《受恩蒙福的一生》

 | | | 轉寄

Kap上帝同工

作者 林宗要 2011.01.16

哥林多後書五：20～六：1

回顧gín-á時，大約六十年以前台灣庄腳ê生活確實真貧苦，kap現代比起來，是天大ê差別。日本連續劇－「阿信」ê播出造成轟動，一kóa有年歲ê人看了後，真了解伊ê感受受，koh一pái引起回憶，引起真chē ê感想。

六十歲以上ê老大人，mā可能lóng體會過當時生活ê艱苦。Tī he款困苦ê時代，雖然是庄腳教會ê牧師，無論tī教會主持聚會或者做家庭探訪，猶原西裝革履，穿插整齊，hō͘人看了羨慕無停，連gín-á lóng會對伊起仰慕之心，tī in koh細ê心靈中，對牧師ê khang-khè、生活，加減lóng會有siàu念ê思緒。但是等家己mā teh做牧師ê時，chiah深深體會tio̍h牧師ê難為，kap細漢gín-á時代ê觀感全然無仝。當然，牧師ê khang-khè，確實是神聖、有意義--ê、受tio̍h會友ê敬重、關心kap疼痛，我四十gōa年來ê牧會生涯，體驗tio̍h會友對牧師ê情誼，有時iáu超過親情。Tùi另gōa一個角度來看，牧師ê生活非常清苦。Mā可能受tio̍h過去清教徒精神ê影響，一般會友lóng認為牧師應該tio̍h ài食苦；teh牧會khang-khè上，有時無同心協力ê同工，非常無力感，有時iáu受tio̍h惡意ê批評kap攻擊，真chē牧師ê kiáⁿ兒，大漢了後離棄教會to̍h是因為chit-ê原因。牧師tī教會受tio̍h委屈kap侮辱，對伊當teh成長中ê gín-á是真大ê心理衝擊，有一kóa牧師gín-á tī長執會koh teh討論伊ê老父留任問題ê時，伊ê心情會koh-khah惡劣鬱卒，chit款tāi-chì ê發生對牧師kui口灶來講，ná愁雲慘霧仝款，siōng好避免。基督徒千萬ài小心謹慎處理，bē-tàng hō͘傳道人生活teh驚惶ê中間，che對雙方lóng是不利--ê。「教會是上帝所祝福ê團契」，使徒行傳二章描寫初代教會，hō͘咱koh-khah清楚chit句話ê意義，伊講「大家做伙過團契ê生活，只要是物件tio̍h公家用，互相分享，保持和睦ê關係，上主將得救ê人ta̍k工加hō͘ in」。教會所以會受tio̍h上帝ê祝福，是kui-ê團契發揮團隊ê精神，幹部雖然重要，若無全體動員配合，效果mā是有限--ê，這to̍h是初代教會ê特色。

當然，教會是一陣有罪軟弱ê人聚集ê團體，難免有人性ê弱點，牧師、長執mā仝款，lóng有人性ê缺陷、軟弱ê一面，如何去輔助牧師kap長執，是信徒信仰ê重任。

大家lóng知影，有人ê所在就有人ê問題，教會mā是。教會mài驚問題ê發生（若無問題是siōng好），問題若來就ài盡力去化解，甚至將伊變成美好ê見証，這chiah是基督徒信仰生活ê重點。每一位信徒lóng有責任參與教會ê事奉kap建設，hō͘上帝ê厝koh-khah理想koh-khah符合祂ê旨意。若全體信徒lóng有chit-ê共識，相信教會koh-khah會討上帝ê喜樂，koh-khah ē-tàng發揮功能。教會是上帝子民ê團契，信徒ê信仰生活內容ài符合上帝所要求ê。保羅tī伊ê言論上時常提起基督徒行事為人ê重要性。當伊hông chhōa到公會ê時，對猶太人大聲喝講「兄弟啊，我tī神面前行事為人，lóng是憑良心，一直到今á日。」（行傳廿三：1）伊向羅馬ê信徒講：「為人行事ài光明。」（羅馬十三：13），向哥林多教會ê信徒講：「行事為人是憑信心，m̄是憑目chiu看tio̍h--ê。」（哥林多後五：7），向以弗所教會ê信徒講：「Lín行事為人，lóng應該符合神呼召lín ê時所立ê標準。」（以弗所四：1），「Lín ê生活必須像光明ê kiáⁿ兒。」（以弗所五：8），向腓立比教會ê信徒講：「Lín ê生活應該符合基督ê福音所要求ê。」（腓立比一：27），對歌羅西教會講：「Lín行事為人ài對會起主。」（歌羅西一：10），tùi以上chiah-ê經節，咱看tio̍h使徒保羅對信徒行事為人ê期待，ài in ê生活確實符合「神ê子民ê標準」。Ài如何達到hit種標準neh？

（一） Ài了解信徒ê職責
基督徒應該了解伊tī伊ê人生ê舞台頂，到底扮什麼角色，chit點非常重要，因為伊關係tio̍h伊kui-ê人生。做學生--ê若ē-tàng全盤了解老師教課ê內容，chit位學生一定是一個品學兼優ê好學生，將來升學一定lóng無問題，一定會照伊ê志願進入理想ê學校讀冊。進入就業期ê青壯年，若ē-tàng了解伊ê所處ê環境，充分發揮潛能，全力phah拚，相信一定有發揮ê空間，hō͘事業koh-khah進入佳境soah大大發展。成家ê人若ē-tàng了解家庭對一個人ê影響是hiah-ni̍h大，伊必定會phah拚去建立溫暖、甜蜜ê家庭，hō͘厝內ê人過tio̍h幸福美滿ê日子。以上所講ê真chē情況，siōng主要ê關鍵，是tī「了解」二個字頂koân，當一個人內心有所了解了後，一定ē-tàng產生積極ê原動力，化被動為主動，積極進取，全力以赴行向成功ê大道。日劇「阿信」，伊ê一生，運命坎坷，但是伊ē-tàng克服困難，勇敢面對，kā伊ê人生改寫，成做家家戶戶lóng知影ê人物。

一個有原氣有活力ê教會，是tùi基督ê福音有正確認知ê信徒所組成ê，信徒若了解基督kap家己ê關係ê時，自然會tùi內心產生出無比ê感動kap熱情、積極主動去參與教會ê各種事奉，chit種發自內心，心甘情願ê事奉，教會chiah ē-tàng復興。若信徒lóng有chit種共識，chit種心態，教會必定會大大興旺，成做理想koh成功ê教會。日本高知教會，有一位社會地位真koân ê長老，非常愛主，禮拜一定提早去教會，非常關心教會ê事工，見若排柴屐、整理庭院糞埽伊lóng bōe輸人，教會有啥物欠缺，伊mā會主動處理，伊ê身份是日本眾議院ê議長。以議長之尊，竟然tī教會做chit種服事，實在hō͘人敬佩，因為伊ê好見証，m̄知感動了jōa-chē部屬。類似chit款事例，tī目前ê教會中，bōe pháiⁿ chhōe。信徒之所以有chit種疼主ê表現，完全tī伊對神有正確ê認知，來實際行動。

信徒若對「信仰」ê本質融會貫通，就ē-tàng表現tī生活上，bōe對牧師嫌東嫌西，畢竟伊mā是人，m̄是神，伊mā有軟弱ê一面。咱應該多多替伊設想，mài用天使ê角度去衡量伊，過份要求kap責備。

（二） 如何kap上帝同工
身為上帝子民ê咱，ài如何kap祂同工？
A） Bē-tàng疏忽細微ê事項。
一般來講，大tāi-chì khah會hō͘人看重，微不足道ê tāi-chì，tiāⁿ-tiāⁿ hō͘人疏忽。重大ê事件對人有決定性ê影響力。但是tī人生ê境遇中，所tú-tio̍h ê tiāⁿ-tiāⁿ是一kóa小khóa tāi。Chiah-ê渺小ê事件，對人一生ê成敗mā有真重要ê影響。伊有時會決定人ê運命，像尼克森就栽tī水門事件。水門事件tī當時ē-tàng講是一件小tāi-chì，一旦爆發了後，總統lóng ài下台，表示負責，尼克森to̍h是án-ne phah無伊總統職位，chiah結束伊ê政治生涯。

第一pái世界大戰之所以開始，原因真單純，只是為tio̍h一個奧國太子hō͘人暗殺，chiah牽拖kui-ê世界，致使全球九百萬人死亡，二千萬人受傷。信仰生活mā是仝款，基督徒有時為tio̍h一件小事或者一kóa小動作，來造成終身ê遺憾。聖經內底有真chē ē-sái成做警告ê事例，比如夏娃只為tio̍h一粒善惡果來hō͘上帝趕出伊甸園：羅德ê bó͘，為tio̍h一個斡頭看ê小動作soah變做鹽柱。Tī教會內，有時對牧師講一句無心ê話，soah致使牧師離開教界。有時會因為一kóa小動作，soah傷害tio̍h慕道友。Chit款類似ê事件，時常tī咱所處ê環境或者教會中發生，咱bē-tàng 無謹慎。基督徒ài kap上帝同工，必須注意細節，重視微小事工。主耶穌講：「Kā一杯水hō͘門徒中siōng微小ê一個人lim，就一定會得tio̍h報賞。」（馬太十：42），聖詩416首mā án-ne講：「一滴一滴ê水成做海hiah大，一粒一粒土沙，結成地kap山」時間一分一秒，雖然微小，但是連結起來，就成了萬萬年。有時一個人犯錯，看起來bōe án怎，無啥物好講，但是伊ê殺傷力，soah ē-sái用來毀掉一個人ê前途。若咱ē-tàng施行小愛tī人間，相信chit-ê社會一定有大溫暖。所以古早人用：「M̄好因為善細soah m̄去做，m̄好因為惡細soah去做。」來警告咱。基督徒tī教會中對主日學ê扶持、青少年ê關懷，失敗者ê鼓勵，以及對牧師ê關心代禱，其實lóng是微小事工，但是影響真深遠。

B） 用疼kap耐心kap上帝同工
保羅bat勉勵以弗所教會ê信徒講：「Lín行事為人，lóng應該符合上帝呼召lín ê時所立ê標準。」基督徒ê信仰生活ài如何達到上帝ê標準？這是一個大課題。保羅講；「Lín ài謙卑、溫柔、忍耐、用疼心互相寬容。」（以弗所四：2）日文翻譯做「用疼來忍耐互相ê缺失」，確實chit種生活方式，用疼相對待，是基督徒生活上bē-tàng欠缺ê，若基督徒用疼做出發點，互相疼互相容忍，必定ē-tàng替主做美好ê見証。保羅向帖撒羅尼迦教會講：「願主引chhōa lín，hō͘ lín專心疼上帝，而且koh有基督所賜ê耐心。」（帖後三：5），當我想tio̍h chit-ê問題ê時，就會想起「拚性命活」冊中hit位日本長老用花kap祈禱改變了一位年青傳道者ê pháiⁿ習慣ê故事。會友kap牧師ê關係也thang看做kap上帝同工ê重要一環。我非常期待，每一位會友用疼kap忍耐去對待上帝ê僕人，mài有「牧師是教會所chhiàⁿ ê」心態，chhìn-chhái kā伊hoah來hoah去，無kā伊尊重。若有意見無仝，看法無一致ê時，ài忍耐加溝通。主耶穌講：「忍耐到底ê人，必得救。」（馬太廿四：13），chit句話ē-tàng講是基督徒處事成功ê秘訣。聖經上講：「患難生忍耐，忍耐生老練，老練生ǹg望，ǹg望bē致使見笑。」（羅馬：五：3～5）哥林多前書十三：4～7 mā講「忍耐是疼ê表現」，加拉太五：22「忍耐是聖靈ê果子」，tùi聖經中ê這幾位，咱koh-khah了解忍耐ê重要性，只有忍耐chiah會有完美理想ê人生，kap上帝同工chiah會有完善美好ê結局。

C） 用生活ê見証kap上帝同工。
有見証ê人生，chiah是上帝所喜樂ê，因為伊是kap上帝同工siōng好ê表現。見証本身to̍h是kap上帝同工，有見証表示伊ê品德行為受tio̍h肯定，無論是自我修養，家庭、khang-khè、社會公益ê參與lóng受tio̍h肯定kap o-ló，咱ài用現實ê生活表現出基督ê福音kap奧妙。無見証ê基督徒，ài kap上帝同工，恐驚只是破壞，lóng無建設thang講，m̄-nā bōe榮耀主，顛倒阻礙tio̍h教會ê成長kap復興。有一kóa會友通常khah注重心靈方面ê信仰，soah疏忽實際生活，比如家庭ê和諧、kiáⁿ兒ê親職教育、家己ê khang-khè表現kap社會ê人際關係等等，soah m̄知chiah-ê所在，lóng是非基督徒注視咱ê所在。In無jōa知影基督教ê教義內涵，in重視ê是基督徒實質ê表現。Kap上帝同工，最後ê目的就是beh傳福音，帶領未信ê人認bat chit位真神，hō͘ chiah-ê人成做上帝國ê子民。到底ài如何領人信主neh？方式雖然chē，但是siōng要緊ê一點to̍h是家己親身去實行，將聖經內底ê寶貴教示，tī生活中實踐，用美好ê見証領人歸主。長老會teh宣教一百週年ê時，bat做過問卷調查，tī一題如何領人歸主ê方法中，勾選ê項目有（1）舉辦佈道會（2）分發福音單張（3）鼓勵參與教會活動（4）hō͘ in經濟上ê幫助（5）職業傳道（6）基督徒生活上ê美好見証。結果前五項只佔8％～39％ê影響力。大部分信耶穌ê人，lóng是受tio̍h信徒實際生活良好表現ê影響，chiah決意加入教會。

講真正ê，一般人是無jōa了解教會ê組織狀況，mā無jōa清楚基督教教義，in決定信基督教，大部份lóng是受tio̍h信徒美好ê見証ê感召。因此，基督徒應該建立正確ê信仰價值觀，這是kap上帝同工ê先決條件，伊必須是一個形像好、品德高尚、氣質高雅、充分表現出內在涵養ê人，廣受歡迎，chiah有氣質去吸引人進入教會。

基督徒ài koh-khah 內外一致，bōe-sái kan-ta講外表體面好看，內心koh-khah ài有仁慈、疼心、散發出清芳ê氣味。Kap上帝同工siōng主要ê關鍵，是真gâu培育這欉帶有耶穌基督福音ê美麗花種，hō͘伊生長大漢，進一步koh開出清芳美麗ê花蕊。這是基督徒ê重大責任。

總講一句，基督徒mài辜負上帝ê恩典，ài phah拚去追求koh-khah有意義ê人生，實踐保羅教示咱ê功課。