《受恩蒙福的一生》

 | | | 轉寄

《受恩蒙福的一生》 楊啟壽牧師 序

作者 楊啟壽 2010.07.11

知影林宗要牧師teh-beh出版第二本講道集，感覺真歡喜，同時mā真佩服林牧師退休了後，猶原充滿旺盛ê鬥志kap毅力。

我有機會認bat林牧師是tī長老教總會工作了後ê事。當時tùi長期工作ê玉山神學院來到台北，無論tī工作上或生活上lóng遭遇bē少困難，感覺非常心力交瘁。林牧師tī hit時chūn出現tī我ê面前，成做到taⁿ難忘ê幫手。伊m̄-nā關心總會性ê事工，常常為事工ê需要慷慨捐助，伊mā關心總會同工ê生活kap福利，透過真chē場合kap方法來鼓勵並幫助。伊ê幫助並無hō͘人感覺有所負擔，但ē-tàng hō͘人用感謝喜樂ê心接受。

我tùi長老教會總會退休了後，koh接受林牧師ê邀請，tī伊當時牧會ê木柵門諾教會協助主日講道ê工作。Tī kap伊繼續ê交往中，koh-khah體會伊ê為人kap信仰有真chē hō͘阮後輩ê人值得學習ê所在。我總是認為好ê講道無tī活力動人ê言詞，mā m̄是講解深奧難了解ê哲理，卻是藉tio̍h一個人tī伊ê人生戰場上ê故事，宣揚上帝ê愛kap救恩。期待讀者透過林牧師ê信仰歷程kap長期不斷ê服事，聽tio̍h上帝tī今á日beh賜hō͘咱ê智慧、安慰kap鼓勵。

楊啟壽 2005年7月初