因為咱是tùi基督ê寶血所贖tńg來--ê，成做祂ê子民，是聖潔koh得tio̍h憐憫--ê，因此屬基督ê基督徒，必須teh生活上活出ná主仝款ê仁慈kap作為。Tī聖經中，當彼得問主耶穌：「我ê兄弟得罪我，我ài赦免伊幾pái」，主耶穌用一個比喻來說明：一奴僕欠王一千萬兩銀子，求王赦免，王赦免伊，但是chit-ê奴僕ê soah向欠伊10兩銀ê朋友，苦苦相逼，甚至虐待那位朋友同伴，王知影chit-ê tāi-chì，就boài赦免伊（馬太十八章）。Chit段經文結語，上帝叫咱ài互相饒恕，因為人生難免有缺點，任何人lóng無法度永遠活tī十全十美ê境況中，基督徒會成做基督徒是因為咱是受恩ê一群，咱chiah-ê基督徒tī上帝面前並無任何功德，咱只是一群軟弱、無完全ê人而已，但是tī咱身上soah有上帝豐盛ê憐憫kap恩典，咱是白白得tio̍h恩典ê人。因此上帝要求咱chit陣受恩ê人ài tī世上發揚祂ê恩疼，存仁慈、寬宏ê心，來經營上帝所交託、所賜hō͘咱ê人生。當然chit種具備仁慈、寬宏心態ê生活，難免會有一kóa真pháiⁿ克服ê所在，但是當咱詳細思考主耶穌替咱chiah-ê罪人所付出ê一切ê時，就ē-tàng了解，上帝要求屬祂ê人ài有互相饒恕ê生活，因為咱知影人性復仇ê心真重，尤其是父母被害，「父仇不共戴天」是過去ê人ê想法，m̄-koh主耶穌ê教示，是ài屬上帝ê基督徒用仁慈ê心互相對待，所需要ê to̍h是赦免寬恕ê生活，因為咱實在是體驗了主耶穌基督tī咱身上一切仁慈ê作為，mā必須將chiah-ê仁慈ê作為應用teh生活中來報答主ê救恩。

（二） Ài hō͘基督ê平安tī你心內作主（三：15）
保羅tī-chia進一步ê講屬主ê人ài有基督ê平安tī心內作主，伊所強調ê是屬上帝ê基督徒tī生活上ài有上帝ê和平tī內心指揮，掌握咱ê生活。約翰福音十四章27節「我kā平安留落來hō͘ lín，我將我ê平安賜hō͘ lín，我所賜ê無像世人所賜--ê，lín心內mài憂愁mā mài驚惶。」tī-chia咱必須注意ê是主耶穌所講「我ê平安」kap世人ê平安無仝，是tī主以外無法度取得ê平安，同時伊mā是世人siōng需要ê平安，是人生bē-tàng欠缺ê，只有得tio̍h chit-ê平安，人chiah有真實ê平安kap永遠ê安息！咱看tio̍h司提反tī he極端ê危機中，伊iáu ē-tàng表現出無限ê平安，hō͘人用大石用跋倒，臨死前伊ê面容所表現出來ê平安，to̍h是基督所beh賜hō͘人ê平安。Chit種平安是tī人間所chhōe bē-tio̍h ê。為何今á日人類會chiah nih仔紛亂不安？主因是人類心中無主ê平安。Ta̍k pái看tio̍h伊拉克總統哈珊tī回教清真寺跪拜阿拉真主ê時，我心中會產生一種疑問，伊ê敬拜是m̄是有價值？聖經kā咱講，ài建立和平ê世界，m̄是tī聯合國，卻是hō͘主ê平安tī人心中作主ê人生，基督徒ài如何將主ê平安推sak tī人世間？是tī基督徒beh成做和平ê使者，tī人間實現天國ê理想，比如主禱文中「Tī地上ná親像行tī天頂」soah m̄是用咱ê願望kap私慾作主，因為這是人生失敗kap混亂ê主因。人ê平安是暫時ê，表面ê，只有主ê平安，chiah有永遠ê價值，是tùi內心活出平安、喜樂，chiah m̄是靠金錢，靠才能得來ê平安。

有一ê故事，一ê好額人遇tio̍h一ê sàn-chhiah基督徒講：「願你平安！」sàn-chhiah基督徒講：「我真平安！」好額人講：「一生平安？」講：「hō͘天時感謝主，thang做工，落雨天感謝主禁食祈禱（無飯thang食）」好額人講：「若上帝叫你落地獄你kám會平安？」講：「我一手信心，一手愛心掠tiâu上帝，kap上帝同在，上帝若tī地獄，地獄mā會變做天堂。」好額人koh問：「你是siáng。」sàn-chhiah人應：「我是王。」「你國何在？」「Tī我心中。」這to̍h是上帝所賜ê平安ê強力果效。

（三） Ài hō͘基督ê道理存tī心內（三：16）
屬上帝ê生活，m̄-nā有上帝ê平安，同時koh-khah重要ê是beh hō͘上帝ê道理充滿tī kui-ê人生中，上帝ê道理當然是指上帝ê話，是人ê福音，是人生ê腳前燈，路上光（詩一一九：105）基督徒ê人生只有hō͘上帝ê話充滿ê時，chiah ē-tàng發揮伊ê光明面。Ma7chiah ē-tàng活出基督徒ê特質。只有hō͘上帝ê道理充滿ê時，基督徒ê人生chiah會存感恩ê心來經營上帝所交託ê生活。因為主基督ê道理是咱人生ê指標，同時mā ná希伯來書所講：「比一切兩刃ê劍koh-khah緊」，頭前是指引人生活tī上帝所喜樂ê道上，後者是ē-tàng tī咱ê人生中除去一切垃圾無正當ê人生作為，hō͘人生koh-khah淨化，án-ne人生chiah是上帝所希求ê人生，tùi chia thang知基督徒生活充滿上帝ê話是jōa-ni̍h-á ê重要。

Beh án-ná chiah ē-tàng hō͘主ê話充滿teh生活中？A）必須肯聽上帝ê話；骨力讀聖經，khah chiap聚會，用切慕謙卑ê心去領受。B）願意食；主耶穌家己是性命ê餅，ài ê人，只要肯食，就ná人teh成長ê時ài均衡攝取所需ê食物，發育chiah會完整，看hiah-ê發育良好ê gín-á lóng是無胃口，若無會發育不良，基督徒屬靈ê性命mā kap chit-ê原理仝款。C）Bōe-sái代替，家己負責，家己奮鬥phah拚，bōe-sái由別人代替，是家己完全ê責任，真chē熱心ê教會長執，伊ê kiáⁿ孫對教會無一定有貢獻，父母ē-tàng感化基督kiáⁿ兒ê信仰，但是無法度永遠庇蔭kiáⁿ兒，舊約聖經以利ê例thang說明chit-ê 事實，著算講父母ê信仰熱心可取，kiáⁿ兒soah是不法之徒，這mā充分說明了信仰生活ê嚴肅性kap完全獨立ê自主性！

（四） Ài hō͘家己ê作為成做榮耀主ê見證（三：17）
最後保羅要求屬基督ê生活方式是奉主耶穌基督ê名無論作啥物，或者講啥物，或者行事，lóng bē-tàng bē記得基督徒ê人生ài成做榮耀上帝ê人生。

Tī基督徒ê信仰生活中，tiāⁿ-tiāⁿ會疏忽言行舉止ài kap身份相稱，因為人tiāⁿ-tiāⁿ有表面化ê現象，尤其現今咱生活teh重視包裝ê世界，咱ê民族又koh是愛面子、重外表，難免會有偽裝ê表現，做表面功夫，基督徒ê信仰生活beh突破chit點，chiah ē-tàng真正活出有意義ê信仰生活。Chit種tī社會中顯耀信仰ê生活，to̍h是榮耀主ê作為。Bē-tàng因為咱ê生活hō͘主ê名或者上帝ê教會受tio̍h侮辱！保羅講「無論作啥物」是指咱全部ê生活內容，m̄是kan-nā限tī某一部分，譬如tī教會禮拜或者有宗教氣氛ê所在，真chē基督徒有chit-ê情形，tī教會中表現出色，但是tī khang-khòe場做穡soah bōe-tàng榮耀主，這是kan-nā做禮拜堂ê基督徒，咱知影上帝是無所不在ê上帝，m̄是只teh敬拜ê時chiah意識tio̍h上帝臨在，tī其他場合特別是不法或者色情場所將上帝放開，這m̄是基督徒應該有ê信仰生活，咱ê信仰無論tī任何境況中（光kap暗、正或者不法、是或者非）lóng tio̍h表現出基督徒信仰ê價值，chit句話ê意義是講基督徒必須將家己khǹg tī上帝ê面前，對上帝負起完全ê責任。Án-ne tsiah ē-tàng表現出榮耀上帝ê圓滿結局。

結論：主耶穌基督既然已經召咱成做聖潔，理想ê存在，咱必須認清屬祂ê生活方式：1）Ài有仁慈寬宏ê心態 2）Hō͘基督ê平安tī咱ê心中作主 3）Hō͘基督ê道理充滿心中 4）Hō͘家己ê生活成做榮耀上帝ê見證。若ē-tàng具備chit四點一定ē-tàng成做理想ê基督徒。