《受恩蒙福的一生》

 | | | 轉寄

獻身kap事奉

作者 林宗要 2011.01.09

羅馬書十二：1-2

人性是影響人ê一生，mā是形成社會文化ê因素。近來，咱時常感覺咱生存ê社會ê品質實在太差，尤其若用歐美先進國家ê水準來衡量台灣社會ê狀況，咱ê生活環境實在非常無符合人生存ê條件。

當然，咱早to̍h慣習活tī chit種環境中，咱有可能感覺iáu bē-bái，因為若tùi物質情形來看台灣ê社會，咱實在是處tī食好穿好ê富裕狀況中，因為無論是食ê iáu是穿ê，項項lóng ē-tàng滿足人心，有時甚至感覺咱ê生活過分thó-chè、無chhái，因為一桌二、三萬kho͘ ê菜tī台灣真普遍（差不多一千美金一桌菜！）若用亞洲地區阿富汗（150）、尼泊爾（170）、寮國（180）、越南（175）ê國民年平均所得（美金）來比較，台灣一桌ê菜錢，in ài付出5～6年ê所得。雖然，經濟成長造就了台灣ê富裕，同時伊mā為人心帶來負面ê作用。Chit幾年來ê台灣社會、自然生態暫時mài講，真chē社會現象實在值得擔憂：政治ê bē穩定、真chē情形hō͘人認為無公正、搶劫、綁票、愛博ê社會（hō͘外國人評為「kiáu國」，因為四界lóng the poah，比如過去ê大家樂、六合彩、股市等），實在是非常驚人。尤其近年來台灣人ê價值觀念改變，kap過去ê骨力、勤儉完全無仝。尤其是勞工方面，一天thàn三、五千kho͘ 是平常ê tāi-chì，好親像一堆沙仔擔去lih四樓，koh再tùi四樓擔一kóa廢物落來，khang-khè時間tùi九點半到十二點半，工資ài四千kho͘。為啥物勞工會hiah-ni̍h貴？主因tī無人beh做，假使勞工市場人真chē，大概to̍h bē án-ne。為何人無愛做粗工？原因tī hiah-ê人歡喜輕鬆而且待遇好ê khang-khè，尤其是一、二年前台灣ê股市，只要二、三支漲停，就贏過二個月ê收入，chit種價值觀對台灣社會ê人心、經濟成長lóng無正面ê作用（比如江南案二ê主角出獄，有人竟然用英雄來歡迎in！），同時伊mā影響tio̍h台灣社會各種無仝ê生活方式，因為明知人生價值觀ê建立是影響伊人生ê kui-ê事實，價值取向對tī人性ê影響mā真大，而且人性受罪所束縛、是有罪ê人性，有罪ê人性通常lóng有負面ê影響，咱ê社會現象所表現出來ê to̍h是人性ê描寫，因為社會to̍h是tùi咱chiah-ê人所組成ê集合。

Tī-chia，充滿tio̍h自私、自利，只求家己好處，m̄管別人死活，chit種自私ê人性是siōng標準ê人性ê表現，現代án-ne，過去mā仝款！

咱看tio̍h聖經teh描寫耶穌ê門徒爭論siáng siōng大，若照路加福音記ê，是發生tī耶穌kap學生最後ê暗頓，tī約翰福音ê記載，暗頓ê時，耶穌以身作則，告誡學生ài學習事奉人，成做人ê奴僕（約翰十三章）。Tī-chia，咱thang看出，chiah-ê無完全、軟弱ê學生，至少（1）In ài ē記耶穌ê教示，因為耶穌時常kā學生講：人子來是beh事奉人，甚至獻伊ê身軀來贖人ê罪，因為主耶穌所傳講ê福音是事奉ê福音。（2）咱tī-chia mā看出學生爭論ê時間m̄-tio̍h，in實在無了解耶穌基督，假使in了解耶穌所beh面對ê十字架，大概就無心互相爭siáng siōng大，tī-chia咱mā看tio̍h學生ê無知kap bōe-tàng深刻了解耶穌ê狀況。

Tī-chia，咱ē-tàng看出學生中自私ê人性，chit款tāi-chì完全影響tio̍h歷代ê教會歷史，tī kui-ê基督教歷史中，咱發現教會不斷有人性ê軟弱hit面（無完全、軟弱ê教會），部分教會khah無chit種紛爭結黨ê行為，但是有一kóa教會soah時常有，有時所表現--ê會影響tio̍h初信者ê信仰，因為in信仰iáu未堅固，會因為教會chiah-ê負面ê行為來跋倒、離開教會，甚至失去信仰，當然，教會若無chiah-ê吵吵鬧鬧ê tāi-chì to̍h khah ē-tàng榮耀上帝，但是咱必須理解教會是tùi軟弱無完全ê人聚集ê所在，難免會有一kóa軟弱無完全ê表現，chit-ê事實同時mā kā教會ê領導者、牧師、長執或者個機構ê負責人講，必須ài用嚴謹ê心態去經營教會，chiah ē-tàng帶領chit陣軟弱無完全ê人，成做榮神益人ê團契，這chiah是咱教會存在ê使命。

因為上帝交託咱每一個教會（或者基督徒）去完成歷史ê使命，基督徒tī教會生活中受召、受託，基督徒本身ài深深了解，這m̄是職位ê提昇，是責任ê加重！咱若ē-tàng謹守chit-ê原則，就ē-tàng成做榮耀上帝ê門徒！為tio̍h beh完成受託ê使命，基督徒（教會）必須深深了解，比如保羅或者主耶穌ê教示－付出。

只有歡喜、肯付出ê事奉，必定會hō͘人生koh-khah完美豐盛，chit種完美koh豐盛ê人生是咱ê主向人所希求ê性命內容！基督徒必須ài自覺，ài不斷來充實受恩ê生活，hō͘咱ê性命bōe辜負性命ê主，這是基督徒ê人生觀。

（一） 主所喜樂ê事奉是建立teh疼ê基礎頂koân
咱lóng了解teh事奉中，siōng重要ê是心ê預備，台語講「心已經便」，因為無心ê人確實無事奉thang講，事奉是多多付出，付出是beh犧牲、消磨家己，to̍h是對家己不利，這是事奉ê特性，因此kap自私ê人性無符合，所以事奉tī社會中是一件艱難ê khang-khè，咱社會所表揚ê好人好事，通常是因為chiah-ê人願意事奉人，肯付出家己一切來幫助人。確實，人若ē-tàng建立用疼心為基礎ê事奉，伊所付出ê事奉，必定會有決定性ê效果。創世記廿九章記載，雅各為tio̍h疼拉結，tī伊丈人tau做十四年長工，「雅各就為拉結服事了七年，伊因為深疼拉結，就看chit七年ná親像幾工，」（創世記廿九：20），為何雅各tī-che七年久ê事奉，不過看做ná親像幾工？關鍵tī伊深疼tio̍h拉結！雖然雅各tī-chia所表現ê疼是情愛，但是mā thang看出一個事實，to̍h是用疼做出發點ê事奉，就bē有負擔，無負擔ê事奉，to̍h是疼！

基督徒ê事奉，若beh蒙主悅納，siōng根本ê問題是確立tī以疼做基礎ê事奉，tú親像保羅tī哥林多前書十三章：講疼ê狀況，無疼ê基礎，一切ê作為lóng是無chhái工、無價值。基督徒一切事奉作為必須用疼做基礎，若無to̍h ná親像保羅講ê：「我若將所有ê賙濟sàn-chhiah人，koh犧牲己身hō͘人燒，soah無愛，猶原tùi我無幫助。」（林前十三：3）。因此信徒事奉ê動機非常重要，只要有純真正動機，咱ê事奉必定成做主所喜樂。咱也thang tùi路加十五章29結hit位長子向老父所提出「討人情」ê作為，看出chit位長子對老父事奉ê內容，已經失去價值，因為有價值ê事奉是完全ê疼、m̄看重回報ê事奉，chit種疼ài ē-tàng不斷成長（繼續決定ê疼），chiah ē-tàng達成目標，ná親像翁仔bó͘ tī上帝面前誓約，每一個人lóng用肯定ê態度回應對方，但是婚姻ê路上soah充滿tio̍h極大ê變數（婚姻ê完美ài有繼續成長ê疼），án-ne咱thang看出人ê無完全kap軟chiáⁿ hit面，無論任何hông看做偉大ê人物（比如摩西、大衛、以利亞ê灰心），lóng會有無完全ê所在，若beh突破人性ê軟弱面，人生必須ài不斷繼續成長ê生活，chiah ē-tàng hō͘咱ê疼成做完全，只有chit種更新ê疼ê繼續chiah ē-tàng建立完美ê人生現象，同時tùi chia所出ê事奉自然有偉大ê作為，因為伊ê動機是真愛，所事奉ê是絕對、無條件ê付出，這to̍h是聖經中上帝所喜樂ê獻祭，信徒ài有chit種體驗！

（二） 主所喜樂ê事奉是建立teh順服ê生活
Tī基督徒信仰中，疼是信仰生活ê一部分，因為有信仰ê人，的確是疼上帝，會疼ê人！這是聖經ê要求，因為一位人bōe-sái疼神疼人ê基督徒， bōe-sái算做有信仰ê內容。所以主所喜樂ê事奉是用疼做基礎ê事奉，無愛心做基礎ê事奉，往往會發生偏差！甚至有一kóa無正確ê表達觀念。現在咱進一步來思考疼ê本質是啥物？

比如一位疼上帝ê人，伊必須ài表現出有順服上帝ê生活，因為chit種順服上帝ê生活是信仰者表達信仰ê一項實在ê內容。一個人beh如何證明伊kap上帝之間ê信仰？咱thang用順服或者聽從來形容伊，一個bōe-sái服從、聽從上帝ê基督徒，是無法度hō͘人認為有信仰ê，因為疼上帝ê功課，是建立tī人對上帝ê話順從，咱tùi創世記三章人類受引誘ê狀況來看，三章16～17上帝命令人ài執守，上帝講園中各樣樹頂ê果子，你ē-tàng隨意食，只是分別善惡樹頂ê果子，你bē-tàng食，因為你食ê日子一定會死。只要聽從上帝ê命令，必定有安樂ê日子，但是tī第三章：人soah hō͘惡來勝利，m̄聽從上帝ê話，違背了上帝ê命令，結果成做hō͘上帝棄絕ê人，這m̄是上帝所喜樂ê人生。咱koh再看撒母耳記上十五章，chit段聖經是記載以色列首任國王掃羅生死ê問題，先知命令掃羅王若是先到ài先等先知來，m̄-koh掃羅無聽從上帝ê命令，自作主張（1）對亞瑪力ê寬容。（2）自作主張獻祭hō͘上帝。Tī舊約中獻祭m̄是王ê khang-khè，是祭司，伊認為án-ne是the替上帝做tāi-chì，是teh事奉上帝，但是tī上帝眼中，伊是無聽從上帝ê話。Tī信仰ê世界，信仰者kap信仰ê對象之間，若無建立順從ê關係，信仰是bōe發生效用！因為tī上帝眼中，信仰ê重要性是teh聽從！當掃羅向撒母耳辯解伊ê作為ê時，撒母耳soah向伊講：「耶和華喜樂燔祭和平安祭，kám比ē過喜樂人聽從伊ê話neh？聽命勝過獻祭、順從勝過公羊ê油。」（撒母耳記上十五：22）

Tī-chia咱看tio̍h一個信仰ê真實內容，伊是建立tī信仰者對信仰ê主ê順從、聽從，因為tī上帝眼中，無順從ê信仰是無價值、無內容。基督徒ê信仰生活to̍h是事奉ê生活，咱若beh有美好ê信仰生活（ē記leh！基督徒ê信仰生活是不斷運行tī美好、理想ê事實內底！）因為伊是主所喜樂ê，一定bē-tàng疏忽基督徒事奉ê實在，因為事奉通常是表達信仰siōng基本、又koh是siōng積極--ê，teh事奉中，基督徒ài學習聽從、順服！

耶穌基督絕對順服天父旨意，是人類得救ê應允！基督徒是承接這拯救ê應允者！

（三） 信仰ê完成ê事奉（事奉是基督徒信仰ê完成）
一位具備真誠ê信仰者，伊ê信仰生活中必定是充滿tio̍h主所喜樂ê事奉生涯，咱ē-tàng tùi信仰者偉大ê事奉生涯來肯定in ê信仰，所以主所喜樂ê事奉是基督徒信仰ê完成。聖經中hiah-ê做美好ê事奉者，lóng kā in美好ê信仰留落來（印證了）tī人間，舊約中ê約瑟，新約中ê保羅等，咱ē-tàng tùi in事奉ê生涯看in信仰ê結果，尤其保羅tī年老ê時寫hō͘所疼ê提摩太ê批中，咱看tio̍h伊所強調ê，伊苦勸少年ê提摩太ài忠誠事奉主，用忍耐ê精神kap專心ê態度來事奉主kap祂ê教會，用有技巧ê方法，好好á引chhōa教會，mài因為家己少年soah hō͘人看輕，用謹慎ê心，盡本分去完成上帝所交託ê事工。

最後保羅告白講：「那美好ê戰我已經phah過了，當行ê路我已經走盡啊，所信ê道我已經守tiâu啊，tùi-án-ni了後，有公義ê冠冕我存留，to̍h是照tio̍h公義審判ê主到了hit日beh賜hō͘我--ê，m̄-nā賜hō͘我，mā賜hō͘只要疼慕祂顯現ê人。」（提摩太後書四章4～7）

Tī-chit段聖經，咱了解保羅肯定伊ê人生，尤其對主所託付ê教會ê事奉，伊實在盡siōng大ê本份，因此伊真相信有榮耀ê冠冕當teh等待伊。Chit種絕對自信ê信仰實在是咱信仰ê模範！基督徒必須ài有chit種信仰ê把握kap堅持。同時咱tùi保羅ê告白，mā ē-tàng看出保羅一生ê事奉kap伊信仰ê完成是一致ê，mā to̍h是咱tī-chia beh強調ê：主所喜樂ê事奉是信仰ê完成。

基督徒ê人生中，siōng大ê期待to̍h是信仰ê完全，ná親像保羅tī-chia ê告白：「Tùi-án-ni了後，有公義ê冠冕為我存留」，假使當咱khiā-tī審判ê主面前， bōe-sái體會這一ê事實ê時，咱ê信仰to̍h是落空了。

Ē記leh！有時tī主面前，咱mā會聽tio̍h主講：「我從來m̄-bat你，lín chiah-ê作惡ê人，離開我去pah。」（太七：23）聽見chiah-ê話ê基督徒iáu自信in是奉耶穌ê命令傳道，奉耶穌ê名做任何tāi-chì，可見in hō͘主所拒絕是因為in所做ê m̄是主所歡喜ê！

基督徒必須ài謹慎來經營受託ê人生，tī咱事奉主ê生涯中，必須ài會記leh，一定若是主所喜樂ê！

當咱省思學生為tio̍h beh爭取第一位ê紛爭以及耶穌教導ê重心，用保羅tī羅馬書十二章1～2節「所以兄弟啊，我以上帝ê慈悲勸lín，將身軀獻上，當作活祭，是聖潔ê，是上帝所喜樂ê，lín án-ne事奉，是理所當然ê。Mài效法chit-ê世界，只要心意更新來變化，叫lín察驗為何上帝ê善良、純全thang喜樂ê旨意。」作咱信仰ê經營重點，hō͘咱ê事奉，成做主所喜樂，這chiah是有價值ê信心！