《受恩蒙福的一生》

 | | | 轉寄

教會ê隱憂

作者 林宗要 2011.01.23

以弗所書四：11-16

有一位疼主熱心ê平信徒，tī一pái ê演講中提出現代教會ê情形：□無上帝ê神學：神學自頭到尾是以上帝為主，無上帝ê神學是真驚人--ê。□無基督ê教會：教會kap基督是一體--ê，因為基督是教會ê頭，教會是屬於基督ê肢體，教會若無基督ná親像人ê身軀無頭仝款，無頭ê身軀是無法度生存、是無性命ê、是bōe成長、是死--ê。□無使命ê傳道人：當做一個傳道人ài具備個方面ê條件：比如學識、人格、信仰、品德……等等，但是其中有一項絕對bē-tàng欠ê to̍h是心志，mā to̍h是當做一個傳道者ê使命感！Tiāⁿ-tiāⁿ聽tio̍h人teh批評現代傳道者ê精神無可取，mā to̍h是關係tio̍h傳教者決心獻身ê使命感ê問題，雖然有完美ê學識kap品德，但是若無心，伊所做ê工就khah會發生問題，因為心是指揮管理人一切ê根本，所以做一個傳道者，心是非常重要--ê。無使命感ê牧者tī教會ê事工上是chhìn-chhái做做而已，一旦tú-tio̍h 真pháiⁿ排解ê問題，往往是落跑to̍h tio̍h啊。Chit種無使命ê傳道者就無可能有理想ê牧會生活。□無性命ê基督徒：伊講無性命ê基督徒是現代基督徒ê特色，這mā是chiok驚人ê教會現象，因為一個無性命ê基督徒tī屬靈ê過程中等於死亡，無活動、無榮耀上帝ê作為、無信仰ê果實、無生活ê品質，chit種存在是hō͘人棄絕、是無路用--ê，當然koh-khah是無榮耀上帝ê作為。基督徒必須認清伊ê存在是teh榮耀上帝，永遠過tio̍h祂喜樂ê生活。一個無性命ê人（無kā主基督連結ê人）比如約翰福音十五章葡萄樹ê比喻，是無路用ê枝，hông擲tī外口hō͘人踏而已，是無價值ê存在。因為主耶穌真清楚ê講，離開祂就bōe-sái做啥物！以上所舉ê四點實在是今á日基督徒必須ài省思ê重要問題。

咱教會tī現代化ê衝擊之下難免會有真chē問題；咱看這四、五十年來ê教會成長以及教會ê心態，加減 ē-tàng了解處tī急變ê社會中，教會有真chē ê挑戰kap難題。Chiah-ê tī時代中所產生ê真chē問題往往對教會造成衝擊產生真chē問題，當然時代進步，科技發達帶hō͘教會teh傳道事工上ê方便kap快速，但是mā造成傳道事工上真chē ê阻礙kap 不便，chit種情形咱thang tùi實際生活中體會tio̍h。譬如古早時，hiah-ê人對福音往往是排斥kap批評ê態度，現代人對教會（福音）ê心態雖然無像khah早仝款，但是因為物質ê進步，hiah-ê人kah-ná真bōe-tàng mā bōe去關心人性ê心靈上ê問題，mā因此造成傳福音事工上真chē困難。物質富裕，hiah-ê人心靈顛倒空虛，無chhōe-tio̍h純正ê信仰soah去chhōe異端宗教活動來造成損失，比如奧姆真理教kap大衛教派。教會處tī chit種變遷ê社會狀況中，到底ài如何去發揮教會ê功能，是教會重要ê課題。當咱想tio̍h chit-ê課題，咱mā ē-tàng發現教會有真chē負面現象值得省思。

（一） 現代化ê影響
主基督向學生講：「Lín是地上ê鹽，是世上ê光」。這是teh說明教會是為tio̍h人類存在tī世界中，但是chit-ê世界一直發展了真緊，尤其是chit-má ê人類有真chē輝煌ê表現；tī科技ê發展上確實帶hō͘現代人生活上無比ê方便kap真緊ê生活方式。過去ê人生活tī步調khah慢之中，譬如我teh讀神學院ê時，定定行一點鐘左右去參加主日敬拜，一kóa朋友、同學沿路開講，路līn無車，清幽koh安全，若是chit-má大概是無可能ê tāi-chì啊，chit種情形teh說明啥物neh？是現代化ê影響。Ē記tī四十年前，bat參加台南神學院舉行ê教員靈修會，差不多四百人參加，課程安排kah真密，自透早6：30到暗時10：30中間只有12：00～13：00 ê中晝頓kap歇睏時間，日時八點鐘，暗時二點鐘ê集訓，時間是一禮拜以上，參加ê人各種精神飽飽、真有鬥志。若今á日beh舉辦仝款時間ê靈修會，想是無啥可能啊，主因是teh現代化ê影響，現代人無chit種時間去做chiah-ê tāi-chì，現代人活tī分秒必爭ê環境中，kap四十年前hit種清幽ê生活方式完全無仝。Tī chit種急變ê狀況中，像過去hit種教會訓練mā無必要啊，教會既然處tī án-ne ê教會中，當然就會受tio̍h影響，教會ê生活mā會受限制：譬如教會對時間ê控制，或者教會經營方式mā teh改變。牧師ê牧會方式kap心態lóng無仝款，以前對會友ê探訪，樂譜ê處理，lóng kap現在大大無相仝。基督徒ê價值觀kap心態相信mā有真大ê差別，當然四、五十年前ê基督徒信仰價值觀mā會kap現代ê基督徒tī心態kap信仰ê理解體驗頂koân lóng會有無仝ê所在。

咱知影tī chit種現代化影響之下，教會好好利用資源，用teh造就信徒方面必定會有正面ê效果，但是教會因為現代化ê文明，難免有負面ê影響：比如過去bat因為電視ê影響chiah致使基督徒有減少ê情形。基督徒ài清楚教會是存在tī社會以及時代潮流中，因此社會ê任何狀況kap時代ê變遷加減lóng會造成對教會ê影響，當然咱無可能去避免或者拒絕chiah-ê，soah是必須去面對，這是基督徒具體ê教會生活內容，但是咱tio̍h用什麼心態去面對現實ê社會和急變中ê現代化所帶來ê真chē現象，基督徒tio̍h用信仰kap智慧去把握，去疏導負面ê tāi-chì遠離咱ê信仰，chiah將有正面價值ê時代產物帶入去咱ê信仰生活中，thang好tī信仰ê建立，這chiah是咱面對急變ê現代化siōng理想ê信仰態度。咱必須phah拚來分辨正面kap負面ê影響去面對信仰生活。

（二） 已經離開當初ê愛心（啟示錄二4）
啟示錄ê內容是主耶穌向當時ê七間教會提起in實際ê信仰狀態；第一間to̍h是以弗所教會，頭先主耶穌o-ló教會tī真道上真chē美好ê表現，行為、做穡、忍耐，主lóng知影，bōe容忍惡人、辨別真假使徒、為tio̍h主ê名ê忍耐到底，chiah-ê lóng teh講以弗所教會是真值得o-ló--ê，但是主soah講：「但是，有一件tāi-chì我boeh責備你；to̍h是你kā當初ê愛心離棄了」（啟二：4）。本來以弗所教會中有美好ê信仰生活表現，對主耶穌有忠心，mā有辨明ê能力（chit件tāi-chì teh信仰上真重要）所以當時in ê信仰生活表現出積極kap主動。但是另gōa一方面in soah失去信仰生活中siōng重要ê愛心行為（盡心愛上帝，愛人ná愛己是信仰生活ê根本），in因為時間chit久chiah失去愛心。Chit句經節對基督徒來講是chiok大ê警戒，mā thang體會出信仰所要求ê to̍h是持守真理，永遠不斷ê長進，chiah是信仰生活ê現實，信仰bōe因為時間來改變，是tī時間中永遠不斷成長。日本有一位學者用人kap人之間愛ê問題來說明chit句經節，表示出人ê性格kap操守將影響人對當初ê愛ê變化。有時tī信仰中ê愛，若用人ê觀點來看無法度了解；比如馬利亞用香油抹主耶穌ê動作，確實tùi外人ê看法是thó-chè ê行為，但是馬利亞是用絕對ê疼表現tī主身上。Tī教會生活中mā有chit款事例，願將家財全部獻出（苗栗何姓基督徒獻地hō͘戒毒中心），chit種絕對ê疼是信仰生活中所要求--ê，可惜因為人性ê軟弱，基督徒teh信仰上失落了頭先對主ê疼，這是現代教會值得思考ê問題，因為現代教會失去hit種對主熱愛ê信仰情懷！Chit種疼ê衰退家己會影響tio̍h信仰ê事實上，因為信仰是表現teh疼上帝kap疼人ê生活中。

（三） 批評khah chè過實行
時代進步，自由ê風氣是現代ê特色，教會tī現實ê社會中難免受tio̍h chit種世俗ê影響。雖然時代teh變，但是主基督ê真理是永遠無變，古早時ê教會kap現代ê教會生活，lóng會因為社會變遷chiah有所影響，致使教會mā處teh變化ê中間。以前會有對待神職人員態度非常恭敬，我四十gōa年前牧會，若去會友家探訪，伊喜樂ê情形實在真pháiⁿ形容；而且講「先生我看你kah-ná天使」。Ē記細漢時庄腳ê會友對傳道人ê態度實在是非常ê恭敬，但是tī現代教會中有會友公然罵牧師，有一kóa會友告牧師，有phah牧師--ê，若是背後ê批評、責備he lóng是真平常ê tāi-chì。M̄-nā對牧師，有時對kui-ê教會mā tiāⁿ-tiāⁿ用批評ê態度，chiah-ê人自認為是頭家，用chit種心態對待教會實在是無應該，自古以來對待神ê僕人真惡質，佮意批評責難教會ê基督徒是bē受神祝福，因為教會kap牧師是代表神tī地上執行所託付ê使命。誠然，tī現實ê教會中有真chē ê缺失kap無完全，mā有一kóa m̄是真理想ê牧者，但是基督徒若用祈禱kap溫柔代替責備kap批評處理教會問題，一定koh-khah ē-tàng榮耀上帝。

另外有關教會ê運作，有時難免mā會hō͘咱感覺m̄是真理想，有時kap咱家己有關係ê tāi-chì會hō͘咱感覺無自然，往往會提出意見、建言、批評；但是咱必須了解教會是共同ê團體，因此基督徒對待教會必須khiā-tī客觀ê立場來看，bē-tàng主觀意識過強，chiah是基督徒信仰正確ê表現。有時教會表現無一定合你ê心意，但是mā ài體會教會ê公眾性，除了你以外iáu有別人ê存在，in ê看法無一定仝款，因此基督徒對待教會ê態度siōng好ê辦法是「行動khah chē過批評」，教會是每一個基督徒所有ê，批評者往往跳出kho͘-á之外（已經無所屬）所發出ê行動，既然是tī kho͘-á以外伊ná親像俗語所講ê「Phah拉涼而已」，咱也tio̍h了解批評者往往是無愛心ê表現，因為一個實在疼教會、有疼心ê基督徒一定bōe chhìn-chhái來批評無完全ê教會，m̄-nā án-ne，mā thang看出批評者ê心態以及人格ê缺失。若咱ê kiáⁿ兒真gâu批評、嫌東嫌西ê時，父母tio̍h ài kā伊注意kap引chhōa伊ê人格成長，tī教會生活中hiah-ê愛kā人批評ê人往往對教會無實際ê參與，mā bōe有實質ê信仰內容，這mā是現代教會值得警惕ê事實。

（四） 無關心靈性生活（靈性ê兩極端、信仰ê兩極化）
這mā是今á日咱ê教會真重要ê一件事實，因為現代基督徒生活有相當chē ê負擔，無論是tī khang-khè上或者是家庭中lóng有各種無仝ê壓力，無閒ê生活造成基督徒teh信仰方面所付出ê時間心力無夠，因此影響tio̍h屬靈ê性命，這是現代教會ài省思--ê。牧會中我tiāⁿ-tiāⁿ會做主日敬拜ê出席記錄，主因teh想beh了解基督徒ê出席情形；通常一年五十二pái ê敬拜若有40 pái以上出席算是好--ê，khah chiap ê是20到30 pái之間ê khah chē，45 pái以上ê真少，這teh說明啥物neh？基督徒時常teh敬拜ê時間上受tio̍h 小khóa代、家庭問題、親人朋友或者外出旅行等等因素ê影響bōe-tàng出席。一個基督徒若一直bōe-sái重視靈命ê成長，teh信仰方面是一件值得擔憂ê tāi-chì，咱lóng知影屬靈ê性命是建立tī家己ê追求kap體驗，mā確立tī基督徒互相之間ê共同敬拜生活來ê，這mā是咱教會一直teh強調基督徒主日敬拜ê重要性，因為che ē-tàng加強基督徒靈命ê長進。另gōa一方面值得咱省思ê是極端狂熱ê信仰，tī台灣教會中近來真時行神醫佈道，聖靈第三波或者權能佈道等等，方法是替人chhih手祈禱，hō͘人phah tī土腳kā伊稱做聖靈擊倒，致使tī現代教會中造成真chē混亂，in tī聖經ê解釋上mā有過份主觀ê表達，當然咱無講聖靈ê感動以及信心治病ê能力m̄好，但是chiah-ê恩賜m̄是人人lóng有--ê，上帝hō͘每一個人無仝ê境況無仝ê恩賜，這是咱必須了解ê。基督徒siōng重要ê是用愛心做基礎，盡一切ê本份完成上帝所託付ê使命，作主盡忠koh良善ê僕人。六十年代一位留美ê電機工程碩士tī美國期間hō͘教會帶領歸主，非常熱心，tńg去台灣了後放棄了高薪ê好khang-khè，去做教會ê事奉khang-khè，將家庭、bó͘、囝兒ê生活khǹg leh m̄管，試想chit種信仰kám值得鼓勵？

結論：信仰tī時代ê潮流中，不斷會承接真chē ê挑戰kap危機，基督徒tio̍h用智慧kap信心去克服，將信仰引入美好理想ê境界，tī急變ê社會中發揮信仰ê價值。